“Misla Luk Sifacna Nga Filiya Yuruwos”

Tahmtahel sacohk wiyuck, kuht ahkinsewowoyeyuck sin Nguhn luhn God ekuh se inge. Pweng moklweyuck sin tahmtahel kol fokoko uh ac on uh ahkfokokoye luhlahlfongi lasr ac ahkyohkye kena lasr in liyacacng olweacng muhtahl kuht tuh oraclah yurin Pahpah luhngse tuhmasr Inkuhsrao. Kuht puhlakihn ahkyohkyacn luhngse lasr liki met ah ke Leum Jisus Kraist ac tarilacna ke mwe sang wolacna luhn kihsac in iwaclah Lal.

Pweng luhk ofong ma na fihsrwacsr se. Kuht nohfohn tuh puhla mihslac ofong. Kuht nuh kwewa ac luhngse in puhlakihn kain mihslac insiacsr sacn pacl nuh kwewa, in sucu lasr, ac yurin mwet ma raunikuhtlac. Leum el olwelah nuh sin mwet tuhma lutlut Lal mihslac ke pacl se ma El luhkuhn na fahsr luhkwelos. El oraclah olwelah se pacna nuh sesr. Tuh El fahk muh El ac sang ke ohiyac Lal, tiac ohiyac luhn facluh. El ahkuhtweyac ohiyac Lal in suhpwacma mihslac uh:

“Ngun Mutal el fah tuku ac kasrekowos, mweyen Papa El fah supwama inek, el fah luti kowos ma nukewa, ac oru kowos in esamak ma nukewa ma nga fahk tari nu suwos.

“Nga filiya misla yuruwos. Misla luk sifacna pa nga asot nu suwos. Nga tia asot oana ke faclu asot. Nikmet fosrngah ku toasr, oayapa nikmet sangeng.” (John 14:26–27).

Wen nahtuhl Mosiah tuh enenuh mwe sang luhn mihslac sacn ke elos muhtwacwacack misin lalos nuh sin mwet Laman. Ke elos akihlen yohk srihpaciyacn orekma lalos, oruh elos pruhe ke mihs. Ac “Leum El fahsrelos ke Nguhnal, ac fahk nuh selos: Enganwack. Ac elos enganwack” (Alma 17:10; liye pac Alma 26:27).

Ac oasr pacl, ma sahp kom kena nuh ke mihslac ke kom sun mwe ahkfohs ac ma luhman ma upac in kuhtanglah. Wen nahtuhl Mosiah elos lotwelah mwe luti se pacna ma Leum el tuh lotwel Moroni. Ma inge kuh in sie mwe kol nuh sesr kwewa: “Ac mwet uh fin tuhkuh nuh Yuruk Nga fah ahkkahlwemye nuh selos muhnahs lalos. Nga fah sang muhnahs nuh sin mwet uh tuh elos in kuh in inse puhsisacl; ac luhng kuhlwacng Luhk fal nuh sin mwet nuhkwewa suc ahkinsepuhsisaclyaclos sifacna ye muhtuhk; tuh elos fin ahkinsepuhsisaclyaclos sifacna ye muhtuhk, ac luhlahlfongiyuc, na Nga fah oruh ma muhnahs uh in ma fokoko nuh selos” (Ether 12:27).

Moroni el fahk lah ke el “lohng kahs inge,” el “ahkkweyeyucklac” (Ether 12:29). Elos kuh in sie mwe ahkkweye nuh sesr nohfohn. Elos suc tiac kuh in liye muhnahs lalos elos tiac kuh in kapkapwack. Kahlwem lowos ke muhnahs lowos an pa mwe insewowo se ke ac kahsre kowos in insepuhsisacl ac furokihnkowoslac nuh sin Mwet Lahngo. Nguhn tiac kuh in ahkkweye kom muhkwena, a El pa ohiyac ma Iwaclah uh kuh in ekuhllah ohiyowos. Na oruh ma muhnahs uh in eklac ma fokoko.

