Tan-awa! Harianon nga Hangaway

Palangga ko nga kauturan sa priesthood, mapainubuson gid ako nga nagatindog sa inyo atubang sa sining makasaysayan nga okasyon, sa sugo sang aton pinalangga nga propeta kag Pangulo, Russel M. Nelson. Palangga kag ginasakdag ko gid ining dalayawon nga tawo sang Dios kag ang aton bag-o nga Unang Pangulohan. Ginadugang ko ang akon panaksihon sa iya ni Elder D. Todd Christofferson kag akon iban pa nga kauturan sa Korum sang Dose ka Apostoles nga ang mga pagbag-o nga gin-anunsyo sini nga gab-i pagbuot sang Ginuo.

Sa nahambal na ni President Nelson, mapangamuyuon ini nga ginhambalan kag ginbinagbinag sang nagapanguna nga Kauturan sang Simbahan sa malawig nga tion.Ang handum amo nga hibaluon ang pagbuot sang Ginuo kag pabakuron ang mga korum sang Melchizedek Priesthood. Ang inspirasyon nabaton, kag sini nga gab-i ang aton propeta nagpahibalo sang pagbuot sang Ginuo. “Sa pagkamatuod ang Ginuong Dios indi maghimo sing bisan ano nga butang, kon indi niya anay mapahayag ang iya tinago sa iya mga alagad nga mga manalagna”! (¹ Bulahan gid kita nga may buhi kita nga propeta subong!

Sa bilog namon nga kabuhi ni Sister Rasband, nagabiyahe kami sa bilog nga kalibutan sa nagkalainlain nga mga buluhaton sa Simbahan kag sa trabaho.Nakita ko ang halos tanan nga klase sang pagplastar sang Simbahan:gamay nga branch sa Russia nga ang kadamuon sang mga nagakapot sang Melchizedek Priesthood maisip lang sa isa ka kamot, bag-o kag nagatubo nga ward sa Africa nga ang mga high priest kag mga elder nagamiting sing tingob tungod kay diutay lang ang mga nagakapot sang Mechizedek Priesthood, kag lubos na nga napahamtang nga mga ward nga ang kadamuon sang mga elder nagakinahanglan nga tungaon ang ila korum sa duha!

Bisan diin kami magkadto, nasaksihan namon ang paggiya sang Ginuo sa Iya mga alagad, nga ginahanda ang mga tawo kag ang alagyan agud nga ang Iya mga anak mabugayan suno sa tagsa nila ka panginahanglan.Nagpromisa ang Ginuo nga “magapanguna Sia sa [aton] kag mangin sa [aton] natuo nga kamot kag sa [aton] nawala kag ang Iya Espiritu mangin sa [aton] mga tagipusuon, kag ang [Iya] mga anghel sa palibot [naton].²

Nga ginahunahuna kamo tanan, madumduman ko ang kanta nga “Behold! A Royal Army.”

Si Elder Christofferson nagsabat sang mga pamangkot nga piho gid magatuhaw sa pag-anunsyo nga ang high priest group kag elders korum sa mga ward, tingbon sa isa ka nagahiusa, mabaskog nga hangaway sang kauturan sa Melchizedek Priesthood.

Ining mga pagbag-o magabulig sa mga elders korum kag mga Relief Society sa pagpasanto sang ila buluhaton.Pasimplehon man sini ang pagpakig-angot sang korum sa bishopric kag ward council.Kag nagatugot ini sa bishop sa pagtugyan sing mas madamo nga mga responsibilidad sa mga pangulo sang elders korum kag Relief Society agud nga ang bishop kag iya mga manuglaygay makatutok sa ila pinakaimportante nga mga tulumanon—labi na ang pagpanguna sa young women kag young men sang Aaronic Priesthood.

