Tus Nqi—thiab cov Koob Hmoov—ntawm Kev Ua Thwj Tim

Thawj Tswj Hwm Monson, peb hlub koj. Koj tau muab koj lub siab thiab siv koj lub dag zog ua txhua txoj hauj lwm uas tus Tswv tau muab rau koj, qhov tseem ceeb yog txoj hauj lwm dawb ceev uas koj ua tam sim no. Tag nrho cov Ntseeg ua koj tsaug rau koj txoj kev pab ruaj nrees thiab koj txoj kev rau siab ua hauj lwm tsis tu tsis tseg.

Kuv qhuas thiab txhawb nqa txhua tus uas yuav tsum sawv khov kho nyob hauv lub caij nyoog kawg no, kuv hais rau txhua tus thiab qhov tseem ceeb kuv hais rau cov tub hluas ntxhais hluas ntawm lub Koom Txoos hais tias yuav muaj ib hnub uas nej yuav tsum tiv thaiv rau nej txoj kev ntseeg los yog tej zaum nej yuav raug kev tsim txom vim nej yog mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Thaum ntawd nej yuav tsum muaj siab tuab thiab kev ua siab zoo.

Piv txwv hais tias, tsis ntev tas los ib tug ntxhais txib sau ntawv rau kuv hais tias: “Kuv tus khub thiab kuv wb pom ib tug txiv neej zaum saum ib lub rooj noj su nyob rau hauv plawv zos. Thaum wb tuaj ze zuj zus nws, nws tsa muag pom wb ob daim npe qhia tias wb yog ntxhais txib. Nws lub ntsej muag nyaum heev, es nws sawv tsees thiab tsa sab tes xav ntaus kuv. Kuv khoov tam sim ntawd, tiam sis nws nto nws cov zaub mov lo kuv tas thiab pib hais lus phem kawg nkaus cem wb. Wb tig twj ywm rov qab mus tsis hais dab tsi. Thaum kuv tseem tab tom so cov zaub mov ntawm kuv lub ntsej muag, ib lub qos los raug tom qab ntawm kuv taub hau. Tej lub sij hawm kev ua ntxhais txib yog ib qho nyuaj heev vim thaum ntawd kuv xav tig rov qab mus, tuav tus txiv neej me ntawd, thiab hais tias, ‘UA CAS KOJ UA LI NTAWD!’ Tiam sis kuv tsis tau ua li ntawd.”

Kuv xav hais rau tus ntxhais txib rau siab no hais tias, me ntxhais, koj twb txo hwj chim koom nrog ib co poj niam thiab txiv neej uas muaj npe uas tau ua ib yam li tus yaj saub Yakhauj hauv Phau Ntawv Maumoos hais, “ntsuas [Khetos] txoj kev tuag, thiab los kwv nws tus ntoo khaub lig thiab los nyiaj ntiaj teb txoj kev txaj muag.”¹

Yakhauj tus tij laug Nifais sau ntawv txog Yexus hais tias: “Thiab tej neeg ntiaj teb, vim yog lawv txoj kev tsis ncaj, yuav txiav txim rau nws zoo li ib yam uas tsis muaj nuj nqis dab tsi; yog li ntawd lawv thiaj muab nws nplawm thiab nws ua siab ntev nyiaj; thiab lawv muab nws ntaus, thiab nws ua siab ntev nyiaj. Muaj tseeb tiag, lawv nto qaub ncaug rau nws, thiab nws ua siab ntev nyiaj vim yog nws txoj kev hlub thiab nws txoj kev ua siab ntev rau noob neej.”²

Ib yam li tus Cawm Seej raug, twb muaj ntau tus uas xyeej cov yaj saub thiab cov thwj tim, cov tub txib thiab cov mej zeej nyob hauv txhua tiam neeg—lawv xyeej cov uas tau siv zog hwm Vajtswv txoj kev hu kom lawv txhawb nqa tib neeg pab lawv taug “ib txoj kev zoo dua.”³

Tus uas sau phau Henplais nug hais tias, “Kuv yuav hais dab tsi ntxiv txog [lawv]?

