“Tus Tswv, Kuv Ntseeg”

Muaj ib lub sij hawm uas Yexus ntsib ib pawg neeg uas sib cav sib ceg nrog Nws cov thwj tim. Thaum tus Cawm Seej nug yog vim li cas lawv sib cav sib ceg, leej txiv ntawm ib tug me nyuam uas raug xwm txheej los thiab hais tias, nws xav kom Yexus cov thwj tim foom koob hmoov rau nws tus tub, tiam sis lawv kho tsis tau nws. Tus me nyuam tub tseem zom hniav qees, npuas ncauj tawm plaws, thiab ntog nti rau hauv av, leej txiv no thov Yexus nrog ib lub suab xav xav txais kev pab hais tias:

Nws hais tias, “Yog koj pab tau, thov koj hlub peb, thiab pab peb.

Yexus hais rau nws hais tias ua li cas koj hais tias, yog leej twg ntseeg, kuv yeej ua tau txhua yam huv tib si.

“Tam sim ntawd tus me tub leej txiv hais tias, Kuv ntseeg tiam sis tsis txaus, thov koj pab kom kuv muaj kev ntseeg ntxiv.”¹

Tus txiv neej no lees hais tias nws tsis muaj txoj kev ntseeg ntau. Tiam sis nws muaj siab xav pab nws tib leeg tub heev. Yexus qhia hais tias ua li ntawd yuav txaus pib. Amas hais tias, “Yog tsis muaj dab tsi ntau tshaj li uas nej xav los ntseeg, cia lub siab xav ntseeg no ua hauj lwm nyob hauv nej, mus txog thaum nej ntseeg.”² Nws tsis muaj lwm txoj kev cia siab, leej txiv no siv txoj kev ntseeg uas nws muaj thiab nws thiaj li thov tus Cawm Seej ntawm lub ntiaj teb, “Yog koj pab tau dab tsi, thov koj hlub peb, thiab pab peb.”³ Nyuaj rau kuv nyeem tej lus no thiab tsis quaj. Nws txhob txwm hais lo lus peb. Tus txiv neej no hais tias: “Peb tsev neeg thov koj. Kev nyuaj siab yeej tsis tu tsis tseg. Peb nkees heev. Wb tus tub ntog rau hauv dej. Nws ntog rau hauv qhov cub. Nws pheej raug xwm txheej, thiab peb pheej ntshai heev. Peb tsis paub yuav thov leej twg. Koj pab peb puas tau? Peb yuav zoo siab yog koj pab tau me ntsis xwb—ib qho koob hmoov, ib qho kev cia siab me ntsis xwb, pab ris lub nra uas tus tub ntawv leej niam ris txhua hnub.”

Leej txiv no hais tias ”Yog koj pab tau dab tsi,” ces tus Xib Hwb teb hais tias, “Yog kojntseeg tau.”⁴

Vaj lug kub hais tias, “Tam sim ntawd”---tsis yog nws maj mam ua, los yog lam ua, tiam sis “tam sim ntawd”---leej txiv ntawd lub siab mob heev thiab qw hais tias, “Tus Tswv, kuv ntseeg; thov pab kom kuv ntseeg.” Vim leej txiv no muaj txoj kev ntseeg tshiab, txawm nws tsis ntseeg tag nrho, Yexus kho tus me tub zoo, muab nws sawv hauv qhov tuag rov qab los raws li Malakaus piav.⁵

Tom qab uas peb tau xav txog zaj no hauv vaj lug kub, kuv xav hais lus rau cov hluas hauv lub Koom Txoos---tsis hais cov tub hluas ntxhais hluas, cov uas nyuam qhuav los ua mej zeej tshiab los yog cov uas txoj kev ntseeg tsis loj los yog. Hais li ntawd ces, nyaj kuv hais rau peb txhua leej txhua tus.

Qhov thib ib peb kawm los ntawm zaj no yog qhov uas thaum nyuaj rau leej txiv no ntseeg, nws hais tias nws txoj kev ntseeg muaj zog npaum li cas ua ntej ces tom qab ntawd nws lees tias nws txoj kev ntseeg tsis muaj zog. Qhov uas nws hais ua ntej yog ib qho nws hais kiag hais tias: “Tus Tswv, kuv ntseeg.” Rau nej cov uas xav muaj kev ntseeg ntxiv, cia li nco txog tus txiv neej no! Thaum peb ntshai los yog ua xyem xyav los yog muaj kev nyuaj siab, cia li siv txoj kev ntseeg uas nej muaj lawm, txawm yog nej ntseeg me ntsis xwb. Thaum peb loj hlob hauv lub neej no, tej kev sim siab zoo li tus me tub txoj kev txom nyem los yog leej txiv no txoj kev nyuaj siab yuav los rau peb txhua tus. Thaum twg txog tej lub sij hawm zoo li ntawd thiab nej muaj teeb meem, ntshe kev daws tej teeb meem ntawd tsis los sai heev, ces cia li tuav nkaus tej yam uas nej paub lawm thiab nyob ruaj khov kho mus txog thaum nej paub ntxiv. Yexus hais txog qhov txuj ci tseem ceeb no hais tias, “Yog nej muaj kev ntseeg luaj lub noob zaub, nej hais rau lub roob no hais tias, ’Cia li txav ntawm no mus rau tod!’ Ces lub roob ntawd yeej yuav txav mus. Nej yuav ua tau txhua yam huv tib si.”⁶ Qhov uas nej muaj kev ntseeg los yog nej paub npaum li cas tsis yog qhov tseem ceeb---qhov tseem ceeb yog qhov uas nej ua dab tsi kom siv txoj kev ntseeg uas nej muaj lawm thiab qhov tseeb uas nej twb paub lawm.

