Keememej ilo Wōn eo Jaar Lōke

Ke iaar ratimjuon iiō detta, lelļap eo jibū emouj koļan bōran, emen-ne-jōn̄ouljuon-inij (1.5 m) eaar itok n̄an joļo̧k jet wiik ko ippam̧ ilo m̧weo im̧ōm. Juon ālkin raelep ke liin eaar pād ijo, ļaddik ro ruo jeiū im n̄a kar kāālet n̄an kibwij juon ron̄ ilo meļaaj eo iturejet in iaļ eo jān m̧weo im̧ōm. Ijjab jeļā etke kom̧ kar kōm̧m̧ane; jet iien ļaddik ro rej kōb ron̄ ko. Kōm kar etoonon jidik bōtaab ejjeļo̧k men me enaaj kar kōm̧m̧an bwe kōmin pād ilo eļap jorrāān. Ļaddik ro jet ilo peļaak eo am kar lo jon̄an an kar kaitoktok limo n̄an kibwij juon ron̄ im kar jino jipan̄. Innām kōm aolep kar etoononļo̧k ippān doon. Bwidej eo eaar pen, kōn menin kōm kar bōktok juon ooj in jikin kallib im likūt jidik dān ilo kapin ron̄ eo n̄an kapidodoikļo̧k bwidej eo. Ekar wōr jet pedkat ioom ke kōmij kōb, bōtaab ron̄ eo eaar m̧wilaļļo̧k.

Juon ilo kumi eo am eaar kāālet bwe kōmij aikuj ukōt ron̄ eo am n̄an juon jikin aaō, kōn menin kōm kar tein̄i kōn dān. Āinwōt eo edik tata im kōņaan kakobaba ippāer, kar kareel eō n̄an keļo̧k n̄an lowaan im kajjion̄e. Kiiō iaar lukkuun in etoonon. Ikar jab ļōmņak bwe in kar libobo kōn pedkat, bōtaab ej ta eo iaar wōjake.

Ke iaar jino piio̧, iaar kijoon iaļ eo, kajjion̄ deļo̧n̄ļo̧k n̄an lowaan m̧weo im̧ō. Lelļap eo jibū eaar ioon n̄a im̧aan kōjām eo im kar jab kōņaan kadeļo̧n̄ eō. Eaar jiron̄ eō bwe eļan̄n̄e ej kadeļo̧n̄ eō, inaaj ebbōkļo̧k pedkat n̄an lowaan m̧weo me ej kab m̧ōj an kar karreoiki. Kōn menin iaar kōm̧m̧ane ta eo jabdewōt ratimjuon iiō dettan enaaj kar kōm̧m̧ane ilo jekjek ko im kar ettōrļo̧k n̄an kōjām eo itulik, bōtaab liin eaar m̧ōkaj jān aō ļōmņak. Iaar illu, kapatpate neeō, im akweļap n̄an deļo̧n̄ n̄an lowaan m̧weo, bōtaab kōjām eo eaar kilōk wōt.

Iaar tutu, epedkatkat, piiō, im ilo kōļmenļo̧kjeņ in ajri eo aō, kar ļōmņak imaron̄ kar mej ilo meļan eo itulikin m̧weo im̧ō. Āliktata, iaar kajjitōk ippān ta eo ij aikuj kar kōm̧m̧ane n̄an deļo̧n̄ļo̧k m̧weo. M̧okta jān aō kar jeļā, iaar lo eō make ij jutak ilo meļan eo itulik in m̧weo ke būbū eaar būttiki eō kōn juon ooj. Ālkin ta eo eaar āinwōt indeeo, būbū eaar ba irreeo im kadeļo̧n̄ eō n̄an lowaan m̧weo. Eaar okmāāņān ilowaan m̧weo, im iaar maron̄ kōņak nuknuk ko rem̧ōrā, rerreo.

