Kev Tiv Thaiv ntawm Duab Liab Qab—Ib Tsev Neeg uas Tsom Ntsoov rau Khetos

Kuv cov nus thiab cov viv ncaus, hnub no kuv tau koob hmoov vim 13 ntawm kuv cov xeeb ntxwv hlob nyob no. Qhov no ua rau kuv nug kuv tus kheej hais tias, “Kuv xav kom kuv cov xeeb ntxwv paub dab tsi?” Tag kis no kuv xav hais lus ncaj qha rau kuv tsev neeg thiab rau nej tsev neeg.

Peb cov thawj coj txhawj zuj zus tuaj txog kev puas tsuaj uas los ntawm kev saib duab liab qab nyob hauv cov mej zeej ntawm lub Koom Txoos thiab lawv tsev neeg. Dab Ntxwg Nyoog chim siab tawm tsam peb.

Peb nyob rau hauv lub ntiaj teb no kom kawm tswj hwm peb tej kev xav thiab tej kev ntshaw ntawm peb lub cev uas txawj tuag no. Vajtswv muab tej kev xav li no kom pab peb xav yuav poj niam yuav txiv thiab muaj me nyuam. Qhov uas txiv neej thiab poj niam pw ua ke kom coj cov me nyuam los rau hauv lub ntiaj teb no yog ib qho zoo heev los ntawm kev sib hlub uas ob tug neeg koom ib lub siab, koom ntsuj plig thiab lub cev, thiab ua rau nkawd zoo siab puv npo thaum nkawd kawm ib leeg hlub ib leeg. Thawj Tswj Hwm Spencer W. Kimball qhia hais tias thaum peb sib yuav “tus khub … yog tus uas tseem ceeb tshaj plaws rau tus txiv los yog rau tus poj niam, thiab … yuav tsum tsis txhob saib lwm yam [los sis] lwm tus neeg [los sis] lwm qhov tseem ceeb tshaj yus tus khub. …

“Kev sib yuav txhais hais tias yuav sib hwm thiab ua ncaj ncees tag nrho.”¹

Ntau xyoo tas los kuv pom tias kuv ib tug me nyuam nyuaj siab heev. Kuv twb nkag mus hauv nws hoob pw, ces nws qhib nws lub siab thiab piav rau kuv hais tias nws nyob hauv ib tug phooj ywg lub tsev thiab ua rau nws pom tej daim duab thiab tej yam nyob hauv TV ntawm ib tug txiv neej thiab ib tug poj niam uas tsis hnav khaub ncaws. Nws pib quaj thiab qhia kuv tias nws tu siab heev vim nws tau pom tej ntawd thiab kheev lam nws tshem tau tej ntawd tawm nws lub hlwb mus. Kuv zoo siab uas nws kam qhia kuv, kuv thiaj li muaj cib fim nplij nws lub siab dawb huv uas mob heev thiab pab nws paub txais kev nplij siab dhau los ntawm peb tus Cawm Seej txoj Kev Theej Txhoj. Kuv nco qab txog tej uas kuv xav thaum wb txhos caug ua ke, ib tug niam tsev thiab tus ntxhais, thiab wb tau thov peb Leej Txiv Saum Ntuj Ceeb Tsheej ua ke.

Ntau tus me nyuam, cov tub hluas ntxhais hluas, thiab cov neeg laus tsis txhob txwm saib cov duab liab qab, tiam sis ib txhia ntawm cov txiv neej thiab cov poj niam saib thiab rov qab saib mus txog thaum lawv muaj yees. Tej zaum cov neeg no xav dim ntawm rab ntxiab no kawg siab kawg ntsws tiam sis feem ntau lawv tsis muaj peev xwm kov yeej tau lawv tus kheej. Peb zoo siab ua Vajtswv tsaug thaum cov uas peb hlub no qhia peb los yog qhia ib tug thawj coj ntawm lub Koom Txoos. Peb yuav tsum tsis txhob xav tsis thoob, npau taws los yog xyeej lawv, ntshe peb ua li ntawd ces lawv yuav rov qab nyob twj ywm.

Cov niam tsev txiv tsev thiab cov thawj coj, peb yuav tsum qhia thiab ntuas peb cov me nyuam thiab cov tub hluas ntxhais hluas tsis tu tsis tseg, mloog nrog kev hlub thiab kev to taub. Lawv yuav tsum paub txog tej xwm txheej los ntawm kev saib duab liab qab thiab txog qhov uas tej ntawd kov yeej tib neeg lub neej, ua rau lawv poob tus Ntsuj Plig, muaj tej kev xav phem, tsis sib raug zoo nrog lwm tus, tswj hwm tsis tau lawv tus kheej, thiab ua rau lawv siv sij hawm, tej kev xav thiab lub dag zog tag nrho.

