Ia Faatuatua i le Alii a e Aua le Faalagolago
E mafai ona taulai atu o tatou olaga i le Faaola e ala i le iloaina o Ia, ma o le a Ia taitaia o tatou ala.
Ao o’u malaga atu i Asia, sa agai mai ia te a’u se uso pele. Sa opoina a’u i ona lima ma fesili mai, “E te talitonu moni lava o le talalelei moni lenei?” Uso pele, ou te iloa e moni. Ou te faatuatua i le Alii.
I le Faataoto 3:5–6, tatou te faitau ai i lenei fautuaga:
“Ia e faatuatua ia Ieova ma lou loto atoa; a e aua le faalagolago i lou lava atamai.
“Ia e manatua o ia i ou ala uma, ona faatonuina ai lea e ia lava ou ala.”
O lenei mau e sau ma ni apoapoaiga se lua, se lapataiga, ma se folafolaga matagofie. O apoapoaiga e lua: “Ia e faatuatua ia Ieova ma lou loto atoa” ma “ia e manatua o ia i ou ala uma.” O le lapataiga: “A e aua le faalagolago i lou lava atamai.” Ma le folagolaga matagofie: “Ona faatonuina ai lea e ia lava ou ala.”
Tatou talanoa muamua i le lapataiga. Ua tuuina mai e le ata vaaia le tele o mea e mafaufau loloto i ai. O le lapataiga e sau i le faaupuga “aua le faalagolago”—“aua le faalagolago i lou lava atamai.” I le faaPeretania o le upu faalagolago e i ai se uiga o le lilifa atu faaletino po o le masii i se isi itu. A tatou faalagolago faaletino i se tasi itu po o se isi, tatou te o ese mai le ogatotonu, ua tatou le paleni, ma tatou pauuese. A tatou faalagolago faaleagaga i lo tatou lava atamai, ua tatou le faalagolago atu i lo tatou Faaola. A tatou faalagolago atu, ua tatou le i ai i le totonugalemu; ua tatou le paleni; ua tatou le taulai atu ia Keriso.
Uso e, manatua, i lo tatou muai olaga, sa tatou tutu faatasi ma le Faaola. Sa tatou faatuatua ia te Ia. Sa faaleoina atu lo tatou lagolago, naunautaiga, ma le olioli mo le fuafuaga o le fiafia na tuuina mai e lo tatou Tama Faalelagi. Tatou te lei faalagolago ese atu. Sa tatou tau ma a tatou molimau ma “tatou tutu faatasi ma ‘au a le Atua, ona manumalo ai lea.”1 O lenei taua i le va o le lelei ma le leaga ua oo mai i le lalolagi. Ua tatou toe maua foi le tiutetauave paia e tutu atu ai o se molimau ma tuu atu lo tatou faalagolago i le Alii.
E tatau ona tatou fesili ifo taitoatasi: E faapefea ona ou tumau i le ogatotonu ma aua le faalagolago i lo’u lava atamai? E faapefea ona ou iloa ma mulimuli i le siufofoga o le Faaola pe afai ua matua malolosi lava leo o le lalolagi? E faapefea ona ou atinaeina le faalagolago i le Faaola?
Sei ou fautuaina atu ni auala se tolu e faateleina ai lo tatou malamalama i le [faalagolago] ma faalagolago ai i le Faaola. O le a e iloaina e le fou nei mataupu faavae, ae e mausali. O loo usuina i soo se Peraimeri, ta’ua i lesona a Tamaitai Talavou, ma o ni tali i fesili a le toatele o le Aualofa. O ni mataupu faavae tutotonu—ae le o faalagolago [i nisi mea].
Muamua, e mafai ona tatou iloa le Alii ma faalagolago ia te Ia pe a tatou “taumamafa fiafia i afioga a Keriso; aua faauta, o afioga a Keriso o le a tau mai ai ia te outou mea uma e tatau ona outou faia.”2
I nai masina ua tea sa faia la matou suesuega o tusitusiga paia faaleaiga. Sa nofo le atalii a la’u tama tama i luga o o’u vae a o matou faitau. Sa ou fiafia i le avea ai ma se tina matua, ma matua fiafia i le asiasi mai o le aiga o si a’u tama.
I le mavae ai o la matou suesuega o tusitusiga paia, sa tapuni la’u tusi. Sa iloa e le atalii a la’u tama o le a vave ae oo mai le taimi e moe ai. Sa ia tilotilo mai i luga ma mata naunautai lanumoana ma fai mai se upumoni e faavavau: “Su’e nisi mau, Nana.”
