Xav Tau: Cov Tes thiab tej Siab uas Yuav Ua Hauj Lwm Kom Ceev Me Ntsis

Cov viv ncaus, peb hlub nej heev! Thaum peb saib daim video zoo kawg no, nej puas pom nej tes ncav mus pab lwm tus taug txoj kev khi lus? Kuv tau xav txog tus ntxhais uas nyob rau hauv lub Koom Haum Me Nyuam Yaus hu ua Brynn uas muaj ib txhais tes xwb tiam sis nws siv sab tes ntawd ncav mus foom foob hmoov rau nws tsev neeg thiab cov phooj ywg—Ib Tsoom Haiv Neeg Ntseeg thiab cov uas ntseeg lwm txoj kev teev ntuj tib si. Nws zoo nkauj heev puas yog? Thiab nej yeej zoo nkauj thiab! Cov viv ncaus, peb ncav tau tes pab thiab tej lub siab los ua hauj lwm rau Leej Txiv Saum Ntuj Ceeb Tsheej txoj hauj lwm.

Ib yam li peb cov viv ncaus uas muaj kev ntseeg hauv phau vaj lug kub, xws li Evas, Xaliyas, Maiv Liag thiab ntau tus ntxiv, lawv paub lawv yog leej twg thiab lawv lub hom phiaj, Brynn paub tias nws yog Vajtswv ib tug ntxhais.¹ Peb kuj paub tias peb los saum ntuj ceeb tsheej los ua Vajtswv cov ntxhais thiab Nws muaj hauj lwm tseem ceeb heev rau peb ua.

Tus Cawm Seej qhia tias, “Yog leej twg txaus siab ua raws li Vajtswv lub siab nyiam, tus ntawd yuav paub hais tias tej lus uas kuv qhia.”² Peb yuav tsum ua li cas es peb thiaj li ”yuav tau rov qab nrog nws nyob”?³ Peb kawm tau ntawm zaj dab neeg uas tus tub hluas uas nplua nuj noog Yexus hais tias nws yuav tsum ua dab tsi es nws thiaj yuav tau lub neej nyob mus ib txhis.

Yexus teb hais tias, “Yog koj xav tau txoj sia, koj yuav tsum coj raws li Vajtswv txoj kev cai.”

Tus tub hluas noog tias Nws yuav tsum khaws cov lus qhia twg. Yexus ceeb toom nws txog Kaum Nqi Kev Cai uas peb paub txog.

Ces tus tub hluas hais tias, “Tej ko, kuv twb coj txhua nqe huv tib si lawm. Tseem tshuav yam twg uas kuv tsis tau ua thiab?”

Yexus hais tias, “Yog koj xav ua tus uas zoo kawg nkaus, koj cia li mus muab koj tej qhov txhia chaw muag huv tib si, thiab muab cov nyiaj ntawd faib rau cov neeg pluag, koj thiaj yuav yog tus uas nplua nuj nyob saum ntuj ceeb tsheej; tom qab ntawd, koj cia li tuaj nrog kuv mus.”⁴

Yexus hais kom nws los pab ua Yexus txoj hauj lwm—los ua ib tug thwj tim. Peb tej hauj lwm los yeej yog ib yam li ntawd thiab. Peb yuav tsum tso tej yam ntawm lub ntiaj teb no tseg, … tuav ruaj khov rau peb tej kev khi lus,⁵ thiab mus cuag Yexus thiab raws Nws qab. Cov thwj tim yeej ua li ntawd!

Cov viv ncaus, tsis txhob xav ntau ntau txog tus Cawm Seej cov lus uas Nws tau hais rau tus tub hluas uas nplua nuj txog txoj kev zoo tag nrho. Lo lus zoo tag nrhono yog los ntawm cov lus Kilis uas txhais tau tias ”tiav tag nrho.” Thaum peb rau siab taug txoj kev khi lus, peb mam li pib zoo tag nrho zuj zus mus.

Ib yam li tus tub hluas nplua nuj uas nyob rau lub sij hawm uas Yexus tseem nyob hauv ntiaj teb, tej zaum peb raug ntxias kom peb tsum los sis tig rov qab vim xav tias peb ua tsis tau peb tus kheej. Thiab peb xav yog lawm! Peb yeej ua tsis tau tej yam nyuaj li no peb tus kheej xwb yog tsis muaj kev pab. Txoj kev pab yog los ntawm Yexus Khetos txoj Kev Theej Txhoj, tus Vaj Ntsuj Plig Dawb Huv, thiab cov uas ncav tes los pab peb.

