Los thiab Saib

Yexus Khetos cov thwj tim uas rau siab ntseeg yeej ib txwm thiab yeej yuav ua tub txib zoo heev. Ib tug tub txib yog Khetos ib tug thwj tim uas ua tim khawv hais tias Nws yog tus Txhiv Dim thiab tshaj tawm txog qhov tseeb ntawm Nws txoj moo zoo.

Yexus Khetos lub Koom Txoos yeej yog thiab yeej yuav yog ib lub koom txoos uas xa cov tub txib mus. Cov mej zeej ntawm tus Cawm Seej lub Koom Txoos twb txais lus txib kom lawv yuav tsum pab ua raws li Vajtswv tau txib cov Thwj Tim raws li tus Tswv hais nyob hauv Phau Tshiab:

“Yog li ntawd, nej cia li tawm mus qhia txhua haiv neeg, tuav Leej Txiv, Leej Tub thiab Vaj Ntsuj Plig Dawb Huv lub npe muab lawv ua kev cai raus dej:

“Qhia kom lawv paub coj raws li txhua yam uas kuv tau qhia rau nej lawm; thiab kuv yuav nrog nraim nej mus txog hnub uas lub ntiaj teb no kawg. Amees” (Mathais 28:19–20).

Haiv Neeg Ntseeg hauv Hnub Nyoog Kawg xav tias qhov kev lav ris no uas hais kom lawv qhia txhua haiv neeg txog tus Tswv Yexus Khetos thiab Nws txoj moo zoo uas tau muab txum tim rov qab los yog ib qho tseem ceeb heev. Peb ntseeg tias lub koom txoos uas tus Cawm Seej txhim tsa puag thaum ub los Nws twb rov qab muab txhim tsa nyob hauv lub ntiaj teb nyob hauv hnub nyoog kawg. Cov lus qhuab qhia, tej ntsiab cai, txoj cai pov thawj hwj, cov kab ke thiab tej kev khi lus ntawm Nws txoj moo zoo los peb muaj niaj hnub no nyob hauv Nws lub Koom Txoos.

Thaum peb caw nej los koom lub koom txoos nrog peb los yog kawm nrog cov tub txib, tsis yog peb xav ntxias kom nej yuav khoom ntawm peb. Peb cov mej zeej ntawm lub Koom Txoos, peb tsis txais nqi zog los yog sib tw seb leej twg yeej nyob saum ntuj ceeb tsheej. Tsis yog peb xav kom muaj neeg ntau zog nyob hauv lub Koom Txoos xwb. Thiab qhov tseem ceeb, tsis yog peb sim yuam nej ntseeg li peb. Peb caw nej mloog qhov tseeb ntawm Yexus Khetos txoj moo zoo uas txum tim rov qab los nej thiaj yuav kawm, xav txog, thov Vajtswv, thiab los paub ntawm nej tus kheej hais tias tej yam uas peb qhia nej muaj tseeb.

Tej zaum nej ib txhia yuav hais tias, “Tiam sis kuv ntseeg Yexus thiab ua raws li Nws tej lus qhia lawm,” los sis “Kuv tsis paub Vajtswv puas muaj txoj sia nyob tiag.” Qhov uas peb caw nej tsis yog peb sim ua kom nej tso nej txoj kev ntseeg los sis lub neej tseg. Cia li tuaj nrog tag nrho tej yam uas nej paub tias yog qhov tseeb, qhov zoo, thiab txaus qhuas—thiab sim seb peb zaj lus puas muaj tseeb. Ib yam li Yexus thov Nws ob tug thwj tim kom nkawd “los thiab saib” (Yauhas 1:39), peb yaum kom nej los thiab saib Yexus Khetos txoj moo zoo uas tau txum tim rov qab los puas ua kom tej yam uas nej ntseeg muaj zog tuaj.

Peb yeej xav hais tias peb muaj kev lav ris qhia zaj no rau txhua haiv neeg, xeem neeg, yam lus, thiab cov neeg. Thiab peb yeej ua li no nrog 88,000 tus tub txib uas ua hauj lwm nyob hauv 150 tawm lub teb chaws nyob thoob plaws lub ntiaj teb. Cov txiv neej thiab cov poj niam zoo no pab cov mej zeej ntawm peb lub Koom Txoos ua raws li qhov uas Vajtswv txib peb kom peb tshaj tawm Yexus Khetos txoj moo zoo uas kav ib txhis (saib Q&K 68:1).

