Na Jisus El Ngwetwacng nuh Sel Luhngse El

Ke yac ekahsr tari ah nga pahngyak, yohrohl muhtwacn kiyuck, Jacqui, in kol Washington Spokane Misin. Kuht ohsun nuh ke acn luhn misin ke puhla sahngweng ac rahrah ke kunohkohn ke orekma yurin misineri wolacna fuhsr puhspuhs. Elos tuhkuh ke ohiyac siena puhspuhs ac sa in ekihn oacna mukul ac muhtwacn nahtuhsr sifacna.

Finne inkaiyacn selos oruh arulacna wo, kuhtuh selos muhnahs ke ma kunaclos fuhlwact ke pahng lalos. Nga esam sie misineri fahk nuh sihk, “Prestuhn, nga tiac luhngse mwet na.” Puhs fahk nuh sihk lah suhfal kena lalos in ukwe masap yohk ke misineri. Nga elyah ac motko ke ma nga kuh in oruh in eklac insiyaclos luhn misineri ekahsr suc soenna lotwelah ke engan ma oasr ke ahkostwen.

Sie lwen ah ke nga kahsruhsr ahluhkwelah acn kahto ke inmahsrlon Washington ac Idaho, nga lohngwack recording luhn Wuhlweacng Sasuc. Ke nga lohng ip ke mukul fuhsr kahsruhp suc tuhkuh nuh sin Mwet Lahngo ac siyuck ma el kuh in oruh in eis moul ma pahtpaht, nga eis fwackyuck ma nga tiac tuhpan kac tuhsruhktuh pa fwackyuck kuh sifacna lah ingena pa mwe esam muhtahl luhk.

Tukun el lohng Jisus fahklah masap an ac mukul fuhsr topuk lah el karihngihn masap nohfohn ingen ke el fuhsr, nga lohng Mwet Lahngo El ahksuwohsye ke ohiyac kuhlwacng ma se: “Ma sefanna kom srak fos kac. … kukakunla ma lom nukewa … na kom fahsru fahsr tukuk.”¹ Tuhsruhktuh nuh ke mwe lut luhk, nga lohngwack kahs ohnkohsr met liki ipin fuhs se tuh nga soenna lohng kuh riti met. Oacna fin kahs inge tuhfahna sang nuh ke ma suhmuhslah. Nga lut ke kahlwem moklweyuck ma tuhkuh tohkoh.

Kuh meac kahs ohnkohsr inge ma nga puhla kuh kac? Lohng in liye kom fin kuh in akihlen kahs ma luhman oacna sie, tiac oasr ke puk sahyac ac konweyuckyak sefanna ke Wosasuc luhn Mark:

“Sie mwet kasrusr nu yorol … ac siyuk sel, "Mwet Luti wo, mea nga ac oru tuh ngan ku in eis moul ma pahtpat?"

“Ac Jesus el [sramsram nuh] sel, …

“Kom etu ma sap: ’Nik kom akmas, nik kom kosro, nik kom pisrapasr, nik kom orek loh kikiap lain mwet, sunakin papa tomom ac nina kiom.’

“Na mwet sac fahk nuh sel … , Mwet Luti, nga liyaung ma inge nukewa in pacl nga fusr me.

“Jesus el luhngse el, ac el ngetang suilya ac fahk, Ma sefanna kom srak fos kac. Fahla ac kukakunla ma lom nukewa ac sang mani kac an nu sin mwet sukasrup, na ac fah oasr mwe kasrup lom inkusrao; na kom fahsru fahsr tukuk.”²

“Jesus el luhngse el.”

Ke nga lohngwack kahs inge, petsac fokoko nwacklah nuhnak luhk ke Leum lasr tui ac ngwetwacng nuh sin mukul fuhsr inge. Ngwetwacng—oacna liye ma loal nuh ke nguhnal, akihlen ma wo lal ac ma el kuh in oruh, oacyacpac ma el enenuh yohk emet.

Na kahs fihsrwacsr inge—Jisus El luhngse el. El puhla luhngse ac pahkomuhta yohklac nuh sin mukul wo fuhsr inge, ac ke srihpen luhngse se inge, ac ke luhngse se inge, Jisus El siyuck ma se sel. Nga petsaclah ohiyacn puhla nuh sin mukul fuhsr se inge in sesseslah ke kain luhngse se inge finne ke el siyuck in oruh ma upac nuh pwacye in kuhkwackuhnlah ma nuh kwewa lal ac sang nuh sin mwet suhkahsruhp.

Ke pacl se inge, nga etuh tiac insiyacn kuhtuh misineri muhkwena suc enenuh in eklac. Pa insiyuck pac. Kisensiyuck tilac “Kuh fuhkah prestuhn kohs luhn misin oruh misineri in mukwikwi wo likina met” Tuhsruhktuh, kihsensiyuck pa “Kuh fuhkah nga kuh in sessesyucklac ke luhngse luhn Kraist, na misineri kuh in puhla luhngse luhn God nuh keik ac kena in eklac?” Nga kuh in liyacl fuhkah ke ohiyac oacna sie ke Leum El liyacl mukul kahsruhp fuhsr, in liyacl ke ma pwacye ac ma el kuh in sun, ac in tiac liyaclos ke ma elos oruh kuh tiac oruh? Kuh nga kuh in eklac in oacna Mwet Lahngo fuhkah?

