Butimwaea te Mwioko inanon te Korakora, Aine inanon Tion
N riki bwa taan kawakin berita, ti riai ni kamatebwai tua aika kakawaki ibukin te euangkerio ao ni karekei ara koaua ae aki mwainging ni koaua.
I namakina te kimwareirei ngkai ti ikotaki n te Tienta ni Maungatabu aei ma ataeinaine, kairake n ataeinaine, ao aine n te Ekaretia. Ti ataia naba bwa iai tengaa kurubu n aine n ikotaki ni kabuta te aonaaba ni mataku ni waaki aikai, ao I kakaitau n te tai aei ma buoka ake a kariaia ikotakira ni katiteuanaaki ao n iai bukina n te tairiki aei.
N Okitobwa 2006, e anga ana marooro Beretitenti B. Hinckley ae e atunaki “Teirake, O ana mwaane te Atua,” n aranaki n te kuna n taromauri are e koreaki n 1911.1 Bon te wewete ni mwakuri ibukiia mwaane n te Ekaretia n teirake ao ni kanakoraoiia. I iangoa te marooro anne ngke I tataro bwa terana ae N na tibwauaia nakoimi.
Taari, ti maeka n “taai aika kamamate”2 Aron ara bong e na aki riki bwa te kamiimi nakoira. A kaman tuangaki n taai ni kauring ao te reirei bwa ti aonga ni kona n tauraoi. Te ka 8 ni mwakoro n ana boki Moomon e anga te kabwarabwara ae karawawata ae eti n aron ara bong. N te mwakoro aei, e taku Moronaai e a kaman noori ara bong, ao e raonaki ma te buaka, te maningoongo ibukin te buaka, urubwai aika korakora, te tiritiri, rawebwai, ao aomata ake a tuangiira bwa akea ae eti ao ae bure imatan te Atua. E kabwarabwaraia aomata ake a onrake n te kainikatonga, ake a tabe ma bwainakin kunnikai aika bobuaka, ao ake a bwaningarei taian aro. E kaotia aomata ake a iangoi bwain te aonaaba are a kariaia “ake a kainnano, ake akea karabaia, ake aoraki ma ake a karawawataki a na rirarikimi”3 n aki tabeakinaki.
E titiraki Moronaai n nanora aika koaua—ngaira ake ti maeka n taai aikai. E taku, “E aera ngkai kam bwairang ni katoka iaomi aran Kristo?”4 Te bukibuki aei e kabwarabwara aron rikiraken rabakaun ara aonaaba.
Iotebwa Timiti—Mataio e kaotia bwa ni kabanean raoi boong “aika rineaki ni kaeti ma te berita ae tabu”5 a na aki kakoauaki. Berita akanne n raonaki ma ataeinaine, kairake n ataeinaine, ao aine n te Ekaretia ake a tia ni bwabetitoaki ao ni karaoi berita ma Tamaia are i Karawa. E ngae n ae ngaira ti a reke n te kaangaanga ni mwamwanaaki n reirei aika aki koaua.
Taari, I aki kakoaua bwa waaki akanne a na nakoraoi ma n reitinako. Ngkana itera ake a kaeta te kawai bon kanikina, ti riai ni katauraoira ibukin angibuaka ake imwaaira. E na beebete ngkana ti kabwarai nanora, ma ngkai ngaira aomata ni berita, ti aki riai ni bwarannano. N aron ae e taku Unimwaane Gary E. Stevenson, “Kakabwaia ake e anganiira Tamara are i Karawa ni maiu n taai aika kamamate bwa ti maeka naba n taai aika bwanin.”6 I tangira te karaunano n te marooro anne.
E tuangiira Beretitenti Russell M. Nelson n te ririki ae nako: “Kaikoaki ni kaitara te Ekaretia, ana tua ao waakin maiura a tabe n rikirake. Ibukin aei, ti kainnanoia aine are e matoa aan aia atatai n ana tua Kristo ao are e na kamanena te atatai anne n reirei ao ni buoka ni karikirakeia rooro n aomata ake a kona n totokoa te bure. Ti kainnanoia aine ake a kona ni kinaa te mwamwanaaki n aekaia nako. Ti kainnanoia aine ake ataia bwa a na kanga n rin ni mwaakan te Atua are e tauraoi nakoia taan kawakin aia berita ao ake a kaota aia koaua ma te onimaki ao te tangira ae kororaoi. Ti kainnanoia aine ake a ninikoria ma ana atatai Tinara Ewa.”7
E kakoauaki irou n te rongorongo aei bwa n aki ongei aron ara bong, a mwaiti bukin kimwareireira ao tekeraoira. I kakoaua ma nanou ni koaua bwa ngaira taari iai korakorara ao ara onimaki are a anganiira te kona n tokanikai iaon kakaewenako ni maiu ni boong aika kaitira. E koroboki Titita Sheri Dew, “I kakoaua bwa te tai ae ti reiakinaki ni kamwakura bwaninin te anainano n rairakiia, aine ake a kawakin aia berita, uean te Atua e na bitaki ni kangainaa.”8
E na anaa te konabwai ngkana ko a rairaki ao ni kawakin berita aika tabu. Ni karaoan aei, ti riai n riki bwa ataeinaine ao oinaine ake a kamatebwaia tuan te euangkerio ao a karekea aia koaua ae aki mwainging ae koaua. Aikai teniua taabo ake I kakoauai bwa aan am koaua ae matoatoa ao I taku bwa a kakawaki ibukin ara atatai.