Tiam sis tsis yog peb xav tshaj tawm zaj xov no vim peb xav tias yog ib lub luag hauj lwm ntawm sab ntsuj plig xwb. Tiam sis, qhov uas peb xav tshaj tawm Yexus Khetos txoj moo zoo uas tau txum tim rov qab los yog ib qho uas qhia tias tej qhov tseeb no tseem ceeb npaum li cas rau peb. Kuv ntseeg hais tias kuv piav tau vim li cas peb cia li xav piav txog tej yam uas peb ntseeg rau nej dhau los ntawm ib qho uas tau muaj los rau kuv tus poj niam thiab kuv ntau xyoo tas los nrog wb ob tug tub.

Muaj ib hmo Susan thiab kuv wb sawv ze ntawm ib lub qhov rais hauv wb lub tsev thiab saib wb ob tug me nyuam tub ua si nraum zoov. Thaum nkawd tseem ua si, tus yaus raug mob me ntsis thaum muaj xwm txheej me me. Wb pom hais tias nws tsis mob heev, thiab wb txiav txim siab tias wb yuav tsis txhob khiav mus pab nws tam sim ntawd. Wb xav tos saib puas muaj leej twg nco txog peb tsev neeg tej kev sib tham txog kev sib hlub hauv peb tsev neeg. Qhov uas tshwm sim tom qab ntawd yeej tseem ceeb thiab qhia wb.

Tus tij laug twb nplij nws tus kwv lub siab thiab coj tus kwv rov qab mus hauv tsev. Susan thiab kuv wb tau sawv ze rau chav ua mov kom wb saib tau nkawd yuav ua li cas tom qab ntawd, thiab wb npaj mus pab nkawd yog tias nkawd tseem yuav raug xwm txheej ntxiv.

Tus tub hlob rub ib lub rooj zaum los nyob ze lub dab ntxuav tais hauv chav ua mov. Nws nce lub rooj zaum, pab nws tus kwv nce lub rooj zaum, qhib dej, thiab nchuav dej xyaws xab npum ntxuav tais rau nws tus kwv txhais caj npab uas raug mob. Nws ua zoo li ua tau kom ntxuav cov av tawm mus. Thaum nws ua tus txheej txheem no, ua rau nws tus kwv ua zoo ib yam li tej lus uas tau piav txog nyob hauv vaj lug kub hais tias: “Thiab yuav ua rau lawv quaj nrov nrov, thiab nyiav, thiab quaj, thiab tom hniav qees” (Mauxiyas 16:2). Tus me nyuam tub twb quaj nrov heev!

Tom qab nws muab ntxuav tas, ces nws muab ib daim phuam coj los so nws tus kwv caj npab. Ua rau tus kwv tsum tsis quaj ntxiv. Ces tom qab ntawd tus tij laug nce mus zaum saum lub rooj ua mov, qhib lub txee, thiab nrhiav ib lub tshuaj pleev tshiab. Txawm nws tus kwv tej qhov mob tsis loj heev los, tus tub hlob twb pleev yuav luag tag nrho cov tshuaj nyob hauv lub raj ntawd rau nws tus kwv txhais caj npab. Tus kwv tsis tau rov qab quaj, vim zoo li tus kwv nyiam cov tshuaj pleev ntawd zoo dua li nws nyiam txoj kev siv cov xa npus ntxuav tais.

Tus tij laug rov qab mus rau lub txee uas muaj cov tshuaj pleev thiab nrhiav tau ib pob ntaub qhwv mob. Ces nws tev ntawv thiab muab ntaub coj los qhwv tag nrho nws tus kwv txhais caj npab---pib ntawm dab teg mus rau luj tshib. Muaj cov tshuaj pleev thiab cov ntawv qhwv nyob luam taw laws hauv chav ua mov es vim nkawd twb kho qhov xwm txheej ntawd, ob tug me nyuam tub dhia saum lub rooj mus es nkawd luag thiab zoo siab.

Qhov uas muaj los tom qab ntawd yog qhov tseem ceeb tshaj plaws. Tus tub uas raug mob twb khaws tag nrho cov ntaub qhwv uas tseem tshuav thiab lub raj tshuaj pleev uas yuav luag tag lawm, thiab nws rov qab mus rau nraum zoov. Nws nrhiav nws cov phooj ywg sai sai thiab pib pleev tshuaj thiab muab ntaub qhwv rau lawv caj npab. Qhov uas nws rau siab, zoo siab, thiab ua li ntawd tam sim ntawd twb tshoov Susan thiab kuv wb ob leeg lub siab.

