Būruwōn juon Rikanaan
Jemaron̄ m̧ōņōņō bwe rikanaan eo an Irooj em̧ōj an pād ilo jikin im bwe Irooj ej m̧ōņōņō bwe jerbal in An ej kōm̧m̧ane ilo wāween eo ekwojarjar Ekar kean̄ kake.
Ikar lukkuun jar bwe Jetōb Kwojarjar en pād ippādwoj kajjojo rainin ilo iien in ekwojarjar. Ta eo jaar aolep kam̧oole eaar kanooj in kabwilōn̄lōn̄ āinwōt rikanaan eo kein 17th an tōre in bōk eddo in ekar m̧ōj rejtake ilo iien rejtake eo.
Ke iaar pukot tōl n̄an jeļā ta unin kōnono eo Irooj ekōņaan bwe in kōnono kake rainin, kōļmenļo̧kjeņ e aō ekar etal n̄an juon bwebwenato kōn ro rekāāl uwaan Būreejtōnji eo Kein Kajuon. Ilo ekōnono in, juon iaan rikakpilōklōk ro ekar kōnono jet naan ilo iien in: “Ij lukkuun kōjatdikdik bwe membōr ro an Kabun̄ in remaron̄ meļeļe kōn ta eo em̧ōj an bōk jikin ilo kūr rikanaan eo ad ekāāl, Būreejtōn Russell M. Nelson, im tōļo̧k im ekwojarjar eo ilo iien rejtake in eo enaaj bōk jikin ilo kweilōk in elap.” Ekar wōnm̧aanļo̧k wōt, “Enan̄in kiiō 10 iiō, im elōn̄ iaad, eļaptata jodikdik ro ilo Kabun̄ in, rejjab keememej ak rej jan̄in en̄jake men in moktaļo̧k.”
Menin ekar kōm̧m̧an bwe in kōļmenļo̧kjeņ kōn en̄jake eo aō. Rikanaan eo moktata ij keememej ej Būreejtōn David O. McKay. Eaar 14 aō iiō iien eo ekar jako. Ij keememejļo̧k en̄jake in būrom̧ōj eo ilo iien mej eo an im dānnin kōmjaaļaļ ilo mejān eo jinō, im aolepān baam̧le eo rekar en̄jake būrom̧ōj eo. Ij keememejļo̧k naan ko “Jouj im kōjeraam̧m̧an Būreejtōn David O. Mckay” ekar wotļo̧k jān tiō ilo jar eo aō āinwōt ke ikar jajeļo̧kjeņ, men̄e ikar jeļā kōn jako eo an, in kar pukot bwe in kōjerbal ejja naan kein wōt. Ikar kejōkļo̧kjeņ eļan̄n̄e būruwō im aō ļōmņak renaaj kar em̧m̧akūt kōn ejja en̄jake ko im tōmak eo n̄an rikanaan ro m̧oktaļo̧k jān e. Ak āinwōt jinen im ro jemen rej iakwe ajri ro nejier, ikar loe juon iakwe n̄an, āinwōt ippān, im naan in kam̧ool eo an Būreejtōn Josep Fielding Smith, eo ekar ļoore Būreejtōn McKay, im kajjojo rikanaan ro ālikin: Harold B. Lee, Spencer W. Kimball, Ezra Taft Benson, Howard W. Hunter, Gordon B. Hinckley, Thomas S. Monson, im rainin Būreejtōn Russell M. Nelson. Ij lukkuun rejtake kajjojo rikanaan kōn kajutak peiō—kajutak būruwō.
Āinwōt kajjojo rikanaan ro ad rejitōn bōro rekar eļļāļo̧k, ekkā ad en̄jake būrom̧ōj im jako. Ak būrom̧ōj ko ad ej pedped ioon m̧ōņōņō im kōjatdikdik ko rej itok ilo ad en̄jake juon iaan kōjeraam̧m̧an ko reļļap kōn Jepļaaktok eo: kūr im rejtake rikanaan ro rej mour ilo laļ in.
Ilo jemļo̧kin, inaaj kōnono kōn eddōkļo̧k in jerbal in ekwojarjar ilo aō kar etale 90 raan ko remootļo̧k. Inaaj kōmeļeļeiki emān ko: juon, jako eo an rikanaan eo ad im jepepļo̧k eo an Būreejtōnji eo Kein Kajuon; kein karuo, iien kōtar eo n̄an bar ejaake Būreejtōnji eo Kein Kajuon ekāāļ; kein kajilu, kūr eo an rikanaan eo ekāāl; im kein kemān, rejtake rikanaan eo ekāāl im Būreejtōnji eo Kein Kajuon ilo iien rejtake eo.
