Avea o se Soo o lo Tatou Alii o Iesu Keriso

O le a le uiga o le avea ma se soo o lo tatou Alii o Iesu Keriso? O se soo o se tasi ua papatisoina ma ua naunau e tauave i ona luga le suafa o le Faaola ma mulimuli ia te Ia. O se soo e tauivi ia avea faapei o Ia i le tausia o Ana poloaiga i le olaga faaletino, e pei ona saili se tagata aperenitisi ia avea faapei o lona matai.

O le toatele o tagata e faalogo i le upu soo ma mafaufau na pau lona uiga o se “tagata e mulimuli.” Ae o le avea ma soo moni o se tulaga faaletagata. Ua fautuaina mai e lenei mea e sili atu nai lo le suesue ma le faaaogaina o se lisi o uiga paia faaletagata lava ia. E soifua ia soo ina ia mafai ona lalagaina i totonu o latou tagata ia uiga o Keriso, e pei o se ie lalaga faaleagaga.

Faalogo i le valaaulia a le Aposetolo o Peteru ina ia avea ma se soo o le Faaola:

“O le mea lava lea ia outou matua faamalosi ai lava, ina ia faaopoopoina le amio lelei i lo outou faatuatua; ia faaopoopo foi le poto i le amio lelei;

“Ma ia faaopoopo foi le le gaoia i le poto; ma ia faaopoopo le onosai i le le gaoia; o le amio Atua foi i le onosai;

“Ia faaopoopo foi le alofa i le au uso i le amio Atua; o le alofa foi i le alofa i le au uso.”¹

E pei ona tou tagai mai, o le lalagaina o le ie lalaga faaleagaga o le avea ma soo patino e manaomia ai le sili atu nai lo se filo se tasi. I aso o le Faaola, sa toatele na fai mai e amiotonu i se tasi o vaega po o se isi vaega o o latou olaga. Sa latou faataitaia le mea ua ou ta’ua o le usiusitai filifili. Mo se faataitaiga, sa latou tausia le poloaiga e le galue i le Sapati ae na faitio i le Faaola mo le faamaloloina [o ma’i] i lena aso paia.² Sa latou tuuina atu meaalofa i e matitiva ae na ofoina atu nao mea mai a latou faasiliga—mea latou te lei manaomia mo i latou lava.³ Sa latou anapopogi ae sa faia ma mata faanoanoa.⁴ Sa latou tatalo ae sa faia ina ia vaai i ai tagata.⁵ Na fetalai mai Iesu, “Ua latou faalatalata mai ia te a’u i o latou laugutu, a o o latou loto ua mamao mai ia te a’u.”⁶ Atonu o taulai atu ia alii ma tamaitai i le aoaoina o se uiga po o se faatinoga faapitoa ae e le o faapea o le a avea e pei o Ia i o latou loto.

Na tautino mai Iesu, e uiga i nei mea:

“E toatele latou te fai mai ia te au i lea aso, Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni? o lou igoa foi na matou fai ai vavega e tele?

“Ma ona ou tautino atu ai lea ia te i latou i lena taimi: Ou te lei iloa lava outou; ia outou o ese atu mai ia te au, outou o e e faia le amioletonu.”⁷

O uiga paia o le Faaola, e pei ona tatou vaai atu i ai, e le o se tusiga e mulimulitaia po o se lisi e siaki. O ni uiga ua lalagaina faatasi, e faaopoopo atu le tasi i le isi, lea e atiinae i totonu o i tatou i ni auala fesootai. I se isi faaupuga, e le mafai ona tatou mauaina se uiga faaKeriso se tasi e aunoa ma le mauaina foi ma le uunaiaina o isi. E pei ona amata ona malosi se tasi o uiga, e faapena foi le tele o isi.

