Pauna nga mga Pahayag

Salamat, Brother Holmes, sa imo importante nga mensahe.

Mahal kong mga kauturan, nahidlaw gid kita kay President Thomas S. Monson kag Elder Robert D. Hales. Apang “nagapadayon kita tanan sa buluhaton sang Ginuo.”¹

Nagapasalamat ako para sa tagsa ka lalaki nga nagakapot sang balaan nga priesthood. Kamo ang ginasaligan sang aton Manunubos nga luyag “nga ang tagsa ka lalaki maghambal sa ngalan sang Dios nga Ginuo, ang Manluluwas sang kalibutan.”² Luyag niya ang tanan sang Iya naordinan nga mga anak nga lalaki nga magrepresentar sa Iya, nga maghambal para sa Iya, nga maghikot para sa Iya, kag magpakamaayo sang kabuhi sang mga anak sang Dios sa bug-os nga kalibutan tubtob sa katapusan agud nga “ang pagtuo magdugang sa [bug-os] nga duta.”³

Ang pila sa inyo nagaalagad kon sa diin naestablisar na ang Simbahan sa madamo nga henerasyon.Ang iban nagaalagad kon diin bag-o pa lang ang Simbahan.Sa pila sa inyo, dalagko ang inyo ward. Sa iban, magagmay ang inyo branch kag malayo kaayo. Wala’y sapayan sang inyo mga sirkumstansya, ang tagsa sa inyo miyembro sang korum sang priesthood nga may diosnon nga takay nga magtuon kag magtudlo; magpalangga kag mag-alagad sa iban.

Karon, ginaanunsyo namon ang dako nga pag-organisar liwat sang aton mga korum sa Melchizedek Priesthood agud matuman sing mas maayo ang buluhaton sang Ginuo.Sa tagsa ka ward, ang mga high priest kag elder pagaupuron na sa isa ka korum sang mga elder. Ini nga pagliwat magapabakod gid sa ikasarang sang mga lalaki nga nagakapot sang priesthood sa pag-alagad sang iban. Ang potensyal nga mga elder pagaabi-abihon sinang korum. Sa tagsa ka stake, ang pangulohan sang stake padayon nga magapangulo sang korum sang mga high priest sang stake.Apang ang pagplastar sinang korum igabase sa kinaron nga mga tawag sa priesthood nga igapaathag sa indi madugay.

Sanday Elder D. Todd Christofferson kag Elder Ronald A. Rasband sang Korum sang Dose ka Apostoles matudlo sa aton sing dugang pa gid parte sining importante nga mga pagliwat.

Ining mga pagliwat gintun-an sing binulan. Nabatyagan namon ang dugang nga kakinahanglan sa pag-improbar sang aton pagtatap sang aton mga miyembro kag pagrekord sang aton mga komunikasyon sa ila. Sa paghimo sini, kinahanglan naton pabakuron ang aton mga korum sang priesthood agud maghatag sing mas maayo nga direksyon sa pag-alagad sang gugma kag suporta nga ginatuyo sang Ginuo para sa Iya mga Santos.

Ining mga pagliwat gin-inspirar sang Ginuo.Kon ipatuman naton ini, mangin mas epektibo kita sangsa nagligad.

Nagapakigbahin kita sa buluhaton sang Dios nga Makagagahum. Si Jesus ang Cristo! Kita ang Iya mapainubuson nga mga alagad!Kabay nga pakamaayohon kamo sang Dios mga kauturan samtang nagatuon kita kag nagahimo sang aton tulumanon, ginapangamuyo ko sa ngalan ni Jesucristo, amen.