Faauta! O Le Au Tautupu

O’u uso pele o le perisitua, faatasi ai ma le lotomaualalo tele ou te tu atu ai i outou luma i lenei sauniga faasolopito, i lalo o le tofiga mai lo tatou perofeta pele ma le Peresitene, o Russell M. Nelson. Ou te alofa tele ma lagolagoina lenei tamaalii ofoofogia o le Atua ma lo tatou Au Peresitene Sili fou. Ou te faaopoopo atu la’u molimau i le molimau a Elder D. Todd Christofferson ma isi Usoga o le Korama a Aposetolo e Toasefululua e faapea, o suiga na fofogaina i lenei afiafi o le finagalo lea o le Alii.

E pei ona ta’ua e Peresitene Nelson, o se mataupu lenei sa talanoaina ma le agaga tatalo ma sa soalaupuleina e le Usoga sinia o le Ekalesia mo se taimi umi. O le manao, o le sailia lea o le finagalo o le Alii ma faamalolosia ia korama a le au Perisitua Mekisateko. Sa maua ia musumusuga, ma o le afiafi nei ua faailoa mai ai e lo tatou perofeta le finagalo o le Alii. “E le faia lava se mea e le Alii o Ieova, ae faaalia lona finagalo i ana auauna o perofeta”!¹ Ua matua faamanuiaina lava i tatou i le i ai o se perofeta i le asō!

I le gasologa o lo ma olaga, sa ma malaga ai ma Sister Rasband i le lalolagi i tofitofiga eseese faale-Ekalesia ma faalegaluega. Ua toetoe o ituaiga uma o faatulagaga o iunite o le Ekalesia ua ou vaai i ai: o se paranesi laitiiti i Rusia lea e mafai ona faitauina le aofai o le au Perisitua Mekisateko i le lima e tasi; o se uarota fou ma ua faatupulaia i Aferika lea e potopoto faatasi ai faitaulaga sili ma toeaina i se tino e tasi ona e maualalo le faitau aofai o le au Perisitua Mekisateko; ma uarota ua malolosi lea e manaomia ai le vavae o la latou korama a toeaina i ni korama se lua!

O soo se mea ua ma o i ai, ma te molimauina lava le aao o le Alii o muamua atu i Ana auauna, e sauniuni ia tagata ma le ala i luma ina ia mafai ona faamanuiaina Ana fanau e tusa ai ma mea uma latou te manaomia. Pe Na te le’i folafola mai ea “o le a [Ia] alu muamua atu i [o tatou] luma” ma “o le a i ai i lo [tatou] lima taumatau ma lo [tatou] agavale” ma o Lona “Agaga o le a i o outou loto, ma si’o faataamilo [i tatou] e Ana agelu”?²

A o ou mafaufau ia te outou uma, sa faamanatu mai ia te a’u le viiga “Faauta! Se Au Tautupu.”

Ua tali e Elder Christofferson le tele o fesili e mautinoa e tulai mai le faasilasilaga faapea o vaega o faitaulaga sili ma korama a toeaina, i tulaga faaleuarota, ua tuufaatasia nei i se ‘autau malosi e tasi o le usoga o le Perisitua Mekisateko.

O nei fetuunaiga o le a fesoasoani i korama a toeaina ma Aualofa e faaogatasi ai la latou galuega. O le a latou faafaigofieina ai foi le faamaopoopoga a le korama faatasi ma le au epikopo ma le aufono a le uarota. Ma ua mafai ai e le epikopo ona faasafua atu isi mau tiutetauave i le korama a toeaina ma peresitene o le Aualofa ina ia mafai ai ona taulai atu le epikopo ma ona fesoasoani i o latou tiute autu—aemaise ai le pulefaamalumalu i tamaitai talavou, ma alii talavou o loo umiaina le Perisitua Arona.

O suiga i faalapotopotoga ma galuega a le Ekalesia o se mea e masani ai. I le 1883, sa fetalai mai ai le Alii ia Peresitene Ioane Teila: “E tusa ai ma le pulega ma le faatulagaga o la’u Ekalesia ma le Perisitua … o le a ou faaali atu ia te outou, mai lea taimi i lea taimi, e ala i auala ua ou faatuina, o mea uma o le a tatau ai mo le atina’ega i le lumanai ma le faaatoatoaina o la’u Ekaleisa, mo le fetuunaiga ma le faataavaleina i luma o lo’u malo.”⁴

O ni nai upu ia te outou le usoga o faitaulaga sili—ia outou silafia matou te alolofa ia te outou! E alofa lo tatou Tama o i le Lagi ia te outou! O outou o se vaega tele o le autau a le au perisitua, ma e le mafai ona matou tuleia lenei galuega i luma e aunoa ma lo outou lelei, auaunaga, poto masani, ma le amiotonu. Na aoao mai e Alema e faapea ua valaauina alii e avea ma faitaulaga sili ona o lo latou faatuatua tele ma galuega lelei e aoao atu ma auauna atu ai i isi.⁵ O lena poto masani ua manaomia i le taimi nei masalo e sili atu nai lo se isi lava taimi.

