Cia Li Muaj Siab Loj Mus Sawv ntawm Vajtswv lub Rooj Zaum

Nej cia li ntsuas ib mus txog kaum, seb nej muaj siab loj npaum li cas los mus sawv ntawm Vajtswv xub ntiag? Nej puas muaj lus tim khawv hais tias, ua ib tug Neeg Ntseeg Hauv Hnub Nyoog Kawg, tej yam nej tab tom pab ua txaus rau nej txais txoj sia nyob mus ib txhis? Nej puas hais tau hais tias Leej Txiv Saum Ntuj Ceeb Tsheej txaus siab rau nej? Nej yuav xav li cas yog ib feeb saum nov tus Cawm Seej yuav muab nej xam phaj? Nej puas yuav xav txog nej tej kev txhaum, kev tu siab, thiab kev ua tsis taus xwb, los sis nej puas yuav tos tsis taus thiab muaj kev xyiv fab? Nej puas yuav ntsia Nws los sis tsis kam? Nej puas yuav ua xyem xyav nyob ntawm qhov rooj los sis ua siab loj mus kiag ntawm Nws xub ntiag?

Thaum tus yeeb ncuab ua tsis tau rau cov Neeg Ntseeg li nej, uas tsis zoo tas huv si tiam sis sim ua zoo, kom nej tso nej kev ntseeg tus Vajtswv uas hlub nej tseg, nws ua siab phem heev sim muab nej txav deb ntawm Vajtswv. Tus yeeb ncuab paub hais tias thaum nej ntseeg tias nej yeej rau siab ua qhov yog nej txoj kev ntseeg Khetos muaj zog tuaj thiab yog ib txoj kev ntseeg uas ua rau tus Tswv muaj kev hlub tshua rau nej thiab ua tej txuj ci tseem ceeb. Vim li ntawd nws sim hais lus dag rau nej tej siab—lus dag hais tias Leej Txiv Saum Ntuj Ceeb Tsheej tu siab rau nej, tias txoj kev Theej Txhoj yuav pab tsis tau nej, tias nej nkim nej lub dag zog xwb, tias txhua leej txhua tus ua zoo tshaj nej, tias nej tsis tsim nyog, thiab ntau yam tsav phem zoo li ntawd.

Yog nej cia tej lus dag no ua rau nej xav tias nej tsis tsim nyog, nej muaj tsis tau siab loj mus sawv ntawm Vajtswv lub rooj zaum. Txawm yog hais tias nej ua li cas, txawm yog nej thov rau yam dab tsi, txawm yog nej muaj kev cia siab li cas rau tej txuj ci, nej yuav muaj kev tsis ntseeg nej tus kheej uas ua kom nej tsis muaj kev cia siab—tsis yog kev cia siab rau Vajtswv xwb, tiam sis kev ntseeg nej tus kheej thiab. Thaum nej ua neej raws li txoj moo zoo li no, tsis zoo rau nej. Qhov tseem ceeb tshaj, tsis tas yuav muaj li no! Yog nej xav hloov—nej yeej hloov tau.

Kuv muaj rau lub tswv yim uas kuv xav qhia uas, yog nej mloog, lawv yuav ua kom tej lus phem no ploj thiab nej yuav rov qab muaj kev thaj yeeb thiab kev siab loj uas nej muaj tau yog nej xav. Txawm yog nej ntsuas nej tus kheej ib txog kaum zoo li cas, yog nej siv Yexus Khetos txoj kev Theej Txhoj, nej yuav ua kom nej txoj kev siab loj ntawm sab ntsuj plig loj hlob tuaj yog nej kam mloog thiab ua. Kuv yuav hais lus hnyav me ntsis, vim kuv xav tsa nej siab thiab tsis ua kom nej tu siab.

1. Nej yuav tsum lav ris rau nej tus ntsuj plig nyob li cas. Tsis txhob lam liam luag tej los sis tej yam uas muaj ib ncig nej, tsis txhob sim piav, thiab txhob hais lus li ub li no qhia vim li cas nej tsis sim mloog lus tiag tiag. Cia li lees hais tias nej yeej “nyob ywj siab thaum uas (nej) tseem ua neej nyob” thiab “muaj kev ywj siab xaiv txoj kev nyob ywj siab thiab txoj sia nyob mus ib txhis” (2 Nifais 2:27). Tus Tswv yeej paub tias nej lub neej muaj li cas tag nrho, tiam sis Nws kuj paub tas huv si hais tias nej puas tsis xav coj raws li txoj moo zoo qhia xwb. Yog muaj li ntawd, cia li lees paub, thiab coj zoo tas li nej coj tau raws li tej yam uas tab tom muaj hauv nej lub neej. Thaum nej lav ris rau seb nej sab ntsuj plig nyob zoo li cas thiab niaj hnub siv Yexus Khetos txoj kev Theej Txhoj nej txoj kev siab loj ntawm sab ntsuj plig yuav loj hlob.

