Lub Hauv Paus Ruaj Khov

Thaum lub Kaum Hli Ntuj hnub tim 17, 1989, kuv tab tom tsav tsheb los ntawm hauj lwm los, kuv los txog lub teeb liab ntawm qhov chaw uas txoj Market thiab Beale sib tshuam hauv San Francisco, California. Thaum ntawd nas has kuv hnov lub tsheb co co thiab tau xav twj ywm hais tias, “Tej zaum kuv ib lub log tawg lawm.” Thaum uas lub tsheb pheej co co, kuv txawm saib lub tsheb npav nyob ze kuv lawm ces tau xav tias, “Lub tsheb npav ntawd tsoo kuv lawm lauj!” Lub tsheb haj yam co co xwb, thiab kuv txawm xav tias, “Tej zaum kuv plaub lub log tib si tawg lawm lauj!” Tiam sis tsis yog tim cov log tawg tas los sis lub tsheb npav—twb yog av qeeg loj heev! Thaum kuv nres ntawm teeb liab, kuv pom tias txoj kev Market ntawd twb tawg rhe tas. Nyob tom kuv hauv ntej ib lub tsev siab siab tab tom ua viav vias, thiab cov thwv cib pib poob ntawm ib lub tsev qub qub uas nyob ntawm kuv sab laug vim lub ntiaj teb pheej muaj qhov av qeeg loj loj ntawd.

Qhov av qeeg hauv Loma Prieta raug thaj tsam ib ncig lub nroog San Francisco thaum 5:04 moos tsaus ntuj thiab muaj li 12,000 uas txawm tsis muaj tsev nyob lawm.

Qhov av qeeg ntawd ua rau tej chaw ib ncig San Francisco puas loj kawg, qhov uas raug puas tsuaj ntau tshaj yog tej av uas tsis khov hauv San Francisco thiab Oakland. Hauv San Francisco, Qhov Chaw hu ua Marina twb raug muab “txhim tsa rau saum ib qho chaw uas thaum ub yog chaw muab khib nyiab pov tseg thiab lawv muab av suab zeb, av thiab khoom liam sij, … thiab lwm yam khoom uas muaj dej ntau tso rau hauv. Ib txhia yam khoom liam sij no lawv twb tso rau hauv tom qab muaj qhov av qeeg hauv San Francisco puag thaum xyoo 1906.”¹

Ze li xyoo 1915, lawv tau ua tej tsev kem loj loj rau saum qhov chaw pov khib nyiab ntawd. Hauv qhov av qeeg thaum xyoo 1989, cov av uas muaj dej ntau tau ua av nkos, xuab zeb thiab khib nyiab ces thaj av ntawd zoo nkaus li kua nplaum xwb, ces tej tsev ntawd tau vau kiag. Tej tsev ntawd yeej tsis nyob rau saum ib lub hauv paus uas ruaj thiab khov.

Qhov av qeeg hauv Loma Prieta tau hloov coob tug neeg lub neej, yeej tau pauv kuv lub neej thiab. Thaum muab tej yam xwm uas kawj hnub ntawd xav mus xav los kuv kawm paub yog tias peb yuav tiv tau tej kev cua daj cua dub, kev av qeeg, thiab tej kev kub ntxhov hauv lub neej no, peb yuav tsum nyob rau saum ib lub hauv paus uas ruaj khov.

Cov neeg Nifais tus yaj saub Hilamas piav meej meej hais tias qhov uas peb tsa peb lub neej saum ib lub hauv paus uas ruaj khov tseem ceeb npaum li cas, lub hauv paus ntawd twb yog Yexus Khetos nws hais tias: “Thiab nim no, kuv cov me tub es, nco ntsoov, nco ntsoov tias twb yog nyob rau saum lub pob zeb peb tus Txhiv Dim, tus uas yog Khetos, Vajtswv Leej Tub, uas neb yuav tsum cog neb qhov chaw cuab zog; xwv kom thaum tus dab yuav xa nws tej cua muaj zog, muaj tseeb tiag, nws tej xub nyob hauv tej cua moj lwg kaw, muaj tseeb tiag, thaum tag nrho nws tej lawg thiab nws tej cua daj cua dub uas muaj zog yuav los raug neb, tej ntawd yuav tsis muaj hwj chim kov yeej neb kom luag tau neb nqis mus rau tus kwj tob tob ntawm txoj kev nyuaj siab thiab txom nyem uas tsis muaj qhov kawg, vim yog lub pob zeb uas neb tau cog rau saud, uas yog qhov chaw cuab zog ruaj, ib qhov chaw cuab zog uas yog neeg cog rau saud lawm yuav vau tsis tau” (Hilamas 5:12).

