Aua le Vaavaai Solo, Vaai i Luga!
O le valaauliaina o isi e o mai ia Keriso o lo tatou faamoemoega lena, ma e mafai ona tatou faataunuuina lenei faamoemoega e ala i le vaai i luga ia Iesu Keriso.
O lo’u faamoemoega o le “valaaulia o isi e o mai ia Keriso.”1 O la outou faamoemoega foi lea. E mafai ona tatou faataunuuina lenei faamoemoega e ala i le vaai i luga ia Iesu Keriso.
Sa ou papatiso faatasi ma ou matua ina ua 16 ou tausaga.Sa auai lou uso laitiiti, o Kyung-Hwan, o le sa 14 tausaga le matua, i le Ekalesia e ala i lo’u uncle, o Young Jik Lee, ma sa valaaulia ai i matou e auai i lana lotu. O tagata taitoatasi e toa 10 i lo matou aiga e auai i se lotu ese, sa matou fiafia ai e maua le upumoni ma mananao e faasoa lena fiafia sa matou maua i le talalelei a Iesu Keriso ina ua uma ona papatisoina i matou.
Sa sili atu ona fiafia lou tama ia i matou e aoao ma faasoa atu le upumoni. Sa masani ona ia ala vave i le taeao e suesue tusitusiga paia mo le silia ma le lua itula i aso uma. A maea le galuega, e o faatasi ma faifeautalai e asiasi i o matou aiga, uo, ma tuaoi toetoe o aso uma. I le fitu masina talu ona matou papatiso, e toa 23 tagata o lo matou aiga na avea ma tagata o le Ekalesia. Sa sosoo ai le vavega o le vaaia o le 130 o tagata o papatisoina i le tausaga na sosoo ai i le galuega faafaifeautalai faaleaupaia a lou tama.
Sa taua foi le talafaasolopito o le aiga ia te ia, ma sa ia faamaeaina le valu augatupulaga a o matou tuaa. Mai i lena taimi, o fua o lo matou liua faaleaiga sa amata e lou uso laitiiti 14 tausaga, ua faateleina i le anoanoai o auala e le gata i e o loo soifua ae faapena foi e ua maliliu. I le atiae ai i luga o le galuega a lou tama ma isi, ua faalautele atu ai i lo matou gafa faaleaiga i augatupulaga e 32, ma ua matou faamaeaina nei galuega faalemalumalu mo le tele o tuaa. I le aso, ou te maofa ma lagona le olioli tele i le sootaga a o matou tuaa i o matou suli.
Sa faamaumauina e Peresitene Gordon B. Hinckley se aafiaga faapena i le Malumalu o Ohaio Columbus:
“O le mafaufau ai i soifuaga o [le tamamatua a lou tamamatua, tamamatua, ma lou tama] a’o ou saofai i totonu o le malumalu, sa ou tepa ifo ai i lo’u afafine, i lana tama teine, … ma i lana fanau, le fanau a le tama teine a lo’u afafine. Sa vave ona ou iloa ai, sa ou tu i le ogatotonu tonu lava o nei augatupulaga e fitu—o le tolu na muamua atu ia te a’u ma le tolu ua mulimuli mai ia te a’u.
“I totonu o lena maota paia ma mamalu, na oo mai ai i lo’u mafaufau se manatu o le tele naua o lo’u tiute ina ia tuufaasolo atu mea uma ua ou mauaina mai o se tofi mai o’u augatama i augatupulaga o e ua mulimuli mai nei ia te a’u.”2
O i tatou uma o se vaega o se aiga e faavavau. O la tatou matafaioi e mafai ona avea o se tulaga e mafai ai ona tutupu suiga taua i auala lelei pe faalelelei.Sa faaauau Peresitene Hinckley, “Aua nei faatagaina oe lava e avea o se sootaga vaivai i le filifili o lou augatupulaga.”3 O le a faamalosia lou aiga e lou faatuatua i le talalelei.E mafai faapefea ona tatou mautinoa o i tatou o se sootaga malosi i o tatou aiga e faavavau?