I le 2 Peteru ma le Mataupu Faavae ma Feagaiga vaega e 4, tatou te aoao ai o le faatuatua i le Alii o Iesu Keriso o le faavae lea. Tatou te fuaina lo tatou faatuatua i le mea e taitaiina atu i tatou e faia—e ala i lo tatou usiusitai. Ma ua fetalai mai Keriso, “Afai tou te faatuatua mai ia te au o le a outou maua le mana e fai ai soo se mea e tatau ai ia te au.”⁸ O le faatuatua o se elemene ola. A aunoa ma galuega, a aunoa ma le ola mama, e leai se mana o lo tatou faatuatua e faaola ai le avea ma soo. O le mea moni, e mate lava le faatuatua.⁹

Ma sa faamatala mai e Peteru, “ia faaopoopoina le amio [mama] i lo outou faatuatua.” O lenei amio mama e sili atu nai lo le mama mai feusuaiga. O le mama ma le paia lea i le mafaufau ma le tino. O le amio mama o le mana foi. A tatou ola faamaoni i le talalelei, o le a tatou maua le mana ina ia mama ai ia mafaufauga, lagona, ma amioga uma. O le a gauai atili atu o tatou mafaufau i uunaiga a le Agaga Paia ma le Malamalama o Keriso.¹⁰ Tatou te faataitaia Keriso e le gata i upu tatou te fai atu ma mea tatou te faia ae faapena foi i le tagata ua tatou i ai.

Na faaauau le saunoaga a Peteru, “Ia faaopoopoina le poto i lo outou amio [mama].” A tatou ola i ni olaga mama, o le a tatou iloa lo tatou Tama Faalelagi ma Lona Alo i se auala faapitoa. “Ai se tasi e fia fai [le] finagalo [o le Tama], e iloa ai e ia le mataupu.”¹¹ O lenei atamai o se molimau patino, lea na maua mai i se aafiaga patino. O le atamai lea e liua i tatou, ina ia [pipii] atu lo tatou “malamalama i [Lona] malamalama” ma [fiafia] lo tatou “amiomama i [Lona] amiomama.”¹² E ala i lo tatou ola mama, tatou te malaga mai ai i le “Ou te talitonu” i le taunuuga matagofie o le “Ou te iloa.”

Na apoapoaiina i tatou e Peteru ina ia faaopoopo “le le gaoia i le poto; ma le onosai i le le gaoia.” I le avea ai ma ni soo le gaoia, ua tatou ola i le talalelei i se auala paleni ma tumau. Tatou te le “momo’e televave atu nai lo le malosi ua ia [i tatou].”¹³ Tatou te agai i luma i aso taitasi, leai se faavaivai i luitau ua faaleleia o lenei olaga.

O le le gaoia i lenei auala, tatou te atiinae ai le onosai ma le faalagolago i le Alii. Ua mafai ona tatou faalagolago atu i Lana mamanu mo o tatou olaga, e ui e le mafai ona tatou vaai atu i ai ma o tatou mata faalenatura.¹⁴ O le mea lea, e mafai ona tatou “filemu ma iloa o [Ia] o le Atua.”¹⁵ Pe a fetaiai ma afa o faigata, tatou te fesili atu, “O le a se mea e Te finagalo ia ou aoao mai lenei aafiaga?” O le i ai o Lana fuafuaga ma faamoemoega i o tatou loto, o le a tatou agai ai i luma e le gata i le lavātia o mea uma ae o le lavātia lelei ma le onosai.¹⁶

O lenei onosai, ua aoao mai e Peteru, e taitaiina atu i tatou i le amioatua. E pei ona onosai le Tama ia i tatou, o Lana Fanau, o le a tatou onosai i le tasi ma le isi faapea ma i tatou lava. Tatou te fiafia i le saolotoga o isi ma le avanoa e tuuina atu ia i latou ina ia tuputupu ae i “lea fasifuaitau ma lea fasifuaitau,”¹⁷ “tupu susulu malamalama tele pea lava pea seia oo i le aso e atoatoa ai.”¹⁸

