Paho in Kolyuck Lal Lwen nuh Kwewa

Sie kuhfa sacohk emet luhn Pahpah Lucng in kol tuhlihk Nahtuhl pa ninac pahpah mahtuh suwohswohs uh. Ninac kiyacn pahpah tuhmuhk ah el oacna. Ke pacl ma ingacn sikyak ke nga srwack fuhsr in esam, pahpah tuhmuhk el kaiyuc. Liye ke ahksuwohs se inge, ninac mahtuh kiyuck el fahk, “Monte, nga luhlahlfongi muh kom ahksuwohsyacl upaclac pac.”

Pahpah tuhmuhk ah topuk, “Ninac, nga fah ahksuwohsye tuhlihk nuhtihk oacna nga kena.”

Ac ninac mahtuh lahlmwetmwet kiyuck el fahk ke puhsra fihsrwacsr, “Ac oacpacna nga.”

Nga etuh na pwacye lah pahpah tuhmuhk ah lohng kolyuck lahlmwetmwet luhn ninac kiyacl an in lwen sacn.

Ke pacl nuhnkuh ke kolyuck, kuht kuh in nuhnkuh ke soko on ma kuht kwewa etuh ac luhngse—“Nga Tuhlihk nuhtin God.” Kuht konwacack kahs ke kohres “Kolyuc, liyeyuc, fahsruh wiyuc, Suk innek pwacye.”¹

Ne ingena, nga etuh lah kohres sacn el ikusyacn wolacna nuh sin ninac pahpah. Ke pacl nuhnkuh ke kahs inge, nga nuhnkwacack lah ke pacl elos eis ikusyuck sacn, ac oasr kalmac na wowo kac. Kais sie, kuht siyuck lwen nuh kwewa sin Pahpah Lucng el in karihngihn kuht, kol kuht, ac fahsr siskacsr.

Prestuhn Dieter F. Uchtdorf el ahkuhtweyac: “Pahpah tuhmasr Inkuhsrao El etuh enenuh luhn tuhlihk Nahtuhl yohk liki mwet sahyac. Pa orekma ac wolacna Lal in kahsrwe kuht pacl nuh kwewa, use mwe kahsruh luhn mahno ac nguhn in kahsruh innek lasr in fohlohk nuh Yohrohl.”²

Lohng ke kahs inge: Pahpah Lucng el etuh ma kom ac nga enenuh yohk liki sie mwet. Ke ma sikyak uh, El orwaclah sie ap in kahsruh nuh sin kais sie mwet ac suhpwaclah nuh sin mwet ma enenuh kahsruh in ahkwoye kais sie sesr. Oasr ip yohk srihpac puhkantwen kac. Ma ingacn weacng Wen Nahtuhl ac Iwaclah sac, Nguhn Muhtahl, masap, ma suhmuhslah, pruhe, mwet pahluh, mwet sap, ninac pahpah, ninac pahpah mahtuh, mwet kol Alu ke acn uh, ac ma puhs sahyac—ma inge kwewa ma in kahsrwe kuht fohlohk in moul Yohrohl sie lwen.

Nga luhngse akacsruhi mihsenge ke kuhtuh ip yohk srihpac ke ap in kahsruh ma oruh ngan akihlen lah sie Pahpah luhngse El kol, karihngihn, ac fahsr siskuck ac sucu luhk? Finsrak luhk pa kais sie suwos in fah akihlen ke ohiyac lowos ma Pahpah Lucng El kol, karihngihn, ac fuhfahsryucsr siskowos, ac ke etwacack sacn, kowos fah fahsr ke luhlahlfongi, etuh lah kowos tiacna muhkwena.

