Zoo Siab Tos Txais Nej rau lub Tuam Rooj Sab Laj

Kuv cov kwv tij thiab cov muam, kuv zoo siab txais tos nej rau lub tuam rooj sab laj no. Peb sib sau ua ke nyob thoob plaws lub ntiaj teb kom mloog thiab kawm los ntawm cov kwv tij thiab cov muam uas peb tau txhawb nqa ua cov Tuam Thawj Coj thiab cov tuam nom tswv hauv lub Koom Txoos. Lawv twb nrhiav Vajtswv txoj kev pab kom paub tej yam uas lawv yuav qhia, thiab lawv txais kev tshoov siab txog tej lus uas lawv yuav hais.

Lub rooj sab laj no yog 90 xyoo tom qab thaum pib muaj kev tshaj tawm lub tuam rooj sab laj ntawm xov tooj cua. Thaum lub Kaum Hli Ntuj xyoo 1924, yog thawj zaug uas KSL, uas lub Koom Txoos yuav, tau tshaj tawm tej tuas rooj sab laj ntawm xov tooj cua. Lub rooj sab laj no yog 65 xyoos tom qab thaum pib tshaj tawm lub rooj sab laj no hauv TV thiab. Lub tuam rooj sab laj thaum lub Kaum Hli Ntuj xyoo 1949, KSL pib tshaj tawm tej tuas rooj sab laj no rau cheeb tsam Salt Lake no.

Peb paub hais tias cov koob hmoov ntawm tej media niaj hnub nim no cia ntau plhom tus mej zeej ntawm lub Koom Txoos saib thiab mloog lub tuam rooj sab laj no. TV, xov tooj cua, cable, lub tshuab xa xov xwm, thiab Internet, tsis hais tej xov tooj ntawm tes, yog tej yam uas peb siv kom tshaj tawm tej tuas rooj sab laj no.

Rau lub hlis tas los txij thaum peb sib ntsib, peb muab ib lub tuam tsev fij tseg thiab ib lub rov qab fij tseg. Thaum lub Tsib Hlis Ntuj Thawj Tswj Hwm Dieter F. Uchtdorf muab lub Tuam Tsev Fort Lauderdale fij tseg. Cov tub hluas ntxhais hluas ua koob tsheej ib hnub ua ntej tau muab lub tuam tsev fij tseg. Hnub tom qab ntawd, thaum Hnub Sunday, lub Tsib Hlis Ntuj hnub tim 4, peb twb siv peb tuas muab lub tuam tsev fij tseg.

Ob lub lim tiam tas los kuv muaj cib fim rov qab muab lub Tuam Tsev Ogden Utah fij tseg, thawj zaug yog Thawj Tswj Hwm Joseph Fielding Smith ua thaum xyoo 1972. Muaj ib txoj kev ua koob tsheej ib hnub ua ntej tau muab lub tuam tsev rov qab fij tseg, es muaj cov tub hluas ntxhais hluas coob kawg, lawv thiaj yuav tsum ua yeeb yam ob zaug es nyias muaj nyias pawg tub ntxhais. Tag nrho muaj 16,000 tus tub hluas ntxhais hluas uas koom tes ua. Peb twb ua tej kev sib ntsib muab lub tuam tsev rov qab fij tseg ib hnub tom qab ntawd, es muaj ntau tus Kwv Tij uas koom tes, tsis hais cov koom haum pab cov thawj coj thiab lub tuam tsev tus thawj tswj hwm, nws ob tug pab cuam thiab lawv cov poj niam.

Peb tseem rau siab ua tuam tsev. Lub hlis tom ntej mam li muab lub Tuam Tsev Phoenix Arizona fij tseg, thiab xyoo tom ntej thaum xyoo 2015, peb xav tias peb yuav muab tsib lub tuam tsev fij tseg los yog rov qab fij tseg, nyob ntawm seb peb ua pes tsawg lub tiav.

Raws li kuv hais thaum lub Plaub Hlis Ntuj, thaum peb ua tag nrho cov tuam tsev uas peb tshaj tawm thiab muab cov ntawd fij tseg, peb yuav muaj 170 lub tuam tsev nyob thoob plaws lub ntiaj teb. Vim tam sim no peb tsom ntsoov kom ua tiav cov tuam tsev uas tau hais tas lawm, peb yuav tsis tshaj tawm txog tej lub tuam tsev tshiab tam sim no. Tiam sis, thaum yav tom ntej, thaum peb nrhiav tej thaj av thiab kawm txog tej kev xav tau, ces peb yuav tshaj tawm txog tej tuam tsev uas peb mam li ua.

Lub Koom Txoos tseem loj tuaj. Peb muaj 15 plhom tus mej zeej thiab peb muaj ntxiv zuj zus tuaj. Tsis muaj dab tsi tab kaum peb tej hauj lwm ua tub txib. Peb muaj 88,000 tus tub txib uas ua hauj lwm, lawv qhia txoj moo zoo nyob thoob plaws lub ntiaj teb. Peb rov qab tshaj tawm hais tias kev mus ua tub txib yog ib lub luag hauj lwm ntawm cov tub hluas uas tuav lub pov thawj hwj, thiab peb yaum cov tub hluas uas tsim nyog thiab txawj npaj mus ua tub txib. Peb zoo siab ua tsaug rau cov ntxhais hluas uas ua ntxhais txib. Lawv ua ib txoj hauj lwm tseem ceeb, tiam sis tsis yog Vajtswv txib lawv ua hauj lwm li cov tub hluas.

Tam sim no kuv caw nej mloog zoo rau cov kwv tij thiab cov muam uas yuav hais lus hnub no thiab tag kis hauv peb lub rooj sab laj. Tag nrho cov uas peb thov kom hais lus xav tias yog ib qho kev lav ris tseem ceeb heev. Thaum peb mloog, thov kom peb yuav txais kev tshoov siab thiab muaj kev ntseeg ntxiv, kuv thov los ntawm Yexus Khetos lub npe, amees.