Jako eo an juon Rikanaan
Ilo Jānwōde 2, 2018, jitōn bōro eo ad rikanaan Thomas S. Monson ekar iļo̧k jān mour in n̄an ijo iturajet in rōn̄ōl eo. Ej pād ilo būruwōd n̄an indeeo. Aorōk ko kar litok jān Būreejtōn Henry B. Eyring ilo iien jako eo an Būreejtōn Monson eo ej kōmeļeļeiki en̄jake ko ad: “Aorōk ko ilo mour eo an, āinwōt Rilo̧mo̧o̧r eo, enaaj an ro an kajjojo inepata n̄an pukotļo̧k rijeram̧ōļ ro, rinan̄inmej—aaet aolep kajjojo—ipeļaakin laļ in.”1
Būreejtōn Spencer W. Kimball ekar kōmeļeļe:
“Ilo an juon iju tulo̧k ilikin kapin lan̄, bar juon ej waļo̧ktok im jej loe, im mej ej kwaļo̧k mour.
“Jerbal eo an Irooj ejjeļo̧k jemļo̧kin. Men̄e juon ritōl ekajoor ej jako, ejjeļo̧k juon iien Kabun̄ in ej etal im ejjeļo̧k ritōl ie, kam̧m̧oolol kōn jouj eo an Rikōjparok eo ej wōnm̧aanļo̧k im indeeo letok aelōn̄ in kiin eo an. Āinwōt em̧ōj an bōk jikin … moktaļo̧k ilo epepen in, armej rej kauteij ilo aer kiļo̧k juon lōb, ir dānin kōmjaalaļ, im ukōt mejāer n̄an ilju im jekļaj ko aer.”2
Jako an Rjilōk eo
Ilo iien eo ikōtaan mej eo an rikanaan eo im iien bar ejake Būreejtōnji eo Kein Kajuon ekāāl ej meļeļein “jako an rijilōk eo” Ilo iien in, ro uwaan, Doulul eo an Jon̄oulruo ro iumwin karōk eo an būreejtōn eo an doulul eo, ippān doon rej kabwijer ki ko n̄an karejar n̄an ritōl ro an Kabun̄ in. Būreejtōn Josep F. Smith ekar katakin, “Aolep iien ewōr jeban Kabun̄ in, im n̄e Būreejtōnji eo an Kabun̄ in renaaj em̧m̧akūt kōn mej ak ko jet, innām eo ej jeban Kabun̄ in enaaj Doulul eo an Jon̄oulruo ro, m̧ae iien ebar ejaak juon Būreejtōnji.”3
Iien bōjrak in ekar ijjino ke Būreejtōn Monson ekar jako ilo Jānwōde 2 im jem̧ļo̧k ilo 12 raan ko tokālik ilo Jabōt, Jānwōde 14. Ilo Jibbon̄ in Jabōt ņe, Doulul eo an Jon̄oulruo Rijilōk ro rekar kuk tok ippān doon ilo ruum̧ eo ilōn̄ ilo Salt Lake Temple eo ilo juon jitibōn jitļo̧k im jar, ium̧win kappe eo an Būreejtōn Russell M. Nelson, rikaļoor eo erūttotata im Būreejtōn eo an Doulul eo an Jon̄oulruo ro.
Kūr eo an juon Rikanaan Ekāāl
Ilo iien kweilo̧k in ekwojarjar im ekakememej, ālkin iien jokālet eo em̧m̧an ilo bōro kuk im errā, Em̧m̧aan ro rejitōn bōro rekar jijet ilo ekkar jān eo etotata an jerbal ilo juon doulul in jea ko 13 im kar kotak peier m̧okta n̄an rejtake doulul eo an Būreejtōnji eo Kein Kajuon innām n̄an rejtake Būreejtōn Russell Marion Nelson āinwōt Būreejtōn eo an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Rejtake eo ekar wōnm̧aanļo̧k jān Doulul eo an Jon̄oulruo ro ilo aer kar kuktok ippān doon ilo juon doulul im likūt peir ioon bōran Būreejtōn Nelson n̄an kapit im kōjnolo̧k e, kōn ainikien Rijilōk eo etotata an jerbal.
