Yog Nej Leej Twg Tsis Muaj Tswv Yim
Los ntawm Txwj Laug Marcos A. Aidukaitis
Ntawm Pawg Xya Caum
Vajtswv yuav qhia qhov tseeb rau cov uas nrhiav qhov tseeb li sau tseg hauv cov vaj lug kub.
Hnub i kuv tus tub uas muaj 10 xyoo tab tom kawm txog tib neeg lub paj hlwb hauv Internet. Tom ntej nws xav ua ib tug kws phais neeg. Tsis nyuaj rau yus pom hais tias nws yeej txawj ntse tshaj kuv.
Peb nyiam qhov Internet. Tom tsev peb muaj cai nrog tsev neeg thiab cov phooj ywg sib txuas lus dhau ntawm social media, e-mail, thiab lwm yam. Kuv cov me nyuam ua ntaub ntawv rau tsev kawm ntawv dhau ntawm qhov Internet thiab.
Txawm muaj lus nug dab tsi los yog, xav tau xov xwm dab tsi los yog, peb cia mus nrhiav online. Ob peb xe nkoos xwb peb muaj ntaub ntawv ntau kawg nkaus. Yog ib qho txuj ci loj heev.
Qhov Internet muab ntau lub cib fim rau yus tau kawm ntawv. Tiam sis, Dab Ntxwg Nyoog xav kom peb yuav txom nyem heev, thiab nws pauv lub ntsiab tseeb rau txhua yam. Nws siv qhov cuab yeej zoo kawg no kom tib neeg poob siab thiab ntshai thiab kom kev ntseeg thiab kev cia siab puas tsuaj mus.
Vim muaj ntau yam tsav hauv Internet, peb yuav tsum ua tib zoo xav seb yuav siv sij hawm rau tej yam twg. Dab Ntxwg Nyoog txawj ua rau peb tsis khoom, tsis nco qab zoo, thiab muaj teeb meem vim saib xyuas ntau yam ntaub ntawv, uas muaj ntau yam tsis zoo kiag li.
Yus yuav tsum tsis txhob saib tej yam tsis zoo li.
Cia li mloog cov lus qhia no, uas yus nrhiav pom hauv cov vaj lug kub hais tias: “Vajtswv muab Khetos tus Ntsuj Plig rau txhua tus neeg, kom nws yuav paub qhov zoo tawm ntawm qhov phem; yog li ntawd, kuv yuav qhia txoj kev txiav txim rau nej; vim txhua yam uas caw kom ua zoo, thiab yaum kom ntseeg Khetos, yeej raug xa tawm los ntawm lub hwj chim thiab lub txiaj ntsim ntawm Khetos; yog li ntawd nej yuav paub … tias tej ntawd yog Vajtswv li.”1
Tiag tias mas, peb muaj tib qhov teeb meem uas Yauxej Xamiv muaj thaum nws tseem ua tub hluas. Feem ntau mas peb txawm tsis muaj tswv yim.
Nyob hauv Vajtswv lub nceeg vaj, yeej xav thiab yaum kom tib neeg nrhiav qhov tseeb, thiab yeej tsis tswj hwm los sis ntshai thaum tib neeg ua li ntawd. Tus Tswv Kiag tau ua tib zoo ntuas lub Koom Txoos cov mej zeej kom kawm txawj kawm ntse.2 Nws hais kom lawv rau siab nrhiav tej lus txawj ntse hauv cov ntawv zoo; nrhiav kev kawm ntawv, los ntawm kev kawm thiab kuj los ntawm kev ntseeg.3 Tiam sis, peb yuav ua li cas thiaj paub qhov tseeb hauv ib lub ntiaj teb uas niaj hnub no haj yam tab meeg tsim txom tej yam uas qhia txog Vajtswv?
Cov vaj lug kub qhia peb hais tias:
Qhov xub thawj, peb paub tau qhov tseeb thaum peb saib tej ntawd txi txiv zoo li cas.
Thaum qhia Nws Zaj Lus Qhia Nyob Pem Roob, tus Tswv hais tias:
“Ib yam li ntawd txhua tsob ntoo zoo yeej txi tej txiv zoo; tiam sis tsob ntoo uas liam lawm yeej txiv tau tej txiv phem. …
“Yog li ntawd, nej yuav paub cov xib hwb cuav los ntawm tej hauj lwm uas lawv ua.”4
Tus yaj saub Maulaunais qhia tib txoj ntsiab cai ntawd thaum nws hais tias, “Los ntawm lawv tej hauj lwm nej yeej yuav paub lawv; vim yog lawv tej hauj lwm zoo, ces lawv yeej zoo thiab.”5
Peb caw txhua kom kawm txog cov txiv thiab tej hauj lwm ntawm lub Koom Txoos no.
