¶ 1 BEA koe kau mātua koe tamai ae gaahi faahiga oe fānau a Kiliati koe foha o Mekili koe foha ia o Manase, oe gaahi faahiga oe fānau a Josefa, naa nau unuunu mai o nau lea i he ao o Mosese, moe ao oe houeiki, koe kau mātua tuu ki mu‘a i he fānau a Isileli:

2 Bea naa nau behe, Nae fekau e Jihova ki he eku eiki ke foaki ae fonua i he talotalo, koe tofia ki he fānau a Isileli: bea nae fekau e Jihova ki he eku eiki ke foaki ae tofia o Silofitati ko no mau tokoua ki hono gaahi ofefine.

3 Bea kabau te nau unoho moe niihi i he gaahi foha oe gaahi faahiga oe fānau a Isileli, e toki to ai ho nau tofia mei he tofia oe mau gaahi tamai, bea e tuku ia ki he tofia oe faahiga aia kuo nau alu ki ai: bea e mole behe ia mei he talotalo o ho mau tofia.

4 Bea oka hoko ae jiubeli oe fānau a Isileli, e lau ai ho nau tofia ki he tofia oe faahiga aia kuo nau ma‘u akinautolu: bea e mole behe a ho nau tofia mei he tofia oe faahiga oe mau gaahi tamai.

5 Bea nae fekau e Mosese ki he fānau a Isileli o fakatatau ki he folofola a Jihova, o ne behe, Kuo lea totonu ae faahiga oe gaahi foha o Josefa.

6 Koe mea eni kuo fekau e Jihova koeuhi koe gaahi ofefine o Silofitati, o behe, Tuku akinautolu ke nau fakamau mo kinautolu oku nau manako ki ai; ka te nau fakamau i he fānau oe faahiga be oe nau gaahi tamai.

7 Bea koia e ikai hiki ai ae tofia oe fānau a Isileli mei ha faahiga ki ha faahiga: ka te nau taki taha bikitai ki he tofia oe faahiga o ene gaahi tamai.

8 Bea koe ofefine kotoabe, oku ne ma‘u ha tofia i ha faahiga oe fānau a Isileli, e hoko ia koe unoho o ha toko taha i he fānau oe faahiga o ene tamai, koeuhi ke ma‘u e he fānau a Isileli e he tagata taki taha ae tofia o ene gaahi tamai.

9 Kae oua e hiki ae tofia mei ha faahiga e taha ki ha faahiga kehe; kae taki taha bikitai ae faahiga oe fānau a Isileli ki hono tofia oona.

10 O hage koia nae fekau e Jihova kia Mosese, nae fai behe ae gaahi ofefine o Silofitati:

11 He nae fakamau a Mala, mo Tilisa, mo Hokila, mo Milika, mo Noa, koe gaahi ofefine o Silofitati, moe gaahi foha oe tokoua oe nau tamai:

12 Bea naa nau fakamau ki he gaahi fānau oe gaahi foha o Manase koe foha o Josefa, bea nae ma‘u ho nau tofia i he faahiga oe fānau oe nau tamai.

13 Koe gaahi fekau eni moe gaahi fono, aia nae fekau e Jihova i he nima o Mosese ki he fānau a Isileli i he gaahi botu tafagafaga o Moabe oku ofi ki Joatani,  bea ofi ki Jeliko.