Luhlahlfongi lowos ac fah kuhtuh pacl uh lainyuck sel Setuhn; ma inge sikyak nuh sin mwet tuhma lutlut luhn Jisus Kraist. Mwe kahsruh lowos lain mwe ahkkoluk inge pa in oruh Nguhn Muhtahl in mwet wi kowos. Nguhn ac fah fahkwack mihslac nuh ke nguhnuwos. El ac fah pahtok kowos nuh met ke luhlahlfongi. Ac El ac fah kahsrwe kowos in esam pacl met ah ke kowos puhla kahlwem ac luhngse luhn Jisus Kraist.

In esam pa mwe sang sacohk emet ma Nguhn el kuh in usot nuh suwos. El fah “oru kowos in esamak ma nukewa ma [Leum El] fahk tari nu suwos” (John 14:26). Mwe esamyuck uh kuh in ma ke pruhe se topukyucklac ah, ke akwuck se luhn pristut ma kowos tuh eis ah, ke mwe ahkpwacyei luhn fahkwack luhlahlfongi lowos ah, kuh ke pacl se ma kowos liye paho in kolyuck luhn God in moul lowos an. Sahp ke lwen se fahsruh uh ke pacl kowos enenuh ahkkweye, Nguhn el kuh in oruh kowos in esam mwe puhla ma kowos puhlakihn ke tuhkweni se inge. Nga pruhe tuh in sikyak ohinge.

Mwe esamwack se ma Nguhn el kwacna use nuh in nuhnak luhk ah ma ke toeni ke kuhfa luhn Leum ke sie ekuh yac pucspucs somlah ah lun lohm osra srihsrihk se fin acn Innsbruck, Austria. Lohm sac oasr ye sohs soko ma tahpuhk train uh. Oasr mwet singucul luo muhkwena oasr, elos muhta ke siyah sahk. Inkaiyaclos muhtwacn, kuhtuh fuhsr ac kuhtuh mahtuh. Nga liye sronin muhta in kuloh ke kuhfa luhn Leum kihtakatwelihk nuh sin u srihsrihk se ingacn. Nga puhla luhngse luhn Mwet Lahngo nuh sin Mwet Luhlahlfongi ingacn, ac elos puhla pac. Tuh ma usrnguck ma nga esam wo ah pa kahlwem se ma luhman nwacklah lohm osra sacn, wi kac puhla in mihslac se. Fongweni ac wacngihn winto, tuh infuckihl ah kahlwem na pwacye oacna faht ke infulwen lwen.

Kahlwem luhn Nguhn Muhtahl an arlac kahlwem ac yohk ke ekuh se ingacn. Ac winto uh ma ikacklah nuh ke kahlwem sacn pa inse puhsisacl luhn mwet Luhlahlfongi sacn, suc tuh tuhkuh ye muhtuhn Leum suk ke nuhnak muhnahs ke ma koluk lalos ac olwelah in esamuhl pacl nuh kwewa. Ac tiac upac in esamuhl ke pacl sacn, ac mwe esamwack ke pacl muhtahl sacn oruh in fihsrwacsr nuh sihk in esamuhl ac Iwaclah Lal ke yac tohkoh ah. Lwen se ingacn olwelah se ma oasr ke pruhe in kuhfa luhn Leum fahk muh Nguhn el fah wi kuht tuh ahkpwacyeiyucklac ac na use puhla luhn kahlwem ac mihslac.

Oacna kowos, nga tarilacna ke ohiyac puhs ma Leum El tuh muhtwacta yuruk ke Mwet Ahkkweye ke pacl nga enenuh mihslac. Tuh Pahpah tuhmasr Inkuhsrao El tiac fosrngah muhkwena ke mwe ahkkweye lasr tuh el fosrngah yohk liki ke kapkapwack nuh lucng lasr. “Mwet Ahkkweye” pa sie ke ohiyac puhs ma Nguhn Muhtahl el ahkuhtweyucki in ma suhmuhslah ah. Pa inge sie pac: Nguhn Muhtahl el oacyacpac ahkuhtweyucki oacna Nguhn se ma kol kuht in oruh ma wo, ac fahk nuh sesr lah kuht enenuh in sang luhlahlfongi lasr in El (liye D&C 11:12). Inkaiyacn pacl uh, ma wo ma El kol kowos in oruh fah ma ke in kahsruh mwet se in eis ahkkweyeyuck sin God.

