Peb Sib Koom Siab

Tus Tswv piav meej meej txij thaum pib lub caij nyoog kawg tias peb yuav tsum coj txoj moo zoo mus rau hauv tag nrho lub ntiaj teb. Qhov uas Nws hais rau ob peb tug neeg uas tuav lub pov thawj hwj thaum xyoo 1831 los tam sim no Nws hais rau coob leej. Txawm peb muaj hnub nyoog, los yog peev xwm li cas, ua hauj lwm dab tsi hauv lub Koom Txoos, los sis nyob qhov twg, peb sib koom siab raug hu los pab ua hauj lwm rau Nws thiab pab saib xyuas Nws cov me nyuam mus txog thaum Nws rov qab los. Nws hais rau thawj cov tub zog hauv lub vaj txiv hmab hais tias:

“Thiab ntxiv, kuv hais rau nej tias, kuv muab ib lo lus txib rau koj, tias txhua tus txiv neej, tsis hais tus txwj laug, los yog pov thawj, los yog xib hwb, thiab txhua tus mej zeej los xij, yuav tsum ua siab loj, tawm mus ua hauj lwm, pab npaj thiab ua txhua yam uas kuv txib kom ua.

“Thiab cia kom nej tej lus qhuab qhia ua ib lub suab uas ceeb toom, txhua tus txiv neej ceeb toom nws tus neeg zej zog, ua siab mos siab muag.

“Thiab nej yuav tau tawm ntawm cov neeg siab phem mus. Cawm nej tus kheej. Nej cov uas yog tus Tswv cov tub qhev yuav tsum ua neeg dawb huv.”¹

Nim no, nej cov uas tuav lub Pov Thawj Hwj Aloos pom tias tus Tswv txoj lus txib no kuj hais rau nej thiab. Vim nej paub tias tus Tswv ib txwm npaj kev rau nej tau ceev Nws cov lus txib, ces nej yuav tsum paub tias Nws yuav ua li ntawd rau nej txhua tus thiab.

Cia kuv qhia nej tias Nws tau ua li cas pab ib tug tub hluas uas tas sim no ua ib tug pov thawj hauv lub Pov Thawj Hwj Aloos. Nws muaj 16 xyoos. Nws nyob hauv ib lub teb chaws uas nyuam qhuav tos txais cov tub txib li ib xyoos tas los lawm xwb. Lawv mus nyob hauv ob lub nroog tiam sis tsis yog hauv lub nroog uas tus tub hluas no nyob.

Thaum nws hluas heev, nws niam txiv coj nws los nyob hauv Utah kom nws yuav puaj phais. Cov tub txib tau qhia yim neeg ntawd thiab lawv tau ua kev cai raus dej. Nws tsis tau ua kev cai raus dej hauv lub Koom Txoos vim thaum ntawd nws tsis tau muaj yim xyoo.

Ces txawm muaj xwm txheej ceev es nws niam txiv tau tuag. Nws pog tau coj nws rov qab mus nyob hauv nws lub qub teb chaws, hla dej hiav txwv, rov qab mus nyob hauv lub nroog uas nws yug los hauv.

Thaum lub Peb Hlis Ntuj xyoo tas los no nws tab tom taug kev ces nws tau kev tshoov siab kom mus nrog ib tug poj niam uas nws tsis paub sib tham. Nws nrog nws tham hais cov lus As Kiv uas nws tseem nco tau. Tus poj niam yog ib tug nais maum uas qhov chaw tshaj tawm txoj moo zoo tus thawj tswj hwm xa tuaj rau nws lub nroog los nrhiav tsev nyob thiab kev kho mob rau cov tub txib uas tsis ntev yuav los nyob ntawd. Nws thiab tus poj niam tau pib ua phooj ywg thaum nkawd sib tham ntawd. Thaum tus poj niam rov los txog qhov chaw tshaj tawm txoj moo zoo lub tsev, nws qhia ob tug tub txib txog tus tub hluas no.