Masap luhn Pahpah Lucng pa ip yohk srihpac ke ap in kahsruh sac. Alma el tuh fahk, “Ma koluk tiacna pa engan.”³ Lwelah mwet in mukwikwi suhfal ac tiac ahksuwohsye ke luhngse el tiac mwe pahkomuhta pwacye se ac ahkkweye sie nuhnak yohk muh ma koluk kuh in mwe engan. Samuel mwet Laman sac el lain ke nuhnak se inge: “ac kowos suk in engan ke kowos oruh ma koluk, tuh ma inge lain ohiyac pwacye luhn suwohswohs ma oasr yurun Sifac Ma Pahtpaht ac wolacna lasr.”⁴

Ke mwet pahluh Lal, Pahpah Lucng el kwacna ahkacsmakihnye kuht lah suwohswohs pa engan. Sie mwe srihkasrak pa, Tohkohsrah Benjamin, el luti lah Pahpah Lucng “El kena tuh kowos in oruh oacna El sapkihn nuh suwos; tuh kowos fin oruh, El ac sa in ahkinsewowoye kowos.”⁵Ke on soko sahyac el tuhkuh oacna mwe ahkacsmakihnye se:

Ke puhtte ahk 14 luhk ah, nga lotwelah ke kuhtuh mwe insewowo inge. Nga akihlen ohiyac sienna yurin ninac pahpah tuhmuhk ah. Nuhnkuh ke ma nga liye, nga siyuck, “Kuh kuht ac som nuh ke sie misin?” Lut ke muhtuhn ninac kiyuck ah ahkkahlwemye ma nga motko uh. Tok, ke sie kahsruh luhn sucu, tuhlihk wiyuck ah ac nga lotwelah lah ninac pahpah tuhmwacsr ah pahngonyuck in karihngihn ahkfahsrye sie misin.

Kuht muhta ke sie acn in imac kahto Wyoming. In nuhnak luhk sifacna, moul uh suwohswohs. Nga kuh in tuhkuh ke lutlut ah nuh lohm ah, ahksahfye orekma luhk, ac na som sukwac num, pahtuhr, kuh muhtwacta wi kosro nuhtihk.

Tiac paht tukun lotwelah ke pahngonyuck sac, nga nuhnkwacack muh nga enenuh in fuhlwelah kosro soko nuhtihk suc inel pa Blue. Nga ohsun nuh sin pahpah tuhmuhk, siyuck lah mac nga enenuh in oruh nuh sel Blue. Nga kena ahkuhtweyac ma tiacna fal ac suwohs God El enenuh. Nga fah tiac muhlkuhnlah top se lal inge. El fahk, “Nga tiacna etuh na pwacye. Sahp el tiacna kuh in wi kuht, oruh kom enenuh in siyuck yohk sin Pahpah Lucng.” Tiac pa ingacn top se nga pahngon nga ac eis sin pahpah tuhmuhk an.

Nga muhtwacwacack in riti Puhk luhn Mormon. Nga pruhe na pwacye in etuh fin nga enenuh in fuhlwelah kosro soko nuhtihk inge. Top luhk uh tiacna tuhkuh ke pacl sacn; tuh, oasr nuhnak yohk se ma an in nuhnak luhk. “Nimet oruh kom in sie mwe toasr luhn ninac pahpah tomom. Nimet oruh kom in sie mwe toasr. Nga pahngon ninac pahpah tomom an.”

Nga etuh ma Pahpah Lucng el enenuh kac. Etuh se ingacn tiacna ahksrihkyelah mwe ahkngal se in fuhlwelah kosro soko nuhtihk ah. Tuh, ke kihsac srihsrihk sac, ahkfihsrwacsryeyuck insiyuck ac nga konwacack mihs in suk olwelah luhn Pahpah Lucng.

Nga kuloh nuh sin Pahpah Lucng tuhmuhk ke mwe insewowo ac mwe engan nga konwacack ke ma suhmuhslah, pruhe, ke Nguhn Muhtahl, ac sie pahpah nwacsnwacs fin facluh suc use atac lal oacna ip yohk se in luti tuhlihk nahtuhl. Elos kolyuc, karihngihnyuc, ac finne in fahsr sikuck in kahsrweyuc konwacack innek pwacye—yohkiyacna ke pacl nga oruh ma upac.

