Kwōn Juon Waanjon̄ak im juon Meram

Ro jeiū im jatū rejitōnbōro, elukkuun em̧m̧an bwe imaron̄ bar pād ippāmi bar juon alen. Āinwōt ami jeļā, jān tōre eo jekar koba ippān doon ilo Eprōļ eo, jekar būrom̧ōj kōn jako eo an jilu iaan Rijilōk ro ad rejitōn bōro: Būreejtōn Boyd K. Packer, Elder L. Tom Perry, im Elder Richard G. Scott. Emōj aer jepļaak n̄an kapijunen eo aer ilan̄. Jenaaj emeļo̧ke er. Jej kam̧m̧oolol bwe kōn waanjon̄ak ko aer kōn iakwe eo an Kraist im kōn katak ko rem̧m̧an rekar likūti ippād wōj kajjojo.

Jej leļo̧k ad karuwainene eo emānentata n̄an Rijilōk ro ad rekāāl, Elder Ronald A. Rasband, Elder Gary E. Stevenson, im Elder Dale G. Renlund. Em̧m̧aan rein eļap aer wūjlepļo̧k n̄an jerbal in an Irooj. Relukkuun karbab n̄an bōk jerbal kein raorōk ko emōj kūr er n̄ani.

Tōre ko ļo̧k, ke ikar riiti im kejōkļo̧kjeņ kōn eoon kein, ruo baj eoon ko rekar pād wōt ilo ļōmņak ko aō. Eoon kein jim̧or eļap aō jeļā kaki. Eoon eo kein kajuon ej jān Kwaļo̧k eo an Kraist ioon Toļ eo: “En romaak ami meram im̧aan mejān armej, bwe ren lo ami jerbal ko rem̧m̧an, im nōbar Jemami i lan̄.”¹ Eoon eo kein karuo ej juon eo ekar itok n̄an kōlm̧enļo̧kjeņ eo aō ke ij kejōkļo̧kjeņ kōn meļeļe eo an eoon eo kein kajuon. Ej jān Bok eo an Rijilōk Paul n̄an Timote: “Kwōn juon jon̄ak n̄an ro rej tōmak, ilo naan, ilo kōm̧anm̧an, ilo yokwe, ilo tōmak, im ilo kwōjarjar.”²

Ij tōmak eoon eo kein karuo ej kōmeļeļeik, m̧ōttan eo eļap, ewi wāween ad maron̄ kōttōbrak eoon eo kein kajuon. Jej jino waanjon̄ak n̄an ro rej tōmak jān ad mour kōn gospel eo an Jisōs Kraist ilo naan, ilo kōm̧m̧ao, ilo iakwe em̧ool, ilo jetōb, ilo tōmak, im ilo erreo. Ilo ad kōm̧man āindein, meram ko ad renaaj romaak n̄an ro jet bwe ren loe.

Kōj kajjojo rekar itok n̄an laļ in im emōj leļo̧k n̄an er Meram in Kraist. Ilo ad ļoor waanjon̄ak eo an Rilo̧mo̧o̧r eo im mour āinwōt Eaar mour im āinwōt Eaar katakin, meram in enaaj romaak ilo kōj im naaj kōmeram iaļ eo n̄an ro jet.

Rijilōk Paul ej kōllaajrak jijino m̧wil ko an juon ritōmak, m̧wil ko me renaaj kōm̧m̧an bwe meram eo ad en romaak. Jen lale kajjojo iaer.