Qhov thib ob uas peb kawm tau yeej zoo li qhov thib ib. Thaum nej raug teeb meem thiab nej nug txog tej yam uas nej tsis paub, thaum nej xav muaj kev ntseeg ntxiv, tsis txhob pib hais tias nej tsis muaj kev ntseeg. Ua li ntawd yeej nyuaj heev! Cia kuv hais meej txog qhov no: Kuv tsis hais kom nej ua txuj hais tias nej muaj kev ntseeg. Kuv hais kom nej siv txoj kev ntseeg uas nej twb muaj lawm. Tej lub sij hawm peb xav hais tias tus uas ua siab ncaj hais tias nws tsis ntseeg yeej zoo dua qhov uas nws ua siab ncaj hais tias nws ntseeg. Yeej tsis zoo li ntawd! Yog li ntawd cia li nco ntsoov ib txoj ntsiab lus ntawm zaj vaj lug kub no: Cia li ua siab ncaj nug txog tej yam uas nej yuav tsum nug; peb txhua tus muaj tej lus nug zoo li ntawd. Tiam sis yog nej thiab nej tsev neeg xav txais kev kho mob kom zoo, tsis txhob cia tej lus nug ntawd tab kaum nej txoj kev ntseeg tej txuj ci tseem ceeb.

Tsis tas li ntawd xwb, nej muaj kev ntseeg ntau tshaj qhov nej xav vim muaj ib yam uas Phau Ntawv Maumoos hu ua “tej pov thawj loj.”⁷ Yexus hais tias,⁸ “Nej yuav paub lawv los ntawm lawv tej txiv, thiab peb pom tej yam zoo hauv Haiv Neeg Ntseeg hauv Hnub Nyoog Kawg tej lub neej zoo li cov txiv ntawm tsob ntoo thiab cov txiv hmab. Hnub no kuv hais rau nej ib yam li Petus thiab Yauhas tau hais rau cov neeg thaum ub hais tias, “Tej uas peb hnov thiab peb pom lawm, peb yeej yuav qhia, peb tsis npog li” thiab tej uas peb hnov thiab pom yog “ib qho txuj ci tseem ceeb” nyob hauv cov mej zeej ntawm lub Koom Txoos lub neej. Yeej yuav tsum lees qhov no.⁹

Cov kwv tij thiab cov muam, nov yog Vajtswv txoj hauj lwm uas muaj tej kev tshwm sim thiab cov koob hmoov ntau nplua mias, yog li ntawd tsis txhob txhawj dhau yog tias tej lub sij hawm muaj teeb meem uas yuav tsum xyuas, to taub thiab kho. Yeej muaj tej teeb meem zoo li ntawd thiab peb yeej kho tau tej ntawd. Nyob hauv lub Koom Txoos no tej yam uas peb paub yeej muaj zog tshaj tej yam uas peb tsis paub. Thiab nco ntsoov tias nyob hauv lub ntiaj teb no, peb txhua tus yuav tsum siv peb txoj kev ntseeg.

Yog li ntawd ua siab zoo nyiaj tib neeg tej kev qaug zog---nej tej kev qaug zog thiab cov uas ua hauj lwm nrog nej hauv lub Koom Txoos uas yog txiv neej thiab poj niam uas ua siab dawb pub lawv tej sij hawm. Tsuas yog Nws Tib Leeg Tub uas zoo tag nrho xwb, Vajtswv tsuas siv tau cov neeg tsis zoo tag nrho xwb. Yeej nyuaj rau Nws ua li ntawd, tiam sis Nws tseem ua hauj lwm. Peb yuav tsum ua li ntawd thiab. Thiab thaum nej pom tej yam tsis zoo tag nrho, cia li nco ntsoov tias qhov tsis zoo tag nrho ntawd tsis yog ib feem ntawm Vajtswv txoj hauj lwm. Raws li ib tug sau lus hais tias, thaum yus muab cov roj uas nyob mus ib txhis nchuav los, ces tsis tas liam cov roj thaum twg muaj me ntsis ploj mus vim cov hwj tsis txaus ntim tag nrho.¹⁰ Cov hwj uas tsis nyob mus ib txhis ntawd yog nej thiab kuv, yog li ntawd cia li ua siab ntev thiab zam txim.