I se tasi aso, i nai masina i le maea ai o lou papatisoga, sa ou faalogo i nisi o tagata o faitioina le tasi ma le isi i le lotu. Sa matuai ou faanoanoa lava. Sa ou alu i le fale ma tau i lou tama atonu e le tatau ona ou toe alu i le lotu. Sa faigata le vaaia o tagata o le au paia o faitio i isi faapena. I le maea ai ona faalogo, sa aoao au e lou tama e faapea sa toefuatai le talalelei ma e atoatoa ae e lei atoatoa lava tagata, ma faapena foi o ia ma au. Sa ia fai mai ma le mautinoa, “Aua nei aveesea lou faatuatua ona o tagata o loo siomia ai oe, ae ia fausia se sootaga malosi ma Iesu Keriso. Aua le vaavaai solo, vaai i luga!”
Vaai i luga ia Iesu Keriso—le fautuaga atamai a lou tama—e faamalosia ai lou faatuatua i taimi uma ou te feagai ai ma luitau i le olaga. Sa ia aoao au i le ala e faaaoga ai aoaoga a Keriso, e pei ona taua i upu nei: “Vaai mai ia te a’u i mafaufauga uma; aua le masalosalo, aua le fefefe.”4
A o ou pulefaamalumalu ai i le Misiona a Uosigitone Seattle, sa timuga le tele o aso o le tausaga. Ae, sa faatonuina lava a matou faifeautalai e o atu ma talai i le timu. Sa masani ona ou tau atu ia i latou, “O atu i le timu, vaavaai i luga i le lagi, tatala o outou gutu ma inu [le timu]! A tou vaavaai i luga, o le a faamalosia outou e tatala o outou gutu i tagata uma e aunoa ma le fefefe.” O se lesona faafaatusa mo i latou e vaavaai i luga pe a latou feagai ma luitau e tusa lava pe maea a latou misiona. Faamolemole aua nei faataitai’a lenei mea i nofoaga ua faaleagaina [le siosiomaga].
A o auauna pea i le misiona a Seattle, sa ou maua se telefoni mai lou atalii ulumatua, o Sunbeam, o se ta piano. Sa fai mai o ia o le a ia maua le avanoa e faafiafia ai i le Falefaafiafia o Carnegie i Niu Ioka ona sa ia manumalo i se tauvaga faavaomalo. Sa matou fiafia tele ma matuai olioli mo ia. Ae peitai, a o tatalo ma le agaga faafetai i lena afiafi, sa silafia e lou toalua e le mafai ona ma auai atu i lana faafiafiaga ma fai atu se mea faapenei i le Tama Faalelagi: “Tama Faalelagi, ou te faafetai mo le faaamanuiaga ua tuuina atu e Lau Afio ia Sunbeam. Ae, ou te faamalie atu e le mafai ona ou alu iina. E ono mafai ona ou alu pe a na tuuina mai e Lau Afio lenei faamanuiaga a o lei faia lenei misiona po o le maea foi [o le misiona]. Ou te le o faitio, ae e i ai sina lagona o le faanoanoa.”
I le taimi lava na uma ai lenei tatalo, sa ia faalogoina se leo manino: “Ona e le mafai ona e alu, o lea ua tuuina atu ai i lau tama lenei avanoa. Faamata la e te faafesuiaia?”
Sa ofo lou toalua. Sa ia iloa e faamanuiaina fanau i galuega faatuatua a o latou matua i le malo o le Alii, ae o le taimi muamua lenei sa ia malamalama ai ma le manino lelei i lana matafaioi. Sa ia tali atu i le taimi lena ia te Ia: “Leai, leai, e Lelei mo au le le alu. Tuu atu ia te ia lena avanoa.”
Uso e ma tuafafine pele, e le faigofie mo i tatou le iloaina o le alofa o le Tama Faalelagi pe a tatou vaavaai solo ma o tatou mata faaletino ona tatou te muamua lava vaai atu i faafitauli, tiga, avega, po o le tuuatoatasi. I le isi itu, e mafai ona tatou vaavaai i faamanuiaga i tua atu pe a tatou vaai i luga. Ua faaali mai e le Alii, “Ma a tatou maua se faamanuiaga mai le Atua, e maua i le usiusitai i lena tulafono ua faavae ai i luga.”5 Ia i latou o e o atu i soo se auaunaga a le Atua, ia iloa o outou o se sootaga malosi mo faamanuiaga mamana ia i latou e muamua atu ia te outou ma i tupulaga e mulimuli mai ia te outou.
