O Le Loto o se Perofeta
E mafai ona tatou olioli ua i ai nei le fofoga taumomoli o le Alii, ma ua faia Lana galuega i le ala na Ia faatonuina ai mai le lagi.
Sa ou tatalo faatauanau talu ai nei ia faatasi le Agaga Paia ma i tatou taitoatasi i le aso i lenei sauniga faalelagi. O le mea ua tatou molimauina faatasi e maeu le faagaeetia loto a o lagolagoina le perofeta lona 17 o lenei tisipenisione i le potopotoga paia.
A o ou saili atu ia iloa le autu e finagalo le Alii ou te tautalagia i le aso, sa taitai lo’u mafaufau i se talanoaga talu ai nei ma le Au Peresitene Sili sa faatoa valaauina. I lea talanoaga, sa faasoa mai ai e se tasi o fesoasoani ni upu e foliga faapea: “Ou te matua faamoemoe moni lava ia mafai ona malamalama le faitau aofai o le Ekalesia i le maoae o le mea ua tupu i le valaauina o lo tatou perofeta fou, Peresitene Russell M. Nelson, ma le iloga ma le paia o le potopotoga paia o le a tupu i le konafesi aoao.” Na ia toe matauina, “Ua 10 tausaga, ma e toatele, aemaise o le autalavou a le Ekalesia e le manatua pe e lei vaai foi i lenei mea muamua.
Ua afua ai i lea mea ona ou toe manatunatu i ni aafiaga sa ou maua. O le perofeta muamua ou te manatua o Peresitene Tavita O. MaKei. Sa 14 o’u tausaga ina ua maliu o ia. Ou te manatuaina se lagona o le misia na aumaia e lona maliu ma loimata i mata o lo’u tina, ma le faanoanoa sa lagonaina e lo matou aiga atoa. Ou te manatuaina upu “Faamolemole faamanuia Peresitene Tavita O. MaKei” o pa’u mai fua mai lava i o’u laugutu i a’u tatalo e faapei ou te le o manatu i ai, e oo lava ina ua mavae lona maliu, e otometi lava ona ou faia o na upu.Sa ou le mautinoa pe na i ai lava na lagona ma le talitonuga maumaututu i lo’u mafaufau ma le loto mo perofeta na sosoo mai ma ia. Ae e totoe lava ina pei o matua o e e alolofa i a la fanau taitoatasi, sa ou iloaina se alofa mo, piitaga ma, ma se molimau ia Peresitene Iosefa Filitia Samita, o le sa sosoo ma Peresitene MaKei, ma mo perofeta taitasi mulimuli ane ai: Harold B. Lee, Spencer W. Kimball, Ezra Taft Benson, Howard W. Hunter, Gordon B. Hinckley, Thomas S. Monson, ma i le aso, o Peresitene Russell M. Nelson. Ou te lagolagoina ma lo’u loto atoa ia perofeta taitoatasi ma se lima ua sii i luga—ma se loto ua faagaeetia.
A o taitasi ma maliliu a tatou perofeta pele, o se masani lava le lagona o le faanoanoa ma le aveesea. Peitai e faapaleni lo tatou faanoanoa e le olioli ma le faamoemoe e oo mai a o tatou vaaia se tasi o faamanuiaga sili o le Toefuataiga: i le valaauina ma le lagolagoina o se perofeta soifua i le fogaeleele.
Ona o lena le mafuaaga, o le a ou tautala atu ai i lenei faagasologa paia e sosoo mai ai i nei aso e 90 ua tuanai atu nei. O le a ou faamatala atu i ni vaega se fa: muamua, o le maliu o lo tatou perofeta pele ma le soloia o le Au Peresitene Sili; lona lua, o le vaitau e faatalitali ai i le toefaatulagaga o le Au Peresitene Sili fou; lona tolu, o le valaauina o le perofeta fou; ma le lona fa, o le lagolagoina o le perofeta fou ma le Au Peresitene Sili i le potopotoga paia.
O Le Maliu o se Perofeta
Tatou te amata i le aso 2 Ianuari, 2018, ina ua pasi atu lo tatou perofeta pele o Thomas S. Monson i le isi itu o le veli. O le a faavavau pea ona i ai sona nofoaga i o tatou loto. Sa ofo mai e Peresitene Henry B.Eyring ni mafaufauga i le maliu o Peresitene Monson sa faamatala atoatoa lelei ai o tatou lagona: “O le uiga iloga o lona soifua, e faapei o le Faaola, o lona lava popolega patino e aapa atu i e matitiva, o e mama’i—e oo lava i tagata taitoatasi uma—i le lalolagi atoa.”1
Sa faamatala mai e Peresitene Spencer W. Kimball:
“A o goto atu se tasi fetu i tua atu o le tafailagi, ona toe vaaia foi lea o se isi, ma o le oti e faapogai mai ai le ola.