“[Cov] uas … ua rau tsov ntxhuav rua tsis taus qhov ncauj,

“Tua tau cov hluav taws uas cig hlob hlob, khiav dim hniav ntaj hniav riam, … muaj tswv yim ua tsov ua rog, … tawm tsam yeej lwm haiv neeg cov tub rog …

“[Pom] lawv tej neeg uas tuag lawm sawv rov qab los … [thiab] muaj qee leej raug kev tsim txom …

“Thiab … raug luag thuam thiab raug luag nplawm, … raug luag muab saw hlau khi thiab cia luag muab kaw rau hauv tsev loj cuj:

“Muaj qee leej raug luag muab pob zeb ntaus, … raug luag muab kaw kaw ua ob ya, raug luag muab ntaj tua: … hnav tawv yaj tawv tshis mus rau ub rau no; tsis muaj noj tsis muaj haus, txom nyem thiab raug luag tsim txom kawg li;

“([Cov uas] lub ntiaj teb no tsis phim rau lawv nyob:) … mus nyob tom tej roob moj sab qhua thiab pem tej roob, thiab nyob hauv tej qhov zeb qhov tsua thiab khawb qhov av nyob.”⁴

Nyaj cov tim tswv saum ntuj ceeb tsheej quaj thaum lawv sau ntawv txog tus nqi ua ib tug thwj tim nyob hauv ib lub ntiaj teb uas tawm tsam Vajtswv cov lus txib. Tus Cawm Seej Nws tus Kheej twb los kua muag txog cov uas raug xyeej thiab raug tua tuag thaum lawv ua Nws txoj hauj lwm tau ntau pua xyoo. Thiab thaum ntawd Nws twb raug xyeej thiab raug tua tuag ib yam.

Yexus hais tias, “Yeluxalees, Yeluxalees! Koj muab cov yaj saub tua pov tseg, koj muab pob zeb ntaus cov uas Vajtswv txib los qhia koj! Muaj ntau zaus kuv twb yuav muab koj cov pej xeem los puag, ib yam li tus poj qaib cuab nws cov me nyuam los puag rau hauv nws ob sab qab tis, tiam sis koj tsis cia kuv ua li ntawd!

“Nim no koj lub tsev yuav raug muab tso tseg nyob qhuav nquas cia.”⁵

Los ntawm cov vaj lug kub no yog ib zaj xov rau txhua tus tub hluas thiab ntxhais hluas ntawm lub Koom Txoos. Tej zaum nej xav seb puas muaj nqi yog tias nej rau siab coj ncaj ncees nyob hauv tsev kawm ntawv qib siab los yog mus ua tub txib thaum lwm tus thuam nej txoj kev ntseeg uas nej saib rau nqi los sis puas muaj nqi yog tias nej siv zog tawm tsam ntau yam nyob hauv peb sawm fem thaum qee leej thuam cov uas ua neej raws li kev teev ntuj. Qhov no muaj nqi heev, vim yog tsis ua li no ces peb tej “tsev” yuav raug muab tso tseg “nyob qhuav nquas cia”—tib neeg yuav nyob qhuav nquas cia, tsev neeg yuav nyob qhuav nquas cia, zej zog yuav nyob qhuav nquas cia, thiab tej haiv neeg yuav nyob qhuav nquas cia.

Yog li ntawd peb ris lub nra ntawm cov uas Vajtswv hu kom tshaj tawm zaj xov ntawm tus Mexiyas. Tej lub sij hawm Vajtswv cov tub xa xov qhia, yaum, thiab txhawb nqa tib neeg (qhov ntawd yog qhov zoo ntawm kev ua ib tug thwj tim), tiam sis tej lub sij hawm cov tub xa xov no txhawj, ceeb toom, thiab quaj (qhov ntawd yog qhov nyuaj ntawm kev ua thwj tim). Lawv paub tseeb hais tias txoj kev uas mus rau thaj av uas tau cog lus tseg uas muaj “mis nyuj thiab zib ntab nplua mias”⁶ yeej nyob ntawm lub Roob Xinais, uas muaj ntau yam uas peb yuav tsum ua thiab yuav tsum tsis txhob ua.⁷

