Kōn Māj ko Mejān Anij

Ro jeiū im jatū, kom̧ em̧ool kōn ami kar rejtake n̄a inne āinwōt juon membōr in Doulul eo an Jon̄oulruo Rijilōk ro. Epen aō kwaļo̧k ewi jon̄an an aorōk n̄an n̄a. Eļaptata ikar lukkuun kam̧m̧oolol kōn bout in rejtake eo an ruo kōrā ro relukkuun kabwilōn̄lōn̄ ilo mour e aō: kōrā eo pāleeō, Ruth, im leddik eo nejimro, Ashley.

M̧ool eo in bwe jān aō bōk kūr in eletok kam̧ool in ennaan eo an Irooj kar jinoin epepen in. “Bwe tarlep in gospel eo Aō maron̄ in kean̄ kake jān ro rem̧ōjņo̧ im ļam waan n̄an jem̧ļo̧k ko an laļ.”¹ Ij juon iaan ro remōjņo̧ im ļam waan. Ke ikar kūr bwe in juon bisop an juon ward ilo tuiiōn̄ in Amedka, ļaddik eo jeiū, jidik wōt an rūttoļo̧k im māletlet ļo̧k jān n̄a, kar kūrtok taļboon eo aō. Ekar ba, “Kwoj aikuj in jeļā bwe Irooj ejjab kūr eok kōn jabdewōt men kwaar kōm̧m̧ane. Ilo jekjek eo am̧, ej kōnke ta eo kwaar kōm̧m̧ane. Ej aikuj in kōm̧m̧ane kōn kwe, im enaaj tōprak elan̄n̄e kwoj kōm̧m̧ane wāween eo An.” Ij watōke naan in emāletlet in jān ļaddik eo jeiū eļapļo̧k an jerbal ilo raan kein.

Elōn̄ jet men ko rekabwilōn̄lōn̄ rej waļo̧k ilo juon jerbal in mijenede n̄e ļeo ak lio ej kile bwe kūr eo ej jab kōn e; ijjelo̧k, bwe ej kōn Irooj, jerbal eo An, im ajri ro nejin Jemedwōj Ilan̄. Ij en̄jake ejja m̧ool in wōt n̄an juon Rijilōk. Kūr in ejjab kōn n̄a. Ej kōn Irooj, jerbal eo An, im ajri ro nejin Jemedwōj Ilan̄. Jekdo̧o̧n ta ijjitōn̄ eo ak kūr eo ej ilo Kabun̄ in, n̄an jerbal, juon ej aikuj in jeļā bwe aolep ro jej jerbal n̄an er “ej juon ļaddik ak leddik in jetōb nejin jemedwōj im jenedwōj ilan̄, im, rein … ewōr piktokier ekwojarjar im juon mejān kajjik.”²

Ilo kar jerbal ko aō, ikar juon taktō in menono ilo kōm̧admōd jorrāān in menono im leļo̧k menono n̄an bar juon armej. Jān an lōn̄ rinan̄inmej ro rekar lukkuun do̧do̧o̧l, elōn̄ armej ikar loe aer mej. Kōrā eo pāleeō ekar kōjak im ba ej juon jokālet enana n̄an erom juon iaan rinan̄inmej ro aō. Kōn en̄jake eo aō kōn kain rinan̄inmej rot in, ikar ejaake juon kain en̄jake n̄e jekjek ko an rinan̄inmej eo ejjab em̧m̧anļo̧k. Wāween in, ej en̄jake in būrom̧ōj im ebbweer ko ikar aikuj jelm̧ai.

Ilo 1986, juon likao etan Chad ekar do̧lo̧o̧l kōn nan̄inmej in menono im kar aikuji bar juon menono. Ekar em̧m̧an an mour ium̧win jon̄oul im jim̧ettan iiō ko. Chad ekar kōm̧m̧ane jon̄an wōt an maron̄ bwe en ājmour wōt im mour juon mour ājmour. Ekar jerbale juon mijen, jerbal, im kar juon ļaddik ekar kōm̧aatļo̧k an n̄an jinen im jemān. Iiō ko āliktata in an mour, pen, kar apan̄, im ekar diwōj deļo̧n̄ ilo aujipitōļ.