Thawj ob tug txwj laug tau tuaj txog thaum lub Cuaj Hlis Ntuj xyoo 2012. Tus tub ntsuag nos no yog thawj tus neeg uas nkawd muab ua kev cai raus dej los rau hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Thaum txog lub Peb Hlis Ntuj xyoo no ces nws twb ua ib tug mej zeej tau plaub lub hlis lawm. Nws raug tsa los ua ib tug pov thawj hauv lub Pov Thawj Hwj Aloos ces nws muab tau tus neeg thib ob uas los ntseeg lub Koom Txoos ua kev cai raus dej thiab. Nws yog thawj tug uas tuav lub pov thawj hwj uas tau pib sau Leej Txiv Saum Ntuj Ceeb Tsheej cov me nyuam los ua ke pab txhim tsa lub Koom Txoos hauv ib lub nroog uas muaj coob npaum li 130,000 leej.

Thaum hnub Caiv Easter, lub Peb Hlis Ntuj hnub tim 31, 2013, nyob hauv lub nroog ntawd lub Koom Txoos haj yam muaj mej zeej coob heev twb muaj rau tus neeg lawm. Nws yog tib tug mej zeej hauv lub nroog uas tuaj koom txoj kev sib ntsib rau Hnub Caiv. Hnub ua ntej ntawd nws hauv caug raug mob, tiam sis nws yeej xav tuaj koom. Nws tau thov Vajtswv pab kom nws yuav muaj cuab kav taug kev mus tom tshawj. Ces nws thiaj tuaj nyob ntawd. Nws noj lub cim nco txog nrog plaub tug txwj laug hluas thiab ib khub niam txiv uas yog tub txib---uas yog tag nrho pawg ntseeg ntawd.

Tej zaum nej yuav xav tias zaj dab neeg ntawd tsis muaj xwm txheej li cas tsuas yog nej pom Vajtswv siv tus txheej txheem zoo li cas thaum nws txhim tsa Nws lub nceeg vaj. Kuv twb pom ntau zaus.

Kuv pom hauv New Mexico thaum kuv tseem ua ib tug txiv neej hluas. Rau ntau tiam neeg cov yaj saub tau qhia peb tias peb yuav tsum pab cov tub txib nrhiav thiab qhia cov neeg ncaj ncees thiab hlub lawv cov uas los rau hauv lub nceeg vaj.

Kuv twb pom hais tias cov thawj coj hauv lub pov thawj hwj thiab cov mej zeej ua tau li cas thaum lawv rau siab ntso pab. Hauv xyoo 1955 kuv tau los ua ib tug nom hauv Teb Chaws Amelikas Pab Tub Rog Tsav Dav Hlau. Kuv tus npis sov tom tsev tau foom koob hmoov rau kuv ua ntej kuv sawv kev mus, yuav mus nyob hauv lub nroog Albuquerque, New Mexico.

Hauv txoj koob hmoov ntawd nws hais tias lub sij hawm uas kuv nyob hauv pab tub rog kuv yuav pab ua cov tub txib tej hauj lwm. Kuv tuaj txog lub koom txoos thawj thawj Hnub Caiv uas kuv nyob hauv Albuquerque Thawj Ceg Ntseeg. Ib tug txiv neej los ntsib kuv, thiab qhia tias nws yog koog chaw tus thawj tswj hwm, thiab tias nws yuav hu kuv los ua ib tug tub txib hauv koog chaw ntawd.

Kuv qhia nws tias kuv tsuas tuaj kawm ua tub rog rau ob peb lim piam xwb ces lawv yuav xa kuv mus nyob hauv lwm qhov chaw hauv ntiaj teb no. Nws hais tias, “Kuv tsis paub txog qhov ntawm ko, tiam sis peb yuav tsum hu koj los ua txoj hauj lwm no.” Thaum lawv tab tom qhia kuv ua tub rog, zoo nkaus li lam tau lam tshwm los es, kuv raug xaiv ntawm ntau pua nom tub rog uas tab tom kawm ntawd kom kuv los pauv lwm tus qhov chaw uas nyuam qhuav tso lub neej no tseg.