Tiam sis, niaj hnub no tib neeg tsis nyiam cov tub xa xov txog Vajtswv tej lus txib zoo dua li lawv nyiam cov uas nyob puag thaum ub; ob tug ntxhais txib uas raug neeg nto qos yaj ywm rau nkawd muaj peev xwm ua tim khawv txog qhov no. Kev ntxub yog ib lo lus phem heev, tiam sis muaj tej tug niaj hnub no uas yuav hais ib yam li Ahaj hais tias, “Kuv ntxub [tus yaj saub Mikhayas] heev, vim nws yeej ib txwm tsis cev tej lus zoo rau kuv li; nws tsuas yog pheej cev tej lus phem rau kuv xwb.”⁸ Kev ntxub ib tug yaj saub tej lus ncaj zoo li no ua rau Anpinadais raug tua tuag. Nws hais rau Vaj Ntxwv Nau-as: “Vim kuv tau qhia nej qhov tseeb nej thiaj npau taws rau kuv … Vim kuv tau hais Vajtswv txoj lus nej thiaj tau txiav txim rau kuv tias kuv yog neeg vwm”⁹ los yog cov neeg hais tias cov yaj saub yog neeg siab me, cia txiv neej kav, ntxub lwm tus, siab tsis zoo, nyob raws li qhov qub thiab yog neeg laus.

Yeej zoo li tus Tswv Nws tus Kheej quaj nyiav rau tus yaj saub Yaxayas hais tias:

“[Cov me nyuam no tsis kam] … mloog tus Tswv tej lus qhuab qhia:

“Lawv hais rau [cov pom tau hais tias, Tsis txhob pom; thiab rau cov yaj saub hais tias], Tsis txhob qhia tej qhov tseeb rau peb paub, qhia tej uas peb nyiam rau peb mloog xwb, [qhia tej lus dag rau peb]:

“Cia li khiav mus thiab tsis txhob thaiv peb kev, peb tsis xav hnov nej hais txog cov Ixayees tus Vajtswv uas dawb huv hlo li.”¹⁰

Kuv cov phooj ywg hluas, tu siab uas niaj hnub no yog tib neeg xav muaj ib tug vaj tswv, lawv xav muaj cov vaj tswv uas tsis hais kom yus ua ntau yam, cov vaj tswv uas ua tsis hais kom yus ua tej yam nyuaj thiab tsis coj kev, cov vaj tswv uas nplij peb lub siab li ib tug me nyuam, ua rau peb luag nyav, ces qhia peb mus thiab de paj.¹¹

Li no mas yeej yog tib neeg tsim Vajtswv raws li tib neeg tus yam ntxwv! Tej lub sij hawm—thiab zoo li yog qhov tsis yog loj tshaj plaws—cov neeg no hais tias Yexus yog ib tug Vajtswv uas ua rau neeg “txaus siab”. Tiag los? Lawv hais txog tus uas tau hais tias tsis yog peb yuav tsum ua raws li cov lus txib xwb, tiam sis peb yuav tsum tsis txhob xav txog qhov uas peb yuav tsis ua raws li cov lus txib. Thiab yog tias peb xav tias peb yuav ua txhaum, peb twb tsis ua raws li cov lus txib nyob hauv peb lub siab lawm. Qhov no puas zoo li cov lus qhuab qhia uas ua rau neeg “txaus siab”, uas yooj yim ua thiab tib neeg nyiam?

Thiab hais dab tsi txog cov uas xav saib kev txhaum los yog ua txhaum me me xwb? Yexus hais lus piv txwv hais tias, yog nej qhov muag ua txhaum, cia li muab sab qhov muag ntawd kaus pov tseg. Yog nej sab tes xis ua rau nej ua txhaum, ces koj cia li muab sab tes ntawd txiav pov tseg.¹² Nws ceeb toom cov uas xav tias Nws hais txog tej yam uas nplij neeg lub siab hais tias, “Kuv tsis coj kev thaj yeeb los, tiam sis kuv coj rab ntaj los.”¹³ Peb yeej paub yog vim li no, ib zaj lus qhia dhau ib zaj, cov neeg hauv zej zog tau “thov kom nws tawm hauv lawv cheeb tsam ntawd mus.”¹⁴ Peb yeej paub yog vim li no, qhov txuj ci tseem ceeb dhau qhov txuj ci tseem ceeb, lawv hais tias Nws lub hwj chim tsis yog los ntawm Vajtswv los tiam sis yog los ntawm tus dab phem.¹⁵ Peb yeej paub tias ntsiab lus uas hais tias “Yexus yuav ua li cas?” tsis yog ib qho uas tib neeg nyiam.