Ļōmņak kōn būrabōļ in em̧ool an mour, jouj im ļōmņak kōn naan kein an Jisōs Kraist: “Im ejjeļo̧k men ejjab erreo emaron̄ deļo̧n̄ ilo aelōn̄ eo An; kōn menin ejjeļo̧k ej deļo̧n̄ ilo An kakkije ijello̧kun wōt ro raar kwaļ ballier ilo bōtōktōkū, kōn tōmak eo aer, im ukeļo̧k jān aolep aer jero̧wiwi, im aer tiljek n̄an jem̧ļo̧kin.”¹

Jutak inam̧ōj in m̧weo im̧ō būttiki eō kōn dān jān būbū eaar nana. Kōn jab letok iien eo em̧m̧an n̄an bar ro̧o̧lļo̧k n̄an pād ippān Jemed ilo Lan̄ kōnke kōn kāālet eo ad n̄an pād wōt ilo ak etoonon kōn pedkat in jerawiwi enaaj lukkuun kabūrom̧ōjm̧ōj indeeo. Jej aikuj jab m̧oņe kōj make kōn ta eo ej menin aikuj n̄an bar ro̧o̧lļo̧k im pād wōt ilo im̧aan mejān Jemed ilo Lan̄ Jej aikuj in erreeo.

M̧okta jān ad kar itok n̄an laļ in, jaar bōk kuņaad āinwōt ļaddik im leddik in jetōb ro nejin Anij ilo ko̧o̧njeļ eo eļap.² Kajjojo iaad jaar kanooj leļo̧k ad, im ejjeļo̧k iaad eaar mejki. Ilo ko̧o̧njeļ jab in Jemed ilo Lan̄ eaar kwaļo̧k juon karōk. Kōnke karōk eo eaar dāpij anemkwoj eo ad im kar menin aikuj bwe jen ekkatak jān en̄jake eo ad make im ejjab baj jān E wōt, Eaar jeļā jenaaj kar kōm̧m̧an jerawiwi. Eaar barāinwōt jeļā bwe jerawiwi enaaj kar kōm̧m̧an bwe jen jab erreo im jab maron̄ bar ro̧o̧lļo̧k n̄an im̧aan Mejān, kōnke ijo Ej jokwe ie ej em̧ool erreoļo̧k jān juon em̧ būbū kar karreoiki.

Kōnke Jemed ilo Lan̄ ej iakwe kōj im ewōr juon An jibadbad “n̄an kakūrm̧ool jab wabanban [eo ad] im mour indeeo,”³ karōk eo An ekar koba jerbal eo an juon Rilo̧mo̧o̧r—juon eo me emaron̄ kar jipan̄ kōj erom erreo jekdo̧o̧n ta ewi jon̄an ad etoon. Ke Jemed ilo Lan̄ eaar kwaļo̧k aikuj eo n̄an juon Rilo̧mo̧o̧r, ij tōmak jaar aolep oktakļo̧k im kalimjōk Jisōs Kraist, M̧aanje in Jetōb eo, juon eo eaar eddōkļo̧k n̄an jon̄an eo me ej erom āinwōt Jemen.⁴ Ij tōmak aolepād wōj jaar jeļā enaaj kar E, bwe ejjeļo̧k iaad wōj emaron̄ kar kōm̧m̧ane, ak bwe E emaron̄ kar im bwe E enaaj kar.

Ilo Jikin Kallib Gethsemane, im ioon debwāāl eo ilo Golgotha, Jisōs Kraist eaar en̄taan jim̧or ilo ānbwin im jetōb, kar wūdiddid kōn metak, to̧o̧rļo̧k būtōktōk ilo aolep ro̧n̄, kar akweļap ippān Jemen n̄an bōkļo̧k kab eo emeo̧ jān E,⁵ im aaet Eaar bōk wōt.⁶ Etke Eaar kōm̧m̧ane? Ilo naan ko An, Eaar kōņaan kaiboojoj Jemen im kadedeļo̧k “m̧aanjāppopo ko An n̄an ro nejin armej raņ.”⁷ Eaar kōņaan n̄an kōjparok bujen eo An im kōm̧m̧an bwe en pidodo n̄an ad bar ro̧o̧lļo̧k n̄an kapijuknen. Ta eo Ej kajjitōk ippād bwe jen n̄an kōm̧m̧ane n̄an ukōtļo̧k? Ilo ļam waan Ej kajjitōk ippād n̄an kwaļo̧k jerawiwi ko ad im ukweļo̧k bwe jen jamin naaj en̄taan āinwōt An kar en̄taan.⁸ Ej kūr kōj n̄an erom erreo bwe maron̄ jab likūt wōt kōj itunam̧ōj in m̧weo im̧ōņ Jemedwōj ilo Lan̄.

