Jerbal in Karejar kōn Kajoor im Maron̄ an Anij
Jenaaj karejar ilo Etan, kōn kajoor im maron̄ eo An, im kōn An iakwe im jouj.
Em̧m̧aan ro aō rejitōn bōro, kom̧ em̧ool kōn ami wūjlepļo̧k kom̧ n̄an Irooj im jerbal in An ekwojarjar. Em̧ool ij lan̄lōn̄ in pād ippem̧i. Āinwōt juon Būreejtōnji Ekāāl, jej kam̧m̧oolol kom̧ kōn jar ko ami im kōn rejtake ko ami. Kōm̧ij kam̧m̧oolol kōn mour ko ami im kōn jerbal ko ami n̄an Irooj. Ami wūjlepļo̧k n̄an eddo im jerbal in jipan̄ eo ami rej barāinwōt aorōk ilo kūr ko ami barāinwōt ilo kūr ko am. Jān juon jerbal in jipan̄ aolepān aō mour ilo Kabun̄ in, ikar ekkatak bwe ejjab lukkuun aorōk ia eo juon ej jerbal ie. Ta eo Irooj ej kea kake ej Ewi wāween an juon jerbal.
Ij kwaļo̧k aō kam̧m̧oolol em̧ilaļ jān būruwō kōn Būreejtōn Thomas S. Monson, eo ekar juon waanjon̄ak n̄an n̄a elōn̄ļo̧k jān 50 iiō ko. Im n̄an rikakpilōklōk ro an, Būreejtōn Henry B. Eyring im Būreejtōn Dieter F. Uchtdorf, Ij kwaļo̧k aō kautiej eļap. Ij nōbar er kōn jerbal eo aer n̄an Irooj im rikanaan ro An. Rikarejar rein jim̧or rewūjlepļo̧k rekar bōk jerbal ko rekāāl. Rej wōnm̧aanļo̧k im jerbal kōn kajoor im kallim̧ur. Ij kautiej im iakwe erro jim̧or.
Ej juon kōjeraam̧m̧an ekabwilōn̄lōn̄ n̄an jerbal ilo Kabun̄ eo em̧ool im emour an Irooj kōn maron̄ im kajoor eo An. Jepļaaktok in priesthood eo an Anij, ekoba kii ko an priesthood eo, eppeļļo̧k n̄an Armej ro Rekwojarjar rerreo me rej eļļaptata an aolep kōjeraam̧m̧an ko an jetōb. Jej loe kōjeraam̧m̧an kein aer ibebtok n̄an kōrā ro, em̧m̧aan ro, im ajri ro ipeļaakin laļ in.
Jej loe kōrā ro retōmak im meļeļe kōn kajoor eo ejjab jenolo̧k jān kūr ko aer im menin letok kwojarjar eo aer im kain̄i ko jet an tampeļ eo. Kōrā rein rejeļā wāween eo aer kūr ioon kajoor ko an lan̄ n̄an kōjparok im kōkajoorļo̧k ļōm̧aro pāleer, ajri ro nejier, im ro jet rej iakwe er. Kōrā rein rekajoor ilo jetōb rej tōl, katakin, im jab mijak in karejar ilo kūr ko aer kōn kajoor im maron̄ eo an Anij!1 Ewi jon̄an aō kam̧m̧ool kōn er!
Barāinwōt, jej lo em̧m̧aan ro retōmak rej mour erreo kōn kōjeraam̧m̧an ko emaron̄ aer āinwōt rikabwijer priesthood ro. Rej tōl im jerbal jān kaarmejete ilo wāween eo an Irooj kōn iakwe, jouj, im kijenmej. Rej kōjeraam̧m̧an, tōl, kōjparok, im kōkajoorļo̧k ro jet kōn kajoor eo an priesthood eo rej kabwijere. Rej bōktok kabwilōn̄lōn̄ ko n̄an ro rej jerbal n̄an er im kōjparok wōt m̧are ko aer im baam̧le ko aer. Rej dike men eo enana im rej elder ro rekajoor an Israel.2 Eļap aō kam̧m̧oolol kōn er!
Kiiō, imaron̄ ke kwaļo̧k juon ainikien inepata? En̄in bwe: Elōn̄ m̧aan ro jeid im jatid rejjab lukkuun meļeļe meļeļein kajoor im maron̄ eo an priesthood eo. Rej m̧akūtkūt āinwōt aer ļōmņak renaaj kar ijjelo̧kin kaju būrweer make kōn kōņaan ko aer make im m̧ōn̄ā ijjelo̧kin kōjerbal kajoor eo an Anij n̄an kōjeraam̧m̧an ajri ro Nejin.