Qhov kawg: thaum twg muaj kev nyuaj siab los yog kev sim siab, tsis txhob ntshai thov kev pab. Yog peb txo hwj chim thiab ua siab ncaj xav kom tau kev pab zoo li leej txiv no xav tau, ces peb yeej yuav tau xwb. Cov vaj lug kub hais tias kev xav tau tiag tiag zoo li no txhais hais tias nej “mob siab ntso ... nrog tag nrho nej lub siab, tsis txhob lam ua txuj ua los sis lam dag rau Vajtswv.”¹¹ Yog tias peb mob siab thov li ntawd ces Vajtswv yeej yuav xa cov uas nyob saum ntuj ceeb tsheej thiab cov uas tau tas sim neej no pab txhawb nqa peb txoj kev ntseeg.

Kuv hais tias kuv hais lus rau cov hluas. Kuv tseem hais lus rau lawv. Tsis ntev tas los ib tug tub hluas uas muaj 14 xyoos hais rau kuv hais tias, “Tij Laug Holland, kuv tseem hais tsis tau hais tias kuv paub lub Koom Txoos muaj tseeb, tiam sis kuv ntseeg.” Kuv puag tus tub hluas ntawd mus txog thaum ntshe nws lub qhov muag yuav tawm. Kuv qhia nws kawg kuv lub siab lub ntsws hais tias kev ntseeg yog ib lo lus uas muaj nqi, thiab nws tsis tas thov txim vim nws “ntseeg xwb.” Kuv qhia nws tias tus Khetos hais tias, “Tsis txhob ntshai, cia li ntseeg xwb,”¹² yog ib co lus uas pab Gordon B. Hinckley mus ua tub txib.¹³ Kuv qhia tus tub hluas no hais tias kev ntseeg yeej yog thawj ruam mus tom ntej kom txog kev ntseeg tiag tiag thiab tej nqe kev ntseeg txhua nqe pib nrog cov lus no, “Peb ntseeg.”¹⁴ Thiab kuv qhia nws tias kuv zoo siab txog nws vim nws ua siab ncaj nrhiav.

Vim 60 xyoo twb dhau los lawm tom qab uas kuv yog ib tug tub hluas muaj 14 xyoos xwb, nim no kuv tshaj tawm txog ob peb yam uas kuv paub. Kuv paub tias Vajtswv yog peb Leej Txiv Saum Ntuj Ceeb Tsheej txhua lub sij hawm nyob mus ib txhiab ib txhis. Kuv paub Yexus yog Nws tib leeg tub zoo tag nrho; raws li Leej Txiv thiab Leej Tub lub siab nyiam, nws muaj txoj kev hlub muab nws txoj sia txov kom muab peb txhua tus uas tsis zoo tag nrho txhiv dim. Kuv paub tias Nws sawv hauv qhov tuag rov los muaj sia, thiab vim Nws tau ua li ntawd, peb yuav ua li ntawd thiab. Kuv paub tias Yauxej Xamiv, txawm nws lees hais tias nws tsis zoo tag nrho los¹⁵ nws yog tus uas Vajtswv xaiv tseg kom muab txoj moo zoo kav ib txhis txum tim rov qab los rau lub ntiaj teb. Thiab kuv paub tias vim nws ua li ntawd—qhov tseem ceeb yog los ntawm kev txhais Phau Ntawv Maumoos—nws tau qhia kuv ntau tshaj lwm tus yaj saub uas kuv tau nyeem, hnov txog los yog tau paub txog Vajtswv txoj kev hlub, txog Yexus Khetos, thiab txog lub hwj chim pov thawj hwj. Kuv paub tias Thawj Tswj Hwm Thomas S. Monson, uas mob siab thiab zoo siab ua hauj lwm mus txog thaum 50 xyoos tom qab lawv muab nws tsa ua ib tug Thwj Tim, nws yog tus uas tuav txoj cai ua tus yaj saub niaj hnub nim no. Peb twb pom tias nws tuav txoj cai no nyob hauv lub rooj sab laj no. Kuv paub tias muaj 14 tug txiv neeg ntxiv uas nej pom zoo ua cov yaj saub, cov pom tau, thiab cov txais kev tshwm sim txhawb nqa nws nrog lawv txhais tes, lawv lub siab, thiab lawv cov yuam sij ua thwj tim.

Kuv hais tej yam no rau nej nrog txoj kev ntseeg uas Petus hu ua “tej lus qhia tej uas yuav muaj los yav tom ntej uas ruaj dua.”¹⁶ Kuv txoj kev ntseeg uas ib txwm yog ib lub noob me me twb loj hlob los ua ib tsob ntoo ntawm txoj sia, yog li ntawd yog nej txoj kev ntseeg raug sim siab, kuv caw nej siv kuv txoj kev ntseeg. Kuv paub tias txoj hauj lwm no yog Vajtswv txoj hauj lwm tseeb, kuv paub tias thiab ntshe peb yuav raug xwm txheej yog tias peb cia peb tej kev ua xyem xyav los sis cov dab phem ntxias kom peb ncaim txoj kev yog. Cia li muaj kev cia siab. Taug kev mus tom ntej. Ua siab ncaj lees nej tej lus nug thiab tej kev txhawj, tiam sis cia li txhawb nqa nej txoj kev ntseeg ua ntej thiab nyob tas mus li, vim cov uas ntseeg ua tau txhua yam. Los ntawm Yexus Khetos lub npe, amees.