Tuyak Ke Insiyacsr ac Sang Nohfohn
Lwelah kuht in sifilpac kotaiyac inkacnek lasr uh fin enenuh ac fahsr nuh met ke finsrak yohk ac luhlahlfongi. Lwelah kuht in “tuyak ke insiac” ke in puhlaik ac “sang nohfohn.”
Yac ekahsr somlah ah granddaughter fuhsr se emet nahtuhsr ah kahsruhsr nuh yuruk ac fahk, “Pahpah Mahtuh, Pahpah Mahtuh, nga oraclah score tolu ke soccer game luhk mihsenge ah!”
Nga lihksreni topuk, “Arlac wo, Sarah!”
Ninac kiyacl ah ngwetma nuh sihk ke sie isrwacsr ke muhtahl ac fahk, “Score sac luo ac sie.”
Nga tiac ke siyuck lah suc itto!
Kanfracns uh pa sie pacl in sifil liye, fwackyuck, ac kuhtuh pacl uh sifil furohklac.
Oasr sie acn in rent stosah ma oasr GPS system kac pahngpahng NeverLost. Fin tahfonglac kahsruhsr lom an ke pacl se kom sang acn kom ac som nuh we uh, puhsra kac ac te fahk, “Kom lahlfon!” Tuh ac, ke sie puhsra wowo, fahk, “Sifilpac kotaiyac —fin kuh, oruh sie legal U-turn uh.”
Ke Ezekiel kuht riti olwelah wolacna se inge:
“Sie mwet koluk fin tui liki oru ma koluk, ac liyaung ma sap luk, ac el fin oru ma su suwohs ac wo, el ac fah tia misa, pwayena lah el ac fah moul.
“Ma koluk lal nukewa ac fah nunak munas nu sel, ac el ac moul mweyen el oru ma su suwohs.”1
Fuhkah wolacnaiyen olwelah uh, tuhsruhk ac enenuh nohfohnna luo in eis olwelah ke ma ahktolu sac. Forlah liki nohfohn; liyacacng nohfohn; na ma nuh kwewa nuhnak muhnahskihnyuck. Ma inge enenuh in “sang nohfohn”!
Kuht tiac enenuh in oacna mukul se suc, ke Wall Street Journal ripohrti ah, suhpwaclah sie acnfuhlop sesseslah ke mani wi sie lwacta lukmac nuh sin Internal Revenue Service ma fahk muh, “Dear IRS: Lun acnfuhlop se inge nuhnak muhnahs eis mani nga soenna molwelah ke tax somlah ah. P.S. Fin tukun ma se inge nuhnak luhk uh in srwackna elyah, nga fah suhpwacoht ma luhlah uh.”2
Tiac pa ingacn ohiyac kuht ac oruh uh! Kuht ac tiac tahfuhluo in liye lah meac fihsrwacsr emet in kahingkuhnlah. Leum El enenuh insiac ac sie nuhnak fokoko.3Insiyacsr nohfohn! Ke kuht pacptaislac ah, kuht tihli nohfohn oacna sie akucl ke olwelah lasr in ukwe na pwacye Mwet Lahngo, tiac tahfuh na. Ke kuht olweacng nohfohn ac “sang nohfohn uh,” inkuhsrao engan ke wo lasr.4Ke kuht tiac sang kuhiyacsr kuh sang tahfuh na, kuht ac koflah eis kuhtuh mwe insewowo wolacna inkuhsrao.”5
Yac ekahsr somlah ah, nga us Scout uh nuh ke sie acn in kacm yen mwesis uh. Tuhlihk mukul uh mutul sisken e se elos oraclah, ac oacna mwet kol wowo se ke Scout, nga mutul kapihn stosah okuhk ah. Ke lututacng ke nga tuhkahkwack ac ngwetlah nuh ke acn in kacm sac, nga liye sie Scout, suc nga fah pahngon Paul, atacl oacna lan tena mutul wo. Nga siyuck sel Paul fin el mutul fong, ac el topuk, “Tena arlac wo.”
Ke nga siyuck lah efuh ah, el fahk, “Nga mihsrihsr; e ah kunlac.”
Nga topuk, “Ac, e an oruh angacn. Kuh pack in mutul kiyom an tiacna fucsrfucsr fal?”
Wacngihn top.
Na siepac Scout sahyac ah lihksreni fahk, “El tena orekmakihn pack in mutul lal ah.”
Nga siyuck ke suhlahlahlfongi, “Efuh kom te, Paul?”