Ij mijak bwe elōn̄ wōt iaan m̧aan im kōrā ro jeid im jatid rejjab meļeļe kōjeraam̧m̧an ko me emaron̄ erom̧ aer.3 Jet iaan em̧m̧aan ro jeid im jatid rejitōn bōro, n̄an waanjon̄ak, rej m̧akūtkūt āinwōt rejjab meļeļe ta priesthood eo im ta eo emaron̄ kōmaron̄ er n̄an kōm̧m̧ane. In lewaj jet waanjon̄ak ko.
Jet iien remootļo̧k, ikar etal n̄an juon kweilo̧k in kwojkwoj eo me juon nin̄nin̄ kar tōn leļo̧k juon et n̄an e im juon kōjeraam̧m̧an an jemān. Likao in jemān ekar jibwe nin̄nin̄ in eaiboojoj ilo pein, leļo̧k n̄an e juon et, innām leļo̧k n̄an e juon jar eaiboojoj. Bōtaab ekar jab leļo̧k n̄an ajri in juon kōjeraam̧m̧an. Nin̄nin̄ eo em̧m̧an ekar bōk juon et ak ejjeļo̧k kōjeraam̧m̧an. Elder in ekar jab jeļā oktak eo ikōtaan juon jar im juon kōjeraam̧m̧an an priesthood. Kōn maron̄ in priesthood im kajoor eo an, emaron̄ kar kōjeraam̧m̧an nin̄nin̄ eo, ak ekar jab. Ikar ļōmņak, “Eluuji juon iien em̧m̧an n̄an bōk kōjeraam̧m̧an!”
In kwaļo̧k bar jet waanjon̄ak ko. Jej jeļā kōn jet m̧aan ro rejitōn bōro ro rekar kōjenolo̧k jet kōrā jeid im jatid āinwōt ritōl im rūkaki ro an Būraimere, Doulul eo an Jiron̄ ro, ak Doulul eo an Kōrā ro ak rekar likjab in kōjeraam̧m̧an er—n̄an kōjeraam̧m̧an er kōn kajoor n̄an kakūrm̧ool kūr ko aer. Rej leļo̧k wōt rōjan̄ im kōmeļeļe ko. Jej loe an juon jemān eo erreo ej likjab in leļo̧k n̄an kōrā eo pāleen im ajri ro nejin kōjeraam̧m̧an ko an priesthood n̄e ej ta eo ejjejet n̄an ta aikuj eo aer. Kajoor eo an priesthood em̧ōj an jepļaaktok n̄an laļ in, im aaet elōn̄ wōt em̧m̧aan ro im kōrā ro rej jelm̧ae kapo ko renana ilo aer jab bōk juon kōjeraam̧m̧an an priesthood. Juon men ekabūrom̧ōjm̧ōj! En̄in ej juon men ekabūrom̧ōjm̧ōj emaron̄ in jako.
Em̧m̧aan ro jitōnbōro, jej kabwijer priesthood eo an Anij! Epād ippād maron̄ eo An n̄an kōjeraam̧m̧an armej ro An. Baj ļōmņak kōn kallim̧ur eo ekabwilōn̄lōn̄ Irooj ekar letok n̄an kōj ke Ekar ba, “Jabdewōt eo kwōj kōjeraam̧m̧ane I naaj kōjeraam̧m̧ane.”4 Ej ad jeraam̧m̧an n̄an m̧akūtkūt ilo etan Jisōs Kraist n̄an kōjeraam̧m̧an ajri ro nejin Anij ekkar n̄an ankilaan eo An n̄an er. Stake būreejtōn ro im bisop ro, jouj im lale bwe aolep membōr an doulul ko rej pād wōt ilowaan wōt eddo eo ami bwe ren meļeļe wāween n̄an leļo̧k juon kōjeraam̧m̧an an priesthood—ekoba erreo an juon make im m̧aanjabpopo in jetōb emenin aikuj n̄an kūr n̄an bōk aolepān kajoor eo an Anij.5
N̄an aolep em̧m̧aan ro rej kabwijer priesthood eo, ij kajjitōk ippemi n̄an im̧we membōr ro n̄an kōjparok bujen ko aer, jitlo̧k im jar, ekkatak jeje ko rekwojarjar, kabun̄jar ilo tampeļ eo, im jerbal kōn tōmak āinwōt em̧m̧aan im kōrā ro an Anij. Jemaron̄ jipan̄ aolep n̄an lo kōn mejān tōmak bwe pokake im wāppen renaaj kepaakļo̧k er n̄an Jisōs Kraist, kōtļo̧k aer m̧ōņōņō kōn jem̧jerā eo an Jetōb Kwojarjar, im en̄jake lan̄lōn̄ ilo mour in!
