Tutu i Luga i Totonu ma Tuuto Atoa Atu

I nai tausaga ua mavae sa tamoe mai ai le afafine laitiiti a le ma tama ma tau mai ma le fiafia tele, “Tamamatua, Tamamatua na ou sikoaina uma ‘ai i la’u taaloga soka ananei!”

Sa ou tali atu ma le fiafia tele, “Lelei tele, Sara!”

Sa tilotilo mai ma le ataata lona tina ia te a’u ma fai mai, “O ‘ai e lua i le tasi.”

Ou te lei fia fesili po o ai na malo!

O le konafesi o se taimi o le manatunatu, faaaliga, ma o nisi taimi o le toe faatonutonuina.

E i ai se kamupani e lisia taavale ma se polokalama GPS e ta’ua o le E Le Leiloa Lava.Afai e te faia se afega sese pe a uma ona e taina i ai le nofoaga manaomia, e le faapea mai le leo taiala, “Lou vale!” Ae, i se leo malu lava, e faapea mai, “Toe sui lou ala—pe a fai e mafai, ia toe liliu faaletulafono.”

I le Esekielu, tatou te faitau ai i lenei folafolaga matagofie:

“Afai e liliu ese le ua amio leaga ai ana agasala uma na ia faia, ma tausi i a’u tulafono uma, ma faia e ia le amio tatau ma le amiotonu, e ola lava ia e le oti.

“O ana solitulafono uma na ia faia e le tautaua ia te ia.”¹

Oka o se folafolaga maoae, ae e manaomia ai faatinoga uma e lua ina ia maua ai le folafolaga lona tolu. Liliu ese mai mea uma: tausi mea uma; ona faamagaloina lea o mea uma. E manaomia ai le “tuuto atoa atu!”

E le tatau ona tatou faapei o le tagata o lē, e pei ona lipotia mai e le Wall Street Journal, na auina atu se teutusi e tumu i se tinoitupe faatasi ai ma se tusi faalilolilo i le Tautua Tutotonu o Tupe [Internal Revenue Service] lea na faapea atu, “Mo le IRS, O loo auina faatasi atu ma lenei tusi le tupe na ou nofo aitalafu ai mo lafoga ua mavae. P.S. A mavae lenei mea ae le maua se toafilemu o lo’u mafaufau, o le a ou auina atu le tupe o totoe.”²

E le o le ala lena tatou te faia ai! Tatou te le taofiofi ia vaai po o le a le tulaga maualalo e mafai ona tatou aloese mai ai. E manaomia e le Alii le loto ma le mafaufau malie.³ O o tatou loto atoa! A tatou papatiso, e faatofuina atoa i tatou o se faatusa o la tatou folafolaga ina ia mulimuli atoatoa i le Faaola, e le o se afa loto. A tatou tautino atoa atu ma “tuuto atoa atu,” e luluina le lagi mo lo tatou lelei.⁴ Afai e faaleogalua pe ua na o se vaega lo tatou tuuto, tatou te le mauaina nisi o faamanuiaga silisili o le lagi.⁵

I le tele o tausaga ua mavae, sa ou aveina ni Sikauti i se tolauapiga i le toafa. Na momoe tama i autafa o se afi tele sa latou faia, ma e pei o taitai Sikauti lelei uma, sa ou moe i tua o la’u loli. I le taeao ina ua ou nofo ae i luga ma tilotilo atu i le tolauapiga, sa ou iloa atu se Sikauti e toatasi, o le a ou ta’ua o Paulo, na foliga mai e lei lelei sana malologa. Sa ou fesili atu pe na a mai lana moe, ma sa ia tali mai, “E lei lelei tele.”

Ina ua ou fesili atu pe aisea, ae na tali mai, “Na ou maalili; na pe le afi.”

Sa ou tali atu, “Ia, e faapena ia ‘afi. E lei lava le mafanafana o lau palanikeke?”

Leai se tali.

Ona faamatala leotele mai lea e se tasi o isi Sikauti, “Na te lei faaaogaina lana palanikeke.”

Sa ou fesili atu ma le le talitonu, “Aisea, Paulo?”

Sa le magagana—ona tuuina mai lea o se tali matamuli: “Ia, sa ou mafaufau afai ou te le tatalaina, ou te le toe taaiina.”

