Zoo Siab Txais Tos Nej rau lub Tuam Rooj Sab Laj

Kuv cov kwv tij thiab cov muam, kuv zoo siab tos txais nej rau lub rooj sab laj nyob thoob plaws lub ntiaj teb ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Peb yog ib tsev neeg uas sib sau ua ke, muaj 15 phlom tus neeg, uas koom siab ntawm peb txoj kev ntseeg thiab peb txoj kev xav mloog thiab kawm los ntawm tej zaj lus uas yuav hais rau peb.

Rau lub hli tas los no zoo li ib vuag dua ntais lawm vim tsis muaj dab tsi tab kaum lub Koom Txoos tej hauj lwm uas mus tom ntej. Ib hlis tas los kuv tau muaj cib fim muab lub Tuam Tsev Gilbert Arizona fij tseg; yog ib lub tsev zoo nkauj kawg. Hmo ua ntej tau muab lub tuam tsev fij tseg, lawv ua yeeb yam txog kab lig kev cai nyob rau hauv Discovery Park nyob ze lub tuam tsev. Kaum ob txhiab tus tub hluas ntxhais hluas ua yeeb yam tau 90 feeb. Lawv txoj kev seev cev, hu nkauj, thiab qoj nkauj puav leej zoo kawg.

Ntshe qhov chaw no qhuav heev, thiab kuv ntseeg tias lawv tau thov Vajtswv ntau tau ob peb lim tiam kom ntuj los nag. Tiam sis, ntuj los nag ua ntej kiag lawv ua yeeb yam thiab tseem los nag mus txog thaum lawv ua yeeb yam tiav lawm! Txawm cov tub hluas ntxhais hluas ntub heev thiab no no vim cua txias, peb txhua tus tau hnov tus Tswv tus Ntsuj Plig nyob ntawd. Cov tub hluas ntxhais hluas uas zoo siab thiab cia siab heev tau ua yeeb yam zoo kawg txog lub ntsiab uas yog “Ua Neej Raws Li Kev Ntseeg”—cia li xav txog lub ntsiab no: “Ua Neej Raws Li Kev Ntseeg.” Txawm cua txias thiab ntuj los nag, kev ua yeeb yam no ua rau cov tub hluas ntxhais hluas no muaj kev ntseeg thiab tshoov lawv lub siab thiab lawv yeej yuav hais txog qhov no rau lawv cov me nyuam thiab cov xeeb leej xeeb ntxwv thaum yav tom ntej.

Hnub tom qab ntawd, peb tau muab lub Tuam Tsev Gilbert Arizona fij tseg. Yog lub tuam tsev thib 142 ntawm lub Koom Txoos. Tiam sis tsis zoo li hmo ua ntej, hnub ntawd zoo nkauj thiab tshav ntuj. Tej tuas muab lub tuam tsev fij tseg twb tshoov peb lub siab. Thawj Tswj Hwm Henry B. Eyring, Txwj Laug thiab Muam Tad R. Callister, Txwj Laug thiab Muam William R. Walker, thiab Txwj Laug thiab Muam Kent F. Richards lawv puav leej nrog kuv nyob.

Thaum lub Tsib Hlis Ntuj yuav muab lub Tuam Tsev Fort Lauderdale Florida fij tseg. Muaj lwm lub tuam tsev uas yuav ua tiav thiab muab fij tseg xyoo no thiab. Thaum xyoo 2015 peb npaj siab peb yuav muab ntau lub tuam tsev tshiab nyob rau ub rau no ua tiav thiab muab fij tseg. Yuav ua raws li tus txheej txheem no mus ntxiv. Thaum peb muab tag nrho cov tuam tsev uas tau tshaj tawm lawm ua tiav, peb yuav muaj 170 lub tuam tsev nyob thoob plaws lub ntiaj teb.

Txawm peb siv zog muab tej tuam tsev uas tau tshaj tawm ua tiav thiab txawm peb tsis tshaj txog tej lub tuam tsev tshiab, peb tseem yuav sim seb yuav tsum ua li cas thiab nrhiav tej qhov chaw kom ua tau tej tuam tsev. Nyob hauv tej lub tuam rooj sab laj tom ntej mam li tshaj tawm txog tej ntawd. Peb yog ib haiv neeg uas ua tej tuam tsev thiab mus rau lub tuam tsev.

Nim no, cov kwv tij thiab cov muam, peb yeej zoo siab mloog tej xov xwm uas cov thawj coj yuav hais lus rau peb hnub no thiab tag kis. Lawv cov uas yuav hais lus rau peb tau thov kom ntuj pab thiab coj lawv kev thaum lawv tseem npaj cov lus uas lawv yuav hais.

Thov kom peb—peb txhua tus, nyob no thiab nyob lwm qhov chaw—muaj tus Tswv tus Ntsuj Plig nrog nraim peb nyob thiab tshoov peb lub siab kom peb thiaj mloog tau thiab kawm tau. Los ntawm Yexus Khetos lub npe dawb ceev, amees.