Vim li cas tus me nyuam tub tau ua li ntawd? Cia li nco qab hais tias nws mus tam sim ntawd thiab xav pub qhov uas tau pab nws thaum nws raug mob rau nws cov phooj ywg. Tsis tas yaum, hais, los yog yuam tus me nyuam tub ua li ntawd. Qhov uas nws xav ua li no rau lwm tus yog vim qhov ntawd twb tau pab nws tus kheej lawm.

Peb cov neeg laus kuj ua zoo ib yam thaum peb nrhiav kev kho mob los yog cov tshuaj uas pab peb tsis raug mob uas peb twb nyiaj tau ntev, los yog peb txais lus ntuas uas ua rau peb paub ua siab loj kho tej teeb meem thiab ua siab ntev nyiaj tej kev nyuaj. Kev qhia lwm tus neeg txog tej yam uas tseem ceeb rau peb los yog tau pab peb yeej tsis yog ib qho txawv heev.

Peb ua zoo ib yam thaum hais txog xwm txheej uas tseem ceeb rau peb sab ntsuj plig. Piv txwv hais tias, ib zaj nyob hauv phau vaj lug kub hu ua Phau Ntawv Maumoos hais txog ib zaj npau suav uas ib tug yaj saub thiab thawj coj thaum ub hu ua Lihais tau txais. Qhov tseem ceeb ntawm Lihais zaj npau suav yog tus ntoo uas cawm neeg txoj sia—uas yog ib lub cim txog “Vajtswv txoj kev hlub” uas yog “yam uas xav tau tshaj plaws” thiab “qhov kev zoo siab tshaj plaws rau tus ntsuj plig” (1 Nifais 11:22–23; saib 1 Nephi 8:12, 15).

Lihais piav hais tias:

“Thiab tau muaj tias kuv tau mus ntawm tsob ntoo thiab kuv tau noj cov txiv ntawd; thiab kuv tau pom tias [cov txiv] yog cov uas qab zib tshaj txhua yam uas kuv tau noj tas [los]. Muaj tseeb tiag, thiab kuv twb tau pom hais tias cov txiv ntawd yog ib co uas dawb, dawb tshaj txhua yam uas kuv tau pom los lawm.

“Thiab thaum kuv tau noj cov txiv ntawd nws ua rau kuv tus kheej muaj kev xyiv fab heev; yog li ntawd, kuv tau xav kom kuv tsev neeg tau noj thiab; vim kuv paub lawm hais tias nws yog ib yam txiv uas qab tshaj txhua yam txiv” (1 Nifais 8:11–12; ntxiv qhov uas ntawv qaij).

Qhov uas qhia tias Vajtswv hlub Nws cov me nyuam uas tseem ceeb tshaj yog tus Tswv Yexus Khetos txoj hauj lwm qhuab qhia hauv lub ntiaj teb, Nws txoj kev txheej txhoj, thiab txoj Kev Sawv Rov Los. Cov txiv ntoo yog ib lub cim ntawm cov koob hmoov uas los ntawm tus Cawm Seej txoj Kev Theej Txhoj.

Tom qab kiag uas Lihais noj cov txiv thiab muaj kev xyiv fab heev nws cia li xav qhia thiab pab nws tsev neeg. Yog li ntawd, thaum nws los cuag Khetos, nws kuj muaj kev hlub xav pab lwm tus.

Ib zaj tseem ceeb ntxiv nyob hauv Phau Ntawv Maumoos piav txog ib tug txiv neej hu ua Enos tom qab Vajtswv hnov thiab teb nws txoj kev rau siab thov.

Nws hais tias:

“Thiab kuv tus plig tau tshaib nqhis; thiab kuv tau txhos caug ua ntej ntawm tus uas Tsim kuv lub xub ntiag, thiab kuv tau quaj rau nws ntawm kev thov tag zog thiab thov pab rau kuv tus kheej tus ntsuj plig; thiab kev txo hwj chim kuv tau quaj thov nws tas hnub; muaj tseeb tiag, thiab thaum uas tsaus ntuj lawm los kuv tseem tsa kuv lub suab siab xwv kom nws mus txog puag saum ntuj.

