A o Lē Tumau seia oo i le Gataaga, e Faaolaina Lea

Uso e ma tuafafine pele, ou te matuai faafetai tele i le avanoa e faailoa atu ai ia te outou nisi o o’u lagona.

I nai tausaga ua mavae, sa ma auai ai ma lo’u toalua i le sauniga amata o le faaaliga fefaasoaai a tamaiti i le Falemataaga o Talafaasolopito o le Ekalesia i le Aai o Sate Leki. I le faaiuga o le sauniga, sa savali agai mai Peresitene Thomas S. Monson ia i maua, ma ao ia faatalofa mai, sa ia saunoa mai, “Tumau ai, ma o le a oulua manuia ai”—e moni, o se aoaoga loloto ma o se upumoni, e mafai ona tatou faamaonia uma.

Sa faamautinoa mai e Iesu Keriso i tatou e faapea “a o lē tumau seia oo i le gataaga, e faaolaina o ia.”¹

O le tumau o lona uiga “o le tumau mausali i se tautinoga ia faamaoni i poloaiga a le Atua e tusa lava pe oo mai faaosoosoga, tulaga faafeagai, ma puapuaga.”²

E oo foi ia i latou o e na maua ni aafiaga mamana faaleagaga ma na tuuina atu auaunaga faamaoni, e mafai ona i ai se aso e se ese ai pe le toaaga ai pe afai latou te le tumau seia oo i le iuga. Tau ina ia tatou tausia i taimi uma ma le malosi i o tatou mafaufau ma loto le fuaitau “E le tupu lea mea ia te au.”

Ao aoao atu Iesu Keriso i Kapanaumi, “[sa] o ese isi o ona soo e toatele i tua, a e lei toe feoai i latou ma ia.

“Ona faapea atu lea o Iesu i le toasefulu ma le toalua, Pe tou te fia o ese foi?”³

Ou te talitonu i lena mea i le aso, ua fesili mai Iesu Keriso ia i tatou uma o e na osia ni feagaiga paia ma Ia “Pe tou te fia o ese foi?”

Ou te tatalo ina ia tatou tali uma atu ma le manatunatu loloto e uiga i mea o i ai i le faavavau mo i tatou, e pei ona faia e Simona Peteru: “Le Alii e, a matou o ea ia te ai? o ia te oe upu o le ola e faavavau.”⁴

Ia tatou faamaoni i mea ua tatou talitonu i ai ma iloaina. Afai tatou te le o ola ai e tusa ma lo tatou malamalama, ia tatou sui.O tagata agasala o e tausisi pea i a latou agasala, ma e le salamo, e magoto maualalo ifo i totonu o tulaga eleelea, seia maua i latou e Satani, ma matuai lamatia ai lo latou avanoa e salamo ai, ina ia faamagaloina, ma ia faamanuiaina i faamanuiaga uma o le faavavau.

Ua ou faalogo i le tele o faamatalaga mai ia i latou o e na taofi le auai malosi i le Ekalesia ma ua leiloa le vaaiga sa’o o le faamoemoega o le latou faigamalaga i lenei lalolagi. Ou te apoapoai atu ia i latou e mafaufau ma toe foi mai, aua ou te talitonu e leai se tasi e mafai ona faia ni ‘alofaga i luma o lo tatou Alii, o Iesu Keriso.

Ina ua papatisoina i tatou, na tatou osia ni feagaiga—e le ma soo se tagata ae ma le Faaola, ma ioeina e “ave i o [tatou] luga le suafa o Iesu Keriso, ua i ai se naunautai e auauna atu ia te ia e oo i le iuga.”⁵

O le auai i sauniga faamanatuga o se tasi lea o auala taua e mafai ai ona tatou iloiloina la tatou naunautaiga e auauna atu ia te Ia, o la tatou malosiaga faaleagaga, ma le tuputupu ae o la tatou faatuatua ia Iesu Keriso.

O le inu ma aai i le faamanatuga o le mea aupito sili ona taua tatou te faia i le aso Sapati. Sa faamatala atu e le Alii lenei sauniga i Ana Aposetolo a o lei maliu o Ia. Sa Ia faia le mea e tasi i le konitineta o Amerika. Sa Ia tau mai ia i tatou a tatou auai i lenei sauniga, o le a avea o se molimau i le Tama faapea o le a tatou manatua pea o Ia, ma ua Ia folafola mai e tusa ai, o le a tatou maua Lona Agaga e faatasi ma i tatou.⁶

I aoaoga a Alema le Itiiti i lona atalii o Sepulona, tatou te maua ai le fautuaga atamai ma lapataiga lea e fesoasoani ia i tatou ia tumau faamaoni ai i a tatou feagaiga.

“Vaai ia aua neʼi faafefeteina oe i luga i le faamaualuga; ioe, vaai ia aua neʼi e mitamitavale i lou lava poto, po o lou malosi tele.

“Faaaoga le lotoa, ae le o le faafiamalosi; ma vaai foi ia pulea ou tuinanau uma, ina ia mafai ona faatumuina oe i le alofa; vaai ia e aloese mai le faapaie.”⁷

I nai tausaga ua mavae, ao ave ni aso malolo, sa ou manao ai e alu e alovaa mo le taimi muamua. Sa ou totogia se vaa alo, ma i le faatumulia ai i le naunautai, sa ou agai atu loa i le sami.

