I Tau (nakon te abanuea are Tiretio) N na Kona n Roko n Tiretio?

Mauri tariu ao mwaneu aika tangiraki, ai kakabwaiara ngaira n ikotaki bwa ti na reireinaki irouia ana toro te Uea. E aki Tamaroa aron mwaitin kawai are e kairiiri ao ni kakabwaiaira iai Tamara are i Karawa n tatangira? E rang n tangiriira bwa ti na oki Nakoina.

Rinanon rinan aika reireitaki n aro n akoi ngke te kairake ngai n Taokita ae tibwa otinako man te kuura n reirei ibukin bwainaoraki, I butimwaeaki bwa N na kataneiai n te onaoraki ibukiia ataei n te burokuraem ae birimwaaka, ao e kaiangatoa. Ngke I kaitibo ma raou ake tabeman n tibwa otinako, I namakinna bwa te kabanea ni memeere wanawanau ao te kabanea n aki tauraoi ibuakoia ni kabane. I taku bwa bon akea te anga ae I kona iai ni karokoai n aia rinan kain te kurubu aio.

Ni moantaai n ara kateniua n namwakaina, I tekateka n aia tabo neeti n te onaoraki n te bwakanakontai n te tairiki teuana, ni katinea ao n tang ibon irou ao ni kan matu ngke I kataia ni korea te ota ibukin karinan te ataeinimwane ae iai irouna te niumonia. I bon tuai man namakina te bwarannano inanon maiu. I aki ata aron katokan te niumonia iroun te roro ae te 10 n ririki. I a tabe n iango bwa tera ae I karaoia ikekei.

Bon n te tai anne, temanna te kara ae kaain te tabo e katoka baina iaon angau. E titirakinai bwa I uara, ao I a kaota arou ni bwarannano ao ni maaku. Ana kaeka e bita maiu. E tuangai bwa e rang kakatonga ngaia ma ni kabane raona ake tabeman irou ao aron aia namakin are N na kona n riki bwa te Taokita ae bane arona. Ni kauarerekeana, iai ana onimaki irou n te tai anne ngke ngai I bon aki kakoauaai ibon irou.

N aron oin au taneiai, n tabetai ti kona n ongo tabetai irouia ara membwa n titiraki, “E tau au konabwai n aron te aomata arei?” ke “N na bon kona n roko n te abanuea are tiretio?” Bon eng, bon akea te bwai ae kona n atongai bwa “e tau.” Akea mai iroura ae e kona “reke” ke “karekea” kamaiuara, ma bon te bwai ae ririki bwa ti na titiraki ngkana ti kona ni butimwaeaki iroun te Uea, are kaanga tein otau n titiraki aikai.

N tabetai ngkana ti nako n taromauri, ti rootaki n te bwarannano riki man te kakao nakoira bwa ti na katamaroai riki arora. Ti na iango ma te karaurau, “I aki kona ni karaoi bwaai aikai ni kabane” ke “I bon aki kona n roko n tamaroaia aomata aikai ni kabane.” Ke tao ti na namakina ae aron are I namakinna n te onaoraki n te tairiki arei.

I bubuti, tariu ao mwaneu, ti riai n toki ni kabotauiira ma tabeman. Ti kammarakira ni bwaai aika aki kainnanoaki man te kaiangatoa ao te kakabotau. Ti kairua ni motika arora aika kakaawaki man bwaai ake ti karaoia ke akea iroura man aia iango tabeman.. Ngkana ti na kabotau, ti na kabotaua arora n taai aika nako ao arora n taai aikai—ao riki bon arora are ti tangiria nakon taai aika a na roko. Ti te bwai ae kakaawaki riki bwa tera ana iango Tamara are I Karawa ibukira. Taiaoka bubutiia n te bwa are E iangoia ibukimi. E na rang n tangiria ao E na kaetiira ma ti naki kabwarai nanora, anne ana kamwane Tatan.