In weacng ke eisyacn ip srihsrihk lun ap in kahsruh nga fahk tari ah, kuht kais sie ahkinsewowoyeyuck sin mwet kol luhn pristut in kol ac karihngihn kuht.

Prestuhn Boyd K. Packer el fahk: “Pisap el moklweyuck! Kais sie sesr oasr kuh in lwelah kuh tiac lwelah kahsruh sin mwet kol lasr, tuh tiac pihlesruh kahsruh luhn pisap lom an, lah utuckot sin u kuh kais sie.”⁷

Mwet inge elos kampare in ahol Leum. Lah kuht mahtuh kuh fuhsr, ke pacl se Setuhn el kena kuht in nuhnkuh muh wacngihn finsrak, pisap inge oasr in kahsrwe kuht. Ke pacl sramsram nuh sin pisap uh, nga konwacack sie sifac ma fal nuh ke seahkos kuh mwet lohsr puhla elyah luhn ma koluk. Pisap el pacl nuh kwewa kena ahkkahlwemye luhngse luhn Pahpah Lucng nuh sin kais sie ac kena se in fahsr siskom kuh siskacl oacna ke el konwacack inkacnek lal nuh lohm ah.

Sahp yohkiyacn ip srihsrihk lun ap in kahsruh luhn Pahpah Lucng uh ahkuhtweyucki ke kahs inge: “Tuh God el luhngse facluh ouinge: El acse Wen sefanna nahtuhl.”⁸

In luti kuht kwewa ma kuht enenuh in oruh, Jisus Kraist el kol inkacnek ke use mwe srihkasrak suwohs ma kuht enenuh in ukwe. El kwacfe sesr kais sie ke ahsroellah pahol in tuhkuh, fahsr Tohkohl.⁹ Ac ke kuht tiac orwaclah, suc kuht nuh kwewa oruh, El ahkacsmakihnye kuht lah El kweok ke ma inge kacsr kwewa, tuh kuht in tiac kweok fin kuht auliyak.¹⁰

Mwe sang sacohk se pa inge! Auliyak el tiac kaiyuck se; a el ohiyac wo se. Ohiyac wo se ma kol kuht ac karihngihn kuht. Tiac mwe lut se ke ma suhmuhslah uh fahk muh kuht enenuh in luti tiac ma sahyacn auliyak.¹¹

Oasr mwe kahsruh puhs luhn Pahpah Lucng, tuhsruhk kais kuhtuh pacl El orekmakihn mwet sahyac in Kahsrwel. Kais sie lwen El use ma wowo nuh sesr in kol, karihngihn, ac fahsr siskacn sie mwet enenuh. Kuht enenuh in ukwe mwe srihkasrak luhn Mwet Lahngo. Kuht oacyacpac enenuh in oruh orekma luhn Pahpah Lucng.

Ke Prestuhnsi Luhlahp luhn Mukul Fuhsr, kuht etuh lah mwet fuhsr uh ahkinsewowoyeyuck ke pacl oasr ninac pahpah tuhmwaclos ac mwet kol suc orekma oacna Pahpah Lucng in kol, karihngihn, ac fahsr siskaclos. Ip yohk tolu¹² ma fah kahsrwe kuht in ekihn sie ip lun ap in kahsruh luhn Pahpah Lucng nuh selos pa:

Ma se met, wi mwet fuhsr an. Prestuhn Henry B. Eyring el ahkuhtweyac mwe nuhnak se inge: “Oasr kuhtuh ma kuht kuh in oruh suc ma ac yohk na pwacye srihpac. Finne in yohk kuh kac likina orekmakihn kahs ke luti mwe luti lasr in pa mwe srihkasrak ke moulkihn mwe luti uh.”¹³In kol mwe enenuh luhn mwet fuhsr pa in weluhlos. Ahkfuhlwactye pacl el sie atac ke luhngse ma lwelah nuh sesr in luti ke kahs ac mwe srihkasrak.

