Pahngonyuck nuh ke Orekma

Yac nuh kwewa tausin singucul ke mukul fuhsr ac muhtwacn fuhsr, ac siyacnyacn mahtuh puhs sahyac, elos rahrahlah in tari eis lwacta sacohk se tuhkuh sin Salt Lake City. Koanon lwacta sac mwe oraclah eklac netok nuh sin mwet se ma eis ac, oacyacpac mwet ke sucu ac mwet puhs sahyac. Ke lwacta sac tuhkuh ah, sahp ac kuh pacna in wo ac akwuck ikucsyac ah kuh ac seyucki na ke srihpen rahrah ac suhlahklahk. Ritiyacn lwacta sacohk se inge el sie ohiyac sikyak suc ac fah tiac muhlkihnyucklac.

Lwacta sac sihmihsyuck sin Prestuhn luhn Alu luhn Jisus Kraist luhn Mwet Luhlahlfongi ke Lwen-sahflah, ac pohloh kahs luo emet ritiyuck ohinge: “Ke ma inge kom pahngonyuck in kuhlwacnsap oacna sie misineri ke Alu luhn Jisus Kraist luhn Mwet Luhlahlfongi ke Lwen Sahflah. Suleyucklac tuh kom in orekma ke ______ Misin.”

Nuhnak muhnahs esam lah sanctacns soko emet an pahng se in kuhlwacnsap oacna sie misineri full-time ke Alu fohlohkyak luhn Leum. Sacntacns soko ahkluo an ahkuhtweyac ohiyacn orekma se ac misin fuhkah se. Yohk srihpac kuht in akihlen ma sielacna ke sacntacns lukoac ingacn.

Ke facsin luhn Alu uh, kuht kwacna sramsram ke pahngonyuck in kuhlwacnsap fin acn oacna Argentina, Poland, Korea, kuh United States. Tuhsruhk misineri se tiacna pahngonyuck nuh ke acn se; tuh, el pahngonyuck in kuhlwacnsap na. Leum El fahk suc tahfweyuck sel Mwet Pahluh Joseph Smith ke yac 1829 lah fin oasr kena lom in kuhlwacnsuhpuh God, kom pahngonyuck nuh ke orekma sacn.²

Kais sie pahng ac mwe kuneyuck luhn misin, kuh sulpac mwe kuneyuck tokoh an, tuhkuh ke fwackyuck sin mwet kuhlwacnsap luhn Leum. Pahng nuh ke orekma tuhkuh sin God yurin Prestuhn luhn Alu uh. Mwe kuneyuck se nuh sin sie sin puhs likina misin 400 fin facluh nohfohn tuhkuh sin God nuh sin sie mempucr ke U luhn Mwet Sap Singucul Luo, suc orekma ke wal luhn mwet pahluh moul luhn Leum. Mwe sang muhtahl luhn nguhn luhn pahluh ac fwackyuck oasr ke pahng ac mwe kuneyuck nuhkwewa luhn misin.

Section 80 ke Doctrine and Covenants sie ma sihmlac ke pahng in misin nuh sel Stephen Burnett tuhkuh sin Mwet Pahluh Joseph Smith ke 1832. Lutlut ke pahng se inge nuh sel Tamuhlwel Burnett kuh in kahsrwe kuht in (1) kahlwem yohk liki met ah ac ke ma sienna liki “pahngonyuck nuh ke orekma” oacna sie misineri ac “sulwaclah in orekma” ke acn pakpucki ac (2) sifacna sruikihn yohk ac muhtahlkihn ma kuneyucki in fahkwelihk wosasuc uh.

Fuhs 1 ke section se inge pa pahng se in kuhlwacnsap: Leum El fahk nuh sin mwet kuhlwacnsap Lal Stephen Burnett lah el enenuh in som nuh ke muhtuhnfacl uh ac fahkwelihk wosasuc nuh sin mwet nuh kwewa suc ac fah tuhkuh in lohng puhsrwacl.³

Yohkna, fuhs 2 ahkuhtweyac nuh sel Tamuhlwel Burnett ke misineri se suc ac fah srihsrngiyucki in weluhl uh: Leum El fahk lah ke srihpen Stephen Burnett el kena in oasr companion lal, El ac fah sang nuh sel mwet kuhlwacnsap Lal Eden Smith (el in misineri companion se lal).⁴

Fuhs 3 ahkkahlwemye lah acn fuhkah se misineri luo inge elos ac som orekma we uh: Leum El fahk lah Stephen Burnett el ac fah som ac fahkwack wosasuc. Ac finne el som nuh lacyacn acir kuh epang, nuh lacyacn kuhtuhlacp kuh rohtoh, ac tiac yohk srihpac, ke srihpen el ac fah tiac tahfonglac (tiac elyah lah el ac som nuh oyac).⁵