Ib tug viv ncaus uas tseem yog nkauj ntsuab hais lus tim khawv tias dhau ntawm txoj Kev Theej Txhoj, nws thiaj tau dag zog los siv nws txhais tes thiab lub siab los pab tu nws tus viv ncaus plaub tug me nyuam uas tau tso tseg rau nws tu vim nws tus viv ncaus mob khas xawj es tuag lawm. Qhov no ua rau kuv nco qab txog ib yam uas Txwj Laug Neal A. Maxwell hais tias: “Txhua yam uas yooj yim ces lub Koom Txoos twb ua tas lawm. Txij hnub no mus ces, txoj kev sim raws Yexus qab yuav raug kev sim siab loj heev.”⁶ Nej tau los rau hauv ntiaj teb lub sij hawm no vim nej yog leej twg thiab tau twb npaj ua tes dej tes num no lawm! Txawm Dab Ntxwg Nyoog sim ntxias peb los peb yeej paub tias peb yog Yexus Khetos cov thwj tim ntag!

Maumoos yeej yog ib tug thwj tim rau ib lub sij hawm uas, … tsis tau muaj kev phem kev qias ntau npaum li ntawd dua nyob rau hauv cov neeg Lihais.”⁷ Nej puas xav nyob rau hauv lub sij hawm ntawd? Tiam sis Maumoos tseem ua siab loj hais tias, “Saib seb, kuv yog Yexus Khetos, Vajtswv Leej Tub, ib tug thwj tim.”⁸

Nej puas hlub Maumoos? Nws paub tias nws yog leej twg thiab nws txoj kev txib yog ua dab tsi thiab yeej tsis tau xav txog tej kev phem uas nyob puag ncig nws. Nws pom tias, nws txoj kev txib yog ib qho khoom plig.⁹

Nej sim xav seb, tau koob hmoov li cas vim nej ua tus Tswv cov thwj tim, es thiaj hais tau tias, “Saib seb, kuv yog Yexus Khetos, Vajtswv Leej Tub, ib tug thwj tim!”

Kuv nyiam zaj dab neeg uas Thawj Tswj Hwm Boyd K. Packer piav txog ib tug viv ncaus uas raug luag thuam vim nws ua raws li tus yaj saub hais es tau khaws zaub mov cia. Tus uas thuam nws hais tias yog tias muaj teeb meem ces, nws cov thawj coj yuav txib kom nws muab cov zaub mov rau lwm tus neeg. Nws hais lus zoo zoo thiab ua ib tug thwj tim thaum nws teb hais tias, “Tsuas kuv muaj zaub mov uas kuv nqa tau los yeej zoo.”¹⁰

Kuv hlub cov poj niam hauv lub Koom Txoos, cov hluas thiab cov laus tib si. Kuv tau pom nej lub zog. Kuv tau pom nej txoj kev ntseeg. Nej yeej muaj ib yam pub rau lwm tus thiab zoo siab hlo muab tej no. Nej ua tej no kom hawm tau Vajtswv thiab kom nws tau yeeb koob, yeej tsis xav txog tias seb lawv puas yuav tau kev qhuas, thiab seb nej yuav txais yam twg.¹¹ Cov thwj tim yeej ua li ntawd!

Kuv nyuam qhuav ntsib ib tug poj niam hauv teb chaws Philipines uas muaj ib tse neeg uas tsis tshua rau siab mus lub Koom Txoos lawm thaum nws muaj 7 xyoos xwb, ces nws taug ib txoj kev loj uas muaj tsheb mus mus los los ntau heev txhua lub lim piam mus rau lub koom txoos. Nws piav tias thaum nws muaj 14 xyoos nws txiav txim tias nws yuav ua raws li tej kev khi lus kom nws thiaj li yuav tsim nyog tu nws tsev neeg hauv ib lub tsev ”uas muaj lub hwj chim pov thawj hwj.”¹² Txoj kev pab ib lub tsev zoo tshaj plaws, tas sim no los sis yav tom ntej, yeej yog kom ua raws li tej kev khi lus, uas peb tau cog tseg ib leeg rau ib leeg thiab rau Vajtswv.

Cov thwj tim yeej ua li ntawd!

Ib tug viv ncaus Nyij Pooj uas muaj kev ntseeg thiab nws tus txiv tuaj saib peb qhov chaw qhia txoj moo zoo hauv Kaus Lim teb. Nws tsis txawj hais lus Kaus Lim thiab hais tau lus As Kiv me me xwb, tiam sis nws zoo siab hlo siv nws tej txuj ci pab ua tus Tswv txoj hauj lwm. Cov thwj tim yeej ua li ntawd! Nws qhia peb cov tub txib muaj ib daim ntawv tais ua ib qho ncauj uas qhib thiab kaw tau. Ces nws hais ob peb lo lus As Kiv uas nws paub kom cov tub txib kom ”qhib lawv qhov ncauj” es qhia txoj moo zoo—yog ib zaj lus qhia uas lawv yeej nco ntsoov, kuv los nco ntsoov thiab.