“E le uma le galuega a le Alii. E tusa lava pe maliu se taitai malosi, e leai ma se taimi se tasi e aunoa ai le Ekalesia ma ni tulaga faaleautaitai, e faafetai ai i le finagalo agalelei o le Atua o le na tuuina mai lona malo ia faaauauina ma ia faavavau. E pei lava ona tupu ai … muamua i lenei tisipenisione, e tapunia ai ma le faaaloalo e tagata se tuugamau, soloi o latou loimata, ma liliu atu o latou fofoga i le lumanai.”2
O Le Vāinofoa’iga Faaaposetolo
O le vaitau i le va o le maliu o se perofeta filifilia ma le toe faatulagaina o le Au Peresitene Sili ua faasino i ai o se “vāinofoa’iga faaaposetolo.” I le taimi o lea vaitau, o le Korama a Aposetolo e Toasefululua, i lalo o le taitaiga a le peresitene o le korama, e umia faatasi ia ki e faatautaia ai le taitaia o le Ekalesia. O le talanoa ai e uiga i lenei mea, sa saunoa ai Peresitene Iosefa F. Samita, “E i ai lava le ao o le Ekalesia, ma afai ua aveeseina le Au Peresitene o le Ekalesia ona o le maliu po o nisi o mafuaaga, o le ao e sosoo ai o le Ekalesia o Aposetolo e Toasefululua, seia oo ina toe faatulaga se au peresitene.”3
Na amata le vaitau o le vāinofoa’iga sili ona lata mai ina ua maliu Peresitene Monson i le aso 2 Ianuari ma faamutaina i le 12 aso mulimuli ane i le aso Sa, 14 Ianuari. I le taeao o lena Aso Sapati, sa fono ai le Korama a le Toasefululua i le afeafe i luga o le Malumalu o Sate Leki i se agaga o le anapogi ma le tatalo, i lalo o le taitaiga faapulefaamalumalu a Peresitene Russell M. Nelson, o le Aposetolo sinia ma le Peresitene o le Korama a le Toasefululua.
Valaauina o se Perofeta Fou
I lenei fonotaga paia ma lemafaagaloina, sa alaala ai i nofoa e 13 i le faasologa sinia i le afali’o, na sosoo ma se mamanu mautu lelei, i le lotogatasi ma le autasi, sa muamua sii ae ai aao o le Usoga e lagolagoina le faatulagaga o le Au Peresitene Sili ona lagolago ai lea o Peresitene Russell Marion Nelson o le Peresitene o Le Ekalesia a Iesu Keriso o le Au Paia o Aso e Gata Ai. Na sosoo lenei lagolagoina i le potopoto ai o le Aufono o le Toasefululua i se li’o faatasi ma lima na faaee atu i luga o le ao o Peresitene Nelson, e faauu ma vaetofia o ia, a o avea le Aposetolo sinia na sosoo ai ma fofoga.
Ona faailoa mai lea e Peresitene Nelson ona fesoasoani, o Peresitene Dallin Harris Oaks, Peresitene Henry Bennion Eyring, faatasi ai ma Peresitene Oaks o le Peresitene o le Korama a Aposetolo e Toasefululua ma Peresitene Melvin Russell Ballard o le Sui Peresitene o le Korama a Aposetolo e Toasefululua. Mulimuli ai i palota lagolago e talitutusa, sa vaetofia nei Uso taitoatasi i o latou tofi faapitoa e Peresitene Nelson. O se aafiaga loloto paia lenei, faatasi ai ma se faatelega naua o le Agaga na auai ai. Ou te tuu atu ia te outou la’u molimau mautu, o le finagalo o le Alii, lea tatou te tatalo ai ma le faatauanau, sa faaalia ma le mamana i gaoioiga ma mea na tutupu i lena aso.
Faatasi ai ma le faauuga o Peresitene Nelson ma le toefaatulagaina o le Au Peresitene Sili, sa faamuta ai le vāinofoa’iga faaaposetolo, ma i se tulaga ofoofogia, sa amata e le Au Peresitene Sili sa faatoa faatulaga ona galulue e aunoa ma se faalavelavea e oo lava i se sekone, i le puleaina o le malo o le Atua i le lalolagi.