Na lapatai a’u e la’u tama, o se mätua lelei ma faamoemoeina, “Tinā aua e te vaivai ai. O loo ia taumafai e aloese mai le alu e moe.”
Peitai ina ua talosaga mai le atalii o la’u tama mo nisi mau, sa matou toe faitauina nisi mau! O le tele o mau e faamalamalamaina ai o tatou mafaufau, fafaga o tatou agaga, tali a tatou fesili, faateleina lo tatou faalagolago i le Alii, ma fesoasoani e faataulai o tatou olaga ia te Ia. “Manatua ia suesue i ai ma le filiga, ina ia mafai ona outou manuia ai.”3
Lua, e mafai ona tatou iloaina le Alii ma faalagolago ia te Ia e ala i le tatalo. O se faamanuiaga le mafai ona tatalo i lo tatou Atua! “Tatalo atu i le Tama ma le malosi atoa o le loto.”4
E i ai so’u manatuaga matagofie e uiga i se tatalo e pele ia te a’u. Mo se tasi o a’u malologa o le taumafanafana mai le kolisi, sa ou talia ai se galuega i Texas. E tatau ona ou tietie atu i le fia selau maila mai Idaho i Texas i la’u taavale tuai, o se taavale na ou faaigoaina ma le alofa ia Vern. Na tumu saisai Vern e oo i le taualuga, ma ua ou sauni mo se faigamalaga fou.
I lo’u agai atu i fafo mai le faitotoa, sa ou opoina si o’u tina pele ma sa ia fai mai, “Sei fai se ta tatalo ae e te lei alu.”
Sa ma tootutuli ma amata ona tatalo lo’u tina. Sa ia aioi atu i le Tama Faalelagi mo lo’u saogalemu. Sa ia tatalo mo la’u taavale e leai se ea malulu, aioi atu ia lelei le taavale. Sa ia talosaga mo agelu ia faatasi ma a’u i le taumafanafana atoa. Sa ia tatalo ma tatalo ma tatalo.
O le filemu lea na aumai e lena tatalo na ou maua ai le lototele e faatuatua i le Alii ae aua le faalagolago i lo’u lava atamai. Na taialaina lo’u ala e le Alii i le tele o faaiuga sa ou faia i lena taumafanafana.
Ao tatou faia se mausa o le o atu i le Tama Faalelagi i le tatalo, o le a tatou iloaina le Faaola. O le a tatou faalagolago ia te Ia. O le a avea atili o tatou manaoga faapei o Ona [manaoga]. O le a mafai ona tatou mauaina mo i tatou lava faapea ma isi faamanuiaga ua sauni le Tama Faalelagi e tuuina mai pe a tatou ole atu i le faatuatua.5
Tolu, e mafai ona tatou iloaina le Alii ma faalagolago ia te Ia pe a tatou auauna atu i isi. Ou te faasoa atu le tala lenei i se faatagaga mai ia Amy Wright, lea na oo ina iloaina le mataupu faavae o le auaunaga e oo lava i le lotolotoi o se gasegase matautia ma lamatia ai le soifua. Na tusia e Amy:
“I le aso 29 Oketopa, 2015, na ou iloa ai ua ou maua i le kanesa. O lo’u kanesa ua 17 pasene le tulaga o le faasaoina mai ai. Sa lei i ai i se tulaga lelei. Na ou iloa o le a ou tauivi ma le luitau sili o lo’u olaga. Sa ou naunau e tauivi i le mea e gata ai lo’u malosi e le gata mo a’u lava ia ae, na sili ona taua, mo lo’u aiga. O Tesema, na amata ai o’u togafitiga. Sa ou masani i le tele o aafiaga o vailaau mo le kanesa, ae ou te lei iloa na mafai ona ola pea se tagata ua ma’i tigaina.
“I se tasi taimi, sa ou ta’ua le togafitiga o le kimo o se soliga lea o le aia tatau o tagata. Sa ou ta’uina i lo’u toalua ua ou lelavā. Ua ou faamaamulu! Ou te le toe alu i le falema’i. I lona atamai, sa faalogo ma le onosai la’u pele ona tali mai lea, “Ia, lona uiga la e tatau ona matou sailia se tasi e auauna atu i ai.”
E a? Na ia misia ea le faamatalaga ua maua lona toalua i le kanesa ma ua lelavā tatali se isi ma’i oso pe toe tasi lava se taimi o le tiga matuitui?
Sa faaauau pea Amy: “Sa faateteleina lo’u ma’i ma oo ai i le tulaga e tasi pe lua ni o’u aso ‘lelei’ i le masina [lea] e mafai ai ona ou ola ma manava e pei o se tagata ola. O aso faapena na mafai ai e lo matou aiga ona saili ni auala e auauna atu ai.”