Cov uas xav paub qhov tseeb yuav pom tau hais tias lub Koom Txoos thiab nws cov mej zeej ua zoo npaum li cas hauv tej koog zej zog uas lawv nyob hauv. Lawv kuj yuav pom hais tias cov neeg uas ua raws li lub Koom Txoos tej lus qhia tau ib lub neej zoo dua thiab. Cov uas tshawb nrhiav txog cov txiv no yuav pom hais tias cov txiv hauv Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej qab kawg thiab yog cov uas yus xav noj.
Qhov thib ob, peb nrhiav tau qhov tseeb thaum peb sim txoj lus rau peb tus kheej thiab.
Tus yaj saub Amas qhia tias:
“Peb yuav muab txoj lus piv rau ib lub noob. … Yog nej cia ib qho chaw, xwv kom ib lub noob yuav raug muab cog rau hauv nej lub siab, saib seb, yog tias nws yog ib lub noob tseeb, [thiab] … yog nej tsis muab nws ntiab tawm los ntawm nej txoj kev tsis ntseeg, … saib seb, nws yuav pib hlob nyob rau hauv nej tej hauv siab; thiab … nej yuav pib hais rau nej tus kheej tias—Nws yuav tsum yog … ib lub noob zoo, … vim nws tau pib ua rau kuv tus ntsuj plig loj tuaj; muaj tseeb tiag, nws tau pib ua rau kuv to taub tuaj, muaj tseeb tiag, nws tau pib qab heev rau kuv. …
“… Thiab nim no, ... qhov no yuav tsis txhawb kom nej txoj kev ntseeg muaj zog tuaj los? Muaj tseeb tiag, nws yeej yuav ua kom nej txoj kev ntseeg muaj zog tuaj. …
“… Vim txhua lub noob loj hlob tuaj mus zoo li nws yam.”6
Nov yog tus Tswv tus yaj saub ib lo lus caw zoo kawg nkaus! Yus muab tau qhov no piv rau ib txoj kev tshawb nrhiav txog ib yam txuj ci. Peb raug caw los sim txoj lus, peb tau tej ciaj ciam, thiab peb tau lus qhia seb txoj kev sim ntawd yuav zoo li cas yog tias peb ua raws li cov lus qhia.
Yog li ntawd cov vaj lug kub qhia peb tias peb paub tau qhov tseeb thaum peb saib nws cov txiv los sis cia li sim ua rau peb tus kheej, cia li muab chaw rau txoj lus rau hauv peb lub siab thiab ua tib zoo tu ib yam li peb tu ib lub noob.
Tiam sis, tseem tshuav qhov thib peb uas kom peb paub qhov tseeb, thiab qhov ntawd twb yog kev tshwm sim rau lub siab.
Phau Lus Qhuab Qhia thiab Kev Khi Lus tshooj 8 qhia tias kev tshwm sim yog kev paub txog tej yam twg uas peb muaj kev ntseeg nug txog, thaum muaj ib lub siab ncaj ncees, ntseeg hais tias peb yeej yuav txais.7
Thiab tus Tswv qhia peb seb peb yuav ua li cas thiaj txais txoj kev tshwm sim no. Nws hais tias Nws yuav qhia rau peb nyob hauv peb lub cim xeeb thiab peb lub siab, los ntawm tus Vaj Ntsuj Plig Dawb Huv, uas yuav los rau peb thiab yuav nyob rau hauv peb lub siab.8
Yog li ntawd peb kawm tau hais tias kev tshwm sim los tau thaum peb muaj kev ntseeg thaum nug, es muaj lub siab ncaj ncees, thiab ntseeg hais tias peb yuav txais.
Tiam sis nco tias tus Tswv piav meej meej thaum Nws ceeb toom hais tias, nco ntsoov tias nej ua tsis tau ib yam dab tsi yog nej tsis muaj kev ntseeg; yog li ntawd cia li muaj kev ntseeg thaum nej nug.9 Kev ntseeg yuav tsum muaj txoj kev ua hauj lwm, zoo li kev kawm twj ywm hauv nej lub paj hlwb, ces nug tus Tswv seb qhov ntawd puas yog qhov tseeb.
Tus Tswv hais tias:
Nws yuav ua kom peb lub siab kub lug tuaj; yog li ntawd, peb yuav xav tau hais tias nws yeej yog.
Tiam sis yog tias nws tsis yog qhov yog peb yuav tsis muaj tej kev xav zoo li ntawd, tiam sis nej cia li yuav tsis pom qab xav es yuav ua rau peb tsis nco qab txog qhov tsis zoo ntawd. 10
Txoj kev ntseeg uas tsis muaj kev ua hauj lwm nrog yeej plam mus xwb.11 Yog li ntawd, “muaj kev ntseeg thaum nug, tsis txhob ua xyem xyav.”12
Kuv muaj ib tug phooj ywg, uas tsis koom peb txoj kev ntseeg, uas qhia kuv tias nws tsis yog neeg uas xav ntau txog sab ntsuj plig. Nws tsis kam kawm vaj lub kug los sis thov Vajtswv vim nws hais tias nws tsis to taub Vajtswv tej lus, thiab nws tsis paub tias Vajtswv muaj sia nyob. Nws qhov cwj pwm no qhia seb vim li cas nws tsis xav txog sab ntsuj plig thiab yuav ua rau nws txais tsis tau kev tshwm sim, ib yam li Amas qhia. Nws hais tias, “Thiab yog li ntawd, tus uas yuav ua nws lub siab tawv, tus ntawd yuav tau txais txoj lus qhov uas tsawg dua.”