Te moan, ti riai n ataa kakawakin te Atua Tamara ae Akea Tokina ao Natina, Iesu Kristo, nakon ara onimaki ao te kamaiuaki. Iesu Kristo ara Tia Kamaiu ao te Tia Kabooira. Ti riai ni kamatebwaia ao n oota n Ana Mwakuri ni Kamaiu ao ti na kanga ni kamwakuria ni katoa bong; te rairannano bon teuana te kakabwaia ae korakora n tikura iaon te kawai ae raoiroi. Ti riai n taraa Iesu Kristo bwa te banna ao te katoto are ti na riki n ai arona. Ti riai n reitinako n reireiniia ara utu ao kaain te kiraati ana babaire ni kamaiu Tamara are i Karawa, are e raonaki ma ana tua Kristo.
Te kauoua, ti riai n ataa te kainnano ni kaokan te tua, barongaakina, ao kiing ibukin kariaia ni boong aika kaitira. Ti riai ni karekea ara koaua bwa te Burabeti Iotebwa Timiti e bon rineaki ao ni weteaki mairoun te Uea ibukin kaokan te euangkerio ao n ataia bwa e barongaia aine n te Ekaretia imwiin katean ana Ekaretia Kristo n taai ake ngkoa.9
Te kateniua, ti riai ni kamatebwai ao n oota n otenanti ao berita aika tabu n te Tembora. Te tembora e katauraoa te tabo ibukin aan ara koaua aika tabu, ao e bubuti te Uea bwa ti na nanako iai, n iango, ni kamatebwai, ao ni kakaei nanoia aika onoti ao ni maiuakin n tatabemaniira nako. Ti na kamataataki bwa rinanon otenanti n te tembora, te mwaaka n atua e kaotaki inanon maiura. 10 ao ibukin otenanti n te tembora, ti kona ni katauraoaki ni mwaakan te Atua ao Arana e na mena iaora, Mimitongina e na katobibira, ao Ana anera a mwiokoaki n tararuaira.11 I miimi ngkana ti katan iaan mwaakan berita akanne.
Taari, e ngae ngke tao te kabanea ni uarereke ibuakon te koraki aei a kona n teirake inanon te onimaki ao ni karaoa tabeia ni katea uean te Atua. Ataei a moanna ni karekei oin aia koaua man te wareware ao te kakauongo nakon booki aika tabu, te tataro ni katoa bong, kanakin te toa ni kawai aika kakawaki. Ataei ni kabane ao ataeinaine a kona ni kaunga te kainutu n te tairiki ao n riki bwa kaaina. Kam kona n riki bwa moan aomata ni katorobubua ngkai a ikotaki am utu ibukin te tataro n utu. E ngae ngkana mweengami, aki tau, ami katooto ae onoti ae kakaonimaki ni maiuakina te euangkerio e kona n anainano ni maiuia ami utu ao raoraomi.
Ataeinainen te Ekaretia a riai n taraiia bwa taan boutoka aika kakawaki ni mwakurin te nakoanibonga n te kamaiu ao n aki riki bwa taan tii taraia ma taan boutoka. Kam tau nakoa ao ni katabuaki irouia naake a taui kiingin te nakoanibonga ni mwakuri bwa taan kairiiri ma te mwaaka ao te kariaiakaki n te mwakuri aei. Ngkai kam kakaraoi nakoami n te kiraati ibukiia Beretitentii ao ni katauraoi n te tamnei, ni kaai n reirei, karoko irouia ao buokiia kaain ami kiraati, ao reireia te euangkerio imarenami, iai tabemi n te mwakuri aei ao ngkami ni kabane ao ami roro nako a na kakabwaiaki.
Aine ni kabane a riai n taraiia bwa taan boutoka aika kakawaki ni mwakurin te nakoanibonga. Aine n te Ekaretia aei bon beretitenti, kauntira, taan reirei, kaain te kauntira, aine, ao tiina, ao uean te Atua e aki kona ni mwakuri ni karokoa are ti teirake ao ni kakoroa nanon mwiokoara ma te onimaki. N tabetai ti riai ni karekea te taratara ae e na kona ni karaoaki.
I kaitibo ma ainen Mexico n taai aika nako are e ataia bwa tera nanon karaoan mwiokoana ma te onimaki. E weteaki Marffissa Maldonado bwa e na reireiniia kairake n te Reirei n Tabati. Iai 7 ana ataei aika roroko ngke e weteaki, ma ngkai ai 20 ana ataei n roroko ni katoabong, Ni kakubanakoana, I titirakinna, tera ae e karaoia ni keeraken ana mwaiti. E taku ma te nanorinano, “O, bon tiaki ngai. A bane n ibuobuoki kaain te kiraati.” Ni kabane, a noori araia ake aki kakaonimaki iaon te beeba ao ni moanna ni kaokiia nakon te taromauri. Iai naba aia bwabetito ibukina e nako man aia konabwai.