Cov duab liab qab yeej qias neeg, phem thiab lim hiam tshaj yav tas los. Thaum peb nrog peb cov me nyuam sib tham, peb tsim tau kev cai rau peb tsev neeg, thiab ua tib zoo pov hwm peb tsev neeg thaum peb siv tej yam uas kho tau teeb meem ntawm computer los yog smartphone. Cov niam txiv, peb puas to taub hais tias tej xov tooj ntawm tes uas siv tau Internet, tsis yog computer, yog qhov uas ua rau lawv txhaum ntau tshaj?²

Cov tub hluas ntxhais hluas thiab cov neeg laus, yog tias nej twb mag Dab Ntxwg Nyoog rab ntxiab ntawm kev saib duab liab qab, cia li nco qab ntsoov tias peb tus Cawm Seej muaj siab hlub nej npaum li cas. Nej puas paub tias tus Tswv hlub thiab tshua nej npaum li cas? Peb tus Cawm Seej muaj hwj chim ntxuav nej thiab kho nej. Nws muaj peev xwm tshem nej tej kev mob thiab kev tu siab thiab ua rau nej rov qab huv dhau los ntawm Nws txoj Kev Theej Txhoj lub hwj chim.

Peb cov thawj coj kuj txhawj txog cov txij nkawm thiab tsev neeg uas muaj yees saib duab liab qab. Txwj Laug Richard G. Scott tau thov hais tias: “Yog tias nej tsis tau ua txhaum loj nej tus kheej, tsis txhob raug txom nyem los ntawm lwm tus neeg tej kev txhaum. … Nej muaj tau kev khuv leej. … Tiam sis nej yuav tsum tsis txhob xav tias nej lav ris tej kev txhaum ntawd.”³ Cia li paub tias nej tsis nyob nej ib leeg. Muaj kev pab. Muaj kev sib ntsib kov yeej kev muaj yees, tsis hais kev sib ntsib ntawm xov tooj, uas cia cov txij nkawm hu tuaj thiab koom kev sib ntsib thaum lawv nyob hauv tsev.

Cov nus thiab cov viv ncaus, peb yuav ua dab tsi kom pov hwm peb cov me nyuam thiab cov tub hluas ntxhais hluas? Qhov uas pab kom txhob muaj teeb meem zoo tshaj plaws nyob thoob plaws lub ntiaj teb, yog ib zaj lus tim khawv ruaj nrees nyob hauv peb nruab siab txog peb Leej Txiv Saum Ntuj Ceeb Tsheej txoj kev hlub thiab peb tus Cawm Seej txoj kev theej txhoj rau peb txhua tus.

Peb yuav ua li cas coj tau peb cov me nyuam kom lawv hloov siab los ntseeg thiab siv tus Cawm Seej txoj Kev Theej Txhoj? Kuv nyiam tus yaj saub Nifais tej lus txog tej yam uas nws cov neeg tau ua dab tsi kom txhawb nqa cov tub hluas ntxhais hluas hauv nws lub caij nyoog: “Peb … hais txog Khetos, peb zoo siab rau Khetos, peb qhia txog Khetos, [thiab] peb qhia tej uas yuav muaj los yav tom ntej txog Khetos … kom peb cov me nyuam yuav paub txog yam uas yuav nrhiav los ntxuav peb tej kev txhaum mus.”⁴

Peb yuav ua li cas kom ua tau li no nyob hauv peb tsev neeg? Nej ib txhia twb hnov kuv hais txog qhov uas kuv thiab kuv tus txiv, Mel, txhawj heev thaum wb muaj plaub tug me nyuam yaus. Thaum wb sim kov yeej tej teeb meem ntawm kev ua niam tsev txiv tsev thiab kev ua neej, wb xav tau kev pab heev. Wb tau thov Vajtswv kom wb paub ua li cas. Wb txais lus teb uas meej hais tias: “Tsis ua li cas yog tias lub tsev sw thiab cov me nyuam tseem hnav khaub ncaws pw thiab muaj tej hauj lwm uas tsis tau ua. Tej yam uas yuav tsum ua nyob hauv tsev xwb yog kev kawm vaj lug kub thiab kev thov Vajtswv txhua hnub thiab tsev neeg hmo ua ke txhua lub lim tiam.”

Wb tau sim ua tej ntawd, tiam sis wb tsis tau saib tej ntawd tseem ceeb tshaj plaws thiab, tej lub sij hawm thaum txhua yam ntxhov hnyo, wb tsis tau ua tej ntawd. Wb tau hloov siab thiab sim ua kom txhob txhawj txog tej yam uas tsis tshua tseem ceeb. Wb tsom ntsoov rau kev qhia, zoo siab, thiab ua tim khawv txog Khetos thaum wb thov Vajtswv thiab kawm cov vaj lug kub nrog wb tsev neeg txhua hnub thiab muaj tsev neeg hmo ua ke.