Ces, rau ob xyoos uas kuv nyob ntawd, kuv tau ua hauj lwm hauv kuv lub hoob kas. Yuav luag txhua hmo thiab thaum hnub vas xaum vas thiv, kuv tau qhia Yexus Khetos txoj moo zoo rau cov neeg uas cov mej zeej coj tuaj ntsib peb.

Kuv thiab cov neeg uas pab kuv qhia, tau qhia ntau tshaj 40 xuab moos tauj ib lub hlis peb tsis tas mus khob leej twg lub qhov rooj nrhiav neeg uas xav kawm. Cov mej zeej nrhiav neeg coob kawg ces feem ntau peb tau qhia ob tsev neeg hauv ib hmos. Kuv pom lub hwj chim thiab txoj koob hmoov uas los vim txhua tus mej zeej tau ua li tus yaj saub txib kom ua ib tug tub txib.

Hnub Caiv kawg ua ntej kuv tawm ntawm lub nroog Albuquerque, lawv tau txhim tsa thawj thawj ceg txheem ntseeg hauv lub nroog ntawd. Nim no muaj ib lub tuam tsev dawb ceev nyob ntawd, tus Tswv ib lub tsev, hauv ib lub nroog uas thaum ub peb tau sib sab laj hauv ib lub tsev teev ntuj me me nrog ib Tsoom Haiv Neeg Ntseeg uas tau coj lawv cov phooj ywg tuaj rau peb qhia thiab pab kom lawv hnov tau tus Ntsuj Plig ua tim khawv rau lawv. Cov phooj ywg zoo siab vim tib neeg tau tos txais lawv los rau hauv tus Tswv lub Koom Txoos uas muaj tseeb.

Kuv rov qab pom li no hauv New England thaum kuv mus kawm ntawv. Kuv raug hu los ua ib tug pab cuam rau koog chaw tus thawj tswj hwm uas thaum i tsis nyiam tuaj koom lub Koom Txoos es nim no yog ib tug txiv neej uas sab ntsuj plig muaj zog heev. Tus neeg uas tuaj qhia nws tom tsev tau hlub nws heev es thiaj tsis quav ntsej nws txoj kev haus luam yeeb thiab pom nws zoo li Vajtswv pom nws. Koog chaw tus thawj tswj hwm wb tau tsav tsheb mus ub mus no mus xyuas tej ceg ntseeg me me hauv lub xeev Massachusetts thiab Rhode Island los pab txhim tsa thiab foom koob hmoov rau Vajtswv lub nceeg vaj.

Hauv tej xyoo uas kuv ua hauj lwm nrog tus thawj coj zoo no, wb pom tib neeg coj lawv cov phooj ywg los rau hauv lub Koom Txoos vim lawv ua yam ntxwv zoo thiab tau caw lawv los mloog cov tub txib. Rau kuv ces zoo li tej ceg ntseeg ntawd loj hlob qeeb heev thiab tej thaum zoo nkaus li poob qab xwb. Tiam sis Hnub Caiv uas kuv tawm ntawm qhov chaw ntawd, tsib xyoo tom qab ntawd, ob tug Thwj Tim tau tuaj xyuas peb koog chaw hauv ib ceg txheem ntseeg hauv Longfellow Park lub tsev teev ntuj hauv lub zos Cambridge.

Ntau xyoo tom qab ntawd kuv tau rov qab tuaj coj ib lub rooj sab laj rau ceg txheem ntseeg nyob ntawd. Ceg txheem ntseeg tus thawj tswj hwm tau coj kuv mus saib ib lub toj uas muaj pob zeb hauv lub zos Belmont. Nws qhia kuv tias yuav yog ib qho chaw zoo heev ua Vajtswv ib lub tuam tsev. Nim no yeej muaj ib lub nyob ntawd. Thaum kuv ntsia lub tuam tsev, kuv nco txog cov mej zeej uas txo hwj chim uas kuv ntsib hauv tej ceg ntseeg me me, cov neeg zej zog uas lawv caw tuaj, thiab cov tub txib uas tab tom qhia lawv.

