“Ou Te Tuuina Atu Ia Te Outou Le Manuia”

Ou tuafafine pele, ua faamanuiaina lava i tatou i le Agaga o le Atua i le po nei. O savali musuia mai taitai tamaitai malolosi ma musika ua faamalosia ai lo tatou faatuatua ma faateleina ai lo tatou manao ia tausia feagaiga paia ua tatou osia ma lo tatou Tama Faalelagi alofa. Ua tatou lagonaina se faatelega o lo tatou alofa mo le Alii o Iesu Keriso ma le talisapaia o le meaalofa ofoofogia o lana taulaga togiola.

O lau savali i le po nei e faigofie lava. Ua tatou lagonaina uma le filemu i le po nei.Tatou te fia lagonaina e le aunoa lea filemu i totonu o i tatou lava, i o tatou aiga, ma tagata o siomia i tatou. Ua folafola mai e le Alii le filemu i Ona soo ina o le a Ia tuua i latou. Ua Ia faia lea folafolaga e tasi ia i tatou. Ae na Ia fetalai mai e Na te tuuina mai le filemu i Lona ala, ae le pei o ala a le lalolagi. Sa ia faamatalaina Lona ala o le auina mai o le filemu:

“A o le Fesoasoani, o le Agaga Paia lea, e auina mai e le Tama i lo’u igoa, o ia lava na te aoao ia te outou i mea uma lava, e faamanatu mai foi o ia ia te outou i mea uma ua ou fai atu ai ia te outou.

“Ou te tuuina atu ia te outou le manuia, o lo’u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:26–27

Sa manaomia e atalii o Mosaea lena meaalofa o le filemu a o latou o atu i o latou misiona i le au sa Lamana. E sili atu ma sina atuatuvale a o latou lagonaina le mamafatu o la latou galuega, sa latou tatalo mo se faamautinoaga. Ma sa “asiasi mai le Alii ia te i latou e ala i lona Agaga, ma fetalai mai ia te i latou: Ia faamafanafanaina outou. Ma sa faamafanafanaina i latou” (Alema 17:10; tagai foi Alema 26:27).

E i ai taimi, e te manaomia ai le filemu a o e feagai ma le lē mautonu ma mea e foliga ia te oe o ni fagata o le a oo mai. Na aoaoina e atalii o Mosaea le lesona na aoao atu e le Alii ia Moronae. O se taitala lea mo i tatou uma: “Ma afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga, ina ia faalotomaualalo ai i latou; ma ua lava lo’u alofa tunoa mo tagata uma o e e latou te faalotomaualaloina i latou lava i o’u luma; aua afai latou te faalotomaualaloina i latou lava i o’u luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou” (Eteru 12:27).

Sa fai mai Moronae ina ua ia “faalogoina o ia upu,” sa “faamafanafanaina” o ia (Eteru 12:29). E mafai ona avea [na upu] ma se faamafanafanaga ia i tatou uma. O i latou e le iloaina o latou vaivaiga e le alualu i luma. O lou iloaina o lou vaivaiga o se faamanuiaga, ona e fesoasoani ia te oe e tumau ai i le lotomaualalo ma faatumauina ai lou liliu atu pea i le Faaola. E le gata ina faamafanafana oe e le Agaga, ae o Ia foi o le ala lea e galueaiina ai e le Togiola se suiga i lou lava natura. Ona avea lea o mea vaivai ma mea malolosi.

O le a i ai foi taimi o le a luitauina ai foi lou faatuatua e Satani; e tupu i soo uma lava o Iesu Keriso. O lau puipuiga e tetee atu i nei osofaiga o le faatumauina lea o le Agaga Paia e fai ma au soa. O le a musumusu e le Agaga le filemu i lou loto. O le a ia uunaia oe ia agai i luma i le faatuatua. Ma o le a Ia toe aumaia le manatuaga o taimi na e lagonaina ai le malamalama ma le alofa o Iesu Keriso.

Atonu o le manatuaina o se tasi lea o meaalofa aupito faapelepele e mafai e le Agaga ona tuu atu ia te oe. O le a Ia “faamanatu mai foi o ia ia te outou i mea uma ua fai atu ai [le Alii] ia te outou” (Ioane 14:26). O le manatuaga atonu o se tali i se tatalo, o se sauniga faaleperisitua, o se faamautinoaga o se molimau, po o se taimi na e vaaia ai le aao taitai o le Atua i lou olaga. Masalo i se aso o lumanai pe a e manaomiaina le malosi, e mafai e le Agaga ona aumaia i lou manatuaga ia lagona o loo e mauaina i lenei sauniga. Ou te tatalo ia faapea lava ona faia.