Tsis ntev tas los ib tug phooj ywg ceeb toom kuv tias, “Thaum koj hais kom cov poj niam nyeem cov vaj lug kub thiab thov Vajtswv ntxiv, ua rau lawv txhawj heev. Lawv twb xav tias lawv muaj ntau yam lawv yuav tsum ua lawm.”

Kuv cov nus thiab cov viv ncuas, vim kuv paub tej no ntawm kuv tus kheej, thiab ntawm kuv tus txiv, kuv yeej yuav tsum ua tim khawv txog tej koob hmoov uas los ntawm kev kawm vaj lug kub, kev thov Vajtswv txhua hnub, thiab tsev neeg hmo ua ke. Tej yam no yuav pab kom peb tsis txhob txhawj, pab coj peb lub neej, thiab pov hwm peb tsev neeg. Ces, yog tias peb tsev neeg raug tej yam nyuaj xws li kev saib duab liab qab, peb thov tau tus Tswv kom Nws pab, thiab yuav paub tias tus Ntsuj Plig yuav pab, vim peb paub tias peb tau ua raws li peb Leej Txiv tau hais kom peb ua.

Cov kwv tij thiab cov muam, yog tias peb tsis tau ua tej yam no nyob hauv peb tsev neeg, peb txhua tus pib tau tam sim no. Yog tias peb cov me nyuam hlob me ntsis thiab tsis kam koom nrog peb, ces peb pib ua peb tus kheej los tau. Thaum peb ua li no, tus Ntsuj Plig lub hwj huam yuav puv peb lub tsev thiab lub neej, thiab thaum sij hawm dhau mus, peb cov me nyuam yuav hloov siab.

Cia li nco ntsoov tias, cov Thwj Tim tau cog lus tias thaum nej nrhiav nej cov poj koob yawm txwv thiab npaj nej tsev neeg tej lub npe mus rau lub tuam tsev, ces nej yuav txais kev pov hwm tam sim no thiab tas nej lub neej thaum nej tsim nyog txais daim ntawv tso cai nkag tuam tsev.⁵ Yog tej lus cog tseg zoo heev!

Cov tub hluas ntxhais hluas, cia li lav ris nej txoj kev nyob zoo ntawm sab ntsuj plig. Cia li muab lub xov tooj tua, hu ib zaj nkauj los ntawm lub Koom Haum Me Nyuam Yaus, thov Vajtswv pab, xav txog ib nqe vaj lug kub, tawm movie mus, xav txog tus Cawm Seej, tsim nyog txais lub cim nco txog, kawm phau ntawv Ntxiv Dag Zog rau cov Tub Hluas Ntxhais Hluas, nrog nej niam nej txiv tham, mus xyuas koj tus npisov, thiab thov kom txais kev pab, thiab nrhiav kev pab los ntawm cov kws pab tawm tswv yim, yog tias yuav tsum ua.

Kuv xav kom kuv cov xeeb ntxwv paub dab tsi? Kuv xav kom lawv thiab nej paub tias tus Cawm Seej muaj txoj sia nyob thiab hlub peb. Nws tau them tus nqi rau peb tej kev txhaum, tiam sis peb yuav tsum txhos caug thov peb Leej Txiv Saum Ntuj Ceeb Tsheej, txo hwj chim, lees peb tej kev txhaum, thiab thov Nws zam txim rau peb. Peb yuav tsum xav hloov peb lub siab thiab peb tej kev xav thiab txo hwj chim nrhiav kev pab thiab kev zam txim los ntawm cov uas peb tau tso tseg.

Kuv paub tias Yauxej Xamiv pom Vajtswv, peb Leej Txiv Saum Ntuj Ceeb Tsheej, thiab peb tus Cawm Seej, Yexus Khetos. Kuv ua tim khawv tias peb muaj ib tug yaj saub nyob hauv lub ntiaj teb, Thawj Tswj Hwm Thomas S. Monson. Kuv kuj ua tim khawv tias peb yeej yuav tsis ua yuam kev yog tias peb ua raws li Vajtswv tus yaj saub tej lus ntuas. Kuv ua tim khawv tias peb tej kev khi lus thiab cov koob hmoov ntawm lub tuam tsev muaj hwj chim.

Kuv paub tias Phau Ntawv Maumoos muaj tseeb! Kuv piav tsis tau phau ntawv zoo no muaj hwj chim npaum li cas. Kuv tsuas paub tias, nrog kev thov Vajtswv, Phau Ntawv Maumoos muaj hwj chim kom pov hwm tsev neeg, ntxiv dag zog rau tej kev sib raug zoo, thiab ua rau neeg tso siab rau tus Tswv. Kuv ua tim khawv txog tej no los ntawm Yexus Khetos lub npe uas dawb huv, amees.