Potopotoga Paia
O le taeao nei, ua taualuga ai le faagasologa paia e tusa ai ma le poloaiga faatusi paia ua otootoina i le Mataupu Faavae ma Feagaiga: “Aua e ao ina faia mea uma i le faatulagaga tatau, ma i le finagalo autasi o le ekalesia, e ala i le tatalo o le faatuatua,”4 ma “e toatolu Faitaulaga Sili Pulefaamalumalu, … e lagolagoina e le talitonuga, faatuatua, ma tatalo a le ekalesia, e faia ai se korama o le Au Peresitene o le Ekalesia.”5
Sa faamatala e Elder David B. Haight se mea na tupu talu ai o le mea ua tatou auai ai i le aso:
“O i tatou o molimau ma tagata ua auai i se faamoemoega paia—o se potopotoga paia e faataunuu mea faalelagi. E pei foi o aso anamua, sa faia e le Au Paia i le lalolagi atoa ni anapogi ma ni talosaga e tele ina ia mafai ona latou maua le liligiina mai o le Agaga o le Alii, lea ua matuai molimauina iinei i lenei faamoemoe i lenei taeao.
“O se alofi sa, e pei ona ta’ua i le igoa, o se faailoga o se fuafuaga paia, mamalu, ma le migao, lea e faapotopoto ai le Au Paia i lalo o le taitaiga a le Au Peresitene Sili.”6
Uso e ma tuafafine, e mafai ona tatou olioli—tusa lava pe alalaga, “Osana!”—ua i ai nei le fofoga taumomoli o le Alii, o se perofeta a le Atua, ma ua fiafia le Alii ua faia Lana galuega i le ala na Ia faatonuina ai mai le lagi.
Peresitene Russell M. Nelson
O lenei faagasologa faalelagi ua taitai atu i se isi perofeta ua valaauina mai le lagi. E pei foi ona avea Peresitene Monson ma se tasi o tamalii silisili ua soifua i lenei lalolagi, e faapena foi ia Peresitene Nelson. Sa matua saunia lelei o ia ma aoaoina patino e le Alii e taitaia i tatou i lenei taimi. Oka se faamanuiaga ina a maoae ua tatou maua i le avea ai nei o le pele o Peresitene Russell M. Nelson ma o tatou perofeta alofagia ma le tuuto—le Peresitene lona 17 o le Ekalesia i lenei tisipenisione faaiu.
O Peresitene Nelson o se tamaalii ofoofogia moni lava. Ua ou maua le avanoa e auauna ai i le Korama a le Toasefululua faatasi ma ia o lo’u peresitene o le korama mo le silia ma le lua tausaga. Sa ou malaga faatasi ma ia ma maofa i lona malosi, aua e tatau ona vave le gaoioi a se tasi e maua ai lona saoasaoa! I se tauaofai, ua ia asia atunuu e 133 i lona soifuaga.
E aapa atu o ia i tagata uma, talavou ma matutua. E foliga mai na te silafia tagata uma ma e faapitoa le faameaalofaina i le manatuaina o o latou igoa. O i latou uma e iloa o ia, ua lagona o i latou o ni e e pele ia te ia. Ma e faapena mo i tatou taitoatasi—ona o lona alofa faamaoni ma le manatu mo tagata uma.
E ui o au fegalegaleaiga ma Peresitene Nelson e tupu i totonu o matafaioi faaleekalesia, ae ua ou masani lelei ai foi i le olaga faalematata na taulamua ai Peresitene Nelson a o lei valaauina o ia o se Pulega Aoao. E pei ona silafia e le toatele o outou, o Peresitene Nelson o se fomai tipitipi o le fatu ua lauiloa i le lalolagi ma, i le popofou o lana matata faafomai, o ia o se uluai tagata na amataina le masini mo fatu--ma mama. Sa i ai foi o ia i le ‘au sailiili lea sa lagolagoina le taotoga muamua o le fatu na faia i se tagata soifua, i le 1951, e faaaoga ai se masini o le fatu ma le mama.Sa faatino e Peresitene Nelson se taotoga o le fatu mo Peresitene Spencer W. Kimball ae lei leva talu ona avea Peresitene Kimball ma perofeta.
E maeu, ina ua valaauina Peresitene Nelson i le Toasefululua i le 34 tausaga talu ai, sa faamutaina ai se matata faafomai faapolofesa o le faamalolosia ma le faaleleia o fatu, na amata ai se auaunaga i le avea ai ma se Aposetolo na tuuto atu i le faamalolosia ma le faaleleia o loto e le mafaitaulia o le faitau sefulu o afe i le lalolagi atoa, na siitia taitoatasi ma faamaloloina e ala i ana upu ma faatinoga o le poto, auaunaga, ma le alofa.
O Se Loto Faa-Keriso
Pe a ou vaaia se loto faaKeriso i faaaoaoga i aso taitasi, ou te vaai ia Peresitene Nelson. Ou te lei feiloai lava i se tasi e faataitaia lenei taitaiga i se tulaga maualuga atu nai lo ia. O se aoaoga ofoofogia mo au le i ai i le tulaga e matau ai e au lava ia faaaliga o le loto faaKeriso o Peresitene Nelson.