Ikar kwaļo̧k m̧wil ko ruo im̧aantata ippān doon—kwōn juon waanjon̄ak ilo naan im ilo kōm̧m̧aao. Naan ko jej kōjerbali remaron̄ ļōn̄aj im im̧we, ak er remaron̄ kōmetak im kajook. Ilo laļ in rainin ewōr wāween an itok naan in kanijnij ko me jej jebooļi jabdewōt jikin jej etal ie. Elukkuun pen kōjekdo̧o̧n ad ron̄jake aer kōjerbal etan Anij ilo iien ko rejjekkar im ļōmņak ko rejjekar. Naan in kanijnij ko emōj aer jino erom m̧ōttan wōt television ko, pija ko, bok ko, im kōjan̄jan̄ ko. M̧wil ko rejjab jejjet rej kōnono ko reddo im kajin ko rekalulu. Jen kōnono n̄an ro jet ilo iakwe im kautiej, aolep iien kōjerbal kajin eo ejjejet ak ennaan ko me reban kōmetak ak kainepataik ro jet. Kōm̧m̧an bwe jen ļoor waanjon̄ak eo an Rilo̧mo̧o̧r eo, eo ekar kōnono ilo ettā im jouj aolep iien An kwaļo̧k.

M̧wil eo juon Paul ekar kōnono kake ej iakwe-em̧ool, eo emōj kōmeļeļeiki āinwōt “iakwe eo erreo an Kraist.”³ Ij kile bwe ewōr ro me jemaron̄ im̧we er ro rej ajimmakeke, ro rej nan̄inmej, im ro rej ebbweer. Ewōr ad iien em̧m̧an n̄an jipan̄ er im n̄an kotak jetōb ko aer. Rilo̧mo̧o̧r eo ekar bōktok kōjatdikdik n̄an ro ratajinemjen im kajoor n̄an ro rōmōjņo̧. Ekar kōmour rinan̄inmej; kōm̧m̧an bwe ri kūrro ren etetal, ri pilo n̄an loļo̧kijeņ, im ri jaron̄ron̄ n̄an ron̄. Aaet Eaar kōjerkak ro remej jān mej. Ilo aolepān iien Jerbal eo An Ekar diwōjļo̧k ilo iakwe em̧ool n̄an jabdewōt ro repād ilo aikuj. Ilo ad ļoor waanjon̄ak in An, jenaaj kōjeram̧m̧an mour ko, ekoba mour ko ad make.

Eo juon, jej aikuj erom juon waanjon̄ak ilo jetōb. N̄an n̄a meļeļein menin ej bwe jen kijejeto ilo jouj, kam̧m̧oolol, jeorļo̧k bōd, im jerbal em̧m̧an. Mour kein rem̧m̧an renaaj letok n̄an kōj juon jetōb eo enaaj un̄ūr mour ko an ro ipeļaakid. Ekar jet tōre ko rem̧m̧an ilo aolepān iiō kein bwe imaron̄ kar iiaio ippān elōn̄ armej ro rej kabwijer kain jetōb in. Jej bōk juon en̄jake ejenolo̧k n̄e jej pād ippāer, juon en̄jake eo me ej kōm̧m̧an bwe jen kōņaan iiaio ippāer im n̄an ļoor waanjon̄ak ko aer. Rej kwaļo̧k Meram eo an Kraist im jipan̄ kōj en̄jake iakwe eo An n̄an kōj.

N̄an kōmeļeļeiki bwe meram in ej itok jān juon jetōb erreo im iakwe eo im ro jet rej kile, in kwaļo̧k ippāmi juon aō en̄jake elōn̄ iiō ko rem̧ootļo̧k.

Ilo iien in, ritōl ro an Kabun̄ in rekar kweilo̧k ippān jeban ro ilo Jerusalem n̄an aer jerbale juon lease agreement kōn jikin eo im enaaj kar ekkal ie Church’s Jerusalem Center. Bwe jen maron̄ bōk mālim in, Kabun̄ in ekar aikuj errā bwe en ejjeļo̧k jerbal in ito-itak im kwaļo̧k gospel eo renaaj kōm̧m̧an ippān membōr ro ad ro renaaj pād ilo m̧wiin. Ālkin an koņ in kar kōm̧m̧an, juon iaan jeban ro an Israeli, eo ebwe an Kabun̄ in jeļā kajjeen im ej membōr, ekar kwaļo̧k bwe ekar jeļā bwe Kabun̄ in enaaj kile koņ in n̄an jab ito-itak im kwaļo̧k gospel eo. “Ak,” ekar ba, kōnono n̄an rijikuuļ ro renaaj jikuuļ ijin, “ta eo jenaaj kōm̧m̧ane kōn meram eo ilo mejāer?”⁴ Meram in ejenolo̧k enaaj ke romaak ilo kōj, bwe ro jet ren maron̄ kile im kam̧m̧oolol kake.