Mihslac—na sahflah top mwekihn se: “Ac, nga nuhnkuh lah fin ngac tiac ikucslah pack in mutul luhk uh, nga fah tiac enenuh in sifil luhmwacni.”
Sramsram pwacye: el mihsrihsr ke ao ekahsr ke srihpen el srihke in sefiyac mihnit limekohsr ke orekma. Kuht kuh in nuhnkuh, “Fuhkah lahlfoniyac! Suc oruh kain sacn?” Ac, kuht oruh pacl nuh kwewa ke inkacnek sensen likina. Kuht pa, ke sikyak, sruhnga in ikucslah mwe oan nguhnnguhn kiyacsr uh ke kuht tiac ke eis pacl in pruhe pwacye, lutlut, ac kena moulkihn wosasuc uh kais sie lwen; tiac fuhlwelah muhkwena e an in kunlac, tuh kuht in tiac karihngihnyuck ac mihsrihsr in kapwack ke nguhn.
Ke kuht falkihn tiac akihlen sensen ke olwelah lasr uh, ma koluk uh ac ma lasr. Leum El kahsrwe kuht in karihngihn kuhtyang sifacna, in oaru in lohacng nuh ke kahs luhn moul ma pahtpaht uh.6Ac El fah sifilpac fahkwack lah srah Lal fah tiac ahknwacsnwacsye kuhtlac fin kuht fin tiac lohngohl.7
Ke ma pwacye uh, ac fihsrwacsr liki in “sang nohfohn” likina in kuhtuhna. Ke kuht sang kuhtuhna kuh tiac nohfohnna uh, oasr, ke vernacular luhn Star Wars, “oasr ma tiacna suwohs.” Kuht tuhlac liki kena luhn God ac ke ma inge tuhlac liki ma pwacye ke engan uh.8Isaiah el fahk:
“Mwet koluk elos oana noa meoa ma tia tui in sisak kutkut ac mah fohkfok nu fin acn uh.
“Wangin misla nu sin mwet koluk.”9
Wo ohiyac, finne kuht oasr oyac kuh acn kuht muhta we uh, kuht sonna kuh in sonol Mwet Lahngo, suc fahk: “Ke ma inge, el suc auliyak ac tuhkuh nuh Yuruk oacna sie tuhlihk srihsrihk, el fah Nga eis, tuh ke srihpaclos pa tohkohsrahi luhn God. Liye, tuh ke srihpaclos Nga fihliyac moul Luhk, ac sifilpac eis moul.”10
Ke kuht kalweni in auliyak ac luhlahlfongi ke Leum, kuht eis kuh ke kuht sulpac fohlohklac eis puhsisacl ac luhlahlfongi luhn sie tuhlihk srihsrihk,11ahkyohkye ke lahlmwetmwet ma tuhkuh ke sie moul puhlakihnyuck. Job el fahkwack: “Elos su sifacna pangon mu elos mwet suwoswos, yokyokelikna nunkeya selos muh pwaye selos.”12Tennyson pa suhmuhslah, “Kuh luhk pa kuh luhn mwet singucul, ke srihpen insiuck nwacsnwacs.”13Leum El fahk lah kuht enenuh in tu ke acn muhtahl ac tiac mukwikwi.14
Mukul mahtuh se nahtuhsr, Justin, el misac ke el yac 19 tukun lain mas na paht se. Ke sie sramsram ke miting in sackracmacn el oruh tiac paht met liki el misac ah, el akacsruhi sramsram soko ma yohk srihpac na pwacye nuh sel ke sie pahpah ac mukul fuhsr se nahtuhl suc som nuh ke sie toy store ma oasr sie pack in puohpoh ukukyak ke sie atacn mwet. Tuhlihk mukul sac fihskiyac ma toplac, ac sana mayak ke fihsihk nuh kwewa. Pahpah sac siyuck sin tuhlihk mukul sacn lah efuh mukul sac nuh sro fohlohk na. Tuhlihk mukul sac nuhnkuh kihtin pacl na fahk, “Nga nihkihn. Nga muh mweyen el tuyak ke insiyacl.” In kuh in “sang nohfohn,” kuht enenuh in “tuyak ke insiyac,” “finne meac ac sikyak.”15
Kuht tuyak ke insiyacsr ke kuht fah sano na Leum in eslah kuh use nuh sesr kuh in muhtwacnglah mwe muhnahs lasr in mahnosr.16Kain mwe muhnahs ingacn kuh in pa mas, suhkahpahs, maskihn insifac, misac luhn mwet kuht luhngse, ac elyah puhs sahyac.