Juon kadkad ej kwaļo̧k kadkad eo em̧ool an Irooj im Kabun̄ eo an emour enaaj aolep iien ejaak, tōl kijejeto n̄an karejar n̄an kajjojo ajri ro nejin Anij im baam̧le ko aer.6 Kōnke Kabun̄ eo an in, jej āinwōt rikarejar ro An renaaj karejar n̄an juon, āinwōt Ekar kōm̧m̧ane.7 Jenaaj karejar ilo Etan, kōn kajoor im maron̄ eo An, im kōn An iakwe im jouj.
Juon kar aō en̄jake 60 iiō ko remootļo̧k ilo Boston ekar katakin eō ewi jon̄an kajoor in kōjeraam̧m̧an eo an jerbal in karejar juon ilo̧k juon emaron̄ in. Ikar juon rim̧wijm̧wij ej jokwe ilo Massachusetts General Hospital—pād ilo jerbal aolep raan, ļo̧kin juon bon̄, im aolep juon kōttan jem̧ļo̧kin ruo wiik. Ekar dik aō iien n̄an kōrā eo pāleeō, ajri ro nejin, im m̧akūtkūt ko an Kabun̄ in. Mekarta, branch būreejtōn eo am ekar jitōn̄ eō n̄an loļo̧k m̧weo im̧ōn Wilbur im Leonora Cox kōjatdikdik bwe Brother Cox emaron̄ ro̧o̧ltok n̄an m̧akūtkūt ko an Kabun̄ in. E im Leonora rekar liāp ilo tampeļ eo.8 Kiiō Wilbur ejjan̄in bōk koņaan ium̧win elōn̄ iiō ko.
Kōmpānion eo aō im n̄a kōm̧ro kar etal n̄an m̧weo m̧weer. Ke kōm̧ij deļo̧n̄ļo̧k, Sister Cox ekar karuwaineneik kōm̧,9 ak m̧aan eo Jeid im Jatid Cox ekar etal n̄an juon ruum̧ im kiili kōjem̧ eo an.
Ikar etal n̄an kōjem̧ eo ekilōk im kōļļaļļaļ. Ālkin jidik iien, ikar ron̄ juon ainikien “Deļo̧n̄tok.” Ikar kōppeļļo̧k kōjem̧ eo im lo m̧aan eo Jeid im Jatid Cox ej jijet iturin juon retio kein jerbal. Ilo ruum̧ in edik, ekar tile juon jikka. Ilo m̧ool, loļo̧k eo aō ekar jab em̧m̧an.
Ikar kalimjek retio kein jerbal eo ilo ruum̧ eo kōn bwilōn̄ im ba, “Jeiū im Jatū Cox, ikar kōņaan in ekkatak eļapļo̧k kōn jerbal an juon amateur retio. Kwenej ke m̧ōņōņō in katakin eō kake?” Joļo̧k bōd bwe ijjab maron̄ pād eaitokļo̧k joteen in, ak imaron̄ bar ro̧o̧ltok bar juon iien?”
Ekar jidik m̧akoko innām ekar ba aaet. Ekar jinoin ta eo ekar erom̧ ej juon jem̧jerā em̧m̧an. Ikar jepļaakļo̧k im ekar katakin eō. Ikar jino iakwe im kautiej e. Jān loļo̧k im bar loļo̧k ko am, em̧m̧an eo an em̧m̧aan in ekar waļo̧k. Kōm̧ kar jino m̧ōttā ro rem̧m̧an, im barāinwōt kōm̧pānien ro am̧ n̄an indeeo. Innām, iien ar m̧ootļo̧k, baam̧le eo am ekar em̧m̧akūt. Ritōl ro an jikin eo rekar wōnm̧aanļo̧k wōt im jipan̄ baam̧le eo an Cox.10
Enan̄in ruwalitōk iiō tokālik ālkin loļo̧k eo aō m̧oktata, Boston Stake eo ekar ejaak.11 Komaron̄ ke uwaak wōn eo ekar stake būreejtōn eo? “Aaet! Jeid im Jatid m̧aan Cox! Ilo iiō im bar iiō, ekar barāinwōt jerbal āinwōt juon mijen būreejtōn im juon tampeļ būreejtōn.