Ke Leum El fahk ke ma suhmuhslah se inge lah ac tiac yohk srihpac (lah Stephen Burnett el som nuh oyac), nga tiacna luhlahlfongi lah El fahk lah El tiacna elyah lah acn fuhkah se mwet kuhlwacnsap Lal ac som orekma we uh. Pwacyena, El elyah kac na pwacye. Tuh ke srihpen orekma in fahkwack wosasuc pa orekma luhn Leum, El ahkkweye, kol, ac pwen mwet kuhlwacnsap Lal. Ke misineri elos srihke in nwacsnwacs ac fokoko liki met ah in orekmakihn kuhfa nuh ke paholos ac elos sang kuhiyaclos in ahkfalye ma kunaclos, na ke kahsruh Lal elos “tiac kuh in tahfonglac”—ke acn elos kuhlwacnsap we uh. Sahp sie sin mwe luti Mwet Lahngo El luti kuht ke fwackyuck inge pa lah sulwaclah se in orekma ke acn yohk srihpac tuh tiac yohk srihpac oacna pahng in orekma uh.

Fuhs se tohkoh an ahkkahlwemye ma enenuh yohk nuh ke srihpac luhn misineri nuh kwewa: Leum El fahk lah elos enenuh in fahkwack ke ma elos tuh lohng ah, ac ma elos luhlahlfongi kac, ac ma elos etuh pwacye.⁶

Fuhs sahflah sacn ahkacsmakuhnuhl Tamuhlwel Burnett ac kuht nuh kwewa ke pahng se lah tuhkuh na pwacye oyac me, Leum El fahk lah kahs in kahsruh El sang nuh sel Stephen Burnett pa luhngse Lal, ac lah El pahnglol, ac lah El pa Mwet in Molwelah lal, Jisus Kraist.⁷

Kuhtuh suwos sahp ac sifacna siyuck lah efuh nga tuh sulwaclah in sramsram ke tuhkweni luhn pristut ke toeni luhlahp ke ip srihsrihk se inge ke ma sielacna liki pahng nuh ke orekma ac sulwaclah in orekma oyac. Top luhk nuh ke kihsen siyuck se inge arulacna fihsrwacsr: moul luhk luti yuc lah ip yohk srihpac inge tiacna kahlwemack suwohs sin mempucr puhs ke Alu uh.

Srihpac yohk se emet oruh nga sramsramkihn ma inge pa ma nga lotwelah ke pacl met ah ke fosrngah, nuhnak uh, ac finne ma koluk uh ma puhlakihnyuck sin misineri puhs suc ke sie srihpac tuh eklac sulwaclah se lalos elos in orekma ke sie pacna acn ke pacl in kuhlwacnsap lalos. Kain in sulpac sulwaclah inge kuhtuh pacl uh mwe enenweyuck ke srihpen ma sikyak oacna mas luhn mahno kuh kihnet, ma upac in eis visas, fohs luhn acn, oreyacn misin sasuc, kuh mwe enenuh eklac puhs fin facluh nohfohn ke orekma in fahkwelihk wosasuc.⁸

Ke sie misineri el sulpac srihsrngiyucki in som orekma ke siena acn, ac sikyak oacna ke sulwaclah se met lal ah. Mempucr ke U luhn Mwet Singucul Luo elos suk moklweyuck ac kolyuck ke elos oraclah kain in mwe sulwaclah ingacn.

Nga sramsram tiac paht pacl somlah nuh sin mukul luhlahlfongi se suc tuh akacsruhi ke mwe puhla yohk luhn insiyacl. Ke sie toeni ac, nga tuhfahna ahkuhtweyac ma sielacna liki pahng nuh ke orekma ac sulwaclah in orekma oyac. Tamuhlwel sacohk se inge srukyac pouk ac kahk sronin muhtahl el fahk nuh sihk, “Ma kom kahsrwe yuc in lotwelah mihsenge tuh ahkmwesahsye ma toasr finpihsuck ma nga tuh us puhs liki yac 30 ac. Ke nga tuh ekihn misineri fuhsr se ah, nga tuh muhtwacwacack kuneyuck in orekma fin acn South America. Tuh nga tiacna kuh in eis visa, oruh sulwaclah luhn acn luhk eklac nuh ke United States. Yac puhs nga tuh motko lah efuh nga tiac kuh in kuhlwacnsap ke acn ma nga tuh pahngonyuck nuh kac ah. Ingena nga etuh lah nga tuh pahngonyuck nuh ke orekma ac tiacna nuh acn se. Nga tiac kuh in ahkuhtweyac nuh sum luhpan mwe kahsruh luhn etwacack se inge nuh sihk.”