Thaum Nws ua Nws txoj hauj lwm qhuab qhia, Yexus hais tias, “Nej ib leeg yuav tsum hlub ib leeg, ib yam li kuv hlub nej.”¹⁶ Xwv kom lawv yuav to taub zoo txog txoj kev hlub zoo li ntawd, Nws hais tias, “Yog nej hlub kuv, ua raws li kuv cov lus txib,”¹⁷ thiab “leej twg … tsis kam ua raws li nqe lus uas me dua hauv txoj kev cai no thiab nws tseem qhia lwm tus kom tsis txhob ua raws li ntawd, … tus ntawd yog tus uas yau dua ntais uas nyob saum ntuj ceeb tsheej.”¹⁸ Qhov uas peb xav tau tshaj nyob hauv lub ntiaj teb no yog txoj kev hlub zoo li Yexus Khetos vim yeej yuav tsum muaj kev ncaj ncees nrog txoj kev hlub ntawd. Yog li ntawd yog tias peb lub ntsiab lus yog kev hlub, ib yam li yuav tsum ua, ces raws li tus uas yeej yog txoj kev hlub tej lus, peb yuav tsum tso kev txhaum tseg thiab muab qhov uas lwm tus txhawb nqa kev txhaum tso tseg ib yam thiab. Yexus to taub meej txog qhov uas peb feem coob niaj hnub no tsis nco qab: muaj ib qho txawv ntawm lo lus txib kom zam txim rau kev txhaum (uas Nws yeej muaj cai ua nyob mus ib txhis) thiab lus ceeb toom kom txhob txhawb nqa kev txhaum (uas Nws yeej tsis tau ua ib zaug li).

Kuv cov phooj ywg, tsis hais kuv cog phooj ywg hluas los yog, cia li zoo siab. Yexus Khetos txoj kev hlub dawb huv uas los ntawm kev coj ncaj ncees yuav hloov neeg ntiaj teb. Kuv ua tim khawv tias Yexus Khetos txoj moo zoo uas muaj tseeb thiab muaj txoj sia twb nyob hauv lub ntiaj teb thiab nej yog cov mej zeej ntawm Nws lub Koom Txoos tseeb uas muaj txoj sia, es nej siv zog qhia lwm tus txog txoj moo zoo no. Kuv ua tim khawv txog txoj moo zoo thiab lub Koom Txoos ntawd, qhov tseem ceeb ua tim khawv txog cov yuam sij pov thawj hwj uas tau muab txum tim rov qab los uas qhib lub hwj chim thiab lub hwj huam ntawm cov kab ke cawm seej. Kuv paub tias tau muab cov yuam sij txum tim rov qab los thiab rov qab muaj cov kab ke dua nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg; kuv paub qhov no tshaj kuv paub tias kuv sawv ntawm sam thiaj no thiab nej zaum hauv lub rooj sab laj no.

Cia li nyob ruaj nrees. Rau siab ua raws li txoj moo zoo txawm lwm tus nyob ib puag ncig nej tsis ua li ntawd hlo li. Cia li tiv thaiv nej tej kev ntseeg nrog kev ua siab zoo thiab kev khuv leej. Tau ntev cov suab uas txais kev tshoov siab, tsis hais cov uas nej yuav mloog hauv lub rooj sab laj no thiab lub suab uas nej nyuam qhuav mloog uas yog Thawj Tswj Hwm Thomas S. Monson, lawv taw kev rau nej mus rau txoj kev ua Yexus Khetos cov thwj tim. Yog ib txoj kev ti, thiab ib txoj kev nqaim uas tsis cia nej ua ntau yam, tiam sis nej yuav zoo siab taug txoj kev ntawd, “nrog txoj kev ntseeg Khetos [uas khov kho] … ib txoj kev cia siab uas ci kawg nkaus, … thiab ib txoj kev hlub ntawm Vajtswv thiab ntawm tib neeg sawv daws.”¹⁹ Yog nej ua siab tuab taug txoj kev no, nej yuav muaj kev ntseeg ruaj nrees, nej yuav muaj kev nyab xeeb txawm cua phem tshoob nej mus, txawm raug tej xub nyob hauv khaub zig cua, thiab nej yuav muaj peb tus Txhiv Dim uas muaj zog li pob zeb, es yog tias nej ua thwj tim nyob saum lub pob zeb no, nej yeej yuav tsis vau.²⁰ Los ntawm Yexus Khetos lub npe dawb ceev, amees.