E karaoa ana tabo ni kareke rongorongo Titita Maldonado ibukiia kaain ana kiraati ae aranaki “Ngai Natin te Atua,” ao e katekei taeka aika kaunganano ao booki aika tabu uatai te tai n te wiiki. E kanakoa ana rongorongo nakoia ana ataei ma tibwangaia ao ana kaunganano. E namakinna bwa e kakawaki te reitaki ni kawai ake a nakoraoi irouia, ao e bon nako raoi anne. E tuangai, “I tangiriia au ataei.” I namakinna te tangira ngke e tuangai taekan aia konabwai, ana katooto e kauringai bwa tera ana onimaki ma ana mwakuri temanna ni kona ni kakoroa nanon te mwakuri aei ma ana ibuobuoki te Uea.
Ara roronrikirake a kaotaki titiraki aika a kaangaanga nakoia ni katoabong, ao angina ibuakora iai aia koraki aika korakai ni kakaei taian kaeka. Te rongorongo ae raoiroi bwa iai kaekaan titiraki ake a titirakinaki iai. Kakauongo nakon aia rongorongo ae tibwa nako taan kairiiri. Ti kaumakaki bwa ti na kamatebwai ao n ataa ana babaire ni kakukurei Tamara are i Karawa. Ti kauringaki ibukin reirei n ana katanoata te utu.12 Ti kaungaaki n reirei bwa ti na kamanenai bwaai n reirei aikai bwa bwai ni mwakuri ni kateimatoaira iaon te kawai ae eti man irariki.
Ni kaania te ririki ae nako, I kawara te tina ae iai natina aika uarereke ake e kamanenai kawai aika raraoi ni kamanoia natina n ekinakoi anainano aika bubuaka ake a kanakoaki aonraain ao n te reirei. E rinea atuun te reirei ni katoa wiiki, angin te tai temanna are e karika te marooro ae bati aonraain, ao e karaoi marooro aika a uaana inanon te wiiki ngkana a kona natina n tabeki aia titiraki ao ni kakoaua a karekea aia taratara ae tau iaon angin marooro aika kaangaanga. E karaoa mweengana bwa te tabo ae mano n tabekan titiraki ao ni karekei ana kaetieti te euangkerio aika a rang uaana.
I raraoma bwa ti maeka n te tabo n totokoa te bure are n tabetai ngaira ni kabane ti tuki angareirei iaon reirei aika eti. Ti kabwaka n reireiniia ara ataeinaine ibukin katauraoaia n riki bwa tiina ae te bwai ae rangin kakawaki ibukina ti aki tangiria n urui nanoia naake a aki mare ke naake aki kona ni kariki, ke n nooraki ni kaonoti rinerine ibukin taai aika a na roko. N angana teuana, ti na bae naba ni kabwaka ni katereterea kakawakin te reirei ibukina ti aki tangiria ni kanakoa te rongorongo ae kakawaki riki nakon te mare. Ti totokoia ni katanoata bwa Tamara are i Karawa e kabwaraa nanon te mare bwa imarenan te mwaane ao te aine ibukina ti aki tangiria n urui nanoia naake a rinanon te kaitataan imarenaia mwaane ma aine. Ao ti na kunea te aki mweengaraoi ni maroroakin kaangaanga n rikin te aomata ke te reitaki n taanga ae kakukurei.
Ni koauana, aine, ti riai ni kaiangomwaakaira, ma ti na kamanena ara motikitaeka aika raraoi ao ootara ibukin te babaire ni kamaiu n ninikoria ao n aki wimakiiki ngkana ti nang reireiniia natira ao ara roronrikirake reirein te euangkerio are a na oota iai ni borauakina te aonaaba are a maeka iai. Ngkana ti aki reireiniia natira ao te roronrikirake reirei aika koaua—ao n reireia n ae mataata—te aonaaba e na reireiniia ana kewe Tatan.
I tangira ana euangkerio Iesu Kristo, ao I kakaitau n aki toki ibukin te kairiiri, te mwaaka, ao te buoka ni katoa bong are I karekea ngkai nati aine ni berita iroun te Atua. I kakoaua bwa te Uea e a tia ni kakabwaiaira, n aroia aine ake a maeka n taai aika kamamate, ma ibukin te mwaaka ni kabane, bwaintituaraoi, ao te korakora ake a kainnanoaki bwa e aonga ni katauraoaki te aonaaba ibukin Kauaokin te Uea Iesu Kristo. I tataro bwa ti bia noori ara konabwai ao n teirake n riki bwa aine n te onimaki ao te ninikoria are e tangiria Tamara are i Karawa bwa ti na riki iai. N aran Iesu Kristo, amen.