N na kaineti raoi ao ni kamatata. Te kaeka nakon titiraki aikai “I tau?” ao “N na kona n roko n te abanuea are tiretio?” bon “Eng! Ko na bon tau” ao Eng, ko na roko ngkana ko reitinako n rairannano ao n aki karekea angam ke ni kaitara.” Atuan karawa bon tiaki te tia motikitaeka ae akea nanona are e na kakaai anga ni kaotinakoira man te abanuea are tiretio. Bon Tamara n tangira ae kororaoi, are e rang tangiria man bwaai ni kabane ni karekei bwaai ni kabane ibukiia Natina bwa a na okira mweengaia ni maeka ma Ngaia bwa utu n aki toki. E bon anga Natina ae te Riki Temanna bwa tina aki mate ma ti na karekea te maiu ae akea tokina!¹Taiaoka Kakoaua, ao Taiaoka karekea te onimaki ao te raunnano man, te koaua ae akea tokina. Tamara are i Karawa e tangiriira ni kabane bwa tina roko! Anne Ana mwakuri ao Mimitongina.²

I tangira ana kawai Beretitenti Gordon B. Hinckley e kabongana te reirei aei. I ongo irouna ngke e taekinna n taai tabetai, “Tariu ao mwaneu, man bwaai ni kabane ake e kantaningaira te Uea bwa ti na kataia, ma kam na bon kabanea ami kona ni kataia!”³

“Rang kataia” nanona ni karaoia n ara kabanea n Tamaroa, n atai kabwakara ake ti riai ni katamaroai, ao imwiina ni kataia riki. Man kaokiokan karaoan aei, ti na kaniira riki nakon te Uea; ti na namakina riki Tamneina; ⁴ ao ti na karekea riki Ana akoi, ke buouka⁵

N tabetai, I taku, bwa ti aki ata aron mwaitin ana kan ibuobuoki te Uea nakoira. I tangira ana taeka Unimwane David  A. Bednar, are e kangai:

“Angiia mai ibuakora a matata raoi bwa te Mwakuri ni Kamaiu bon ibukiia taan bure. I aki ataia raoi, e ngae n anne, ti ataia ao ti matata bwa te Mwakuri ni Kamaiu bon ibukiia naba aika Itiaki. …

“… Te Mwakuri ni Kamaiu e karekea te ibuobuoki nakoira ni kona n tokanikai ao n totokoi bwaai aika buakaka ao ni karaoi ao n rikirake n tamaroa. …

“‘… Bon … rinanon ana akoi te Uea are aomata nako … a na karekea te korakora ao te ibuobuoki ni karaoi mwakuri aika raraoi are a na bon aki kona ni [karaoi]. … Te akoi aei bon te mwaaka …’ [Bible Dictionary, “Grace”; emphasis added] … ke te buoka mai karawa nakoira n tatabemaniira ake a rangi ni kan tau ibukin te abanuea are tiretio.”⁶

Bwaai ni kabane ake ti na karaoi ni karekea te ibuobuoki mai karawa aei bon ti te bubuti ao imwiina ni mwakuri iaon wirikiriki aika eti ake ti karekei.

Te rongorongo ae kakukurei bwa ngkana ti rairi nanora ma nanora ni kabane, ara bure mai imwaina e na bon aki tuukiira man te karietataki. E tuangiira Moronai bwa taan bure n ana bong, “Bwa n tainako ngkana a rairii nanoia ao n ukoukora kabwaraan aia bure, ma nanoia ni kabane, ao a na kabwaraaki aia bure.”⁷

Ao te Uea e taetae ibukiia taan bure:

“Ao ngkana e kaota ana bure nakoim ao nakoiu, ao e rairannanona ma te nano ae koaua, ngaia ae ko na kabwara ana bure, ao N na kabwara naba ana bure.

“Eng, ao N na kabwarai aia bure au botanaomata n aron katoa tain aia rairannano ibukin aia bure nakoiu.”⁸

Ngkana ti rairannano ma te nano ae koaua, te Atua e na bon kabwarai ara bure, riki ngkana ti karaoa te bure ae e a okioki. N aron are e taekinna Unimwane Jeffrey R. Holland: “E ngae ngkana ko taku n am iango bwa e mwaiti am tai ae koa tia ni karaoi, … , I kakoaua bwa ko tuai raroa man ana tangira Atuam. E kanganga bwa ko na iinako iaan otan ana mwakuri ni Kamaiu Kristo ae akea tokina.”⁹