2. Nej yuav tsum lav ris rau nej lub cev nyob li cas. Nej yog ob yam: lub cev thiab tus ntsuj plig (saib Q&K 88:15). Yog nej pub mov rau nej tus ntsuj plig thiab tsis quav ntsej lub cev, uas yog ib lub tuam tsev, ntau zaus nov yuav ua kom nej tus ntsuj plig nyob tsis nyog thiab ua kom nej tsis ntseeg nej tus kheej. Yog nej lub cev tsis muaj zog, yog nej tsis tshua nyiam nej lub cev thiab nej muaj rab peev xwm ua kom nws zoo dua, ces cia li ua! Txwj Laug Russell M. Nelson tau qhia hais tias peb yuav tsum “saib peb lub cev yog peb tus kheej lub tuam tsev” thiab tias peb yuav tsum “saib xyuas tej yam peb noj thiab mus dhia los yog qoj cev kom muaj zog” (“We Are Children of God,”Ensign, Kaum Ib Hlis Ntuj 1998, 87;Liahona, Ib Hlis Ntuj 1999, 103).

Thawj Tswj Hwm Boyd K. Packer qhia tias “peb tus ntsuj plig thiab peb lub cev sib koom ua ke kom peb lub cev yog ib yam raj tes rau peb lub siab xav thiab lub hauv paus rau peb tus cwj pwm” (“The Instrument of Your Mind and the Foundation of Your Character” [Church Educational System fireside, Ob Hlis Ntuj Hnub Tim 2, 2003], 2; speeches.byu.edu). Yog li ntawd, thov nej siv tswv yim zoo thaum nej xaiv noj dab tsi thiab xaiv noj npaum li cas, thiab mus exercise li nej lub cev xav tau thiab yuav tsum ua. Yog nej lub cev ua tau, txiav txim siab hnub no ua tus tswv ntawm nej lub cev thiab pib exercise, tas mus li, raws li nej muaj peev xwm ua, thiab noj mov zoo rau nej lub cev. Nej muaj siab loj ntawm sab ntsuj plig ntau zog tuaj thaum, los ntawm tus Cawm Seej kev pab, nej tus ntsuj plig ua tus tswv ntawm nej lub cev nitaj teb.

3. Cia li kam, zoo siab hlo mloog lus hauv nej lub neej. Cia li lees paub hais tias nej hlub tsis tau Vajtswv yog nej tsis hlub Nws tej lus txib. Tus Cawm Seej txoj kev cai yooj yim to taub: “Yog nej hlub kuv, nej cia li ua raws li kuv tej lus txib” (Yauhas 14:15). Yog nej mloog lus tej thaum xwb nej yuav tau qeeb yam koob hmoov xwb, thiab txawm yog nej xaiv ib yam phem uas tsis phem npaum lwm yam, nej yeej tseem xaiv qhov tsis yog. Nej saib tsis tau ib daim yeeb yam tsis zoo thiab xav hais tias nej tseem tsim txiaj vim nej tsis tau saib ib daim phem heev tshaj. Qhov uas nej mloog ob peb lo lus txib tsis txhais hais tias tsim nyog uas nej tsis quav ntsej ib txhia cov lus txib. Abraham Lincoln hais yog hais tias, “Thaum kuv ua zoo kuv nyob zoo, thaum kuv ua phem kuv nyob tsis zoo” (nyob hauv William H. Herndon thiab Jesse William Weik, Herndon’s Lincoln: The True Story of a Great Life, 3 phau [1889], 3:439). [1889], 3:439).