O le asō, ou te faafetai lava i le iloaina o le toatele o tagata o lo matou aiga o loo faamaoni i luga o le ala o le feagaiga ae ou te faanoanoa e vaai faalemafaufau i soo se nofoa o avanoa i o matou autafa. Sa saunoa mai Elder M.Russell Ballard: “Afai e te filifili ia le toe toaga mai pe tuua foi le Ekalesia toefuataiina a Iesu Keriso o le Au Paia o Aso e Gata Ai, o fea o le a e alu i ai? O le a se mea o le a e faia? O le faaiuga o le “le toe feoai” ma tagata o le Ekalesia ma taitai filifilia a le Alii o le a i ai sona aafiaga mo se taimi umi lea e le mafai ona vaaia pea i le taimi nei”6 Sa faamalosiau mai Peresitene Thomas S. Monson ia i tatou, “Ia tatou matua filifili i le mea faigata e sa’o, nai lo le mea faigofie e sese.”7
E le o tuai tele le vaai i luga ia Iesu Keriso. O loo tatala mai pea Ona aao ia te oe. O loo i ai tupulaga e muamua atu ma mulimuli ia i tatou o loo faalagolago ia i tatou ia mulimuli ia Keriso ina ia mafai ona tatou avea o se aiga e faavavau o le Atua.
Ina ua faamaloloina lou valaauga o se peresitene o le siteki, sa fiafia ou atalii i le faaaluina o le tele o le taimi ma au. Tolu vaiaso mulimuli ane, sa valaauina au o se Fitugafulu. I le taimi muamua sa ou manatu atonu latou te le fiafia, ae o le tali faamaualalo a lou atalii sili ona latiiti e faapea, “Tama, aua le popole. O i tatou o se aiga e faavavau.” O se upumoni faigofie ma manino lava! Sa ou popole teisi aua sa ou vaavaai solo muamua i lenei olaga faaletino, ae sa fiafia lou atalii aua sa ia le vaavaai solo ae vaai i luga ma fofoga e taulai i le faavavau ma faamoemoega o le Alii.
E le faigofie pea le vaai i luga pe a tetee ou matua i le talalelei, pe afai o oe o se sui o se iunite laitiiti o le Ekalesia, pe afai o lou toalua e le o se tagata o le ekalesia, pe a afai o loo e nofofua pea e ui sa e faia le mea sili ia faaipoipo, pe a se ese se tamaitiiti, pe a oo ina avea oe lava o se matua nofofua, pe a luitauina oe faaletino pe faalelagona, pe a avea oe o se aafia i se mala, ma isi mea. Pipii mau i lou faatuatua i na taimi faigata. Vaai i luga ia Keriso mo le malosi, mausali, ma le faamalologa. E ala i le mana o le Togiola a Iesu Keriso, “o le a galulue faatasi mea uma mo [lou] lelei.”8
Ou te molimau atu ia Iesu Keriso, o Ia o lo tatou Faaola ma le Togiola. A tatou mulimuli i lo tatou perofeta soifua, o Peresitene Thomas S. Monson, tatou te vaai atu i luga ia Iesu Keriso. A tatou tatalo ma faitau ia tusitusiga paia i aso uma, ma aai ma feinu i le faamanatuga i vaiaso taitasi, tatou te maua le malosi e vaavaai atu ai pea ia te Ia. Ou te fiafia e avea o se sui o lenei Ekalesia ma avea o se vaega o se aiga e faavavau. Ou te fiafia e faasoa atu lenei talalelei maoae ma isi. O le valaauliaina o isi e o mai ia Keriso o lo tatou faamoemoega lena, ma e mafai ona tatou faataunuuina lenei faamoemoega e ala i le vaai i luga ia Iesu Keriso. Ou te molimau atu ai i nei mea uma ma le lotomaualalo i le suafa o Iesu Keriso, amene.