I le tele o uarota, atonu o loo i ai ni faitaulaga sili o le a maua nei le avanoa e pulefaamalumalu ai se toeaina e fai ma o latou peresitene o le korama. O loo i ai se faataitaiga o toeaina o loo pulefaamalumalu i faitaulaga sili: o toeaina o loo galulue nei o ni peresitene o paranesi i nisi itulagi o le lalolagi i mea o nonofo ai faitaulaga sili i le paranesi, ma o loo i ai paranesi e na o se korama a toeaina ua faatulagaina ai ae o loo i ai ni faitaulaga sili.

E maeu le olioli o le a i ai mo Perisitua Mekisateko uma i le mauaina ai o le faamanuiaga o le aoao atu, aoao mai, ma le galulue soosoo tau’au ai ma tagata uma i a latou uarota. Po o fea lava o outou i ai ma po o a lava o outou tulaga o i ai, matou te valaaulia outou e talia ma le agaga tatalo, faatuatua, ma le fiafia ia avanoa fou e ta’ita’i ai pe ta’ita’ia ai foi ma auauna atu faatasi o se tino o le usoga o le perisitua.

O le a ou talanoa atu nei i isi mataupu, ia e ono manaomia se faamaninoga, a o tatou agai atu ai i luma e faatino le finagalo o le Alii e tusa ai ma le faatulagaga o Ana korama o le perisitua paia.

O a fetuunaiga mo se korama a faitaulaga sili i le siteki? O le a faaauau pea ona faagaoioi ia korama a faitaulaga sili a le siteki. O le a faaauau pea ona avea ia au peresitene o siteki ma au peresitene o le korama a faitaulaga sili a le siteki. Peitai, e pei ona ta’ua e Elder Christofferson, o uso o le korama a faitaulaga sili o le siteki o le a aofia ai faitaulaga sili o loo auauna i le taimi nei i le au peresitene o le siteki, o uso o le au epikopo o le uarota, o uso o le aufono a fautua maualuga o le siteki, ma le peteriaka o loo galue. O failautusi o siteki ma failautusi faapitoa e le o ni uso o le korama a faitaulaga sili o le siteki. A i ai se tasi o loo avea o se faitaulaga sili, peteriaka, Fitugafulu, po o se Aposetolo e asiasi i se uarota ma e manao e auai i se fonotaga a le au perisitua, o le a fono o ia ma le korama a toeaina.

A faamalolo uso nei mai nei valaauga i le taimi e tatau ai, o le a latou toe foi i o latou iunite masani o ni uso o le korama a toeaina.

O le a le a le matafaioi a le korama o faitaulaga sili a le siteki? E fono le au peresitene o le siteki ma uso o le korama a faitaulaga sili e fefautuaai faatasi, e femolimaua’i, ma tuuina atu aoaoga. O sauniga a le siteki e pei ona otooto atu i a tatou tusitaulima o le a faaauau pea faatasi ai ma fetuunaiga e lua:

Tasi, o le a le toe faia e uarota ma siteki ni fonotaga a komiti a taitai perisitua. Afai e tulai mai ni mataupu faapitoa a uarota, e pei o se mataupu maaleale faaleaiga po o se luitau faaleuelefea e le masani ai, e mafai ona taulimaina i se fonotaga faaumiumi a le au epikopo. O isi mataupu e le maaleale tele e mafai ona taulimaina i le aufono a le uarota. O le mea sa lauiloa o le fonotaga a le komiti a taitai perisitua a le siteki o le a faaigoaina nei o le “fonotaga a le au fono maualuga.”

Lua, o le fonotaga faaletausaga a faitaulaga sili uma ua faauuina i le siteki o le a le toe faia. Peitai, o le a faaauau pea e le au peresitene o le siteki ona faia se fonotaga faaletausaga a le korama a faitaulaga sili o le siteki e pei ona faasilasila atu ananei.