Bwe jen juon waanjon̄ak kōn tōmak meļeļein ej bwe jej lōke Irooj im ilo naan ko An. Ej meļeļein bwe jej kabwijer im bwe jej naajdiki tōmak ko, ko renaaj tōl ļōmņak ko ad im m̧akūtkūt ko ad. Tōmak eo ad ilo Irooj Jisōs Kraist im ilo Jemedwōj Ilan̄ enaaj im̧we aolep ro jej jipan̄ er. Ilubwilijin poktak ko ilo tōre kein ad, idaabtōk ko kōn wāween ko jejeļā, im tarpok kōn mour, juon tōmak eo eban jako ej erom juon emjak n̄an mour ko ad. Keememej bwe tōmak im pere rej jāmin waļo̧k ilo ejja ļōmņak eo wōt ilo ejja iien eo wōt, bwe juon iaer enaaj kariab eo juon. Ij āliji ta eo emōj kar bar ba—bwe n̄an maron̄ bōk im n̄an maron̄ kōjparok tōmak eo jej aikuji, elukkuun aorōk bwe jen riit im katak im kejōkļo̧kjeņ kōn jeje ko rekwojarjar. Kōnono ippān Jemedwōj Ilan̄ ilo jar eaorōk. Jejjab maron̄ kōwaane men kein, bwe rikapo eo im ro mōttan rejjab bōjrak ilo aer pukōt m̧ōjņo̧ ko ad, dikļo̧k ad tōmak. Irooj ekar ba, “Niknik kappukot, jar iien otemjej, im lōke, im aolep men ko naaj jerbal ippān doon n̄an em̧m̧an eo ami.”⁵

Āliktata, jej aikuj in erreo, meļeļein bwe jej aikuj in erreo ilo ānbwin, ļōmņak, ilo jetōb. Jejeļā bwe ānbwinid ej juon tampeļ, bwe jen kōjparoke kōn erreo im kautiej. Ļōmņak ko ad rej aikuj obrak kōn kōļmenļo̧kjeņ ko n̄an ļōn̄aj im kotak im kōjparok jān men ko renaaj kattooni. Bwe jen maron̄ bōk Jetōb Kwojarjar eo āinwōt m̧ōttad, jej aikuj in wānōk. Ro jeiū im jatū, erreo enaaj bōktok aenōm̧man in kōļmenļo̧kjeņ im enaaj kōkarbabe kōj n̄an ad bōk kallim̧ur ko an Rilo̧mo̧o̧r eo. Ekar ba, “E m̧ōņōņō ro erreo būrueir, bwe re naaj lo Anij.”⁶

Ilo ad kam̧ool bwe jej waanjon̄ak an ro ritōmak ro ilo naan, ilo kōm̧m̧aao, ilo iakwe-em̧ool, ilo jetōb, ilo tōmak, im ilo erreo, jenaaj karbab im erom meram ko n̄an laļ in.

Imaron̄ ke ba n̄an kom̧ aolep, im eļaptata n̄an kom̧ jodikdik ro, bwe ilo an laļ in em̧m̧akūt ļo̧k im ettoļo̧k jān pedped in katak ko im unin tōl ko kar litok n̄an kōj jān Jemedwōj Ilan̄ eo ej iakwe kōj, jenaaj jenolo̧k jān jarlepju eo eļap kōnke joktak. Jenaaj jenolo̧k kōnke ekarbab ad nuknuk. Jenaaj oktak kōnke jejjab kōjerbal naan ko renana im kōnke jej jab bōk m̧ōttan uno ko rekajoor ko rej kakkure ānbwinnid. Jenaaj oktak kōnke jejjab kōjerbal kōjak ko renana im naan ko rekajookok. Jenaaj oktak kōnke ilo ad pepe im jab kobrak ļōmņak ko ad kōn pija ko kāleti ko renaaj kōm̧akūt jetōb eo jān mōko im̧ōd im mour ko ad. Jenaaj lukkuun jenolo̧k ilo ad kōm̧m̧ani kālet ko rejelōt m̧wil ko—kālet ko rej pedped wōt ioon pedped in katak ko an gospel eo im jon̄ak ko. Men kein rej kōm̧m̧an ad oktak jān enan̄in aolepān laļ in rej barāinwōt letok n̄an kōj meram eo im jetōb eo me enaaj romaak ilo juon laļ eo emarok.