Tala moni: sa ia tumau mo le tele o itula ona sa ia taumafai e sefe le lima minute o le galue. Atonu tatou te manatu: “Oka se valea! O ai e faia se mea faapena?” Ia, tatou te faia i taimi uma i auala e sili ona matautia. O le mea moni, o loo tatou mumusu e tatala o tatou palanikeke faaleagaga pe a tatou le faaaluina se taimi e tatalo ai, suesue, ma ola faamaoni ai i le talalelei i aso taitasi; e le gata o le a pe le afi, ae o le a tatou le malupuipuia ma maalilili i le tuputupu ae faaleagaga.

A faamalieina a tatou feagaiga, e le tausalaina i tatou i taunuuga. Ua fautuaina i tatou e le Alii “ia faaeteete e faatatau ia te outou lava, ia outou gauai ma le filiga i upu o le ola e faavavau.”⁶ Ma sa Ia folafola atili mai, “O le a le faamamaina i latou e lo’u toto pe afai latou te le faalogo mai ia te a’u.”⁷

O le mea moni, e faigofie atu le “tuuto atoa atu” i lo le faaleogalua. A tatou faaleogalua pe le tuuto atoa atu, i le Star Wars o loo i ai muagagana, “e i ai se mea e le o sa’o.” Tatou te le o ogatasi ma le finagalo o le Atua ma e tatou te le o ogatasi foi ma le natura o le fiafia.⁸ Fai mai Isaia:

“A o e amio leaga e tusa i latou ma le sami ua sousou, e le mafai ona to’a filemu, a e lafoia ae e le suasami le eleele ma le palapala.

“Ua fetalai mai lo’u Atua, e leai se filemu i e amio leaga.”⁹

O le mea e lelei ai, tusa lava po o fea o tatou i ai po o le mea sa tatou i ai, tatou te le o mamao lava mai le Faaola, o le na fetalai mai: “O lea, soo se tasi e salamo ma sau ia te au e pei o se tamaitiiti, o ia lea o le a ou talia, ona ua faapea i latou o le malo o le Atua. Faauta, e mo i latou ia na ou tuuina ai i lalo lou ola, ma ou toe avea ai i luga.”¹⁰

Ao faaauau pea ona tatou salamo ma faalagolago i le Alii, tatou te maua le malosi pe a suia atoa i tatou i le mauaina o le lotomaualalo ma le faatuatua o se tamaitiiti laitiiti,¹¹ faatamaoaigaina i le poto lea e oo mai i le olaga o aafiaga. Na folafola mai e Iopu, “O le ua amiotonu e tumau pea o ia i lona ala, o ia foi ua mamā ona lima e faaopoopoina pea lona malosi.”¹² Na tusia e Tennyson, “O lo’u malosi e pei o le malosi o le toasefulu, ona e mama lo’u loto.”¹³ Ua fautua mai le Alii, “Ia outou tutu ai i nofoaga paia, ma aua le masii ese.”¹⁴

Na maliu le ma tama o Justin i le 19 o ona tausaga ina ua mavae se tauiviga umi ma se ma’i. I se lauga o le sauniga faamanatuga sa ia faia ao lei umi ae ona tuua i matou, sa ia faasoa ai se tala masalo sa aoga ia te ia e uiga i se tamā ma sona atalii laitiiti lea sa alu i totonu o le faleoloa o meataalo ma sa i ai se polo tu’i feula e foliga i se tagata. Na tu’i e le tamaitiiti le polo tu’i e foliga i se tagata, lea na pa’ū i luma ma vave ona toe tu faasao pe a mavae tu’i taitasi. Sa fesili le tamā i lona atalii laitiiti pe aisea e toe tu faasao ai le tagata. Na mafaufau le tama mo se minute ona fai mai lea, “Ou te le iloa. Ou te matea ona o loo ia tu i luga i totonu.” Ina ia “tuuto atoa atu,” e tatau ona tatou “tutu i luga i totonu,” “ia tuu po o le a lava se mea e tupu.”¹⁵

Tatou te tutu i luga i totonu pe a tatou faatalitali ma le onosai i le Alii e aveese pe aumai ia i tatou le malosi e onosaia ai mea matuitui i o tatou tino.¹⁶ O ia mea matuitui o ni faama’i, manaoga faapitoa, ma’i faalemafaufau, maliu o se tasi e pele, ma le anoanoai o isi mea faigata.

