Tubtob sa Kapitoan Pamuaron sa Pito

Ang mga kasaypanan bahin sang kabuhi. Ang maayo nga pagtokar sang piano yano nga indi mahimo kon wala sang linibo ka mga sayup—bisan pa gani isa ka milyon. Sa pagtuon sang iban nga linggwahe, ang tawo dapat mag-atubang sa kahuy-anan sang paghimo sang linibo ka mga sayup—bisan pa gani isa ka milyon. Bisan ang pinakamaayo nga mga atleta sang kalibutan wala nagauntat sa paghimo sang mga sayup.

“Ang kadalag-an,” ginasiling nga, “indi amo ang wala sang kapaslawan, kondi ang magpadayon halin sa isa ka kapaslawan padulong sa isa nga wala madulaan sang kapagsik.”¹

Sa pag-imbento niya sang bombilya, si Thomas Edison ginsiling nga naghambal, “Wala ako malugaw-an sa isa ka libo ka beses. Ang bombilya isa ka imbento nga may isa ka libo ka mga tikang.”² Si Charles F. Kettering nagtawag sa mga kapaslawan bilang “mga poste nga nagatudlo sa karsada padulong sa kadalag-an.”³ Ginalauman, nga ang kada sayup nga aton mahimo mangin isa ka leksyon sa kaalam, nagahimo sa mga batong salandaran nga mangin bato nga tulungtongan.

Ang wala nagaduhaduha nga pagtuo ni Nephi nagbulig sa iya nga magpadayon halin sa isa ka kapaslawan padulong sa isa pa tubtob sang ulihi nakuha niya ang mga lamina nga saway. Napulo ka beses nga nagtinguha si Moses antes sang ulihi sia nangin madinalag-on sa pagpalagyo halin sa Egypt upod ang mga katawhan sang Israel.

Basi kita magpamangkot—kon si Nephi kag si Moses ginsugo sang Ginuo, ngaa nga wala ang Ginuo magpatunga kag magbulig sa ila nga mangin madinalag-on sa una nga pagtinguha? Ngaa gintugotan Niya sila—kag ngaa gintugotan Niya kita—nga mabudlayan kag mapaslawan sa aton mga pagtinguha nga mangin madinalag-on? Sa tunga sang madamo nga importanteng mga sabat, yari ang pila:

• Una, ang Ginuo nakahibalo nga “ining mga butang magahatag sa [aton] sang inagihan, kag mangin para sa [aton] kaayohan.”⁴

• Ika-duha, ang magtugot sa aton nga “magtilaw sang mapait, agud nga [kita] makahibalo magpakabahandi sang maayo.”⁵

• Ika-tatlo, pamatud-an nga ang “ang inaway iya sang Ginuo,”⁶ kag paagi lamang sa Iya grasya nga kita sarang makatuman sang Iya buluhaton kag mangin kasubong Niya.⁷

• Ika-apat, magbulig sa aton nga makatukod kag makapalambo sang madamo nga mga kinaiya ni Cristo nga indi sarang mapaputli kondi paagi lamang sa oposisyon⁸ kag “sa pugon sang kapipit-an.”⁹

Gani, sa tunga sang kabuhi nga napuno sang mga kapaslawan kag kakulangan, nagapasalamat kita tanan sa ikaduhang mga kahigayunan.

Sang 1970, bilang bag-o nga estudyante sa BYU, nag-enroll ako sa una nga subject parte sa nahaunang mga prinsipyo sang physics nga gintudloan ni Jae Ballif, isa ka batid kag maayo nga manunudlo. Pagkatapos sang isa ka bahin sang subject, sia magahatag sang exam. Kon ang estudyante makabaton sang grado nga C kag luyag niya ang mas maayo nga grado, si Professor Ballif magatugot sa estudyante nga magkuha sang ginbag-o nga exam nga nagsakop sang amo man gihapon nga materyal. Kon ang estudyante makabaton sang B sa ikaduha nga exam kag wala gihapon malipay, sarang sia magkuha sang exam nga ika-tatlo, kag ika-apat, kag padayon. Paagi sa pagtugot niya sa akon sang ikaduha nga mga kahigayunan, ginbuligan niya ako nga mangin labing maayo kag sang ulihi nga makabaton sang grado nga A sa iya klase.

Litrato

Si Professor Jae Ballif

Pinasahi sia nga maalam nga manunudlo nga nag-inspirar sa iya mga estudyante nga magpadayon sa pagtinguha—magkabig sa kapaslawan bilang manugtudlo, indi isa ka trahedya, kag indi mahadlok sa kapaslawan apang ang magtuon halin sa ini.