Niaj hnub no thaum peb ua cov tuam tsev, peb ua tib zoo ntaus tswv yim seb yuav ua lub tsev zoo li cas, yuav tsa rau qhov twg thiab siv cov khoom dab tsi. Lawv ua tib zoo xyuas cov av thiab thaj av sab hauv qhov chaw uas yuav txhim tsa lub tuam tsev ntawd. Lawv kawm txog cov cua, kev los nag, thiab huab cua pauv li cas xwv kom lub tuam tsev yuav tiv tau tej kev cua daj cua dub thiab huab cua hauv thaj chaw ntawd, tiam sis yeej ua kom lub tuam tsev yuav tiv tau tej qhov av qeeg, tej nthwv dej loj heev, dej nyab, thiab lwm yam teeb meem ntawm huab cua uas tej zaum yuav muaj thiab. Hauv ntau lub tuam tsev, lawv tso ximees (cement) los sis tej pas hlau mus tob rau hauv ntiaj teb uas pab lub hauv paus tsev haj yam ruaj khov rau lub tuam tsev.

Zoo li cov neeg uas ntaus cov tswv yim thiab ua tej tsev no, peb Leej Txiv Saum Ntuj Ceeb Tsheej thiab Nws Tib Leeg Tub uas hlub peb thiab ua siab dawb paug tau ntaus ib co tswv yim, npaj cuab yeej, thiab lwm yam khoom rau peb siv kom peb thiaj ua thiab kho tau peb lub neej kom nyob ruaj thiab khov. Txoj hau kev ntawd yog txoj kev cawm dim, yog txoj kev zoo siab. Txoj hau kev ntawd piav meej meej thiab pab peb to taub qhov pib thiab qhov kawg tib si, thiab yuav tsum nce tej theem twg, nov kuj hais txog tej kab ke, uas Leej Txiv txhua tus me nyuam yuav tsum ua kom lawv thiaj muaj cai rov qav mus nrog Nws nyob dua thiab nyob tau nrog Nws tas mus ib txhis li.

Kev ntseeg, kev hloov siab lees txim, kev cai raus dej, lub txiaj ntsim ntawm tus Vaj Ntsuj Plig Dawb Huv, thiab kev nyiaj mus txog thaum kawg yog tej “tswv yim zoo” rau lub neej no. Tej no ua lub hauv paus tsev uas muab peb lub neej cog ruaj nrees rau ntawm Yexus Khetos txoj Kev Theej Txhoj. Tej no pab kho tib neeg lub neej. Ces ib yam li tej tswv yim ua lub tuam tsev uas qhia seb yuav ua thiab muab txhua yam sib txuas li cas, kev thov Vajtswv, kev nyeem vaj lug kub, kev noj lub cim nco txog, thiab txais tej kab ke ntawm lub pov thawj hwj uas tseem ceeb thiaj li rais los ua “tej yam” uas pab kho thiab muab peb lub neej khi ua ke.

Txoj kev ua tib zoo ua kom txhua yam muaj kab muaj kev yeej tseem ceeb thiab. Piv xam hais tias, thaum tab tom muab ximees do ua ke, yuav tsum ua tib zoo ntsuas seb yuav nchuav suab zeb, pob zeb, thiab dej npaum li cas hauv kom cov ximees ntawd thiaj khov. Yog tias tsis ua tib zoo tso ib yam khoom los sis tsis ntxiv yam no rau hauv ces cov ximees yuav tsis khov thiab yuav ua tsis taus cov ximees zoo.