Tatou te tutu i luga i totonu pe a tatou siiina i luga lima ua tautau i lalo. Tatou te tutu i luga i totonu pe a tatou puipuia le upumoni e tetee atu i se lalolagi leaga ma faalelalolagi lea ua faateleina le le toafilemu i le malamalama, ua fai mai ua lelei le mea leaga, ae leaga le mea lelei¹⁷ ma “tausalaina e amiotonu ona o lo latou amiotonu.”¹⁸

E mafai ona tutu i luga i totonu e ui i faigata ona o le mafaufau manino, le faamalosiau ma le faamafanafana faamautinoa mai a le Agaga Paia ma se vaaiga faavavau lea e sili atu i lo le malamalama faaletagata.¹⁹ Sa tatou alalaga fiafia i le muai olaga mo le avanoa e tofo ai i le olaga faitino.²⁰ Sa tatou “tuuto atoa atu” ao tatou faia ma le fiafia tele se filifiliga ia avea ma tagata puipui lotototoa i le fuafuaga a lo tatou Tama Faalelagi. Ua oo i le taimi e tu ai i luga ma ia toe puipuia Lana fuafuaga!

Na maliu talu ai nei lo’u tamā e 97 tausaga le matua. Soo se taimi lava e fesili ai se tagata ia te ia po o a mai o ia, o lana tali lava e tasi o le “I se fua o le 1-10, pe a ma le 25 lea ou te i ai!” Na oo lava ina ua le toe mafai ona tu i luga pe saofai lenei tamalii pele, ma sa faigata ona tautala, ae o lana tali lava lea e tasi.Sa na tu pea lava i luga i totonu.

Ina ua 90 tausaga o lo’u tamā, sa matou i ai i le malaevaalele ma sa ou fesili ia te ia pe aumai sona nofoa faataavalevale. Fai mai o ia, “Leai, Gary—masalo pe a oo ina ou matua.” Ona ia fai mai lea, “Ma le isi mea, afai ou te lelava savali, e mafai lava ona ou tamoe.” Afai e le mafai ona tatou “tuuto atoa atu” i le tulaga o tatou savavali ai i le taimi nei, masalo e tatau ona tatou tamomoe; atonu e tatau ona toe sui o tatou ala. Atonu e ono tatau foi ona tatou faia se toe liliuga. Atonu e tatau ona tatou suesue atili ma le totoa, tatalo faatauanau, po o le faamatuu atu o nisi o mea ina ia tatou uumau ai i mea e sili ona taua. Atonu e tatau ona tatou faamatuu ese atu le lalolagi ina ia tatou pipiimau ai i le faavavau. Na iloa e lo’u tamā lenei mea.

Ata

O le tama o Elder Sabin i le neivi

Ao i ai o ia i le neivi i le Taua Lona II a le Lalolagi sa i ai i le fale tele ma le ateatea i latou²¹ o e na ulagia ana mataupu faavae, ae o ana uo seila e toalua, o Dale Maddox ma Don Davidson, na matauina ma e lei ulagia o ia. Sa la fesili atu, “Sabin, o le a le mea e ese ai oe mai tagata uma? E maualuluga ou tulaga faavae ma e te le inupia, ulaula, pe palauvale, ae e te foliga lava e te to’a ma fiafia.”

E lei tutusa o la lagona lelei e uiga i lo’u tama ma mea sa aoao ai i la’ua e uiga i Mamona, ma sa aoaoina ma papatisoina e lo’u tama ana uo seila uma e toalua.Sa matuai le fiafia matua o Dale ma lapataia o ia afai e auai o ia i le Ekalesia e le toe maua e ia lana manamea, o Mary Olive, peitai sa feiloai lava [Mary Olive] i faifeautalai i le talosaga [a Dale] ma sa papatisoina foi.

Ina ua lata i le faaiuga o le taua, sa valaau mai Peresitene Heber J. Grant mo ni faifeautalai, e aofia ai ma nisi alii ua faaipoipo. I le 1946, sa fuafuaina e Dale ma lona toalua, o Mary Olive, e tatau ona auauna atu Dale e tusa lava pe o faatalitali le la tama muamua. Na iu ina la mauaina se fanau e toaiva—tolu tama ma teine e toaono. Na auauna atu uma le toaiva i misiona, sosoo ai ma Dale ma Mary Olive o e na auauna atu i ni a la’ua foi misiona se tolu. Na auauna atu foi le toatele o fanau a fanau. E toalua le la fanau tama, o John ma Matthew Maddox, o loo pepese nei i le Aufaipese a le Tapeneko, faapea foi le atalii faaletulafono a Matthew o Ryan. Ua 144 nei le fuainumera o le aiga o Maddox ma o ni faataitaiga maoae o le “tuuto atoa atu.”