Pe mafai ona sili atu ma le tasi se korama a toeaina i se uarota? O le tali o le ioe. I le agaga o le Mataupu Faavae ma Feagaiga vaega 107, fuaiupu 89, a i ai i se uarota se aofaiga tele e le masani ai o tagata malolosi e umia le Perisitua Mekisateko, e mafai e taitai ona faatulaga le silia ma le tasi ia korama a toeaina. I tulaga faapena, e tatau i korama taitasi ona i ai se paleni talafeagai i tulaga o le matutua, poto masani, ma tofi ma le malosiaga o le perisitua.

Ou te molimau atu a o tatou agai i luma ma lenei toe faatulagaga musuia o korama i a tatou uarota ma siteki, o le a tatou vaai i se anoanoai o faamanuiaga. Se’i ou ta’ua ni nai faataitaiga.

I lalo o le taitaiga a le epikopo, o le a tele atu punaoa faaleperisitua e mafai ona fesoasoani i le galuega o le faaolataga. O le a aofia ai i lenei mea le faapotopotoina o Isaraelu e ala i le galuega o malumalu ma talafaasolopito o aiga, galulue faatasi ma aiga ma tagata taitoatasi o mafatia, ma fesoasoani i faifeautalai e aumaia agaga ia Iesu Keriso.

Pe a toe foi atu ia taitai na pulefaamalumalu talu ai e faasoa atu lo latou poto masani i le korama a toeaina, o le a tulai mai ai se auai malolosi i le korama.

O le a i ai se eseesega tele o meaalofa ma gafatia i totonu o le korama.

O le a tele atu ona faigofie fetuunaiga ma avanoa e taulima ai manaoga i le taimi nei ma manaoga faananati i totonu o le uarota ma korama, ma i le faataunuuina o tofitofiga eseese o le auaunaga.

O le a i ai se faatelega i le faufautua ma le autasi a o fefaasoaai e se toeaina fou ma se faitaulaga sili ua i ai le poto masani ia aafiaga, e tutu faatasi, i fonotaga ma tofitofiga a le korama.

E faamoemoe o le a faasaoloto mai ia epikopo ma peresitene o paranesi e faalautele o latou valaauga e leoleo a latou lafu mamoe ma auauna atu i e e manaomia le fesoasoani.

Matou te malamalama e eseese uarota ma siteki taitasi. I le malamalama ai i nei eseesega, matou te faamoemoe o le a outou mulimuli ai loa lava i nei suiga pe a maea lenei konafesi aoao. Ua uma ona tuuina mai faatonuga e se perofeta a le Atua. Oka se faamanuiaga ma se tiutetauave ina a maoae. Ia tatou faataunuuina ma le amiotonu uma ma le filiga!

Ou te faamanatu atu ia te outou o le pule o le perisitua e maua mai i le vaetofiaina ma le faauuina, ae o le mana moni o le perisitua, le mana e galulue ai i le suafa o le Alii o Iesu Keriso, e na o le ola amiotonu lava e mafai ona maua ai.

Na tautino atu e le Alii ia Iosefa Samita, le perofeta o le Toefuataiga:

“Faauta, ma tagai, o le a Ou tausia a outou lafu, ma o le a Ou faatutu mai toeaina ma auina atu ia te i latou.

“Faauta, o le a Ou faanatinatiina laʼu galuega i lona taimi.”⁶

Ioe, o se vaitaimi lenei ua faanatinatiina ai e le Alii Lana galuega.

Ia tatou faaaogaina lenei avanoa e toe manatunatu ai ma faaleleia o tatou olaga ia ogatasi atili ma Lona finagalo ina ia mafai ai ona tatou maua o faamanuiaga e tele ua Ia folafola mai i e faamaoni ma faatuatua.

Uso e, faafetai atu mo mea uma o loo outou faia e avea ai o se vaega o lenei galuega ofoofogia. Ou te faamoemoe o le a tatou agai i luma i lenei galuega tele ma le mamalu.

O le aso ua tatou tutu uma ai o ni molimau a le Alii a o faaali mai Lona finagalo e ala mai i Lana perofeta, o Peresitene Russell M. Nelson. Ou te molimau atu o ia o le perofeta a le Atua i le lalolagi nei. Ou te tuu atu la’u molimau o le Alii o Iesu Keriso, o lo tatou Togiola sili ma le Faaola. O Lana galuega lenei; o Lona finagalo lenei, lea ou te tuu atu ai la’u molimau paia i le suafa o Iesu Keriso, amene.