Bag-o ko lang gintawgan sa telepono ining halangdon nga tawo 47 anyos ang nagligad pagkatapos nga ako nagtapos sang iya physics nga subject. Ginpamangkot ko sia kon ngaa sugot sia nga maghatag sa mga estudyante sang walay limit nga mga pagkuha sang exam agud pasanyugon ang ila grado. Ang sabat niya: “Luyag ko nga ara ako sa bahin sang mga estudyante.”

Samtang nagapasalamat kita parte sa ika-duha nga mga kahigayunan pagkatapos sang mga sayup, ukon mga kapaslawan sang kaisipan, nagalantaw kita nga may dakung pagkatingala sa grasya sang Manluluwas sa paghatag sa aton sang ika-duhang mga kahigayunan sa paglutos sa sala ukon sa mga kapaslawan sang tagipusuon.

Wala sang mas labaw pa nga nagapangapin sa aton sangsa Manluluwas. Nagatugot Sia sa aton sa padayon nga pagkuha sang mga exam. Para mangin kasubong Niya nagakinahanglan sang di-maisip ngaika-duhang mga kahigayunan sa matag-adlaw naton nga mga pagbato sa kinaugali nga tawo, subong sang pagdumala sa mga luyag, magtuon nga may ara sang pasensya kag pagpatawad, paglutos sang katamaran, kag paglikaw sa mga kasal-anan sang di-pagbuhat, para hinambitan lamang ang pila. Kon ang magsayup tawhanon nga kinaugali, pila ka mga pagsayup ang matabo antes ang aton kinaugali indi na tawhanon kondi diosnon? Linibo? Siguro isa ka milyon.

Nakahibalo nga ang makitid kag masipot nga banas may nagalalapta nga mga pagtilaw kag ang mga kapaslawan matag-adlaw nga hitabo para sa aton, ang Manluluwas nagbayad sang walay dulunan nga presyo sa paghatag sa aton sang madamo nga mga kahigayunan nga ginakinahanglan agud madinalag-on naton nga mapasaran ang aton mortal nga pagtilaw. Ang oposisyon nga gintugotan Niya masami daw sa indi malampuwasan kag indi masarangan nga dalhon, apang wala Sia nagabilin sa aton nga walay paglaum.

Sa pagpabilin sang aton paglaum nga indi madula samtang nagaatubang kita sa mga pagtilaw sang kabuhi, ang grasya sang Manluluwas dalayon nga handa kag ara. Ang Iya grasya isa ka “diosnon nga paagi sang tabang ukon kabakod, ... nagapakasarang nga gahum nga nagatugot sa katawhan nga makaangkon sang kabuhing walay katapusan kag eksaltasyon pagkatapos nga nahimo nila ang pinakalabing maayo nila nga mahimo.”¹⁰ Ang Iya grasya kag mapinalanggaon nga pagbantay ara sa bug-os naton nga pagpanglakaton samtang Sia nagainspirar, nagapamag-an sang mga palas-anon, nagapabakod, nagahatag, nagapangapin, nagapaayo, kag indi gani, “[naga]tabang sa gilayon sa iya katawhan,” samtang sila nagakasandad sa makitid kag masipot nga banas.¹¹

Ang paghinulsol dulot sang Dios nga ara permi, nagatugot kag nagapakasarang sa aton nga magpadayon halin sa isa ka kapaslawan padulong sa isa nga wala madulaan sang kapagsik. Ang paghinulsol indi plano kon engkaso nga kita mapaslawan. Ang paghinulsol amo ang Iya plano, bangud nabal-an Niya nga mapaslawan kita. Ini ang ebanghelyo sang paghinulsol, kag subong sa naobserbahan ni Presidente Russell M. Nelson, ini isa ka “bug-os kabuhi nga tulun-an.”¹²

Sa sining bug-os kabuhing tulun-an sang paghinulsol, ang sacramento amo ang ginhatag nga paagi sang Ginuo agud padayon naton nga mabaton ang Iya kapatawaran. Kon mag-ambit kita nga may mahinulsulon nga tagipusuon kag nagapakubos nga espiritu, ginapatawad Niya kita kada simana samtang nagauswag kita halin sa isa ka kapaslawan padulong sa isa sa banas sang kasugtanan. Kay “wala sapayan sa ila mga sala, ang akon dughan napuno sang kalooy para sa ila.”¹³

Apang pila gid ka beses Niya kita patawaron? Ano ka laba ang Iya pasensya? Sa isa ka okasyon si Peter nagpamangkot sa Manluluwas, “Ginuo, pila ka beses makasala ang akon utod batok sa akon, kag sia patawaron ko sa gihapon? tubtob bala sa pito ka beses?”¹⁴

Litrato

Si Peter kag si Jesus

Siguro, ginhunahuna ni Peter ang pito ka beses tuman na ka nagakaigo nga numero agud magpatawad kag ang kalooy dapat may dulunan. Bilang sabat, ang Manluluwas yano nga naghambal kay Peter nga indi gani mag-isip—nga indi maghimo sang mga dulunan parte sa pagpatawad.