Mai le le gaoia i le onosai, ma mai le onosai i le amioatua, o le a suia o tatou natura. Ua tatou maua le agalelei faaleuso o se uiga tupito lea mo soo moni uma. E pei o le Samaria Agalelei, tatou te sopoia le auala e auauna atu ai i soo se tagata lava o i ai se manaoga, e tusa lava pe le o i ai i le li’o o a tatou uo.¹⁹ Tatou te faamanuia atu ia i latou o e fetuu mai ia i tatou. Tatou te agalelei atu ia i latou o e inoino mai ia i tatou.²⁰ E i ai se isi uiga paia e sili ona amioatua pe faaKeriso?

Ou te molimau atu o taumafaiga o tatou faia ina ia avea ai ma soo o lo tatou Faaola o loo faaopoopoina moni lava i luga seiiloga ua tatou “maua” Lona alofa.²¹ O lenei alofa o se uiga moni o se soo o Keriso.

“Afai ou te tautala i gagana a tagata atoa ma agelu, a e leai so’u alofa, ua avea a’u ma apa memea taalili, po o se sumepalo tagitagi.

“Afai foi o ia te au ona perofeta ane, ma le iloa o mea lilo uma, ma le poto uma lava; afai foi o ia te au le faatuatua uma e aveese ai mauga, a e leai so’u alofa, ou te le aoga lava”²²

O le faatuatua, faamoemoe, alofa mama lea tatou te agavaa ai mo le galuega a le Atua.²³ “A o lenei, o tumau … na mea e tolu; a o le sili o na mea o le alofa lea.”²⁴

Uso e ma tuafafine, ua sili atu i le taimi nei nai lo se isi lava taimi, ua le mafai ona avea i tatou ma se “soo mo na o sina taimi”! E le mafai ona tatou avea ma se soo i le na o se vaega se tasi o le aoaoga faavae ae tuu le isi. O le eseesega o uiga paia lea e si’oina faataamilo le faatuatua ia Keriso—e aofia ai ma isi ia na tatou talanoaina i le asō—e manaomia uma mo lo tatou tutu malolosi atu i nei aso e gata ai.

A o tatou taumafai ma le naunautai ia avea ma soo moni o Iesu Keriso, o le a lalagaina, faaopoopoina i luga, ma faamalosia le fesootaiga o nei uiga i totonu o i tatou. O le a leai se eseesega i le va o le agalelei tatou te faaali atu i o tatou fili ma le agalelei o tatou faaee atu i luga o a tatou uo. O le a tatou faamaoni e tusa lava pe leai se tasi o tilotilo mai po o tilotilo atu foi nisi. O le a tatou tuuto atu i le Atua i nofoaga lautele e pei lava foi o tatou faia i nofoaga lilo.

Ou te molimau atu e mafai ona avea tagata uma ma se soo o le Faaola. E le o faatapulaaina le avea ma soo i le matua, itupa, tupuaga faaleaganuu, po o valaauga. E ala atu i lo tatou avea ai taitoatasi ma soo, tatou te fausia ai, o ni Au Paia o Aso e Gata Ai, se malosiaga tuufaatasia e faamanuiaina ai o tatou uso ma tuafafine i le lalolagi atoa. O le taimi lenei e toe tuuto atu ai i tatou lava ma le maelega atoa i le avea ai ma Ona soo.

Uso e ma tuafafine, ua valaauina i tatou uma e avea ma soo o lo tatou Faaola. Ia avea lenei konafesi ma ou avanoa e “amata [ai] e pei o taimi anamua, ma o mai [ia te Ia] ma o outou loto atoa.”²⁵ O Lana Ekalesia lenei. Ou te tuuina atu la’u molimau faapitoa o loo soifua o Ia. Tau ina Ia faamanuia mai ia i tatou i la tatou sailiga e faavavau ina ia avea ma ni soo tuuto ma lotototoa.I le suafa, o Iesu Keriso, amene.