Iiō ko tokālik, n̄a, āinwōt juon uwaan Doulul eo an Jon̄oulruo ro, ikar bōk ijjitōn̄ eo n̄an ejaake juon stake eo ekāāl ilo Sanpete County, Utah. Ilo iien intōrpiu ko, ikar lukkuun ilbōk n̄an aō bar ioon in m̧ōtta Jeid im Jatid m̧aan Cox! Ikar im̧we n̄an kūri āinwōt stake petriak eo ekāāl. Ālkin aō kapit e, kōm̧ ar atbakwōj doon im jan̄. Armej ro ilo ruum̧ eo rekar bwilōn̄ etke em̧m̧aan rein rerūtto rekar jan̄. Ak kōm̧ro kar jeļā. Im Jeid im jatid kōrā Cox ekar jeļā. Jan̄ ko am rekar kōn lan̄lōn̄! Kōm̧ kar keememej ito itak eo ekabwilōn̄lōn̄ kōn iakwe im ukweļo̧k me ekar ijjino elōn̄ļo̧k jān 30 iiō ko remootļo̧k, juon bon̄ ilo m̧weo im̧weer.
Bwebwenato in ejjab bōjrak ijin. Baam̧le eo an ro jeid im jatid Cox rekar eddōkļo̧k im wōr 3 nejier ajri, 20 jibūer ajri ro, im 54 jibūer im jibūer ajri ro. Kakkobabaļo̧k n̄an wāween an im̧we bukwi mijenede ro, taujin ro rellōn̄ļo̧k ilo tampeļ, im bukwi ro rellōn̄ļo̧k ro rekar bōk kōjeraam̧m̧an ko ilo pein Wilbur Cox. Kareel eo an im Leonora ekajoor enaaj wōnm̧aanļo̧k wōt ilo kareel elōn̄ epepen ko ipeļaakin laļ in.
Kain en̄jake rot in ippān Wilbur im Leonora Cox ej waļo̧k aolep wiik—kōjatdikdik, aolep raan—ilowaan Kabun̄ in. Rikarejar ro rewūjlepļo̧k an Irooj Jisōs Kraist rej kōm̧m̧ane jerbal eo An, kōn kajoor im maron̄ eo An.
Em̧m̧aan ro rejitōn bōro, ewōr kōjem̧ ko jemaron̄ kōppeļļo̧ki, kōjeraam̧m̧an ko an priesthood eo jemaron̄ liļo̧k, bōro ko jemaron̄ kōmouri, eddodo ko jemaron̄ ļōn̄aji, naan in kam̧ool ko jemaron̄ kōkajoorļo̧k, mour ko jemaron̄ lo̧mo̧o̧reni, im lan̄lōn̄ eo jemaron̄ bōktok n̄an m̧ōko im̧ōn Armej ro Rekwojarjar ilo Raan-ko Āliktata—aolep kōnke jej kabwijer priesthood eo an Anij. Jej em̧m̧aan ro rekar “kūr er im kōpooj er jān pedped an laļ ekkar n̄an jeļā m̧okta an Anij, kōn tōmak eo aer eļap im jerbal ko [ad] rem̧m̧an,” n̄an kōm̧m̧ane jerbal in.12
Joteen in ij karuwaineneik kom̧ n̄an jutak ippa ilo jem̧do̧o̧n in ad eļap ejjeļo̧k jem̧ļo̧kin. N̄e inej ba etan opiij eo ami, jouj im jutak im jutak wōt. Tikōn ro, jouj im jutak! Rūkaki ro, jutak! Pris ro! Bisop ro! Elder ro! Pris ro reutiej! Petriak ro! Jiljilimjuonn̄oul ro! Rijilōk ro!
Kiiō, em̧m̧aan ro rejitōn bōro, kom̧ naj jutak wōt im kobatok ippān kuwaer eo ilo al aolep eoon ko jilu “Rise Up, O Men of God.”13 Ilo ami al, ļōmņak kōn eddo eo am̧ āinwōt jar in ritariņae eo ekajoor an Anij rej n̄an kōpooj laļ in n̄an Itok eo Kein Karuo an Irooj. En̄in ej eddo eo ad. En̄in ej jeraam̧m̧an eo ad. Ij kamool ilo etan Jisōs Kraist, amen.