O se tasi o na aso, na seti ai e le aiga o Amy se konaseti laitiitii i le falemai ma tufatufa atu ni taga kimo i isi tagata mama’i, o taga ua faatumulia i mea e faafiafia ai ma fesoasoani e tuuitiitia ai āūga o le ma’i. A le mafai e Amy ona moe, ona ia mafaufau lea i ni auala e faafiafia ai se aso o se isi tagata. O nisi auala e tetele, ae o le tele lava o ni tamai faamatalaga po o ni savali feaveai o le faamalosiauga ma le alofa. O na po pe afai ua matuitui tele lona tiga e moe ai, na te taoto i le moega ma lana iPad ma saili ni sauniga o loo manaomia ona faamaeaina mo ona tuaa ua maliliu. Na faaitiitia le tiga i se tulaga faavavega, ma sa mafai ona ia onosaia.
“O le auaunaga,” na molimau mai ai Amy, “na faasaoina ai lo’u ola. O le mea na iu ina ou maua ai lo’u malosi e faaauau ai pea i luma, o le fiafia lea sa ou mauaina i le taumafai e tuuitiitia mafatiaga o i latou o siomiaina a’u. Sa ou tulimatai atu i a matou galuega faatino ma le olioli tele ma le naunautaiga. E oo mai lava i lenei aso e foliga mai e pei o se faamatalaga ese feteenai. Atonu e te mafaufau faapea o se tagata sa poo le ulu, onā, ma tauivi mo [lona] ola sa fetuutuunai i le mafaufau faapea ‘o le taimi nei ua nao au lava mea uma.’ Peitai, ina ua ou mafaufau e uiga ia te a’u lava ia, lo’u tulaga, o’u mafatiaga ma tiga, na amata ona matua pogisa ma faanoanoa le lalolagi. Ae ina ua liliu atu lo’u taulaiga i isi, sa i ai le malamalama, faamoemoe, malosi, lototele, ma le olioli. Ou te iloa e mafai lenei mea ona o le mana lagolago, faamalolo, ma le gafatia o le Togiola a Iesu Keriso.”
Na oo ina faalagolago Amy i le Alii ina ua ia iloaina o Ia. Ana faapea sa ia faalagolago laitiiti lava i lona lava atamai, atonu e teena le manatu e na te auauna atu. O le auauna atu na mafai ai ona ia tatalia lona tiga ma mafatiaga ma ola ai i lenei mau: “Pe a outou auauna atu i o outou uso a tagata, ua nao lo outou auauna atu lava lea i lo outou Atua.”6
O Iesu Keriso na manumalo i le lalolagi. Ma ona o Ia, ona o Lana Togiola le iu, ua tofu maua ai e i tatou uma se mafuaaga e faalagolago ai, ia iloa ai o le a iu ina lelei mea uma.
Uso e, e mafai e i tatou taitoatasi ona faatuatua i le Alii a e aua le faalagolago [sese]. E mafai ona faatutotonu o tatou olaga i le Faaola e ala i le iloaina o Ia, ma o le a Ia taitaia o tatou ala.
Ua tatou i ai i le lalolagi e faataitai lena lava faalagolago e tasi ia te Ia lea e faatagaina i tatou e tutu faatasi ma Iesu Keriso ma folafola atu, “O A’u lenei, auina atu a’u.”7
O’u uso pele, na molimau mai Peresitene Thomas S. Monson “e le mafuatiaina o tatou faamanuiaga folafolaina. E ui ina foufou mai afa, e ui ina to mai uaga i o tatou luga, ae o lo tatou malamalama i le talalelei ma lo tatou alolofa i lo tatou Tama Faalelagi ma lo tatou Faaola, o le a faamafanafanaina ma lagolagoina i tatou …pe a tatou savavali sa’o. … O le a leai se mea o lenei lalolagi e mafai ona manumalo ia i tatou.”8
E faaopoopo atu la’u molimau i le molimau a lo tatou perofeta pele. Afai tatou te [faalagolago] i lo tatou Tama Faalelagi ma i lo tatou Faaola a e aua le faalagolago i lo tatou lava atamai, o le a La taitaia o tatou ala ma o le a faalautele mai le aao o le alofa mutimutivale ia i tatou. I le suafa, o Iesu Keriso, amene.
Faamatalaga: O le aso 1 Aperila, 2017, na faamalolo ai Sister Cordon o se Fesoasoani Lua i le Au Peresitene Aoao o le Peraimeri ma valaauina ai o se Fesoasoani Muamua [i le Au Peresitene Aoao o le Peraimeri].