Jet iien epen ad maron̄ oktak im jenolo̧k ilo jarlepju eo eļap. Ej piktokid n̄an mijak ta eo ro jet remaron̄ ļōmņak ak ba. Naan in kaenōm̧m̧an ko jān Sam Ko: “Irooj aō meram im aō lo̧mo̧o̧r; wōn eo in mijak e? Irooj kajoor an aō mour, wōn eo in lōļn̄o̧n̄ kake?”⁷ Ilo ad kōm̧man bwe Kraist en pād io̧ļapļap in mour ko ad, mijak ko ad renaaj oktak im peran in kam̧ool ko ad.

Mour in ewāppen ak ejjab n̄an kōj, im ilo iien apan̄ ko im iien ko reppen, emaron̄ kōmōjņo̧ik kōj, im kōm̧m̧an bwe meram eo ilo kōj en tinaad. Ijoke, kōn jipan̄ jān Jemedwōj Ilan̄, jejjo jipan̄ jān ro jet, jemaron̄ bar bōk meram in eo enaaj kōmeram ad iaļ bar juon alen im leļo̧k meram eo ro jet remaron̄ aikuji.

N̄an kōmeļeļeiki, ij kwaļo̧k naan kein rekajoor an juon boem̧ em̧m̧an ippa ikar riiti elōn̄ iiō ko rem̧ootļo̧k:

Ro jeiū im jatū, ad iien em̧m̧an n̄an romaak ipeļaakid kajjojo raan, mekarta jekjek rot ko jej pād ie. Ilo ami ļoor waanjon̄ok eo an Rilo̧mo̧or eo, ami waanjon̄ok enaaj erom iien eo em̧m̧an n̄an erom juon meram n̄an ro jet, mekarta remaron̄ in membōr in baam̧le eo ad make im ro m̧ōttad, rijerbal eo ej jerbal ippād, ro jej kab jeļā kajjeer, ak rūwaimāijet ro.

N̄an kom̧ kajjojo ij ba bwe kom̧wij ļaddik ak leddik ro nejin Jemedwōj Ilan̄. Kom̧ ar itok jān im̧aan Mejān n̄an mour ioon laļ in ium̧win juon tōre, bwe kom̧win juon waanjon̄ak kōn iakwe eo an Rilo̧mo̧o̧r eo im katak ko, im peran n̄an kōm̧mani bwe meram eo ami en romaak n̄an aolep. N̄e tōre in ioon laļ in enaaj jem̧ļo̧k, eļan̄n̄e kom̧ kar kōm̧mane ijo koņaam̧i, kom̧ naaj jeraam̧m̧an in ro̧o̧lļo̧k im mour Ippān n̄an indeeo.

Naan ko an Rilo̧mo̧o̧r eo rej bar kam̧ool: “N̄a, meram in laļ; eo ej ļoor Eō e jāmin etal ilo marok, a enaaj an meram in mour.”⁹ Kōn E ij kam̧ool. E ej ad Ripinmuur; E ej ad Rijojomar ippān Jemed. Ej ad Waanjon̄ak im ad kajoor. E ej “N̄a meram eo ej romaak ilo marok.”¹⁰ Ij kōjatdikdik bwe aolep ro rej ron̄jake aō kōnono naaj kallim̧ur n̄an ļoor E, im erom juon meram ej romaak n̄an laļ in, en̄in ej jar eo aō ilo Etan ekwojarjar, aaet Jisōs Kraist Irooj, amen.