Muaj ib tug dikas tshiab hauv txoj kev sib ntsib hmo no. Kuv tau nrog nws nyob tib Hnub Caiv Easter uas tus pov thawj uas kuv tau tham txog lawm taug kev mus rau txoj kev sib ntsib uas tsuas muaj ib tug mej zeej xwb. Tus dikas luag nyav thaum nws txiv qhia tias hmo no nws yuav nrog nws tuaj rau txoj kev sib ntsib rau lub pov thawj hwj hmo no. Leej txiv no tau ua ib tug tub txib zoo hauv tib qho chaw tshaj tawm txoj moo zoo uas nws yawg tau ua tus thawj tswj hwm. Kuv tau pom Phau Ntawv Ua Tub Txib rau xyoo 1937 uas yog nws tus yawg koob li. Nws zaj keeb kwm coj tib neeg los rau hauv lub Koom Txoos yeej zoo kawg nkaus.

Ces kuv tau nrog tus dikas ntawd tus npis sov tham seb nws yuav ua li cas hauv txoj kev sib ntsib kom pab lub pov thawj hwj ua hauj lwm sau tus Tswv cov ntsuj plig los ua ke. Tus npis sov zoo siab los piav tias pawg ntseeg qhov chaw tshaj tawm txoj moo zoo tus thawj coj tau ua ntawv xyuas seb cov neeg uas tshawb nrhiav txog txoj moo zoo ua li cas lawm. Nws kawm tau li ntawd vim nws ib sij mus ntsib cov tub txib.

Tus npis sov thiab nws pawg ntseeg pawg sab laj sib tham txog cov uas tab tom kawm txoj moo zoo. Lawv txiav txim seb yuav ua li cas pab txhua tus neeg thiab lawv tsev neeg kom lawv tau ua phooj ywg ua ntej lawv los ua kev cai raus dej, kom lawv tuaj koom tej kev ua si, thiab ua tib zoo tu cov neeg uas tau ua kev cai raus dej lawm. Nws hais tias muaj tej lub sij hawm uas cov tub txib muaj neeg coob heev uas lawv yuav tsum mus qhia ces lawv thiaj tau coj cov tub hluas uas tuav lub Pov Thawj Hwj Aloos mus ua lawv tus khub.

Cov tswv yim rau kev qhia txoj moo zoo hauv pawg ntseeg muaj hom phiaj kom tej pawg pov thawj hwj yuav caw cov neeg uas lawv paub tuaj ntsib cov tub txib. Pawg dikas pawg thawj tswj hwm los kuj cuab hom phiaj thiab ntaus tswv yim seb cov mej zeej hauv lawv pawg yuav ua li cas pab coj cov neeg uas lawv paub los rau hauv Vajtswv lub nceeg vaj.

Nim no, tus dikas hauv pawg ntseeg zoo no thiab tus pov thawj tshiab---tus neeg uas hloov siab los ntseeg---hauv pawg ntseeg me me uas tshiab khiv ntawd tsis tshua zoo sib xws los sis tsis zoo li nej. Thiab tej zaum nej xav tias nej txoj kev txhim tsa lub Koom Txoos tsis zoo xws li tej qhov txuj ci loj uas kuv pom hauv New Mexico thiab New England.

Tiam sis muaj ib txoj kev uas peb sib koom siab ua tej hauj lwm hauv lub pov thawj hwj. Thaum peb kho peb tus kheej kom dawb huv thiab ua peb tej hauj lwm kom coj txoj moo zoo rau tag nrho peb Leej Txiv Saum Ntuj Ceeb Tsheej cov me nyuam.