Būreejtōn Nelson ekar kwaļo̧k etan rikakpilōklōk ro an, Būreejtōn Dallin Harris Oaks, Būreejtōn Henry Bennion Eyring, ippān Būreejtōn Oaks āinwōt Būreejtōn eo an Jon̄oulruo Rijilōk ro im Būreejtōn Melvin Russell Ballard āinwōt Ribōk Jikin Būreejtōn eo an Doulul eo an Jon̄oulruo Rijilōk ro. Ālkin ejja kain bout in rejtake in wōt, kajjojo iaan Em̧m̧aan rein rejitōn bōro rekar kōjonolo̧k er n̄an opiij ko aer jān Būreejtōn Nelson. Ej juon en̄jake eļap an ekwojarjar, kōn lutōktok eo an Jetōb eo. Ij lewaj n̄an kom̧ aō kam̧ool bwe ankilaan Irooj, kōn ad lukkuun jar, kajoor eo an ekar alikkar ilo kar m̧akūtkūt ko im pojak ko an raan eo.
Kōn ekkapit eo an Būreejtōn Nelson im bar ejaake eo an Būreejtōnji eo Kein Kajuon, jako eo an Rijilōk eo ekar jemļo̧k, im kar ejaake Būreejtōnji eo Kein Kajuon ekāāl ekar jino jerbal ilo ejjeļo̧k kabwilōn̄lōn̄ ko rekar waļo̧k, ilo aer tōl aelōn̄ in Irooj ilo laļ in.
Juon Tōre in Rejtake Ritōl ro
Jibbon̄ in, jerbal in ekwojarjar ej waļo̧k in jem̧ļo̧k ekkar n̄an juon men emenin aikuj im ekar ellaajrak ilo Katak im Bujen ko: “Bwe aolep men aikuj in kōm̧m̧an ilo koņ, im jān bōro wōt juon ilo kabun̄ in, jān jar in tōmak,”4 jilu Pris Utiej Ritōl, … im rie er jān lōke, tōmak, im jar an kabun̄ in, rej booje doulul eo an Presidency eo an Kabun̄ in.”5
Elder David B. Haight ekar kōmeļeļeik juon men ekar waļo̧k eo me jej bōk koņaad ie rainin:
“Jej rikam̧ool ro n̄an im bōk koņaad ilo iien in elukkuun ekwojarjar—juon iien ad rejtake ritōl ro ad kōn men ko rekwojarjar. Āinwōt iien ko jem̧aan, ekar ļap iien jitlo̧k im jar jān Armej ro Rekwojarjar ipeļaakin laļ in bwe ren maron̄ bōk lutok eo an Jetōb eo an Irooj, im ej waļo̧k … ilo jibbon̄ in rainin.
“Juon iien ad rejtake ritōl ro, ilo an et ko jakim̧aantak, rej bōk jikin juon men ekwojarjar, eaorōk, im iien kautiej ilo an Armej ro Rekwojarjar rej ajel iumwin tōl eo an Būreejtōnji eo Kein Kajuon.”6
Ro jeiū im jatū, jemaron̄ m̧ōņōņō—em̧ool lam̧ōj kōn “Hosanna!”—bwe kōn lo̧n̄in Irooj, juon rikanaan an Anij, ej pād ijin im bwe Irooj ej mōņōņō bwe jerbal in An ej kōm̧m̧ane ilo wāween eo ekwojarjar Ekar kean̄.
Būreejtōn Russell M. Nelson
Jerbal in ekkapit in ej tōlļo̧k n̄an bar juon kūr ekwojarjar an juon rikanaan. Āinwōt an Būreejtōn Monson kar juon iaan ro rekar kamōņōņō laļ in, ejjeļo̧k oktak Būreejtōn Nelson. Em̧ōj an kar kōppojak im eļaptata katakin jān Irooj n̄an tōl kōj ilo tōre in. Ej juon kōjeraam̧m̧an eļap n̄an kōj rainin bwe jitōn bōro Būreejtōn Russell M. Nelson ej ad rikanaan rainin eo eļap iakwe im kate—kein kajuon̄ouljiljilimjuon Būreejtōn an Kabun̄ in iien in tōre in bōk eddo in āliktata.