Juon jota, kar bōktok e n̄an ruum̧ in emergency eo ilo aujipitōl kōn an lukkuun do̧lo̧o̧l. Rijerbal ro m̧ōtta im n̄a kar kōm̧admōde ium̧win juon iien eaitok kōm̧m̧an bwe menono eo an en bar bam̧ bōtōktōk. Āliktata, ekar lukkuun alikkar bwe Chad ekar jab maron̄ jepļaaktok. Kōm̧ ar kabōjrōk am kōm̧admōde, im ikar kwaļo̧k ke ejako. Men̄e būrom̧ōj im inepata, ikar dāpij wōt juon m̧wil eo em̧m̧an. Ikar ļōmņak ippa make, “Chad kar ļap kōjparok e. Elōn̄ iiō in mour ko an jān an naaj kar mour.” Ikar jab maron̄ dāpij aō būrom̧ōj, ke, jinen im jemān rekar deļo̧n̄e tok ruum̧ in emergency eo im loe an ļaddik in nejier ej babu ioon juon tebōļ. Ekar kāāl n̄an n̄a, aō kar loe Chad ilo wāween aō kalimōj jinen im jemān. Ikar lo kōjatdikdik ko reļļap im kōtmāne ko ippāer n̄an e, kōņaan eo aer bwe en maron̄ bar mour jidik im em̧m̧an ļo̧k. Kōn bōklōkōt in, ikar jan̄. Jinen im jemān Chad rekar kaenōm̧m̧an eō ilo juon wāween eo ejouj Ij jamin meļo̧kļo̧k, jinen im jemān Chad kar kaenōm̧m̧an eō.

Ikar jino kile bwe ilo Kabun̄ in, n̄an wājepdik in jerbal n̄an ro jet jej aikuj loi kōn loļo̧kjeņ eo imejān jinen im jemān, jān loļo̧kjeņ eo imejān Jemedwōj Ilan̄. Innām jemaron̄ in jino meļeļe m̧ool eo eaorōk an juon jetōb. Jān menin wōt im jemaron̄ meļeļe iakwe eo ippān Jemedwōj Ilan̄ n̄an aolep ajri ro Nejin. Jān menin wōt jemaron̄ meļeļe kea eo an Rilo̧mo̧o̧r eo kōn er. Jej jab maron̄ lukkuun meļeļe eddo in bujen ko ad bwe jen jan̄ ippān ro rej jan̄ im kaenōm̧m̧an ro rej pād ilo aikuj in kaenōm̧m̧an m̧ae iien jej loe kōn loļo̧kjeņ imejān Anij.³ Loļo̧kjeņ in enaaj kōpeļļo̧k būruwōd n̄an inepata ko, mijak ko, im rub in bōro ko an ro jet. Ak Jemedwōj Ilan̄ enaaj jipan̄ im kaenōm̧m̧an kōj, āinwōt ro jinen im jemān Chad aer kar kaenōm̧m̧an n̄a elōn̄ iiō ko rem̧ootļo̧k. Ej aikuj wōr ippād māj ko n̄an lo, lo̧jiln̄i ko n̄an ron̄jake, im bōro ko n̄an jeļā im en̄jake eļan̄n̄e jej kōņaan lo̧mo̧o̧ren in emakijkij an Būreejtōn Thomas S. Monson rōjan̄ kake.⁴

Mae iien wōt jej maron̄ loe kōn loļo̧kjeņ jān imejān Jemedwōj Ilan̄ jemaron̄ obrak kōn “A iakwe-em̧ool ej iakwe eo erreo an Kraist.”⁵ Aolep raan jej aikuj akweļap ippān Anij kōn in iakwe-em̧ool. Mormon ekar rojan̄: “Kōn menin, ro jeiū im jatū rejitōnbōro, kom̧in jar n̄an Jemād kōn aolep kajoor in bōro, bwe kom̧in maron̄ obrak kōn iakwe eo An, eo Eaar leļo̧k ioon aolep ro rej rikaļoor ro an rem̧ool an Nejin, Jisōs Kraist.”⁶

Kōn aolepān būruwō, ikōņaan bwe in erom juon rikaļoor em̧ool an Jisōs Kraist.⁷ Ij iakwe E. Ij nōbar E. Ij kam̧ool kōn An mour. Ij kam̧ool bwe E eo ekar Pinmuur, Messaia eo. Ij juon an rikam̧ool kōn tūriamo̧ eo An, iakwe eo An, jouj eo An, im An iakwe. Ij kobaik naan in kam̧ool in aō n̄an Rijilōk ro, ilo 2000 iiō ko, rekar ba, “bwe Jisōs ej Kraist eo Emour, Nejin Anij ejjab wabanban. … E ej meram eo, mour eo, im kōjatdikdik eo an laļ in.”⁸

Ij kam̧ool bwe raan eo ilo 1820 ilo bukwin wōjke ko ilo New York Irooj eo ekar jerkakpeje, ippān ļo̧k Anij, Jemedwōj Ilan̄, raar waļo̧k ļo̧k n̄an Rikanaan Josep Smith, āinwōt an Josep Smith kar ba raar waļo̧k. Priesthood kii ko repād ioon laļ in bwe ren maron̄ kōmaron̄ kain̄i in lo̧mo̧o̧r ko im mour ijo ilōn̄tata. Ijeļā menin. Ilo etan Jisōs Kraist, amen.