Ata

O tagata o le aiga o Maddox i le Aufaipese a le Tapeneko.

Ao sailiili ai i pepa a lo’u tama, sa matou maua ai se tusi mai ia Jennifer Richards, se tasi o afafine e toalima o le isi seila, o Don Davidson. Sa ia tusia: “O lou amiotonu na suia ai o matou olaga. E faigata ona malamalama i le tulaga semanu e i ai o matou olaga e aunoa ma le Ekalesia. Na maliu lo’u tama o fiafia lava i le talalelei ma taumafai ia ola ai e oo i le iuga.”²²

E faigata ona fuaina le aafiaga mo le lelei e mafai ona maua e tagata taitoatasi i le tutu i luga i totonu.Na mumusu lo’u tama ma ana uo seila e toalua e faalogo ia i latou sa i ai i le fale tele ma le ateatea ia na tusitusi mai le tamatamailima o le faatauemu.²³ Na latou iloa e sili atu le lelei o le mulimuli i le Foafoa nai lo le motu o tagata.

Atonu na faamatalaina e le Aposetolo o Paulo o tatou aso ina ua ia ta’u atu ia Timoteo “ua sese ai nisi i ia mea, ua latou liliu ane i upu le aoga.”²⁴ E tele naua “upu le aoga” o loo i ai i le lalolagi i aso nei. O le talanoaga lea a i latou o i le fale tele ma le ateatea.²⁵ I le tele o taimi e foliga mai o se ituaiga ‘alofaga lea e tauamiotonu ai le amioleaga po o le faaali mai o ia lava pe a lei loloa e tagata o latou auala ma o saoasaoa ese atu.O nisi taimi e o mai ia i latou o e e lei totogiina le tau ina ia “tuuto atoa atu” ma fiafia e mulimuli i le tagata natura e ese mai ai i le perofeta.

Ma le agaga faafetai, tatou te iloa le auala e iu ai mo le au faamaoni. A tatou “tuuto atoa atu,” ua tatou maua le faamautinoaga maoae o le a “galulue faatasi mea uma e lelei ai i latou o e ua alofa atu i le Atua.”²⁶ E pei ona saunoa mai Elder Neal A. Maxwell, “Aua le fefe, tau lava o le ola amiotonu.”²⁷

Sa faiaoga le tamā o lo’u toalua i le BYU ma fiafia i le lapaki a BYU ae sa le mafai ona ia matamata ia latou taaloga ona e matuai popole lava i le taunuuga. Ona tupu lea o se mea matagofie—ua mamanuina le VCR, lea na mafai ai ona ia pueina ia taaloga. Afai na manumalo BYU, ona ia matamata lea i le ata na pue ma le talitonuga atoatoa, matuai mautinoa lava le faaiuga! Afai na faasala ma le le talafeagai, manu’a, pe na foliga o le a faiaina i le kuata lona fa, na te le popole la ona ua ia iloa o le a latou manumalo! Atonu e mafai ona e faapea atu sa i ai ia te ia “se susulu atoatoa o le faamoemoe”!²⁸

E faapena foi i tatou. A tatou faamaoni, e mafai ona tatou maua le faamautinoaga tutusa o le a lelei mea uma mo i tatou i le iuga. Ua mautinoa lava folafolaga a le Alii. E le faapea la o le a faigofie pe aunoa ma le tele o loimata, ae e pei ona tusia e Paulo, “O mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alofa ia te ia.”²⁹

Uso e ma tuafafine, e leai se tasi ua agasala taeao. Tau ina ia toe sui lo tatou ala pe afai e manaomia ma ia taulai atu i luma ma le faamoemoe ma le faatuatua sili. Tau ina ia tatou “tutu i luga i totonu” e ala i le faamaoni ma “tuuto atoa atu.” Tau ina ia tatou mamā ma lototetele i le puipuiga o le fuafuaga a lo tatou Tama Faalelagi ma le misiona a Lona Alo, lo tatou Faaola. Ou te tuuina atu la’u molimau o loo soifua lo tatou Tama, o Iesu o le Keriso, ma e moni le fuafuaga tele o le fiafia. Ou te talosagaina ia faamanuiaga silisili a le Alii i o outou luga, ma ou te faia ai i le suafa o Iesu Keriso, amene.