Būreejōn Nelson ej barāinwōt juon em̧m̧aan eo emāletlet. Ekar juon kōjeraam̧m̧an n̄an n̄a bwe ikar maron̄ jerbal ilo Doulul eo an Jon̄oulruo Rijiļo̧k ro ippān āinwōt aō būreejtōn baj ium̧win enan̄in ruo iiō ko. Ikar ito itak ippān im bwilōn̄ kōn kajoor eo an, āinwōt juon ej aikuj m̧ōkaj an em̧m̧akūtkūt n̄an an tōpar eo! Ilo total, emōj an loļo̧k 133 laļ ko ilo tōre in an mour.
Ej erļo̧ke pein n̄an aolep, dik im rūtto. Einwōt ejeļā kajjeen aolep armej im eļap an jeram̧m̧an kōn menin letok ippān n̄an maron̄ keememej etan armej. Aolep ro rejeļā kajeen rej en̄jake ke rej aorōk ippān. Im ej āinwōt kōj kajjojo—kōn iakwe eo em̧ool im kea eo an n̄an aolep kōj kajjojo.
Iiaio eo aō eļap ippān Būreejtōn Nelson ekar kōn eddo ko an ritōl ro ad, kiiō ikar barāinwōt jeļā kōn mour eo an juon m̧okta jān an kar kūr n̄an jerbal āinwōt juon Ritōl Eutiej an Kabun̄ in. Āinwōt an elōn̄ iami jeļā, Būreejtōn Nelson ekar juon taktō in m̧wijm̧wij menono im, jinoin jerbal in taktō eo an, ekar eo m̧oktata kar loe heart-lung machine eo. Ekar jerbal ippān juon tiim in ekkatak me eaar rejtake kōm̧adm̧ōd in kōppeļo̧k menono eo kein kajuon ippān juon armej, ilo 1951, kōjerbal heart-lung bypass. Būreejtōn Nelson ekar kōm̧m̧ane juon jerbal in m̧wijm̧wij menono an Būreejtōn Spencer W. Kimball ejjab etto ālkin an Būreejtōn Kimball erom juon rikanaan.
Ekanooj kalimomo, iien eo Būreejtōn Nelson ekar kūr n̄an Jonoulruo 34 iiō emootļo̧k ekar kōjemļo̧k jerbal in taktō eo kōn kōkajoorļo̧k im kōkōm̧anm̧anļo̧k menono ko, ekar ijjino ilo juon rikarejar āinwōt juon Rijilōk ewūjlepļo̧k n̄an kōkajoorļo̧k im kōkōm̧anm̧anļo̧k menono jon̄oul taujin ipeļaakin laļ in, kajjojo iaer rekar kotaki im kōmouri jān naan ko an im m̧akūtkūt ilo māletlet, jerbal, im iakwe.
Juon Bōro Āinwōt an Kraist
N̄e ij loe juon bōro āinwōt Kraist aolep raan, ij loe Būreejtōn Nelson. Ijjan̄in loe juon eo eļap an kōm̧m̧ane kain jerbal in ilo uteij ijjeļo̧kin e. Ekar juon kōjparok eo ekabwilōn̄lōn̄ n̄an n̄a ilo jerbal in n̄an lale waļo̧k ko an mour āinwōt Kraist ibūruwōn Būreejtōn Nelson.
Ilowaan wōt jet wiik ko jān iien eo ikar kūr n̄an Jonoulruo eo ilo Oktoba 2015, ikar maron̄ epaakeļo̧k aō lale mour in jerbal eo an emootļo̧k an Būreejtōn Nelson. Kar karuwaineneikļo̧k n̄a bwe in pād ilo juon m̧akūtkūt ijo me ekar bōk nōbar āinwōt juon paineer rim̧wijm̧wij menono. Ke ikar deļo̧n̄ļo̧k jikin eo, ikar bwilōn̄ kōn jon̄an rimāletlet ro rekar kobatok n̄an kweilo̧k eo ijo n̄an nōbar im kile jerbal eo me Būreejtōn Nelson ekar kōm̧m̧ane elōn̄ iiō ko m̧okta āinwōt juon taktō im rim̧wijm̧wij.
Joteen in elōn̄ ro rebun̄bun̄ rekar jutak im kwaļo̧k aer kautiej im kile jipan̄ ko rem̧m̧an an Būreejtōn Nelson n̄an jibadbad in taktō eo an. Ilo aer kar kōnono im kwaļo̧k aolep tōprak ko Būreejtōn Nelson ekar kōm̧m̧ani, juon iaan ekōnono ko ekar lukkuun pād ippa jān juon em̧m̧aan eo ekar jijjet itūrū. Ekar jab jeļā wōn n̄a, ak ejeļā wōn Būreejtōn Nelson, āinwōt Dr. Nelson, jeban ilo jikin mwijmwij eo ilo jikuuļ in taktō eo ilo 1955.