Ke lahlmwetmwet Lal, Leum El oracni kowos tuhkweni ke kain in u ke Alu Lal. El oruh in ahkyohkye kuh lowos in oruh ma wo. Ke u inge uh, oasr ma kunac yohk srihpac lowos in kuhlwacnsapuh mwet sahyac Kacl. Mwe srihkasrak se, kom fin muhtwacn fuhsr, sahp ac siyuck sum sin pisap lom kuh mwet kol luhn Muhtwacn Fuhsr lom in kahsruh sie Laurel suc ekihn mwet se kuht pahngon “mwet suhkwac wi alu.” Sahp kom etwacl wo liki pisap kuh mwet kol luhn Muhtwacn Fuhsr ah. Sahp kom etuh lah el puhla ma upac lohm ah kuh lutlut ah kuh kwewana. Sahp mwet kol lom an ac tiac etuh srihpac se elos moklweyuck in siyuck sum in kahsrwel, tuh Leum El etuh, ac El kol orekma inge ke moklweyuck luhn Nguhn Lal.

Ma wo tuhkuh ke orekma lom enenuh ma usrnguck se ke eklac kwewana ke insiom ac insiacn muhtwacn fuhsr se ma kom suk in molwelah an—ac ma ingacn enenuh kahsruh luhn Nguhn Muhtahl. Nguhn Muhtahl kuh in oruh kom in kuh in liye Laurel suhkwac wi alu sacn oacna ke Leum el liyacl uh. Leum El etuh insiacl ac insiom, ac El etuh ke ma sikyak ke insiac eklac uh. El kuh in muhtwacta yuruwos kwewa ke Nguhn Lal in moklweyuck ke inse puhsisacl, nuhnak muhnahs, ac luhngse.

Nguhn sac kuh in moklweyuck ke kahs, orekma, ac muhtweng ma enenweyuck nuh sum in suli soko lahm in fohlohk nuh un sip uh. Ac El kuh in ahkkweye insiacn un sip ke kuhlahs in Laurel uh elos in muh luhngse ac pain sip tuhlac, na ke pacl el ac fohlohk, el ac puhla muh el fohlohk nuh lohm sel ah.

Kuh lowos in oruh ma wo ke un muhtwacn nuhtin God ac fah wiwina, ke ohiyac puhkantwen, ma sefanna ac luhngse ma oasr yuruwos. Ma se inge siepac mwe sang ke mihslac ma tuhkuh sin Nguhn Muhtahl.

Alma el kahlwem ke ma inge. Pa oruh el nguhsr sin mwet lal “tuh in fah wacngihn fohs nuh sin sie sin sie, tuh elos in ngwet nuh met ke lwac mwet na, luhlahlfongi sefanna ac pacptais sefanna, insiaclos in maeni in ma se ac in luhngse sie sin sie” (Mosiah 18:21).

Ma sefanna inge enenweyuck Nguhn in muh kuh in wi kuhlahs lasr ac sucu lasr. Tuh kowos etuh ke ma kowos puhlakihn, oacna nga, lah kain tuhkweni in luhngse ingacn upac in karihngihn. Enenuh Nguhn Muhtahl in wi kuht pacl nuhkwewa in ikacslah muhtahsr ac ahkmihsye puhla lasr.

Nga esam sie pacl ah tuhlihk mukul matwac yac itkohsr kuh alkosr nahtuhsr suc srosro fin mwe oan kiyacl ah arlac upac oruh nga nuhnkuh muh ac muhsahllah. Nga foloyak kuhtuh srihsrihk, ac nga pihsrpihsr in oraclah lohm sihk in tiac muhsahllah. Nga sruokyac tuhlihk mukul se nuhtihk ah ke fin pihsacl ac sruhkuhlwack nuh lucng kuht in kuh in angwetwacni.

Nguhn Muhtahl tuh sang kahs inge nuh in nuhnak luhk uh. Oacna sie puhsra srihsrihk fakihsyac insiuck. “Kom sruohkyac mwet na wowo se.” Nga kahkahsrihk fihlilyac fin mwe oan kiyacl ah ac fahk sislah koluk nuh sel.