Nga puhla ahsor ke mukul sacohk se inge. Ke nga tuh luti ip yohk srihpac fihsrwacsr inge fin facluh nohfohn, mwet pucspucs ahkkahlwemye nuh sihk puhla se inge oacna nuh ke mukul se nga tuhfahna sramsramkihn ac. Nga sramsram ke ma inge mihsenge ke srihpen wacngihn mwet luhn Alu uh enenuh in us ma toasr ke ma tiacna kahlwem, kihsen siyuck, ma ahsor, kuh puhla koluk ke sulwaclah se in orekma oyac.

Leum El fahk nuh sel Stephen Burnett lah el enenuh in som ac fahkwack wosasuc. Ac finne el som nuh lacyacn acir kuh epang, nuh lacyacn kuhtuhlacp, kuh rohtoh, ac tiac yohk srihpac, ke srihpen el ac fah tiac tahfonglac (finne el som nuh oyac).⁹ Ke kowos motko ke kahs luhn ma suhmuhslah se inge ac ikacslah insiowos, nga finsrak ac pruhe kowos ac fah suli Nguhn Muhtahl in us nuh insiowos loal mwe kahlwem, mwe ahkwoye, ac mwe ahkkweye kowos enenuh.

Siepacna srihpac nga tuh puhla ke nga sramsram ke sifac se inge pa moul sifacna luhk in sulwaclah acn misineri elos ac som nuh we ke yac puhs. Nuh sin Mwet Singucul, wacngihn mwe ahkpwacyei ma pwacye luhn fwackyuck ke lwen-sahflah fokokoi liki ohiyac in suk in etuh luhngse luhn Leum ke kuht ahkfalye ma kunacsr in sulwaclah acn misineri elos ac fah som orekma we. Nga wi mwet lohoh lah Mwet Lahngo El etuh kacsr “kais sie” ac inesr kais sie.

Ingena nga kena sramsram kuhtuh ke ip yohk srihpac tuh inkaiyacn pacl uh tiacna esamyuck yohk in ahkolah nuh ke sie pahng nuh ke orekma.

Kahs tolu fototo nuh sie ahkkahlwemye sie pactuhn luhn ahkolah ac kapwack in wen nuhtin God: pristut, tempuhl, misin. Kuhtuh pacl uh oacna ninac pahpah, kawuck, ac mempucr luhn Alu uh, kuht lihksreni luti yohk ke ahkolah luhn misin ke mukul fuhsr tuh sahp kuht muhlkuhnlah kuhtuh ke ip yohk srihpac sahyac nuh ke inkacnek luhn olwelah ma enenuh in ahkfalyeyuck met liki muhtwacwacackiyacn orekma luhn misineri full-time. Orekma ekihn sie misineri pwacyena ma se fanna tuh tiacna pa yohk srihpac muhkwena nuh ke kapwack in oraclah pwelucng fokoko ke nguhn ac kuhlwacnsap uh. Mwe insewowo luhn pristut ac tempuhl, kwewana tuhkuh met liki mwet se sun acn in orekma lal, oacyacpac mwe enenuh se in ahkfokokoye ac ahkkweye kuht ke nguhn ke moul lasr nohfohn.

Mukul fuhsr, ke kowos ahkfalye ma kunowos in ahkfuhlwactye Aaronic Priesthood, kuh pristut srihsrihk sac, kowos ahkolah in eis ac ahkyohkye olwelah ac wuhlweacng luhn Melchizedek Pristut kuh priesthood fuhlwact se.¹⁰ Nwacsnwacs luhn kais sie pa ma yohk srihpac emet in eis pristut fuhlwact tohkoh sac. Kuhlwacnsap luhn pristut oan ye muhtowos in moul lom. Ahkolah ingena ke kowos sang kuhlwacnsap yohk srihpac. Nuhnak muhnahs lutlut in luhngse in nwacsnwacs. Oruh in nwacsnwacs. Kalweni in nwacsnwacs.