Em̧m̧aan in ekar juon iaan rijikuuļ ro an Būreejtōn Nelson. Ekar kōnono kōn elōn̄ ememļo̧kjeņ ko. Ekalimomotata an kōmeļeļe wāween an Būreejtōn Nelson rūkaki, ilo, ej ba, ekar bōktok elōn̄ men ko rekabwilōn̄lōn̄. Ekar kōmeļeļeiki ke elōn̄ iaan katak ko kar kōm̧m̧an kōn m̧wijm̧wij ekar kōm̧m̧an ilo ruum̧ in m̧wijm̧wij eo. Ijo, rijikuuļ ro rekar lale im kōm̧m̧ane mwijmwij ko ilo tōl eo an ro rej lale ijo, ilo kūlaaj ruum eo. Ekar kwaļo̧k ke ruum̧ in mwijmwij eo ippān jet iaan rūkaki in mwijmwij ro ekar juon ruum̧ eļap poktak, aitwerōk, ikumkum, im barāinwōt jiaeik doon. Em̧m̧aan in ekar kōmeļeļeik ijo āinwōt jikin eo epen katak ie, jet iien ejjeļo̧k meļeļein. Āinwōt juon uwaak, an rimwijmwij ro en̄jake ke jerbal eo aer enaaj jemļo̧k mōttan jidik.
Innām ekar kōmeļeļeik oktak in ruum̧ in m̧wijm̧wij eo Būreejtōn Nelson ekar rūkaki ie. Eaenōm̧m̧an, jokwane, im em̧m̧an n̄an katak. Rūkatak ro rej jokwe ijo rekar lukkuun kautieji er. Bōtaab, ilo aolepān ta ko rej waļo̧k ilo mwijmwij ko, Dr. Nelson ekar kōnaan bwe aolep ren kate er. Em̧m̧aan in ekar wanm̧aanļo̧k im kōmeļeļeiki bwe aolep ro rekar kūlaaj eo an Dr. Nelson rekar mōkade im jeļā ta eo rej kōmmane.
Ejjab juon men eo ekāāl n̄an n̄a. En̄in ej ta eo ikar ekkatak kake, im em̧ool maron̄ jeraam̧m̧an kake ilo Doulul eo an Jonoulruo Rijilōk ro. Ikar en̄jake ke, ilo juon wāween, ikar juon iaan “rijikuuļ ro rej katak” an.
Būreejtōn Nelson ewōr wāween an katakin ro jet im leļo̧k jipan̄ n̄an kajimwe ilo men ko rem̧m̧an, kautiej, im wāween n̄an kokajoorļo̧k. Ej juon waanjon̄ak āinwōt Kraist im juon waanjon̄ak n̄an kōj kajjojo. Jān e jemaron̄ katak bwe jekdo̧o̧n ta ko jej loe ilo kōj make, m̧wil ko ad im bōro ko ad rej katak ko ilo gospel in an Jisōs Kraist.
Kiiō jekar jeraam̧m̧an eļap n̄an rejtake rikanaan eo ad, Būreejtōn Russell M. Nelson. Ilo aolepān mour eo an, ekar kōļapļo̧k elōn̄ jerbal ko an āinwōt rijikuuļ, jemān, ritimejeļo̧k, ļeo pālele, taktō, ritōl an priesthood, jim̧a, im Rijilōk. Ekar kakūrm̧ool jerbal kein innām—im ej wōnm̧aanļo̧k im kōm̧m̧ane āindein—kōn juon būruwōn juon rikanaan.
Ro jeiū im jatū, ta eo jekar kam̧oole im bōk koņaad ie rainin, juon iien rejtake, ej tōlļo̧k n̄an aō kam̧oole bwe Būreejtōn Russell M. Nelson ej ainikien lo̧n̄iin Irooj n̄an aolep armej. Ij bar kobaiki waj juon aō naan in kam̧ool kōn Anij Jemen, kōn Jisōs Kraist, im jerbal eo An āinwōt ad Rilo̧mo̧o̧r im Ripinmuur. Ilo etan Jisōs Kraist, amen.