Peb sib koom ua tej yam uas tus Tswv ua kom pab txhim tsa Nws lub nceeg vaj hauv ntiaj teb no. Hauv Nws lub Koom Txoos, vim muaj tej cuab yeej zoo thiab tus txheej txheem no, tseem muaj ib lo lus tseeb uas cov yaj saub qhia peb tias peb yuav ua li cas ua cov tub txib tej hauj lwm raws li lub pov thawj hwj txib peb ua.

Hauv lub tuam rooj sab laj thaum xyoo 1959, Thawj Tswj Hwm David O. McKay qhia txoj ntsiab cai no, ib yam li cov yaj saub tom qab nws tau qhia, kuj hais txog Thawj Tswj Hwm Thomas S. Monson thiab. Thawj Tswj Hwm McKay hais hauv nws tej lus xaus lub rooj sab laj ntawd tias thaum xyoo 1923 hauv As Kiv Teb Qhov Chaw Tshaj Tawm Txoj Moo Zoo, lawv tau lus qhia rau lub Koom Txoos cov mej zeej. Lawv raug txib kom tsis txhob siv nyiaj ua ntawv xov xwm tawm tsam cov neeg uas ua tej yam tsis zoo rau lub Koom Txoos. Thawj Tswj Hwm McKay hais tias txoj kev txiav txim yog kom: “Txhua tus mej zeej hauv lub Koom Txoos hauv xyoo 1923 ntawd yuav los ua ib tug tub txib. Txhua tus mej zeej yog ib tug tub txib! Tej zaum nej yuav coj nej niam los rau hauv lub Koom Txoos, los sis tej zaum yuav yog nej txiv; tej zaum yuav yog ib tug phooj ywg tom tsev hauj lwm. Yuav muaj ib tug neeg uas yuav hnov txoj moo zoo los ntawm koj.”

Thiab Thawj Tswj Hwm McKay hais ntxiv tias: “Thiab hnub no zaj ntawd yog zaj xov. Txhua tus mej zeej—ib plhom thiab ib nrab tus neeg—yuav ua ib tug tub txib!”²

Thaum xyoo 2002 kuv xav tsis thoob thaum tshaj tawm hais tias cov npis sov yog cov uas yuav tau lav ris saib xyuas cov tub txib tej hauj lwm. Kuv twb ua lawm. Zoo nkaus li lawv twb ris nra hnyav kawg lawm uas lawv ris tsis tshua tau kom saib xyuas cov mej zeej thiab coj kav tej lub koom haum hauv lawv pawg ntseeg.

Ib tug npis sis paub hais tias yuav tsis yog ib lub nra ntxiv tiam sis yog ib lub cib fim zoo uas yuav pab tau nws pawg ntseeg los sib koom siab thaum txhua tus mej zeej rais los ua ib tug tub txib. Nws hu ib tug los ua pawg ntseeg qhov chaw tshaj tawm txoj moo zoo tus thawj coj. Nws tau ntsib cov tub txib txhua hnub Saturday kawm seb lawv ua hauj lwm li cas, kom txhawb nqa lawv, thiab kawm seb cov neeg uas tab tom kawm txoj moo zoo nyob li cas. Pawg ntseeg pawg sab laj tau nrhiav tej yam uas cov koom haum thiab tej pawg pov thawj hwj ua tau kom pab sawv daws kawm ua ib tug tub txib. Ua ib tug txiav txim hauv Ixayees, nws pab cov tub thiab ntxhais hluas hnov tej koob hmoov uas los ntawm txoj Kev Theej Txhoj los uas pab kom lawv ua neeg dawb huv.

Tsis ntev tas los lawm kuv nug nws seb vim li cas muaj neeg coob heev uas los ntseeg tshiab hauv nws pawg ntseeg thiab haj yam muaj neeg coob uas muaj lub siab xav coj Yexus Khetos txoj moo zoo mus rau tag nrho lub ntiaj teb. Nws hais tias tsis yog ib txoj hauj lwm uas leej twg yuav tsum ua tiam sis yog qhov uas lawv sib koom siab pab coj tib neeg los koom tes nrog ib Tsoom Haiv Neeg Ntseeg uas pab kom lawv sawv daws zoo siab heev.