I le mavae ai o ni nai minute, sa lafotu ai e se galu le vaa. Ma se taumafaiga sili, i le uuina o le foe i le isi lima ma le vaa i le isi lima, sa mafai ona ou toe tu lelei.

Sa ou toe taumafai e alo lau vaa, ae i ni nai minute mulimuli ane, na toe sa’e foi le vaa. Sa ou faaulumalo ma toe taumafai pea, i le le manuia ai, seia oo ina tau mai e se tasi e malamalama i le alovaa ia te au masalo o i ai se ta’e [crack] i le tino [o le vaa] ma masalo ua faatumulia le vaa i le vai, na le paleni ai ma le mafai ai ona faasagatonu. Sa ou tosoina le vaa i le matafaga ma aveese le palaka, ma e moni lava, sa sau i fafo le tele o le vai.

Ou te manatu o nisi taimi tatou te faagasolo ai i le olaga ma agasala lea, e pei o le ta’e i la’u vaa alo, ma taofia ai lo tatou alualu i luma faaleagaga.

A tatou faaauau pea i a tatou agasala, tatou te faagaloina feagaiga na tatou osia ma le Alii, e ui e fai ma tatou sa’e ona o le le paleni lea e faia e na agasala i o tatou olaga.

E pei o ta’eta’ei [cracks] i la’u vaa, e tatau ona taulimaina ta’eta’ei [cracks] i o tatou olaga. O nisi agasala o le a manaomia le tele o taumafaiga i lo isi [agasala] e salamo ai.

O lea e tatau ai ona tatou fesili ifo ia i tatou lava: O fea o tatou i ai e tusa ai ma la tatou amio agai i le Faaola ma Lana galuega? O tatou i ai ea i le tulaga o Peteru ina ua ia teenaina Iesu Keriso? Pe ua tatou agai i luma i le tulaga lea sa ia maua ai le amio ma le naunautaiga i le mavae ai o le poloaiga sili na ia maua mai le Faaola?⁸

E tatau ona tatou taumafai ia usiusitai i poloaiga uma ma gauai lelei atu i [poloaiga] ia e sili ona faigata mo i tatou ona tausia. O le a i ai le Alii i o tatou autafa, e fesoasoani ia i tatou i taimi e manaomia ai ma vaivai ai, ma a tatou faatinoina se manao faamaoni ma galue e tusa ai, o le a Ia faia “mea vaivai ia avea ma mea malolosi.”⁹

O le a aumai e le usiusitai le malosi ia i tatou e faatoilalo ai le agasala. E tatau foi ona tatou malamalama o le tofotofoga o lo tatou faatuatua e manaomia ai lo tatou usiusitai, e masani lava e aunoa ma le iloaina o taunuuga.

Ou te fautuaina atu se mamanu o le a fesoasoani ia i tatou e tumau ai e oo i le iuga:

1. Tatalo ma faitau tusitusiga paia i aso uma.

2. Aai ma feinu i le faamanatuga faatasi ai ma se loto momomo ma se agaga salamo i vaiaso uma.

3. Totogi a tatou sefuluai ma a tatou taulaga anapogi i masina uma.

4. Ia tai lua tausaga ma faafou a tatou pepa faataga o le malumalu—o tausaga taitasi mo le autalavou—.

5. Auauna atu i le galuega a le Alii i o tatou olaga atoa.

Tau ina ia faatumauina i o tatou mafaufau ia upumoni maoae o le talalelei, ma ia tatou tausia o tatou olaga ia saoloto mai ta’eta’ei [cracks] lea e mafai ona taofia la tatou malaga saogalemu i le vasa o lenei olaga.

O le manuia i le ala a le alii e i ai se tau, ma e na o le pau le auala e ausia ai o le totogiina lea o lena tau.

Ou te faafetai sa tumau lo tatou Faaola seia oo i le iuga, e faataunuu Lana taulaga togiola maoae.

Sa ia puapuagatia mo a tatou agasala, tiga, faanoanoa, mafatiaga, vaivaiga, ma le fefe, ma ua Ia silafia le auala e fesoasoani mai ai ia i tatou, le auala e uunaia ai i tatou, le auala e faamafanafana ai i tatou, ma le auala e faamalosia ai i tatou ina ia mafai ona tatou tumau ai ma maua le pale lea ua faapolopolo mo i latou e lē faatoilaloina.

E eseese le olaga mo i tatou taitoatasi. E tofu i tatou uma ma se taimi e tofotofoina ai, se taimi mo le fiafia, se taimi mo le faia o faaiuga, se taimi mo le faatoilaloina o faalavefau, ma se taimi mo le faaaogaina o avanoa.

Po o le a lava o tatou tulaga faaletagata o i ai, ou te molimau atu o loo fetalai mai pea lo tatou Tama Faalelagi, “Ou te alofa ia te oe.” Ou te lagolagoina oe. Ou te faatasi ma oe. Aua le fiugofie. Salamo ma tumau i le ala ua ou faaali atu ia te oe. Ma ou te faamautinoa atu ia te oe o le a tatou toe vaai i le tasi ma le isi i lo tatou aiga selesitila.” I le suafa, o Iesu Keriso, amene.