I totonu o vaiaso o lou valaauga i le Toasefululua ia Oketopa 2015, sa ou maua le avanoa e maua ai se vaaiga lata mai o le olaga faapolofesa ua tuanai a Peresitene Nelson.Sa valaaulia au e auai i se gaoioiga lea sa faamamaluina ai o ia o se paionia o taotoga o le fatu.Ina ua ou ulu atu i le maota, sa ou maofa i le vaaia o se aofaiga toatele o le au polofesa iina e faamamaluina ma aloaia le galuega sa faia e Peresitene Nelson i le tele o tausaga ua mavae.
O lena afiafi, e toatele tagata tomai na tutu ma faaalia lo latou faaaloalo ma le faamemelo mo le sao maoae a Peresitene Nelson i lona tomai faafomai. E pei ona faagaeetia ai tagata taitasi na saunoa i lena po i le faamatalaina o ausiaga eseese a Peresitene Nelson, sa ou maofa atili i se talanoaga na taia ai au ma se alii na nofo i ou talaane. Sa ia lei iloaina po o ai au, ae sa ia iloa Peresitene Nelson, i le taimi lena o Dr. Nelson, le faatonusili o le polokalama o le thoracic residency surgery i se aoga faafomai i le 1955.
O lea alii o se tasi o tamaiti na aoga ia Peresitene Nelson. Sa tele ni manatuaga na ia faasoa mai. O le mea sa sili ona mataina ia te au o lana faamatalaga e uiga i le sitaili faafaiaoga a Peresitene Nelson, lea, na ia fai mai ai, na aumaia ai se fuataga tele o lona lauiloa. Sa ia faamatala mai o le tele o aoaoga e uiga i taotoga o le fatu sa faia i le potu tipitipi. O iina, sa matauina ai ma faatino ia taotoga e fomai tau amata i lalo o le vaavaaiga a le aufaigaluega, o se potuaoga suesue. Na ia fai mai o le siosiomaga o le potu tipitipi i lalo o ni fomai tipitipi patino e gaogaosa, e faatautava, e tumu i atuatuvalega, e faasausili. Sa ia faamatalaina o se siosiomaga faigata, o nisi taimi e faamamasagia. E tele taimi, e lagona ai lava e fomai tau amata o le a fuaina la latou matata i mea e tutupu.
Ona ia faamatalaina lea o le siosiomaga tulagaese i le potu tipitipi o Peresitene Nelson. E toafilemu, e mafanafana, ma e malualii. Sa taulimaina fomai tau amata ma le faaaloalo loloto. Peitai, a maea le faataitaiga o se faagasologa, sa faamoemoeina e Dr. Nelson le faatinoga i le tulaga aupito sili ona maualuga mai fomai tau amata taitasi. Sa faamatala atili e lenei alii taunuuga silisili o ma’i ma fomai tipitipi silisili na o mai mai le potu o taotoga a Dr. Nelson.
E le o se mea ou te maofa ai lava. O le mea lea ua ou matauina e au lava ia, ma ua faamanuiaina ai i le Korama a le Toasefululua. I se faalogoga, e pei o au o se tasi o ana “fomai tau amata o loo ia aoaoina.”
O Peresitene Nelson e i ai sana auala tulaga ese o le aoaoina o isi ma tuu atu i ai se faasa’oga i se uiga lelei, faaaloalo, ma le faagaeetia. O ia o le tino mai o le loto faaKeriso ma o se faataitaiga mo i tatou uma. Mai ia te ia, ua tatou aoao ai i soo se tulaga tatou te i ai, e mafai ona ogatusa a tatou amio ma loto ma mataupu faavae o le talalelei a Iesu Keriso.
Ua tatou maua nei le faamanuiaga silisili e lagolago la tatou perofeta, o Peresitene Russell M. Nelson. I lona soifuaga atoa, sa ia faalautele ana matafaioi e tele o se tagata aoga, tama, polofesa, tane, fomai, taitai perisitua, tamamatua, ma Aposetolo. Sa ia faataunuuina nei matafaioi ona—faaauau ai lea—faatasi ai ma se loto o se perofeta.
Uso e ma tuafafine, o le mea ua tatou molimauina ma auai ai i le asō, o se faapotopotoga paia, ua taitai atu i la’u molimau o Peresitene Russell M. Nelson o le fofoga soifua o le Alii mo tagata uma. Ou te faaopoopo atu foi la’u molimau i le Atua le Tama, ia Iesu Keriso ma i Lana matafaioi i le avea ai ma o tatou Faaola ma Togiola. I le suafa, o Iesu Keriso, amene.