Tukun eis Melchizedek Pristut ac pahng in kuhlwacnsap, sie mukul fuhsr kuh in nuklac ke kuh¹¹ ke olwelah ac akwuck luhn tempuhl muhtahl. Som nuh tempuhl ac tuh nguhn luhn tempuhl in sikyak insiyom tuhkuh met liki kuhlwacnsap oaru oacna misineri full-time. Sifacna nwacsnwacs pa ma se ma yohk srihpac emet ma enenweyuck in eis mwe insewowo luhn tempuhl nuh suwos mukul fuhsr ac nuh sin mempucr nuh kwewa luhn Alu uh. Ke kowos moul fal nuh ke masap luhn wosasuc, kowos kuh in utyak nuh lun lohm sin Leum ac wi ke akwuck muhtahl ke yac fuhsr lowos an. Luhngse lowos ac kahlwem lowos ke akwuck luhn tempuhl ac fah ahkkweye kowos ac ahkinsewowoye kowos ke moul nohfohn lowos an. Nuhnak muhnahs lutlut in luhngse in nwacsnwacs. Oruh in nwacsnwacs. Kalweni in nwacsnwacs.

Puhkantwen mukul fuhsr ac muhtwacn fuhsr srukyac tempuhl recommend ke pacl fototo. Oacna mwet sruok Aaronic Pristut kowos konwacack inen sucu lowos sifacna ac kowos oruh pacptais ac mwe ahkkweye luhn mwet in sucu lowos ke tempuhl. Kalweni sruokyac tempuhl recommend lowos an ahkkahlwemye nwacsnwacs lowos, ac kuhlwacnsuhpuh mwet sahyac in tempuhl pa ip yohk srihpac se in ahkolah in eis Melchizedek Pristut uh.

Mukul fuhsr, kais sie suwos pa sie misineri ingena. Raunikowoslac, lwen nuh kwewa, oasr kawuck ac mwet tuhlan suc tiac eis ma pwacye ke srihpen elos muhkwena tiacna etuh lah elos ac konwacack oyac.¹² Ke kowos kolyuck sin Nguhn, kowos kuh in akacsruhi nuhnak se, mwe suli se, pohloh kahs se kuh tweet soko ma ac fah ahkkahlwemye nuh sin kawuck lowos an ma pwacye luhn wosasuc fohlohkihnyuckyak se. Kowos tiac enenuh ac tiac lwelah in sano nuh ke pacl kowos eis pahng na pwacye lowos an in wi orekma luhn misineri.

Ke mwe insewowo luhn pristut, tempuhl, ac misin orekweni “nuh sie … [ke] Christ”¹³ ac orekma tuhkweni luhn insiyac, nuhnak ac nguhna luhn misineri fuhsr, el kuh in ahkfalye ke orekma.¹⁴ Kuhiyacl yohkwaclihk in ahkfalye ma kunac se in aholuhl Leum Jisus Kraist. Kwewana kuh luhn nguhn in ahkfuhlwactye olwelah luhn pristut ac tempuhl, eis kuh luhn God¹⁵ ke akwuck luhn pristut,¹⁶ kuhlwacnsap inse muhlahlah, ac fahkwack wosasuc nuh sin tuhlihk nuhtin God oruh mukul fuhsr se in “fokoko ac tu na kuh ke luhlahlfongi”¹⁷ ac “okahlah ac kapkapak in [Kraist].”¹⁸

Ke lohm sesr ac ke alu, kuht enenuh in sang kuhiyacsr fal nuh ke ip tolu nuh ke pactuhn luhn Leum in ahkolah ac kapkapwack nuh ke wen luhlahlfongi nuhtin God: pristut, tempuhl, misin. Ip tolu inge enenwe kuht in luhngse in nwacsnwacs. Nwacsnwacslah. Kalweni in nwacsnwacs.

Tamuhlwel sacohk, nga olwelah tuh mwe sang luhn nguhn ke fwackyuck ac fah wi pahng lowos ac nuh ke orekma in fahkwack wosasuc ac nuh ke sulwaclah nuh ke acn in orekma lowos an. Ke kowos oaru in ahkolah ingena in kuhlwacnsap ke inse muhlahlah luhn pristut ac tempuhl, mwe loh lowos ke moul pwacye luhn Leum ac fah ahkkweyeyuck. Luhngse Kacl ac ke orekma Lal ac fah sesseslah insiyowos. Ke kowos lutlut in luhngse in nwacsnwacs, kowos ac fah ekihn kuhfa in poun Leum in ahkinsewowoye ac kuhlwacnsuhpuh mwet puhkantwen.

Ke engan, nga mwet lohoh lah Pahpah tuhmasr Inkuhsrao ac Wen Kuloh Nahtuhl, Jisus Kraist, Elos moul. In wi kuhlwacnsap Lalos ac mwe insewowo yohk emet kuht kuh in eis. Nga fahkwack ohinge ke ine muhtahl luhn Leum Jisus Kraist, amen.