Ang mga pagbag-o sa organisasyon kag mga hilikoton sang Simbahan di-tumalagsahon. Sang 1883 ang Ginuo nagsiling kay President John Taylor: “[Angot] sa pagdumala kag pag-organisar sang akon Simbahan kag Priesthood … ipahayag ko sa inyo sa nagakasantonga tion, sa paagi nga akon ginpili, ang tanan-tanan nga kinahanglanon para sapalaabuton nga pagtubo kag paghimpit sang akon Simbahan, para sa pag-uswag kag pagsulong sang akon ginharian.”⁴

Karon, pila ka tinaga sa inyo mga kauturan nga mga high priest—palangga namon kamo! Palangga kamo sang aton Amay sa Langit! Daku kamo nga bahin sang harianon nga hangaway sang priesthood, kag indi namon mapasulong ining buluhaton kon wala ang inyo kaayo, pag-alagad, ihibalo, kag pagkamatarong. Si Alma nagpanudlo nga ang mga tawo ginatawag nga mangin high priest tungod sang ila daku nga pagtuo kag mga maayong-buhat agud magtudlo kag mag-alagad sa iban. ⁵ Inang ikasarang kinahanglanon subong sangsa bisan san-o pa man.

Sa madamo nga mga ward, ayhan may mga high priest kita nga karon mahimo may oportunidad nga mapangunahan sang isa ka elder bilang pangulo sang ila korum. May nauna na nga mga kaso sang mga elder nga nagapanguna sa mga high priest: may mga elder nga subong nagaalagad bilang branch president sa pila ka mga rehiyon sa kalibutan sa diin may mga high priest nga nagapuyo sa branch, kag may mga branch nga elders korum lang ang naorganisar pero may mga high priest nga yara dira.

Ano kadaku nga kalipay para sa tanan nga mga nagakapot sang Melchizedek Priesthood nga maagum ang bugay sang pagtudlo, pagtuon, kag pag-alagad upod sa tanan nga mga miyembro sang ila ward.Diin man kamo kag ano man ang inyo mga sitwasyon, ginaagda namon kamo nga batunon sing mapangamuyuon, matutum, kag malipayon ang bag-o nga mga oportunidad nga magtuytoy kag tuytuyan kag mag-alagad nga nagaisabilang hubon sang kauturan sa priesthood.

Mahambal ako subong parte sa mga butang nga ayhan nagakinahanglan sang kasanagan samtang ginasulong naton ang pagpatuman sang pagbuot sang Ginuo parte sa pag-organisar sang iya mga korum sang balaan nga priesthood.

Ano ang mga pagbag-o sa isa ka stake high priests korum? Ang mga stake high priests korum magapadayon.Ang mga pangulohan sang stake magapadayon sa pag-alagad sa pangulohan sang stake high priests korum. Ugaling, pareho sa ginhambal ni Elder Christofferson, ang stake high priests korum pagatapoan na sang mga high priest nga sa karon nagaalagad sa stake presidency, mga miyembro sang ward bishopric, mga miyembro sang stake high council, kag nagaserbe nga patriarch.Ang mga ward kag stake clerk kag ang mga executive secretary indi mga miyembro sang stake high priest korum. Kon may aktibo nga nagaalagad nga high priest, patriarch, Seventy ukon Apostoles nga magbisita sa ward kag luyag magtambong sa priesthood miting, magatambong sia upod sa elders korum.

Kon ang kauturan sa sining mga calling irelease sa nagakaigo nga tion, magabalik sila sa ila ginhalinan nga mga yunit bilang miyembro sang elders korum.

Ano ang papel sang mga stake high priests korum? Ang stake presidency magamiting sa mga miyembro sang high priests korum agud maghinun-anon, magpanaksihon, kag maghatag sang paghanas.Ang mga miting sa stake suno sa ginapaathag sa aton mga handbook magapadayon nga may duha ka pagbag-o.

Una, ang mga ward kag stake indi na maghiwat sang mga priesthood executive committee miting. Kon may pinasahi nga mga isyu nga magtuhaw, pareho abi sang sensitibo nga mga bagay parte sa pamilya ukon di-kinaandan nga mga hangkat sa welfare, mahimo ini hambalan sa isa ka pinasangkad nga bishopric miting. Ang iban nga di-gawa sensitibo nga mga bagay mahimo hambalan sa ward council. Ang sang una ginatawag nga stake priesthood executive committee miting tawgon na karon nga “high council miting.”

Ika-duha, ang tuigan nga miting sang tanan nga naordinan nga mga high priest sa stake indi na paghiwaton. Pero, ang stake presidency padayon nga magahiwat sang tuigan nga miting sang stake high priests korum suno sa naanunsyo sini nga adlaw.