Xav ib na this txog tias koj thiab kuv sawv los ua ke nrog ntau plhom tus viv ncaus thiab nus hauv Nws lub Koom Txoos, es ua siab loj mus ua li cov thwj tim ua—pab thiab hlub li tus Cawm Seej. Nej xav tias ua Yexus Khetos ib tug thwj tim txhais tau li cas?

Ntau txhiab leej tus thwj tim tau hnav Pawg Neeg Maumoos uas Ncav Tes Pab cov tsho thiab tau zoo siab hlo pab thaum muaj teeb meem vim lawv xav us Yexus Khetos cov thwj tim. Tiam sis yeej muaj ntau txoj kev pab lwm tus vim ua cov thwj tim zoo. Peb kuj xav txog txoj kev pab ntawm sab ntawm ntsuj plig thaum muaj tej daim pab uas hais tias “xav tau kev pab” los cawm tib neeg kom dim:

• Xav tau kev pab: cov niam txiv uas qhia lawv cov me nyuam txog txoj moo zoo uas tseeb tiag

• Xav tau kev pab: cov tub ntxhais, cov viv ncaus thiab kwv tij, cov phauj thiab dab laug, cov neej tsa, thiab pog thiab yawg, thiab cov phooj ywg zoo uas pab ncav tes rau lwm tus neeg uas taug txoj kev khi lus kom ncaj

• Xav tau kev pab: cov uas mloog tus Vaj Ntsuj Plig Dawb Huv tej kev tshoov siab thiab ua raws li tej kev tshoov siab ntawd

• Xav tau kev pab: cov uas niaj hnub ua tej yam me me kom ua raws li txoj moo zoo qhia

• Xav tau kev pab: cov uas ua hauj lwm rau tsev neeg keeb kwm thiab hauv lub tuam tsev pab khi tej tsev neeg kom nyob tau ua ke tas mus ib txhis

• Xav tau kev pab: cov tub txib thiab cov mej zeej mus tshaj tawm “txoj moo zoo”—uas yog Yexus Khetos txoj moo zoo

• Xav tau kev pab: cov neeg ntseeg mus pab cov uas plam lawv txoj kev ntseeg lawm

• Xav tau kev pab: cov uas khaws tau tej kev khi lus kom ntseeg ruaj nrees thiab ua qhov tseeb

• Xav tau kev pab: cov uas yog Yexus Khetos cov thwj tim tiag tiag

Ntau xyoo tas los lawm, Txwj Laug M. Russell Ballard tau hu cov viv ncaus hauv lub Koom Txoos thaum nws hais tias:

“Txij li tas sim no mus txog rau thaum tus Tswv rov qab los, Nws xav kom txhua tus poj niam hauv txhua tsev neeg, hauv txhua pawg ntseeg, hauv txhua koog zej zog, hauv txhua lub teb chaws uas coj tau ncaj ncees kom tsa tes thiab hais tias, ‘Kuv nyob ntawm no, xa kuv mus.’

“Kuv lo lus noog yog hais tias, ‘Nej puas yuav ua tau ib tug poj niam ntawd?’”¹³

Kuv cia siab tias peb sawv daws yuav teb tau nrov tsawv tias “Yog!” Kuv xaus nrog lub Koom Haum Me Nyuam Yaus ib zaj nkauj:

Vim peb yog cov thwj tim tiag tiag, thov kom peb muab lub siab xav pab thiab tej tes los ua Nws txoj hauj lwm kom ceev me ntsis. Tsawm tias peb zoo li Brynn es muaj ib sab tes xwb los xij. Yeej tsis muaj teeb meem dab tsi txawm peb tsis tau zoo tag nrho. Peb yog cov thwj tim uas yuav ncav tes ib leeg pab ib leeg taug kev. Peb txoj kev ua viv ncaus ncav mus rau txhua tiam neeg rau cov viv ncaus uas rau siab ntseeg uas tau nyob thaum ub. Peb cov viv ncaus sawv daws, yuav tsum ua ib lub siab nrog cov yaj saub, cov neeg pom tau, thiab cov neeg qhia kev tshwm sim uas tuav cov yuam sij ntawm lub pov thawj hwj, peb yuav cov thwj tim, cov tub qhe uas zoo siab hlo ncav tes thiab muaj lub siab xav ua txoj hauj lwm pab cawm tib neeg dim kom ceev me ntsis. Yog peb ua li no, peb yuav rais los mus ua neeg zoo li tus Cawm Seej. Kuv hais lus tim khawv li no los ntawm Yexus Khetos lub npe, amees.