Em̧ool bōbrae jerawiwi ej jon̄ak eo kwaļo̧ke ilo mour, ikkijeen jem̧ļo̧k eo an Pinmuur eo an Jisōs Kraist kōnono kake, ejjab aorōk ta jerawiwi ko jaar kōm̧m̧ani ak ewi m̧wilaļ in ad wōtlo̧k loan ron̄ in iminene eo. Ejjab aorōk eļan̄n̄e jej jook ak āliklik kōnke kōn jerawiwi ko me, āinwōt an rikanaan Nipai kar ba, “epidodo aer jepooļ” kōj.⁹ Ejjab aorōk bwe ilo kar juon iien jaar jāniji m̧aanje eo ad n̄an juon booļ in m̧ōn̄ā.¹⁰

Ta eo eaorōk ej bwe Jisōs Kraist, Nejin Anij, kar en̄taan, “metak ko im kaen̄tanaan ko im kapo ko otemjeļo̧k” kōn menin “bwe En maron̄ jeļā ekkar n̄an kanniōk ekōjkan an jipan̄ armej ro An.”¹¹ Ta eo ej aorōk ej bwe Eaar m̧ōņōņō n̄an kōttāiki,¹² n̄an itok n̄an laļ in im walaļļo̧k “ium̧win aolep men ko otemjeļo̧k”¹³ im en̄taan “eļapļo̧k jumae jān jabdewōt armej” remaron̄ in.¹⁴ Ta eo eaorōk ej bwe Kraist ej akweļap kōn jekjek eo ad im̧aan Jemen, “ Im ba: Jema, lo en̄taan ko im mej eo an Eo eaar jab kōm̧m̧an jero̧wiwi, ilo E Kwaar kanooj bun̄-būruōm̧; … Kōn menin, Jema, dāpij rein jeiū im jatū rej lōke ioon Eta, bwe ren maron̄ itok n̄an Ippa im bōk mour ejjeļo̧k jem̧ļo̧kin.”¹⁵ Bwe ej ta eo ej lukkuun in aorōk im ta eo aikuj in letok n̄an kōj aolep juon kōjatdikdik in kōkāāl im juon kijejeto n̄an kajjion̄ bar juon alen, kōnke E eaar jab meļo̧kļo̧k kōj.¹⁶

Ij kam̧ool bwe Rilo̧mo̧o̧r eo ejjamin naaj oktakļo̧k jān kōj n̄e jej kappukōt E ilo ettā n̄an ad maron̄ ukweļo̧k; ejjamin naaj ļōmņak kōn kōj āinwōt armej eo ejjab maron̄ kōjatdikdik n̄an oktak, ejjamin naaj ba, “O jaab, bar kwe”; ejjamin naaj kowaan kōj kōnke kōn juon likjab in meļeļe jon̄an pen kowaan jerawiwi. E eweppān an meļeļe aolep men, ekoba juon en̄jake in būrom̧ōj, jook, im inepata eo me kaje eo kōtmene an jerawiwi.

Ukweļo̧k ej m̧ool in im ej jerbal. Ejjab juon en̄jake ebōd ak juon tōprak in juon“koļmānļo̧kijeņ ebwebwe.”¹⁷ Ewōr an kajoor n̄an kotak eddo ko im bōk jikier kōn kōjatdikdik. Emaron̄ in tōlļo̧k n̄an juon oktak in bōro ekajoor me ej tōprak in ilo ad “ jab bar itok wōt in kōm̧m̧an nana, ak n̄an kōm̧m̧an em̧m̧an wōt.”¹⁸ Emenin aikuj bwe, ukweļo̧k, ejjab pidodo. Men ko an indeeo reļļap ejeja aer pidodo. Bōtaab tōprak eo ej aorōk. Āinwōt an Būreejtōn Boyd K. Packer kar kam̧ool ilo ekōnono eo an āliktata n̄an Jiljilimjuonn̄oul eo an Kabun̄ in: “Ļōmņak eo in: Pinmuur eo ejjab illik malakan, ejjeļo̧k jenkwan. Ta eo ej kōm̧m̧ane ej em̧m̧an. … Pinmuur eo ejjab illik malakan, ejjeļo̧k jenkwan. Ej kemour wōt, im ta eo ej kemour ej pād wōt ilo an mour.”¹⁹