Rau ib txhia twb yog qhov ntawd thiab ntau yam ntxiv. Zoo li Mauxiyas cov tub, lawv pom tej kev txhaum hauv lawv lub neej thiab tau kev nplij siab dhau ntawm txoj Kev Theej Txhoj hauv Vajtswv lub Koom Txoos. Vim lawv hlub tus Cawm Seej thiab muaj kev ris txiaj rau Nws qhov khoom plig, lawv thiaj xav pab txhua tus neeg kom dim tau kev tu siab uas los ntawm kev txog kev txhaum, lawv tau kev xyiv fab thaum lawv tau kev zam txim, thiab yuav sib sau ua ke hauv Vajtswv lub nceeg vaj.

Twb yog Vajtswv txoj kev hlub thiab lawv cov phooj ywg thiab neeg zej zog txoj kev hlub uas pab lawv sib koom siab los pab tib neeg. Lawv txoj kev xav muab txoj moo zoo coj mus rau txhua tus neeg hauv lawv thaj chaw hauv ntiaj teb no. Thiab lawv tau npaj lawv cov me nyuam los ua neeg tsim nyog raug hu los ntawm tus Tswv los mus qhia, hais lus tim khawv, thiab ua hauj lwm hauv lwm qhov chaw hauv Nws lub vaj.

Txawm yog rau hauv ib pawg ntseeg loj loj uas ib tug dikas tshiab yuav ua nws tej hauj lwm pab faib txoj moo zoo thiab txhawb nqa lub nceeg vaj los yog hauv ib pawg me me nyob puag tom ub uas ib tug pov thawj ua hauj lwm los yog, lawv sawv daws koom tib lub ntsiab. Tus dikas yuav tau kev tshoov siab los ntawm Vajtswv txoj kev hlub kom ncav tes mus pab ib tug phooj ywg uas tseem tsis tau yog ib tug mej zeej. Nws yuav coj nws ib tug phooj ywg tuaj ua hauj lwm pab lwm tus los sis ua si hauv lub Koom Txoos ces mam li caw nws thiab nws tsev neeg los mloog cov tub txib. Rau cov uas ua kev cai raus dej, nws yuav ua lawv tus phooj ywg uas lawv yuav xav tau.

Tus pov thawj yuav caw lwm tus neeg tuaj nrog nws koom ib Tsoom Haiv Neeg Ntseeg pawg me me uas nws tau hnov Vajtswv txoj kev hlub thiab tej koob hmoov uas coj kev thaj yeeb nyab xeeb los vim yog txoj Kev Theej Txhoj.

Yog tias nws pheej rau siab ntso ua nws tej hauj lwm hauv lub pov thawj hwj, nws yuav pom pawg me me ntawd loj loj ua ib ceg ntseeg, thiab ces ib ceg txheem ntseeg hauv Xi-oos yuav loj hlob tuaj hauv nws lub nroog. Yuav muaj ib pawg ntseeg uas muaj tus npis sov uas muaj siab zoo. Tej zaum yuav yog nws ib tug tub los sis xeeb leej xeeb ntxwv uas yuav coj Vajtswv ib tug tub qhe mus rau ib lub toj ze ze ntawd thiab hais rau nws tias, “Nov yuav yog ib qho chaw zoo heev ua Vajtswv ib lub tuam tsev.”

Kuv thov kom txawm peb nyob qhov twg thiab ua hauj lwm dab tsi hauv Vajtswv lub pov thawj hwj los xij, kom peb yuav sib koom siab pab coj txoj moo zoo mus rau tag nrho lub ntiaj teb thiab tias peb yuav txhawb nqa cov neeg uas peb hlub kom tshem tej kev txhaum mus thiab muaj kev zoo siab nrog peb cov uas nyob hauv Vajtswv lub nceeg vaj. Los ntawm Yexus Khetos lub npe, nov yog Nws lub Koom Txoos, amees.