O le tasi manatuaga e tele lava ina aumai e le Agaga i lo’u mafaufau o se sauniga faamanatuga i se afiafi sa faia i se fale apa i Oseteria (Austria), i le tele o tausaga ua mavae. O le fale ala sa i lalo ifo o se auala mo nofoaafi. Pe a ma le sefululua ni tagata sa i ai, sa nonofo i luga o nofoa laupapa. O le toatele o i latou o tamaitai, o nisi sa talavou ae o isi sa matutua atu. Sa ou vaaia ni loimata maligi o le agaga faafetai a o tufa atu le faamanatuga i lenei tamai potopotoga. Sa ou lagonaina le alofa o le Faaola mo na Au Paia, ma sa lagonaina foi e i latou. Ae o le vavega e sili ona manino ou te manatuaina o le malamalama na pei e faatumulia ai lena fale apa, ma aumaia faatasi ai ma le lagona o le filemu. O se taimi o le po ma sa leai ni faamalama, ae sa malama le potu e peiseai o le susulu o le la i le aoauli.

Sa susulu ma faateleina le malamalama o le Agaga Paia i lena afiafi. Ma o faamalama na auala mai ai i totonu le malamalama o loto faamaulalo o na Au Paia, o e na o mai i luma o le Alii ma saili le faamagaloga o a latou agasala ma tautino pea e manatua pea o Ia. Sa lei faigata le manatuaina o Ia i lena taimi, ma o le manatuaina o lena aafiaga paia sa faigofie ai mo au ona manatua o Ia ma Lana Togiola i tausaga ia na sosoo ai. I lena aso o le folafolaga i le tatalo faamanatuga o le a faatasi mai le Agaga ma i tatou sa faataunuuina ma sa aumaia lagona o le malamalama ma le filemu.

E pei o oe, ou te faafetai lava mo le tele o auala ua asiasi mai ai le Alii ia te au faatasi ma Le Faamafanafana i taimi sa ou manaomiaina ai le filemu. Ae e le na o lo tatou mafanafana o loo popole ai lo tatou Tama oi le Lagi ae faapena foi lo tatou alualu i luma. O “Le Faamafanafana” ua na o le tasi lea o auala o loo faamatalaina ai le Agaga Paia i totonu o tusitusiga paia. O le isi lea: “Ma o lenei, e moni, e moni, Ou te fai atu ia te oe, ia tuu atu lou faalagolago i le Agaga lena lea na te taitai ia fai mea lelei” (MF&F 11:12). E masani lava, o le lelei o le a Ia taitai atu i ai oe o le a aofia ai le fesoasoani atu i se isi tagata ia maua le mafanafana mai le Atua.

I Lona atamai, ua aumaia faatasi outou e le Alii i faalapotopotoga ma vasega i Lana Ekalesia. Ua Ia faia lenei mea ina ia faateleina ai lou malosi e fai le lelei. I totonu o nei faalapotopotoga, ua i ai ni ou tiute patino e auauna atu i isi mo Ia. Mo se faataitaiga, afai o oe o se tamaitai talavou, atonu e talosagaina oe e lou epikopo po o lou taitai o Tamaitai Talavou ia aapa atu i se Lora ua oo ina avea ma se tasi lea tatou te ta’ua i nisi taimi “ua le toe toaga.” Atonu e sili atu lou iloaina o ia nai lo le epikopo po o le taitai o Tamaitai Talavou. Atonu e te iloaina o loo ia lagonaina le atuatuvale i le aiga po o le a’oga pe masalo foi o mea uma e lua. Atonu e le iloaina e ou taitai le mafuaaga na latou lagonaina ai le uunaiga e talosagaina oe e aapa atu ia te ia, ae ua silafia e le Alii, ma o loo Ia taitaia lenei galuega e ala i musumusuga a Lona Agaga.

O le tulaga manuia o au taumafaiga o le a manaomia ai se vavega o suiga i lou loto atoa ma i le loto o le tamaitai talavou na auina atu oe e laveai mai—ma e manaomia i lena mea le mafutaga a le Agaga Paia. O le a Ia faatagaina oe e vaai atu i le Lora e pei ona silasila mai i ai le Alii ia te ia. Na te silafia lona loto ma lou loto, ma Na te silafia mea e mafai e loto ona suia. E mafai ona Ia asiasi atu ia te oulua uma e ala i Lona Agaga ia uunaia le lotomaualalo, faamagaloga, ma le alofa.

O lena Agaga e mafai ona musuia ia upu, galuega, ma le onosai e mafai ai e oe ona valaaulia se tamai mamoe e toefoi mai le lafu. Ma e mafai ona ia pa’i atu i loto o le lafu i le vasega o le Lora iaia alolofa ma talileleia le mamoe ua leiloa, a oo la ina toefoi mai o ia, o le a ia lagonaina ua ia toe foi mai i le aiga.

O lou malosiaga e fai ai mea lelei o se vaega o afafine o le Atua o le a faalagolago lea, i se tikeri tele lava, i le lotogatasi ma le alofa lea e i ai ia te outou. O le isi meaalofa lea e sau mai le Agaga Paia.

Sa malamalama i ai Alema. O le mafuaaga lena sa ia augani atu ai i lona nuu “ia le tatau ona i ai se finau o le tasi ma le isi, ae e tatau ona latou tagai i luma ma le mata e tasi, i le faatuatua e tasi ma le papatisoga e tasi, ua fili faatasi o latou loto i le lotogatasi ma le alofa o le tasi i le isi” (Mosaea 18:21).