Ingena el ekihn mukul na wolacna se suc Nguhn Muhtahl el lwelah nga in liye yac 40 somlah ah. Nga tarilacna ma pahtpaht lah Leum El moliyuclac liki mwe puhla tiacna kuhlwacng ke El suhpwacma Nguhn Muhtahl el in lwelah nga in liye sie tuhlihk nuhtin God oacna El liyacl ah.

Ma sefanna kuht suk in sucu lasr ac ke Alu uh fah tuhkuh ke kuht lwelah Nguhn Muhtahl in kahsruh ke ma kuht liye ke kuht ngwet lah nuh sie—ac finne ke kuht nuhnkuh ke sie sin sie. Nguhn Muhtahl el liye ke luhngse suwohs luhn Kraist. Lohng kahs lal Mormon orekmakihnyuck in ahkuhtweyac luhngse muhtahl. Nuhnkuh ke pacl ma kom tuh puhla ah:

“Ac luhngse muhtahl uh mongfihsrwacsr, ac kuhlwacng, ac tiac sok, ac tiac fihlacng, tiac suk kacl sifacna, ac tiac puhrakwack, tiac nuhnkuh ma koluk, ac tiac engan ke ma koluk tuhsruhk engan ke ma pwacye, tu na kuh ke ma nuhkwewa, finsrak ke ma nuhkwewa, muhtweng ke ma nuhkwewa.

“Ohinge, mwet lili sacohk luhk, fin wacngihn luhngse muhtahl yuruwos, kowos wacngihn, tuh luhngse muhtahl uh tiac wacngihnlac. Ohinge, fungyang nuh ke luhngse muhtahl, suc pa wo emet, tuh ma nuhkwewa ac puhtatlac—

“Tuhsruhk luhngse muhtahl uh pa luhngse suwohs luhn Kraist, ac ma inge muhtweng ne tok ma pahtpaht; ac kuhtwena mwet suc sukokyak in sruokyac na ma inge ke lwen sahflah, ac fah wo nuh sel.

“Ohinge, mwet lili sacohk luhk, pruhe nuh sin Pahpah ke kuhiyacn insiowos nohfohn, tuh kowos in kuh in sesseslah ke luhngse se inge, ma El sang nuh selos nuhkwewa suc fahsr na pwacye tukun Wen nahtuhl, Jisus Kraist; tuh kowos in kuh in wen nuhtin God; tuh ke Elac fah sikme kuht fah oacna El, tuh kuht ac fah liyacl oacna El uh; tuh in oasr finsrak se inge yohrohsr; tuh kuht in kuh in ahknwacsnwacsyeyucklac oacna ke El nwacsnwacs” (Moroni 7:45–48).

Pa inge finsrak luhn Pahpah tuhmowos Inkuhsrao nuh suwos, tuhlihk muhtwacn sacohk Nahtuhl. Sahp ac liyeyuck suwos oacna finsrak loeloes, tuh ke liye Lal, kowos tiacna loeslac. Oruh El muhtwacta yuruwos ke Nguhn Lal in ahkkweye kowos, sang kahs in kahsruh nuh suwos, ac moklwe kowos in fahsr na met.

Nga fihliyac mwe lohoh pwacye luhk lah Pahpah El etwe kowos—etuh enenuh lowos ac inewos—luhngse kowos, ac lohng pruhe lowos. Wen Kuloh Nahtuhl El suli kowos in tuhkuh nuh yohrohl. Ac Elos suhpwacma Nguhn Muhtahl elan wi orekma lowos in kuhlwacnsapuh mwet sahyac ke Srihpaclos.

Ke srihpen Iwaclah luhn Jisus Kraist, Nguhn Muhtahl ac wi kowos pacl nuhkwewa ac fah ahknwacsnwacsyeyucklac ac ahkmuhtahlyeyucklac nguhnuwos. Kom ac puhla mihs ma Mwet Lahngo El olwelah in sang nuh sin mwet tuhma lutlut Lal. Ke mihslac sacn ac fah tuhkuh finsrak kahlwem ac puhla luhn kahlwem ac luhngse sin Pahpah ac Wen Kuloh Nahtuhl me, suc kol tohkohsrahi Lal fin facluh nuh ke fwackyuck nuh sin mwet pahluh moul Lal. Nga fahkwack ohinge ke inen Jisus Kraist, amen.