Thiab, nej cia li ua qhov yog vim nej xav ua zoo. Tus Tswv, uas xav kom nej tau ib lub siab xav ua thiab ib lub hlwb kam ua (saib Q&K 64:34) thiab uas paub nej tej kev xav thiab lub siab xav (saib Q&K 33:1), paub vim li cas nej mus church-paub tias nej lub cev tsuas mus koom xwb los sis nej mus teev tiam tiag tiag. Thaum hnub Sunday nej hu tsis tau nkauj, hais tias “Auj Npanpiloos, Auj Npanpiloos, [kuv] yuav tso koj tseg” ces rov qab mus nrhiav los yog mus ua phem dua tsis ntev tom qab (“Ye Elders of Israel,” Hymns, naj npawb 319). Cia li nco qab ntsoov tias yog nej lam ntseeg tej yam sab ntsuj plig xwb nej yeej yuav tsis zoo siab li. Cia lub Koom Txoos thiab txoj moo zoo uas txum tim rov qab los ua nej lub neej tag nrho, tsis txhob cia nws ua ib qho me hauv nej lub neej uas tib neeg pom xwb. Nim no thaum nej hais tias nej txiav txim siab nej yuav pe hawm tus twg tsuas yog ib cov lus nej hais xwb—yog tias nej tsis ua nej lub neej raws li ntawd (saib Yausuas 24:15). Nej muaj siab loj ntawm sab ntsuj plig ntau zog tuaj thaum nej rau siab, thiab muaj lub siab xav ua zoo, ua ib lub neej tshwj tseg rau Vajtswv txawm yog nej tsis yog neeg zoo tas huv si!

4. Cia li rau siab hloov siab lees txhaum txhua yam thiab sai li sai tau. Vim Yexus Khetos txoj kev Theej Txhoj yog ib yam zoo siv, nej yuav tsum siv nws ntau zaus tas mus li, rau qhov nws yeej tsis muaj hnub kawg. Cia li xav tias Yexus Khetos txoj kev Theej Txhoj thiab txoj kev hloov siab lees txhaum yog ob yam uas nej yuav tsum siv hauv nej lub neej txhua hnub raws li Yexus Khetos tej lus txib. Cia li zoo siab hloov siab lees txhaum tas mus li thiab ua nej lub neej raws li no. Thaum nej ua li no, siab xyuas tias nej tsis txhob laug sij hawm es mam li ua, thiab txhob xav hais tias neeg ntiaj teb yuav txhawb nqa nej ua li no. Ntsia ntsoov nej tus Cawm Seej, xav seb Nws xav txog nej li cas, thiab cia tej uas yuav muaj tshwm sim muaj li ntawd. Nej muaj siab loj ntawm sab ntsuj plig ntau zos tuaj thaum nej kam thiab zoo siab hloov siab lees txhaum, tej yam me thiab loj, thaum nws muaj kiag los ntawm Yexus Khetos txoj kev Theej Txhoj.

5. Cia li rau siab zam txim rau luag. Tus Tswv yuav zam txim rau tus uas Nws yuav zam txim rau, tiam sis peb yuav tsum zam txim rau tag nrho txhua tus (saib Q&K 64:10). Cia li zam txim rau sawv daws, rau txhua yam, hauv txhua lub sij hawm, los yog rau siab sim ua li ntawd, es nej thiaj li muaj kev zam txim hauv nej lub neej. Tsis txhob nco ntsoov tseg tej yam neeg ua phem rau nej, tsis txhob chim sai sai, cia li zam txim rau luag thiab tsis txhob nco qab li lawm, thiab tsis txhob xav tias cov lus txib no tsis yog rau nej. Nej muaj siab loj ntawm sab ntsuj plig ntau zog tuaj thaum nej paub tias tus Tswv paub tias nej tsis xav phem txog lwm tus.