E manaomia le lotogatasi ina ia tatou maua ai le Agaga i a tatou vasega ma i o tatou aiga. Ae ua e silafia mai i mea e tutupu, e pei ona ou iloa, o lena lotogatasi agaalofa e faigata ona faatumauina. E manaomia ai le Agaga Paia e fai ma soa ia tatou iloa mea e silafia e le Atua ma faamalūlūina o tatou lagona.

Ou te manatua i se tasi taimi le soona osooso ai o le ma atalii e fitu pe valu tausaga i luga o lona moega sa ou faapea ai o le a gau. Sa ou lagona le faateteleina o le ita, ma sa vave ona ou agai e faatulaga lou fale.Sa ou tago atu i ona tauau iti ma sii i luga i le mea na fetaui ai o ma mata.

Sa tuu e le Agaga ni upu i lo’u mafaufau. Sa pei o se leo lemu, ae sa tuia ai lo’u loto: “O loo e u’uina se tagata maoae.” Sa ou toe tuu ifo ma le filemu o ia i luga o le moega ma faatoese atu i ai.

O le taimi nei ua avea o ia ma tagata sili lea na faatagaina e le Agaga Paia a’u e vaai i ai i le 40 tausaga talu ai. Ou te faafetai e faavavau i le laveaiina o au e le Alii mai lagona leaga e ala i le auina mai o le Agaga Paia e faataga au ia ou vaai i se atalii o le Atua e pei ona sa Ia silasila mai i ai.

O le lotogatasi o loo tatou sailia i totonu o o tatou aiga ma i totonu o le Ekalesia o le a oo mai pe a tatou faatagaina le Agaga Paia ia i ai se aafiaga o mea tatou te vaai i ai pe a tatou vaai atu—i le tasi ma le isi. E silasila le Agaga ma le alofa mama o Keriso. Faafofoga i upu a Mamona na faaaogaina e faamatala ai le alofa mama. Mafaufau i taimi na e lagonaina ai:

“O le alofa mama e loa ona tali-tiga, ma e agalelei, ma e le losilosivale, ma e le faafefeteina, e le sailia e ia ana lava, e le faaitagofie, e le mafaufau i se mea leaga, ma e le olioli i le amioletonu ae olioli i le upu moni, e onosaia mea uma, e talia mea uma, e faamoemoe i mea uma, e onosai i mea uma.

“O le mea lea, ou uso pele e, afai e le ia te outou le alofa mama o ni mea noa outou, ona e le uma le alofa mama. O le mea lea, ia outou fusi ai i le alofa mama, le mea ua silisili lea i mea uma, ona e iu mea uma—

“Ae o le alofa mama o le alofa le pona lea o Keriso, ma e tumau e faavavau; ma o soo se tasi e maua ua i ai ia te ia i le aso gataaga, o le a lelei ia te ia.

“O le mea lea, ou [tuafafine] pele e, ia outou tatalo atu i le Tama ma le malosi atoa o le loto, ina ia faatumulia outou i lenei alofa, lea ua ia faaee mai i luga o i latou uma o e o soo moni o lona Alo, o Iesu Keriso; ina ia mafai ona avea o outou ma [afafine] o le Atua; a oo ai ina afio mai o ia o le a tatou faapei o ia, ona o le a tatou vaai ia te ia e pei ona i ai o ia; tau ina ia tatou maua lenei faamoemoe; tau ina ia mafai ona faamamaina i tatou e pei lava ona mama o ia” (Moronae 7:45–48).

O le sini lenei o loo i ai i lo outou Tama oi le Lagi mo outou, o Ona afafine faapelepele. Atonu e foliga atu ia te oe o se sini mamao lava, ae mai i Lana silafaga, e te le o mamao lava. O lea e asiasi atu ai o Ia e ala i Lona Agaga e faamafanafana oe, faamalosiau atu ia te oe, ma musuia oe ia faaauau pea le malaga,

Ou te tuu atu la’u molimau mautu e silafia oe e le Tama—silafia ou manaoga ma lou suafa—alofa ia te oe, ma e faafofoga i au tatalo. O loo valaaulia oe e Lona Alo Pele e sau ia te Ia. Ma La te auina mai le Agaga Paia e faatasi ma oe i au taumafaiga e auauna atu i isi mo i Laua.

Ona o le Togiola a Iesu Keriso, o le a i ai i le mafutaga faifai pea a le Agaga Paia se aafiaga faapaiaina ma faamamaina i lou agaga. O le a e lagona i lena taimi le filemu na folafola mai e le Faaola e tuu atu i Ana soo. Ma lena filemu o le a oo mai se faamoemoe susulu ma se lagona o le malamalama ma le alofa mai le Tama ma Lona Alo Pele, o loo taitaiga Lona malo i le fogaeleele e ala i faaaliga i Lana perofeta soifua.Ou te molimau atu ai i le suafa o le Alii o Iesu Keriso, amene.