Im kōn menin ej bwe ad kōjatdikdik n̄an bar mour ippān Jemed ej pedped ioon Pinmuur eo an Jisōs Kraist, kōn m̧ōņōņō eo an Armej eo ejjeļo̧k an jerawiwi n̄an bōk Ioon Make, kōjekdo̧o̧n jeļā eo bwe jim̧we ejjeļo̧k an Ioon, eddo eo ekoba an bōd ko an aolep armej, ekoba jerawiwi ko me jet ļaddik im leddik ro nejin Anij rejjab aikuj in kar kāāleti n̄an en̄taan kōn er make.

Āinwōt ro uwaan Kabun̄ eo an Jisōs Kraist im Armej ro Rekwojarjar ilo Raan-ko Ālkiktata, jeļapļo̧k ippād kajoor n̄an Pinmuur eo an Rilo̧mo̧o̧r eo jān enan̄in aolep armej ro jet kōnke jejeļā bwe eļan̄n̄e jej kōm̧m̧ani bujen ko, ukweļo̧k wōt, im niknik n̄an jem̧ļo̧kin, Enaaj kōm̧m̧an bwe jen rijolet Ippān²⁰ im, āinwōt E, jenaaj bōk aolep men ko ewōr an Jemed.²¹ Katak in ej juon katak ekkōm̧akūt laļ, im aaet ej m̧ool. Pinmuur eo an Jisōs Kraist ej kōm̧m̧ane kūr eo an Rilo̧mo̧o̧r eo n̄an “kom̧ naaj weeppān āinwōt Jememwōj i lan̄ E weeppān”²² Elukkuun in pidodo ijello̧kin kalulu in jab tōpare.

Jeje ko rekwojarjar rej katakin bwe aolep kajjojo armej raikuj “ekajet ekkar n̄an ekajet ekwōjarjar an Anij.”²³ Ilo raan jab eo enaaj ejjeļo̧k iien tileekek ibwilijin juon kumi eļap ak jitōn̄ļo̧k ro jet āinwōt jekpen ņae kōn ad jab erreo. Kōn kam̧m̧oolol, jeje ko rekwojarjar rej barāinwōt katakin bwe Jisōs Kraist, Eo eaar en̄taan kōn jerawiwi ko ad, eo ej ad Rijojomar ippān Jemed, eo ej ān̄inn̄in kōj ro ro M̧ōttan, eo ej iakwe kōj n̄an jem̧ļo̧kin, āliktata Enaaj ad riekajet. Juon iaan kōjeraam̧m̧an ko emakijkij likjab jāne an Pinmuur eo an Jisōs Kraist ej bwe “Jemen … kar likūt ekajet otemjej n̄an Nejin.”²⁴

Ro jeiū im jatū, eļan̄n̄e kwoj en̄jake ebbwer ak ļōmņak eļan̄n̄e komaron̄ diwōj tok jān ron̄ in jetōb in me kwaar kūbwjiji, jouj im keememej wōn eo ej jutak “ikōta [ad] im ekajet,” eo ej “obrak kōn jouj n̄an ro nejin armej,” bōk Ioon make nana ko im jero̧wiwi ko ad “kabun̄-būruōn akweļap ko an jim̧we.”²⁵ ilo naan ko jet, āinwōt an Nipai kar kōm̧m̧ane ilo iien eo an kōn pere e make, “ilo wōn [kwaar] lōke,”²⁶ em̧ool Jisōs Kraist, innām ukweļo̧k im en̄jake aaet bar juon alen “juon kōjatdikdik in emeram.”²⁷ Ilo etan Jisōs Kraist, amen.