Kuht tuyak ke insiyacsr ke kuht sruhkwack po tohtohlah uh. Kuht tuyak ke insiyacsr ke kuht tahpuhk ma pwacye lain sie facluh koluk ma yohkwelihk in tiac puhla wo ke kahlwem uh, pahngon ma koluk uh wo ac ma wo uh koluk17ac “kalyei mwet suwohswohs ke srihpen suwohswohs lalos.”18
Tuyak ke insiyac fine oasr ma upac uh kuh ke srihpen nuhnak nwacsnwacs, ahkkweye fokoko ac kuh sin Nguhn Muhtahl ac sie liyaclah ma pahtpaht ma yohk liki ma mwet uh kuh in kahlwem kac.19Ke moul se lasr met ah kuht sasa ke engan ke pacl wowo in puhlakihn moul in mahno uh.20Kuht tuh “sang nohfohn” ke kuht pwacr in sulwaclah in mwet tahpuhk puhlaik ke plwacn luhn Pahpah tuhmasr Inkuhsrao. Pacl in tuyak ac sifil tahpuhk plwacn Lal!
Pahpah matwac yac 97 se tuhmuhk ah fahna misac. Ke pacl sie mwet siyuck sel lah el fuhkah uh, el kwacna topuk muh, “Ke luhpan 1–10, nga oasr ke 25!” Finne ke mukul sacohk se inge koflah tu kuh finne muhta ac upac nuh se in sramsram, top lal uh nuh oacyac ah na. El tuyak ke insiyac pacl nuh kwewa.
Ke pahpah tuhmuhk ah yac 90, kuht oasr ke lohm oaksohk se ac nga siyuck fin el enenuh wheelchair. El fahk, “Moh, Gary—sahp ke nga mahtohoh uh.” Na nga sulpac fahk, “Sahyacna, fin nga ullac ke fahsr uh, nga kuh in kahsruhsr.” Kuht fin tiac kuh in “sang nohfohn” ohiyacn fahsr lasr ingena uh, na sahp kuht enenuh in kahsruhsr; sahp kuht enenuh in sifilpac sokwack innek lasr uh. Sahp kuht enenuh in oruh sie U-turn ah. Sahp kuht enenuh in lutlutkihn yohk, pruhe kac na upac, kuh fuhlwelah kuhtuh ma uh kuht in muh kuh in sruokyacna ma ma yohk srihpac emet uh. Kuht ac sahp enenuh in fuhlwelah facluh kuht in muh sruokyacna ma netok uh. Pahpah tuhmuhk ah kahlwem ke ma se inge.
Ke el oasr ke navy ke pacl World War II ah, oasr mwet lun lohm luhlahp ac mwesahs sac21suc isrucn ohiyac lal an; luo sin shipmate lal an, Dale Maddox ac Don Davidson, akihlen ac tiacna isrucnuhl. Elos siyuck, “Sabin, efuh kom arlac siena liki mwet nuh kwewa sahyac uh? Nuhnak lom uh suwohs ac kom tiac nihmnihm, sismohk, kuh fuhlahk, tuhsruhk oacna in mihs ac engan.”
Nuhnak wowo lalos ke pahpah tuhmuhk ah tiacna insese nuh ke ma lutiyuck nuh selos ke mwet Mormon ah, ac pahpah tuhmuhk ah kuh in luti ac pacptaisi shipmates ingacn. Ninac pahpah tuhmwacl Dale elos arulacna muhlat ac sensenkackuhnuhl lah el fin wi Alu uh ac fah tuhlac sweetheart lal, Mary Olive, tuh el ohsun pac yurin misineri ke nguhsr lal ac el pacptaislac.
Apkuhran mweun ac in sahflah, Prestuhn Heber J. Grant el pahngon misineri uh, weacng kuhtuh mukul pahyuck uh. Ke 1946, Dale ac muhtwacn kiyacl Mary Olive, sulwaclah lah el enenuh in kuhlwacnsap finne eltahl pihtuctuckihn tuhlihk se emet nahtuhltahl. Te paht oasr tuhlihk yuc nahtuhltahl, mukul tolu ac muhtwacn ohnkohsr. Nohfohn oruh misin lalos an, weluhlwacng Dale ac Mary Olive suc sifacna kuhlwacnsapuh misin laltahl. Puhkantwen grandchildren sifilpac kuhlwacnsap. Luo sin mukul nahtuhltahl an, John ac Matthew Maddox, tuhfahna mempucrlac ke Tabernacle Choir, oacyacpac Ryan, son-in-law se nahtuhl Matthew. Sucu luhn Maddox ingena oasr 144 mwet kac ac elos mwet srihkasrak wolacna in “sang nohfohn.”