6. Cia li paub tias nej yuav muaj kev sim siab, tej yam uas yuav khuam nej, thiab “tej yam uas nej yuav tsis paub tias yuav tshwm sim” hauv nej lub neej hauv ntiaj teb no. Nco ntsoov tias nej nyob hauv ntiaj teb no xwv kom sim nej siab, kom saib seb nej yuav ua txhua yam uas tus Tswv nej tus Vajtswv yuav txib kom nej ua (saib Anplaham 3:25)—thiab kuv thov ntxiv cov lus no hais tias, “txawm muaj dab tsi hauv nej lub neej los xij.” Ntau txhiab leej ntawm nej cov kwv tij thiab muam tau raug sim siab los sis tab tom raug sim siab tam sim no, es vim li cas nej xav tias nej yuav tsis raug sim siab no? Ib txhia sim siab uas tshwm sim muaj vim nej tsis mloog lus los sis tsis saib xyuas zoo. Ib txhia uas tshwm sim muaj vim luag tsis saib xyuas zoo los sis vim neeg ntiaj teb tsis ua zoo lawm xwb. Thaum muaj tej kev sim siab no, cov uas lawv tus yeeb ncuab pib tshaj tawm hais tias nej tau ua dab tsi tsis zoo lawm, hais tias qhov no yog ib qho kev rau txim, thiab qhia hais tias Leej Txiv Saum Ntuj Ceeb Tsheej tsis hlub nej lawm. Tsis txhob quav ntsej tej ntawd! Tab sis, sim luag ntxhi, ntsia ntsoov saum ntuj, thiab hais tias, “Kuv to taub, tus Tswv. Kuv paub tias qhov no yog dab tsi. Yog ib lub caij sim kuv siab no, puas yog?” Ces koom nrog Nws kom nyiaj mus txog thaum kawg. Nej muaj siab loj ntawm sab ntsuj plig ntau zog tuaj thaum nej lees txais tias “ntau zaus muaj tej kev sim siab thiab kev cov nyom hauv [nej lub neej] vim [nej] ua tej yam uas yog” (Glenn L. Pace, “Crying with the Saints” [Brigham Young University devotional, Kaum Ob Hlis Ntuj Hnub Tim 13, 1987], 2; speeches.byu.edu).

Ib zaug thaum kuv ua tus thawj tswj hwm ntawm qhov chaw tshaj tawm txoj moo zoo hauv Ukraine Kyiv, kuv nug kuv ib tug ntxhais txib uas rau siab ntseeg tshaj vim li cas nws pheej xav qhov phem txog nws tus kheej xwb, vim li cas nws pheej rau txim rau nws tus kheej rau tej yam me me uas tsis muaj nqi. Nws cov lus teb yog ib qho yam ntxwv uas ntau tus xav uas qhia hais tias nws mloog lub suab phiv lawm, thaum nws teb hais tias, “Xwv kom muaj tsis tau lwm tus uas yuav hais tej ntawd rau kuv ua ntej kuv hais.”

Cov kwv tij thiab muam, cov lus ntuas uas kuv hais rau tus ntxhais txib no yog cov lus ntuas uas kuv yuav hais rau nej: cia li lees paub nej tej kev qaug zag thiab kho nws, tiam sis tsis txhob tsis ua dab tsis li vim nej muaj tej ntawd, vim ib txhia ntawd yuav nyob nrog nraim nej mus txog thaum nej ncaim lub ntiaj teb no. Txawm yog nej lub neej zoo li cas nim no, lub sij hawm uas nej kam txiav txim siab xaiv txoj kev hloov siab lees txhaum niaj hnub uas muaj tseeb thiab kev xyiv fab, thaum nej sim ua ib tug neej zoo tshaj, tus Cawm Seej txoj kev Theej Txhoj, yuav nyob nrog nraim nej thiab lawv nej mus rau txhua qhov chaw uas nej mus. Thaum nej ua neej li no, nej yuav “niaj hnub tau ib txoj kev zam nej tej kev txhaum” (Mauxiyas 4:12) txhua lub teev ntawm txhua hnub, txhua ib pliag ntawm txhua feeb, thiab vim li ntawd nej yuav huv puv npo thiab Vajtswv yuav txaus siab rau nej txhua lub sij hawm.

Hnub no los yog tsis ntev tom ntej, nej muaj lub cib fim, yog nej xav tau, los paub rau nej tus kheej tias, nej ua Vajtswv zoo siab txawm tias nej tsis zoo tag nrho. Kuv ua tim khawv txog ib tug Cawm Seej uas hlub peb uas xav kom peb ua raws li cov lus txib hauv peb lub neej. Kuv ua tim khawv txog ib tug Cawm Seej uas hlub peb uas tos tsis taus muab Nws txoj kev hlub tshua rau peb. Kuv ua tim khawv txog ib tug Cawm Seej uas hlub peb uas zoo siab heev thaum peb nyob ntsiag to thiab zoo siab niaj hnub siv Nws txoj kev Theej Txhoj vim peb paub tias peb xaiv txoj kev yog. Kuv ua tim khawv txog ib tug Cawm Seej uas hlub nej uas tos tsis taus kom nej muaj siab loj txaus mus sawv ntawm Vajtswv xub ntiag (saib Q&K 121:45). Los ntawm Yexus Khetos lub npe, amees.