Ahk luo, in kol mwet fuhsr ke pwacye, kuht enenuh in kuhpahsr nuh selos wi inkuhsrao. Pacl ac fah tuhkuh na ke pacl kais sie mwet enenuh in tu sifacna. Pahpah Lucng muhkwena kuh in oasr we in kol ke pacl nuh kwewa ac in acn nuh kwewa. Mwet fuhsr lasr enenuh in etuh in suk lah fuhkah kolyuck luhn Pahpah Lucng.

Ahktolu, kuht enenuh in sang mwet fuhsr in kol. Oacna ke ninac pahpah luhngse se suc sruok poun sie tuhlihk srihsrihk ma luti in fahsr, kuht enenuh in fuhlwelah mwet fuhsr elos in kapkapwack. Lwelah mwet fuhsr in kol ke mongfihsrwacsr ac luhngse. Sie ma upac ac enenuh pacl yohk likina in oruh sifacna oruh kac. Elos enenuh in sun tihkuclkucl inkacnek lalos, tuhsruhk kuht fahsr tohkohlos.

Tamuhlwel ac tahmtahel, oasr pacl in moul lasr ma mwe insewowo ke kolyuck uh ac luhman loes kuh wacngihn. Ke kain pacl in kweok ingacn, Tamuhlwel D. Todd Christofferson el olwelah: “Lwelah wuhlweacng lowos in ma yohk srihpac in moul lowos ac lwelah ahkostwen lowos in pwacye. Na kowos fah kuh in siyuck ke luhlahlfongi, tiac ahlohloh, oacna ke enenuh lowos, ac God el fah topuk. El fah ahkkweye orekma lowos ac liye. In pacl Lal sifacna ac Ohiyacl fah ahsroellah pahol nuh suwos, fahk, ‘Nga pa Inge.’”¹⁴

Ke sie pacl ah, nga suk kahsruh luhn Pahpah Lucng ke pacl nuh kwewa ke inse pwacye in pruhe puhs liki yac se in suk ma in ahkwoye ma upac sikyak. Nga etuh yohk lah Pahpah Lucng el topuk kwewa pruhe pwacye. Tuh nga sun kain elyah sacn sie lwen ma nga wi nuh tempuhl ke sie kihsensiyuck: “Pahpah Lucng, yac Kom elyah na pwacye?”

Nga muhta apkuhran nuh tukun tempuhl Logan Utah ke fuckihl in tuhpan se ke pacl se, ke mwe lut luhk, utyak nuh lun fuckihl sac ke lwen sac pa prestuhn luhn tempuhl sac, Vaughn J. Featherstone, sie sucu ac kawuck fototo. El tuyak muhtuhn mwet nuh kwewa ac paing kuht kwewa. Ke el akihlenyuc inmahsrlon mwet lun tempuhl sac, el tui tilac sramsram, ngwetma liye muhtuhk, ac fahk, “Tamuhlwel Brough, wo in liye kom in tempuhl mihsenge.”

Nga fah tiacna muhlkuhnlah puhlah se ke puhluhn pacl fihsrwacsr sac. Kac oacna fin—ke paing sacn—Pahpah Lucng el ahsroellah Pahol nuh met ac fahk, “Nga pa Inge.”

Pahpah Lucng el elyah na pwacye ac lohng kac ac topuk pruhe luhn tuhlihk kwewa.¹⁵Oacna sie tuhlihk Nahtuhl, nga etuh top nuh ke pruhe luhk uh tuhkuh ke pacl luhn Leum. Ac ke ohiyac ingacn, nga etuh yohk liki met ah lah kuht tuhlihk nuhtin God ac lah El suhpwekuht me nuh inge tuh kuht in puhla oasr Lal ingena ac fohlohk in moul Yohrohl sie pacl.

Nga fahkwack ma inge lah Pahpah Lucng el kol kuht, karihngihn kuht, ac fuhfahsryucsr siskacsr. Ke kuht ukwe Wen Nahtuhl ac sang kahsruh nuh sin mwet kuhlwacnsap Lal, mwet tuhma lutlut ac mwet pahluh uh, kuht fah konwacack inkacnek nuh ke moul ma pahtpaht. Ke inen Jisus Kraist, amen.