Ib yam li ntawd, yog tias peb tsis ua tib zoo kho peb lub neej kom txhua yam muaj kab muaj kev es niaj hnub thov Vajtswv thiab nyeem cov vaj lug kub, txhua lim piam noj lub cim nco txog, thiab koom lub pov thawj hwj tej kab ke ntau zoo li mus ua tej kab ke hauv lub tuam tsev, ces peb yeej muaj feem hais tias peb sab ntsuj plig yuav pib qaug zog.

Pov Lauj, hauv tsab ntawv uas nws sau rau cov neeg Efexaus, hais li no, uas pab peb to taub tias txhua yam yuav tsum nyob sib txig thiab ua tib zoo kho peb tus cwj pwm thiab tus ntsuj plig hais tias: “Yexus yog tus uas txheem lub tsev ntawd kom khov, thiab ua kom tiav, thiaj li tau ib lub tuam tsev uas zoo kawg nkaus rau Vajtswv nyob” (Efexaus 2:21).

Kev thov Vajtswv yog lub hauv paus tseem ceeb tshaj plaws rau peb txoj kev ntseeg thiab tus cwj pwm. Dhau ntawm kev thov Vajtswv peb muaj cuab kav qhia peb txoj kev ris txiaj, kev hlub, thiab kev hwm rau Vajtswv. Dhau ntawm kev thov Vajtswv peb thiaj muaj cuab kav ua raws li Nws lub siab nyiam thiab tau kev pab kho peb lub neej kom ua raws li Nws qhia. Kev thov Vajtswv yog qhov uas pab peb nrhiav kom tau Nws txoj kev pab hauv peb lub neej, thiab tau kev tshwm sim.

Amas qhia tias: “Sab laj nrog tus Tswv nyob rau hauv txhua yam uas koj ua, thiab nws yuav coj koj mus rau qhov zoo; muaj tseeb tiag, thaum koj qhau cev pw hmo ntuj cia li qhau cev rau tus Tswv, xwv kom nws yuav tsom kwm koj thaum koj tsaug zog; thiab thaum koj sawv thaum sawv ntxov cia koj lub siab puv npo kev ua tsaug rau Vajtswv; thiab yog koj yuav ua tej yam no, koj yuav raug tsa sawv nyob rau hauv hnub kawg” (Amas 37:37).

Txoj kev qhia Vajtswv txog peb tej kev xav thiab tej yam uas peb xav tau thiab mob siab thov Vajtswv yuav tsum tseem ceeb thiab yooj yim ua npaum li qhov uas peb ua pa thiab noj mov.

Qhov uas peb niaj hnub tshawb nrhiav cov vaj lug kub yuav ntxiv zog rau peb txoj kev ntseeg thiab peb tus cwj pwm. Ib yam li peb xav tau zaub mov tu peb sab cev nqaij daim tawv, peb tus ntsuj plig yuav tau dag tau zog thaum peb rau siab nrhiav Yexus Khetos cov lus raws li cov yaj saub muab sau tseg lawm. Nifais qhias tias, “Cia li noj Khetos tej lus; vim saib seb, Khetos tej lus yuav qhia nej txhua txhia yam tsav uas nej yuav tsum ua” (2 Nifais 32:3).

Txoj kev nyeem cov vaj lug kub yeej zoo, tiam sis kev nyeem cov lus ntawd xwb tsis pab peb to taub tag nrho tus Cawm Seej tej lus qhia. Txoj kev tshawb nrhiav, xav mus xav los, thiab muab Yexus Khetos cov lus qhia yuav ua rau peb ua neeg txawj ntse thiab paub zoo dua tib neeg qhov peev xwm. Qhov ntawd yuav pab peb rau siab ntso thiab peb sab ntsuj plig yuav muaj zog txaus peb thiaj ua tau zoo txhua zaus.