Pwede bala nga ang ward may masobra isa ka elders korum? Ang sabat, huo. Sa halimbawa sang Doctrine and Covenants seksyon {nb}107, bersikulo{nb}89, kon ang ward may di-kinaandan nga kadamuon sang aktibo nga mga Melchizedek Priesthood, ang mga lider sarang magpahamtang sang masobra isa ka elders korum. Sa sining mga kaso, ang tagsa ka korum kinahanglan may nagakaigo nga balanse sa pangidaron, ihibalo, kag palangakuan sa priesthood kag kabakod.

Nagasaksi ako nga sa aton pagsulong sa sining inspirado nga pagbag-o sang korum sa aton mga ward kag mga stake, makaagum kita sang madamo nga mga bugay. Tugoti ako nga magsambit sang pila lang ka mga halimbawa.

Sa direksyon sang bishop, mas madamo nga mga ikasarang sang priesthood ang makabulig sa buluhaton sang kaluwasan. Magalakip ini sang pagtipon sang Israel paagi sa buluhaton sa templo kag family history, pag-alalay sa mga pamilya kag indibidwal nga nagakinahanglan, kag pagbulig sa mga misyonero sa pagdala sang mga kalag kay Jesucristo.

Sa pagbalik sang sadto-anay-nagapanguna nga mga lider agud magpaambit sang ila ihibalo sa korum sang mga elder, mangin mas mabakod ang mga miyembro sang korum.

Mangin mas madamo ang nagkalainlain nga mga regalo kag ikasarang sa korum.

Mas magadugang ang kasigo kag kahanda sa pagsabat sang importante nga mga panginahanglan sa ward kag korum kag sa pagtuman sang aton madamo nga mga buluhaton sa pagpangalagad.

Magadugang ang pagpanudlo kag pag-isa kon ang bag-o nga elder kag eksperiyensiado nga high priest upod nga magpaambit sang ila mga inagihan sa mga miting kag buluhaton sa korum.

Ginalauman nga ang mga bishop kag mga branch president mahilway agud mahimo nila sing maayo ang ila obligasyon sa pagtuytoy sang ila panong kag sa pag-alagad sa mga nagakinahanglan.

Nakahangop kami nga ang tagsa sa ward kag stake magkatuhay. Samtang nahangpan namon ining mga kinalain, nagalaum kami nga sundon ninyo gilayon ining mga pagbag-o pagkatapos sining pangkabilogan nga komperensya.Ginhatagan kami sang direksyon sang isa ka propeta sang Dios!Kadaku gid nga bugay kag responsibilidad. Tumanon naton ini sa lubos nga pagkamatarong kag katutum!

Ginapahanumdum ko kamo nga ang awtoridad sang priesthood mabaton paagi sa pagpain kag pag-ordin, pero ang matuod-tuod nga gahum sang priesthood, ang gahum sa paghikot sa ngalan ni Jesucristo mabaton lang paagi sa matarong nga pagpangabuhi.

Ang Ginuo nagpahayag kay Propetang Joseph Smith, ang propeta sang Pagpanumbalik:

“Tan-awa kag yari karon, tatapon ko ang imo mga panong kag magabangon ako sang mga elder kag ipadala sa ila.

“Tan-awa, padasigon ko ang akon buluhaton sa iya sini tion”⁶

Matuod gid, tion ini nga ginapadasig sang Ginuo ang iya buluhaton.

Gamiton naton ining oportunidad sa pagbinagbinag kag pagpauswag sang aton mga kabuhi nga mangin magkasanto sa Iya pagbuot agud nga mangin kaangay kita sa madamo nga mga bugay nga Iya ginpromisa sa mga tampad kag matutum.

Mga utod, salamat sa tanan ninyo nga ginahimo agud mangin kabahin sining dalayawon nga buluhaton.Kabay nga magsulong kita sa sining daku kag dungganon nga kawsa.

Sini nga adlaw nagatindog kita tanan bilang mga saksi sa pagpahayag sang Ginuo sang Iya pagbuot paagi sa Iya propetang si President Russell M. Nelson. Nagasaksi ako nga propeta sia sang Dios diri sa duta. Nagapamatuod ako kay Jesucristo, nga aton halangdon nga Manunubos kag Manluluwas. Iya ini buluhaton, Iya ini pagbuot, nga hugot ko nga ginapamatud-an sa ngalan ni Jesucristo, amen.