Ke kuht suk nuh ke pwepuh luhn pahpah tuhmuhk ah, kuht sokwack sie lwacta sel Jennifer Richard, sie sin tuhlihk muhtwacn limekohsr nuhtin shipmate se sahyac ah, Don Davidson. El suhmuhslah: “Suwohswohs lom uh ekuhllah moul lasr uh. Upac in etuh lah moul lasr uh ac fuhkah fin tiac Alu uh. Pahpah tuhmuhk ah misac, luhngse wosasuc uh ac srihke in moulkihn ne ke sahflah.”22
Arlac upac in srihkeyac ma wo kais sie mwet kuh in eis ke tuyak insiyac nohfohn uh. Pahpah tuhmuhk ac luo mwet weluhl ke oak an sruhnga in lohng mwet lun lohm luhlahp ac mwesahs sac suc srihsrsrihsr ke kihfihn paholos in isrucn.23Elos etuh lah ma wo emet pa in ukwe Mwet Oraclah sac likina un mwet sac.
Mwet Sap Paul sahp el ahkuhtweyac lwen lasr mihsenge uh ke el fahk nuh sel Timothy lah “kutu mwet uh forla liki ma inge ac kuhfla nu ke kaskas lusrongten.”24Puhkantwen “kahskahs lusrohngtwen” orek facluh mihsenge. Pa sramsram luhn mwet ke lohm luhlahp ac mwesahs sac.25Inkaiyacn pacl uh ac luhman fihsrwacsr in nuhnkuh ma koluk muh pa ma wo ke mwet uh tuhlac kuh som uh. Ac kuhtuh pacl uh tuhkuh sin mwet ma soenna oraclah in “sang nohfohn” ac kena in ukwe mwet luhngse ma luhn facluh oacna ke sruhngwacyuck sin mwet pahluh.
Ke srui, kuht etuh lah fuhkah sahflahiyac nuh sin mwet luhlahlfongi uh. Ke kuht “sang nohfohn uh,” oasr etuh na pwacye lasr lah “ma nuh kwewa tuhkweni orekma wo nuh selos suc luhngse God.”26 Elder Neal A. Maxwell el fahk, “Ni met sahngweng, moul na suwohs.”27
Pahpah tuhmwacn muhtwacn kiyuck uh luti ke BYU ac luhngse BYU football tuhsruhk el tiacna ke liye sritacl lalos uh ke srihpen el sensen ke ma kahlwem kac uh. Na sie ma wolacna sikyak—VCR uh oreklac, ma oruh kuh elan recordi sritacl an. Fin BYU itto, elac liye ma sruhuh an ke kuh esac, arulacna etuhna pwacye ne ke na sahflah an! Fin fwackyuck muh eltahl oruh koluk, kihnetuh, kuh oacna in apkuhran in kuf ke sahflahiyac an, elac tiac nuhnak upaclac kac ke srihpen el etuh lah eltahl ac itto pacna! “Kom kuh in fahk muh oasr “sie kahlwem suwohs ke finsrak” lal!28
Oacpacna nuh sesr. Ke kuht luhlahlfongi, oasr nuhnak sefanna lasr lah ma uh ac oreklac fal nuh sesr ke sahflah uh. Olwelah luhn Leum pwacye. Ma inge tiac kalmac pa lutlut fin facluh se inge ac fihsrwacsr kuh ac tiac ahsor, tuh oacna Paul el suhmuhslah, “Ma su mwet uhsoenna liye ku lohng, ma se su mwet uh soenna nunkauk mu ku in sikyak, pa ma se ma God El akola nu selos su lungse El.”29
Tamuhlwel ac tahmtahel, wacngihn mwet oraclah ma koluk lutu. Lwelah kuht in sifilpac kotaiyac inkacnek lasr uh fin enenuh ac fahsr nuh met ke finsrak yohk ac luhlahlfongi. Lwelah kuht in “tuyak ke insiyac” ke puhlaik ac “sang nohfohn.” Lwelah kuht in nwacsnwacs ac puhlaik in pahtok plwacn luhn Pahpah tuhmasr Lucng ac misin luhn Wen Nahtuhl, Mwet Lahngo lasr. Nga fahkwack mwe loh luhk lah Pahpah tuhmasr el moul, lah Jisus pa Kraist, ac ke pwacye ke plwacn luhn engan. Nga pruhe tuh mwe insewowo yohk emet luhn Leum in wi kowos ac nga fahk ke inen Jisus Kraist, amen.