“Jesus el luhngse el.”

Ke pacl sacn fahsruh, nga muhta yac muhtuhn sie misineri suc muhnahs kuhtuh ke ip se luhn ahkostwen, lun insiyuck nga ingena liye mukul fuhsr kuh muhtwacn fuhsr luhlahlfongi se suc sulaclah ke kena lal in tuhkuh wi misin. Na nga kuh in fahk ke puhla oacna pahpah kuh ninac luhngse an:³ “Elder kuh Tahmtahel, fin nga tiac luhngse kom, nga ac puhla oacna sie ke ma luhn misin lohm. Tuhsruhktuh ma nuh pwacye nga luhngse kom, ac ke srihpen nga luhngse kom, nga elyah ke ma kom kuh in oruh. Pwacnwacng nga suli kom in eklac ke ma kom puhla upac in oruh ac eklac in oacna mwet se Leum El kena kom in sun.”

Kais sie pacl ke nga som in kihsensiyuck in lohlngohk, nga pruhe met ke mwe sang luhn luhngse pwacye ac nga kuh in liye kais sie elder ac tahmtahel oacna Leum El liyaclos.

Met liki toeni luhn zone, ke Tahmtahel Palmer ac nga ohsun nuh sin kais sie misineri sie sin sie, nga a tui ac ngwetwacng nuh ke muhtahlos, liyaclos—sie kihsensiyuck in lohlngohk ke wacngihn kahs—na pacl nuh kwewa, nga nwacklah ke luhngse yohk nuh in tuhlihk mukul ac muhtwacn nuhtin God.

Nga lotwelah lesin in eklac moul puhspuhs ke ma sikyak ke sapta 10 luhn Mark. Oasr lesin ahkosr inge nga luhlahlfongi kuh in kahsruh kais sie sesr:

1. Ke kuht lotwelah fuhkah in liye mwet sahyac oacna Leum El liyacl in tiac liye ke muhtahsr muhkwena, luhngse lasr fah kapwack kwaclos ac oacyacpac kena lasr in kahsrwelos. Kuht ac liye ma elos kuh in oruh tuh sahp elos sifacna tiac liye. Ke ohiyacn luhngse luhn Kraist kuht ac tiac sahngweng in sramsram ke kuh, mweyen “Lungse pwaye uh lusak sangeng nukewa.”⁴ Ac kuht tiac kuh in fuhlweack, esam elos suc upac nuh pwacye in luhngse, enenuh luhngse yohk emet.

2. Wacngihn luti kuh lotwelah fah sikyak ke mwet se oruh ke ohiyacn elyah kuh ahngyahng, ac insiyac fah tiac eklac ke acn se ma wacngihn luhngse we. Finne kuht mukwikwi ke kunohkohn luhn pahpah ninac, mwet luti kuh mwet kol, luti pwacye sikyak muhkwena ke puhla luhn luhlahlfongi ac wacngihn ahkkolukye. Lohm sesr enenuh in acn sef ke tuhlihk nahtuhsr—tiac acn ke akuhkuhin.

3. Luhngse tiac kuh in tui nuh sin tuhlihk, kawuck, kuh mempucr luhn sucu se suc tiac ahkfalye finsrak lasr uh. Kuht nihkihn ma lah sikyak nuh sin mukul kahsruhp fuhsr tukun el som ke puhla ahsor, tuhsruhktuh nga luhlahlfongi Jisus El srackna luhngse el suwohswohs finne el fin sulaclah inkacnek fihsrwacsr. Sahp tohkoh ke moul lal, ke el konwacack lah ma lal wacngihnlac srihpac, el esam ac mukwikwi ke ma sikyak ke Leum Lal liyacl, luhngse el, ac solwacl in fahsr Tohkohl.

4. Ke srihpen El luhngse kuht, Leum El kena ma yohk sesr. Kuht fin inse puhsisacl, kuht ac pain mwe suli luhn Leum in auliyak, in kihsackuhnlah, ac in kuhlwacnsap ke mwe loh luhn luhngse suwohswohs Lal nuh sesr. Tukun ma nuhkwewa, mwe suli se in auliyak oacyacpac pa mwe suli in eis mwe sang wolacna ke nuhnak muhnahs ac mihslac. Pwacnwacng, “tia inse toasr … Leum El aksuwosye mwet nukewa su El lungse, Ac sang kai nu selos nukewa su El lungse.”⁵

Tamuhlwel ac tahmtahel sacohk wiyuck, ingena kuhtwena pacl kowos puhla kowos siyuckyuck in oruh ma upac—tui ke mwe pahlah koluk se, som like finsrak luhn facluh, tui ma se ke srihpen kowos oruh ke lwen Sahpuht, sang nuhnak muhnahs nuh sin sie suc ahkkolukye kowos—nuhnkuh ke Leum suc liye kowos, luhngse kowos, ac suli kowos in som likina ac Ukwacl. Ac sang kuloh nuh Sel mweyen El luhngse kowos fal in suli kowos in oruh yohk likina met.

Nga fackwack ke Mwet Lahngo lasr, Jisus Kraist, ac rahrah nuh ke lwen se El ac sruokyac kais sie sesr ke Pahol, liye kuht ac kuhlasuhlwack ke luhngse suwohswohs Lal. Ke inen Jisus Kraist, amen.