“Si Jesus nagsiling sa iya, wala ko ginasiling sa imo, Tubtob sa pito ka beses: apang, Tubtob sa pito ka beses pamuaron sa pito.”¹⁵

Maathag, ang Ginuo wala nagatukod sang dulonan nga 490. Ina kasubong sang pagsiling nga ang pag-ambit sang sacramento may ara sang mataas nga dulonan tubtob lamang 490, kag dayon sa ika-491 ka beses, isa ka langitnon nga manugbantay ang magpatunga kag magsiling, “Pasensyaha ako, apang ang imo card sa paghinulsol bag-o lang nag-expire—sugod karon, bahala ka na sa imo kaugalingon.”

Ang Ginuo naggamit sang numero nga 490 bilang paanggid sang Iya walay dulonan nga Pagpasag-uli, pagpalangga, kag grasya. “Huo, kag subong kasami sang paghinulsol sang akon katawhan ako magapatawad sang ila mga kalapasan batok sa akon.”¹⁶

Ina wala nagakahulogan nga ang sacramento pahanugot agud makasala. Ina isa ka rason kon ngaa ginlakip sang Ginuo ining pulong sa libro ni Moroni: “Apang subong kasami nga sila naghinulsol kag nagpangayo sang kapatawaran, upod ang matuod nga tinutuyo, ginpatawad sila.”¹⁷

Ang matuod nga tinutuyo nagakahulogan sang matuod nga pagtinguha kag matuod nga pagbag-o. Ang “pagbag-o” amo ang sentro nga pulong nga ara sa Giya sa mga Kasulatan nga ginagamit sa pagpaathag sang paghinulsol: “Ang pagbag-o sang kaisipan kag tagipusuon nga nagadala sang bag-o nga pamatasan parte sa Dios, sa kaugalingon, kag parte sa kabuhi bilang kabilogan.”¹⁸ Ina nga sahi sang pagpag-o nagabunga sang espirituhanon nga paglambo. Gani, ang kadalag-an naton indi ang magpadayon halin sa isa ka kapaslawan padulong sa isa, apang ang nagalambo halin sa isa ka kapaslawan padulong sa isa nga wala madulaan sang kapagsik.

Parte sa pagbag-o, binagbinaga ining simple nga panghunahuna: “Ang mga butang nga wala nagabag-o nagapabilin nga amo man sa gihapon.” Ining maathag nga kamatuoran wala gintuyo nga mag-insulto sang inyo kaalam apang amo ang madalum nga kaalam ni Presidente Boyd K. Packer, nga dayon nagdugang, “Kag kon kita wala na nagabag-o—kita wala na.”¹⁹

Bangud indi naton luyag nga kitawala naantes nga kita mangin subong sa Manluluwas,²⁰ ginakinahanglan naton nga magbangon sa kada tion nga kita matumba, upod ang luyag nga nagapabilin sa paglambo kag pag-uswag wala sapayan sang aton mga kahuyangan. Sa aton kahuyangan, Sia nagapasalig sa aton, “Ang grasya ko nagakaigo sa imo: kay ang akon kabakod nahimo nga perpekto sa kahuyangan.”²¹

Sa ginpadasig lamang nga potograpiya ukon sa mga talamdan sang paglambo makit-an naton ang lawasnon nga pagdaku. Sa pagkapareho, ang espirituhanon nga paglambo kinaandan nga daw indi makit-an luwas lamang sa paglantaw kag pagbinagbinag sa naglipas nga panahon. Mangin maalam kita kon dalayon naton nga lantawon kag binagbinagon ang nagligad nga panahon agud mabal-an ang aton pag-uswag kag mainspirar kita nga “magdutdot pasulong nga may kalig-on kay Cristo, nga may isa ka himpit nga kasanagan sang paglaum.”²²

Nagapasalamat ako sang walay katapusan sa mapinalanggaon nga kaayo, pasensya, kag malawig nga pag-antus sang aton Langitnon nga Amay kag sang Manluluwas, nga nagatugot sa aton sang di-maisip nga ika-duhang mga kahigayunan sa aton pagpanglakaton pauli sa Ila presensya. Sa ngalan ni JesuCristo, amen.