Ib qho tseem ceeb uas yuav ntxiv zog rau peb lub neej thiab pab peb nyob ruaj khov ntawm tus Cawm Seej lub hauv paus yog kom ua neeg tsim nyog noj lub cim nco txog txhua txhua lub lim piam. Txoj kab ke noj lub cim nco txog cia txhua tus mej zeej hauv lub Koom Txoos muaj cib fim xav txog lawv lub neej, sim xav txog tej yam lawv tau ua lawm los sis tej yam uas tsis tau ua uas lawv yuav tsum hloov siab lees txim rau, ces txawm noj daim khob cij thiab haus cov dej es nco txog Yexus Khetos lub cev thiab cov ntshav, uas yog ib qho tim khawv txog Nws txoj Kev Theej Txhoj. Yog tias peb ua ncaj ncees thaib txo hwj chim, peb rov qab khi tej lus tseg tas mus ib txhis, raug ntxuav thiab ua kom dawb huv, thiab tau lo lus cog tseg hais tias peb yuav muaj Nws tus Ntsuj Plig nrog peb nyob tas mus li. Tus Ntsuj Plig muaj ntsis zoo li cov ximees, yog qhov uas muab sib txuas ua ke tiam sis tsis yog ua kom dawb huv xwb tiam sis ua rau peb nco txog thiab pheej ua tim khawv txog Yexus Khetos. Qhov uas yus ua neeg tsim nyog thaum noj lub cim nco txog haj yam pab peb nyob rau ntawm lub hauv paus uas ruaj khov, uas yog Yexus Khetos.

Thaum tus Cawm Seej tseem ua neej nyob Nws muaj kev hlub thiab kev tshua thaum qhia tej lus qhuab qhia, tej ntsiab cai, thiab tau ua tej yam uas yuav ceev peb txoj sia thiab ntxiv zog rau peb tus cwj pwm. Thaum nws qhia neeg Saum Roob, Nws hais tias:

“Yog li ntawd, tus uas hnov kuv tej lus hais no thiab ua li lawv, kuv yuav muab nws piv rau ib tug neeg muaj tswv yim, uas tau ua nws lub tsev rau saum ib lub pob zeb—

“Thiab thaum nag los, thiab tej dej los nyab, thiab tej cua tshuab, thiab nplawm rau lub tsev ntawd; thiab nws tsis vau, vim nws tau cog rau saum lub pob zeb.

“Tus uas hnov kuv tej lus, tiam sis tsis ua raws li tej lus ntawd, tus ntawd zoo ib yam li tus uas tsis muaj tswv yim, nws ua nws lub tsev rau saum cov suab zeb—

“Thaum los nag xob nag cua, dej nyab thiab cua ntsawj lub tsev ntawd, ces lub tsev ntawd txawm vau thiab puas tsuaj tas huv tib si lawm” (3 Nifais 14:24–27; thiab saib Mathais 7:24–27).

Cov kwv tij thiab cov muam, peb leej twg los yuav tsis ua peb lub tsev, peb lub tsev hauj lwm, los sis tej tsev teev ntuj rau saum cov suab zeb los sis khib nyiab los sis yog tias tsis tau ua tib zoo npaj tswv yim thiab tej yam khoom zoo. Cia peb ua raws li tus Cawm Seej txoj kev caw kom los nrog Nws mus. Cia peb tsa peb lub neej nyob rau saum ib lub hauv paus uas ruaj khov thiab muaj kev puaj phais.

Kuv txo hwj chim hais lus tim khawv tias thaum peb khi peb lub neej rau ntawm Yexus Khetos thiab Nws txoj Kev Theej Txhoj thiab ua tib zoo ua raws li Nws tej tswv yim uas ua kom peb zoo siab, nov hais tias niaj hnub thov Vajtswv, niaj hnub kawm vaj lug kub, thiab txhua lub lim piam noj lub cim nco txog, ces peb yuav tau dag tau zog, peb thiaj yuav npaj siab tiv tej kev cua daj cua dub thiab lwm yam teeb meem hauv lub neej no, peb yuav tau kev zoo siab thiab kev xyiv fab uas tau cog lus tseg lawm, thiab peb yuav paub tseeb hais tias peb tau tsa peb lub neej rau saum ib lub hauv paus uas ruaj khov---ib lub hauv paus uas vau tsis taus. Los ntawm Yexus Khetos lub npe dawb ceev, amees.