Aio e aki nanonaki bwa te bure e butimwaeaki. Te bure n tainako iai mwiina. Te bure n tainako e kaikoaka ao e kammaraki te tia bure ao naake a rootaki man ana bure te tia bure. Ao te rairannano ni koaua e aki beebete.¹⁰ Riki, taiaoka oota bwa e ngae ngke te Atua e kanakoa namakinan te bure ao te memea man ara bure ngkana ti rairannano ma te nano ni koaua, E kona n aki waekoa ni kanakoi mwiin ni kabane ara bure. N tabetai a bon tiku iroura ni ua tokin maiura. Ao karoton te bure ae nanonaki are e taekinna temanna, “I kona ni bure ngkai ao I raira nanou rimwi.” I kakoaua bwa aio bon bwainikiriinan ana anganano ao korakain Iesu Kristo.

Te Uea e taekinna bwa e bon aki kona ni kariaia karaoan te bure naba teutana.”¹¹

Ao Aramwa e tataekinna, “Nooria, I taku nakoim, te aro ae buakaka e bon aki kona ni karekea te kakukurei.”¹²

Teuana bukina are e taekinna Aramwa ae bon koaua bwa ni kakaraoan te bure, ti kararoaira man te Tamnei, tina kona ni bwarannano, ao imwiina tina aki rairannano. Ma I manga taekinna riki, ibukin ana Mwakuri ni Kamaiu te tia Kamaiu, ti kona n rairannano ao ni kabwaraaki ni kabane ara bure, man te tai are ara rairannano e bon nako mai inanora.

Te bwai ae ti aki kona ni karekea iai anga nakon te rairannano. E na bon aki mwakuri ni kaitiakiia inanon ara bure man taekinana, “te Atua e ataia ae bon rang korakora ibukiu, ngaia are E butimwaeai n ai arou.” N rangi ni kataia” nanona ti kawakinan ngkai ti kabanei nanora n roko n ana kainibaire te Uea, are e kamatataaki n titiraki ake ti kona n titiraki iai bwa ti aonga ni karekea te rekomente ibukin te tembora.

Te bwai teuana are e kona ni kararoaira iai mai karawa ao ni kamaenakoira man te ibuobuoki are ti kainnanoia ngkai bon te kaitara. Man ana boki Moote, ti reiakinna bwa Tatan e tewenakoaki mai karawa ibukin te kaitara. ¹³ Ti kaitara n te ai are ti taekinna iai inanora, “I aki kainnanoa te Atua, ao I aki riai n raira nanou.”

N nakoau n riki bwa te tia bwainnaorakiia ataei, I ataia bwa ngkana temanna e aki butimwaea te mwakuri ni kamaiu ae aki tau, e kona ni karekea tokina te mate n rabwata. N aron aei, ngkana ti kaitara te Atua, ti totokoa te ibuobuoki are tii ngaia ae ti onimakinna. Akea ibuakora ae e kona ni karaoa aei ni bon oin mwaakana. Te koaua bwa akea iroura ae e na kona n “tau,” are e na kamaiuaki rinanon ana kanikina ao ana nanoanga Iesu Kristo,¹⁴ ma ibukina bwa te Atua e karinea inaomatara, ngaira naba ti aki kona ni kamaiuaki n akean ara kakatai. Anne aron te baeranti imarenan te akoi ao te mwakuri n riki. Ti kona n onimakina Kristo ibukina bwa E tangiria ni buokiira ao ni bitiira. N te koaua, E bon tia ni buokiira. Ti teei ao n ururinga ao n atai Ana ibuobuoki inanon maiumi.

I kakoaua nakoimi bwa ngkana kam bon kataia raoi ao n aki karekea angam ke ni kaitara, rairannano n tainako ao ni bubuti ibukin ana nanoanga, ke ana ibuobuoki, Kristo, kona bon “tau,” are, ni butimwaeaki I matan te Uea; ko na kona n roko n te abanuea are tiretio ao ni kakororaoaki iroun Kristo; ao ko na karekei taian kakabwaia ao mimitonging ao te kimwareirei are e tangiria te Atua ibukiia natina ni kabane aika kakaawaki—n ikotaki ma bon ngkoe ao ngai. I kakoaua bwa e maiu te Atua ao e tangiriira bwa ti na okira mweengara, Iesu Kristo ae mimitong, amen.