Tiam sis, Amas ntxiv tias, “tus uas tsis ua nws lub siab tawv, rau nws yuav raug muab qhov ntau dua ntawm txoj lus, mus txog thaum raug muab rau nws paub Vajtswv tej txuj ci uas neeg paub tsis txog mus txog thaum nws paub lawv thoob plaws.”13
Amas thiab Mauxiyas cov tub ua cov yam ntxwv txog txoj ntsiab cai uas qhia tias kev ntseeg xav tau txoj kev ua hauj lwm thiab. Nyob hauv phau Mauxes peb nyeem hais tias:
“Lawv tau rau siab nrhiav vaj lug kub, xwv kom lawv yuav paub Vajtswv txoj lus.
“Tiam sis tsis tas li no xwb; lawv tau muab lawv tus kheej thov Vajtswv thiab yoo mov heev; yog li ntawd lawv tau muaj tus ntsuj plig uas qhia tej uas yuav muaj los yav tom ntej, thiab tus ntsuj plig ntawm kev tshwm sim.”14
Txoj kev muaj lub siab ncaj ncees thaum nug yeej yog ib yam tseem ceeb heev rau qhov no. Yog peb mob siab nrhiav qhov tseeb, peb yuav ua txhua yam uas peb muaj cuab kav ua kom thiaj nrhiav tau, uas muaj tej yam xws li nyeem cov vaj lug kub, mus koom lub koom txoos, thiab sim ua raws li Vajtswv cov lus txib. Nws kuj txhais tau hais tias peb muaj lub siab kam ua raws li Vajtswv lub siab nyiam thaum twg peb nrhiav tau lawm.
Tej yam uas Yauxej Xamiv ua thaum nws tab tom nrhiav tswv yim yog ib tug yam ntxwv zoo txog txoj kev muaj lub siab ncaj ncees. Nws tau hais tias nws xav paub txoj kev teev ntuj twg thiaj muaj qhov tseeb kom nws thiaj paub “tias [nws] yuav tau koom lub twg.”15 Ua ntej nws mus thov Vajtswv, nws twb npaj siab yuav mus ua raws li lo lus teb uas nws tau txais lawm.
Peb yuav tsum muaj kev ntseeg thiab ib lub siab ncaj ncees thaum peb nug. Tiam sis tsis tas li ntawd xwb. Peb kuj yuav tsum ntseeg hais tias peb yuav txais kev tshwm sim. Peb yuav tsum ntseeg tus Tswv thiab cia siab rau Nws tej lus cog tseg. Nco qab tias twb sau hais tias: “Yog nej leej twg tsis muaj tswv yim, kom nws cia li thov ntawm Vajtswv, Vajtswv yuav pub tswv yim rau nws, rau qhov Vajtswv yog tus muaj siab dawb siab zoo pub ib puas tsav yam rau sawv daws, nws tsis khuv xim li.”16 Yog ib lo lus cog tseg zoo!
Kuv caw txhua leej txhua tus kom nrhiav qhov tseeb thaum ua txhua yam no tiam sis qhov tseem ceeb tshaj plaws yog los ntawm Vajtswv los dhau ntawm kev tshwm sim rau yus lub siab. Vajtswv yuav qhia qhov tseeb rau cov uas nrhiav qhov tseeb li sau tseg hauv cov vaj lug kub. Yuav tsum ua ntau tshaj txoj kev nrhiav hauv Internet xwb, tiam sis nws yeej tsim nyog ua.
Kuv hais kuv zaj lus tim khawv tias nov yog Yexus Khetos lub Koom Txoos tseeb. Kuv tau pom nws cov txiv hauv tej koog zej zog thiab ntau txhiab leej neeg lub neej, kuj hais txog cov neeg hauv kuv tsev neeg thiab; yog li ntawd kuv thiaj paub tias nws muaj tseeb. Kuv twb sim txoj lus no hauv kuv lub neej tau ntau xyoo, thiab tau hnov nws pauv kuv tus ntsuj plig; yog li ntawd kuv thiaj paub tias nws muaj tseeb. Tiam sis qhov tseem ceeb tshaj plaws, kuv tau kawm qhov tseeb ntawd rau kuv tus kheej dhau ntawm kev tshwm sim los ntawm tus Vaj Ntsuj Plig Dawb Huv lub hwj chim; yog li ntawd kuv thiaj paub tias nws muaj tseeb. Kuv caw nej txhua tus los ua tib yam li no thiab. Los ntawm Yexus Khetos lub npe, amees.