“Thiab tau muaj ib lub suab los rau kuv, hais tias: Enos, koj tej kev txog txhaum raug muab zam rau koj lawm, thiab koj yuav tau koob hmoov.

“Thiab kuv, Enos, paub lawm tias Vajtswv yeej dag tsis taus; yog li ntawd, kuv tej kev txhaum raug muab cheb pov tseg lawm.

“Thiab kuv tau hais tias: Tus Tswv es, ua li cas es thiaj ua tau tiav li ntawd?

“Thiab nws tau hais rau kuv tias: Vim yog koj txoj kev ntseeg Khetos, tus uas yav tas los koj ib txwm tsis tau hnov los sis pom dua li. … Yog li ntawd, cia li mus, koj txoj kev ntseeg tau ua rau koj huv lawm.

“Nim no, tau muaj tias thaum kuv tau hnov tej lus no lawm kuv tau pib xav qhov tau txoj kev pab rau kuv cov kwv tij, cov Neeg Nifais; yog li ntawd, kuv tau nchuav tag nrho kuv lub siab tawm rau Vajtswv pub rau lawv” (Enos 1:4–9; ntxiv qhov uas ntawv qaij).

Thaum tib lub sij hawm Enos tig mus rau tus Tswv kawg siab kawg ntsws (saib 2 Nifais 31:13), nws haj yam txhawj txog nws tsev neeg, phooj ywg thiab lwm tus.

Qhov uas peb kawm los ntawm ob zaj no yog qhov uas peb yuav tsum txais cov koob hmoov los ntawm Yexus Khetos txoj Kev Theej Txhoj ua ntej peb yuav xav pab lwm tus kawg siab kawg ntsws uas yeej zoo tshaj qhov uas peb “lam ua xwb.” Ib yam Lihais, Enos, thiab kuv tus me nyuam tub hauv zaj uas kuv hais, peb cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tau paub txog kev nyuaj siab uas los ntawm kev tsis paub tseeb thiab kev txhaum. Peb kuj paub txog kev ntxuav kom huv, kev kaj siab lug, kev kho peb sab ntsuj plig, thiab kev coj peb txoj hau kev uas los ntawm kev kawm thiab ua neej raws li tej ntsiab cai ntawm tus Cawm Seej txoj moo zoo.

Yexus Khetos txoj Kev Theej Txhoj yog qhov uas ua rau peb los ua neeg dawb huv, yog cov tshuaj uas kho qhov mob ntawm peb sab ntsuj plig thiab tshem peb lub txim, thiab yog qhov uas tiv thaiv peb kom peb rau siab ntseeg txawm yog ib lub caij zoo los yog lub caij phem.

Rau nej cov ntawm peb tsev neeg thiab cov phooj ywg uas tsis yog mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, kuv twb sim piav yog vim li cas peb yog cov tub txib.

Yeej muaj qhov tseeb tiag tiag nyob hauv ib lub ntiaj teb uas ntxub thiab tso qhov tseeb tseg. Thaum yav tom ntej, “txhua lub hauv caug yuav txhos” thiab “txhua tus nplaig yuav lees hais tias Yexus Khetos yog tus Tswv, kom Vajtswv uas yog Leej Txiv thiaj tau koob meej” (Filipis 2:10–11). Yexus Khetos yog Vajtswv Leej Txiv Nyob Mus Ib Txhis Tib Leeg Tub tiag tiag. Vim peb yog mej zeej ntawm Nws lub Koom Txoos, peb ua tim khawv hais tias Nws muaj txoj sia nyob thiab tau muab Nws lub Koom Txoos txum tim rov qab los hauv lub caij nyoog kawg no.

Peb tej lus caw nej kawm txog thiab sim seb peb zaj lus puas muaj tseeb yog los ntawm tej yam zoo uas peb txais tau los ntawm Yexus Khetos txoj moo zoo hauv peb lub neej. Tej zaum peb hais lus txawv los yog hais lus nrawm los yog hais tas zog thaum peb caw nej. Peb xav qhia nej txog qhov tseeb uas muaj nqi tshaj plaws rau peb xwb.

Vim kuv yog tus Tswv ib tug Thwj Tim, kuv ua tim khawv kawg siab kawg ntsws txog qhov uas muaj Vajtswv thiab Nws muaj txoj sia nyob tiag tiag. Thiab kuv caw nej “los thiab saib” (Yauhas 1:39) los ntawm Yexus Khetos lub npe dawb huv, amees.