Ang Tagipusuon sang isa ka Propeta
Makakasadya kita nga ang propeta sang Ginuo ara na kag nga ginahikot ang olobrahon sang Ginuo sa diosnon nga pamaagi nga ginsugo Niya.
Nakapangamuyo ako sing sinsero nga mag-upod ang Balaan nga Espiritu sa kada isa sa aton subong nga adlaw sa sini nga langitnon nga kahigayunan. Matilingala gid ang nasaksihan naton tanan sang ginsakdag na ang ika-17 nga propeta sang sini nga dispensasyon sa solemn assembly.
Samtang nagapangita ako sang paggiya agud mahibal-an ang topiko nga gusto sang Ginuo nga akon ipamulong subong adlaw, natuytuyan ang akon nga mga panghunahuna sa isa ka sugilanon sang ligad lang sa bag-o nga gintawag nga Unang Pangulohan. Sa sini nga sugilanon, nagpaambit ang isa sang mga manuglaygay sang mga pulong nga daw amo ini: “Nagalaum ako sing lubos nga maintyendihan sang kamiyembrohan sang Simbahan ang kadakuan sang natabo sa pagtawag sang aton bag-o nga propeta, Si Presidente Russell M. Nelson, kag ang kaimportansya kag kasagradohan sang solemn assembly nga matabo sa pangkabilogan nga komperensya.” Natalupangdan pa gid niya nga, “Nakaligad na ang 10 ka tinuig, kag madamo na, ilabi na gid sa mga hoben sang Simbahan, ang wala nakadumdom ukon wala pa nakaeksperyensya sang amo sini antes subong.”
Nagtulod ini sa akon nga magbinag-binag parte sa mga eksperyensya ko. Ang una nga propeta nga madumduman ko amo si Presidente David O. McKay. 14 ang akon idad sang nagtaliwan siya. Madumduman ko ang balatyagon sang kakulang nga nag-upod sa pagtaliwan niya, ang mga luha sa mga mata sang akon iloy, kag ang kasubo nga nabatyagan sang bilog namon nga pamilya. Madumduman ko kon paano ang mga tinaga nga “Palihug bugayi si Presidente David O. McKay” nahambal sing natural sang akon baba sa akon mga pagpangamuyo nga kon indi ko pagbantayan ang akon ginahambal, bisan pagkatapos sang iya nga pagtaliwan, masalapoan ko ang akon kaugalingon nga nakahambal sang amo man gihapon nga mga tinaga. Nagduhaduha ako kon makabawi ang akon tagipusuon kag kaisipan sa parehas nga balatyagon kag kasiguradohan para sa mga propeta nga magbulos sa iya. Pero medyo parehas sa mga ginikanan nga nagapalangga sa kada isa sang ila mga kabataan, nakita ko ang pagpalangga, kalabutan, kag testimonya kay Presidente Joseph Fielding Smith, kon sin-o ang nagsunod kay Presidente McKay, kag sa tanan nga mga propeta halin sadto: Sanday Harold B. Lee, Spencer W. Kimball, Ezra Taft Benson, Howard W. Hunter, Gordon B. Hinckley, Thomas S. Monson, kag subong nga adlaw si Presidente Russell M. Nelson. Ginsakdag ko sing lubos ang kada propeta sa ginpataas nga kamot—kag sa malipay nga tagipusuon.
Sa pagtaliwan sang kada isa sang aton pinalangga nga mga propeta, natural lang nga mabatyagan ang balatyagon sang kasubo kag kakulang. Pero ang kasubo naton ginapahagan-hagan sang aton nga kalipay kag sang paglaum nga nagaabot samtang ginaeksperyensyahan naton ang isa sang daku nga mga bugay sang Pagpanumbalik: ang pagtawag kag pagsakdag sang isa ka buhi nga propeta sa kalibutan.
Tungod sina nga kabangdanan, maghambal ako parte sini nga diosnon nga proseso parehas nga ginsundan sang nagligad nga 90 ka adlaw. Ilaragway ko ini sa apat ka bahin: primero, ang pagtaliwan sang aton propeta kag ang pagbulagay sang Unang Pangulohan; ika-duha, ang panahon sang paghulat sa pagtukod liwat sang bag-o nga Unang Pangulohan; ika-tatlo, ang pagtawag sang bag-o nga propeta; kag ika-apat, ang pagsakdag sang bag-o nga propeta kag Unang Pangulohan sa solemn assembly.
Ang Pagtaliwang sang isa ka Propeta
Sang Enero 2, 2018, nagtaliwan ang aton pinalangga nga propeta nga si Thomas S. Monson sa pihak nga kabuhi. May ara siya sang lugar sa aton mga tagipusuon sa wa’ay katapusan. Ang pagkonswelo nga ginhalad ni Presidente Henry B. Eyering sang pagtaliwan ni Presidente Monson nagalaragway sing perpekto sang aton nga mga balatyagon: “Ang katandaan sang iya nga kabuhi, parehas sa kabuhi sang Manluluwas, amo ang iya nga indibidwal nga pagkabalaka sa pagbulig sa mga pigado, mga masakiton—bisan pa sa tanan nga mga indibidwal—sa bilog nga kalibutan.”1
Gin-eksplikar ni Presidente Spencer W. Kimball nga:
“Kon maghingunud ang isa ka bituon sa kalangitan, magpakita ang isa pa, kag ang kamatayon nagatuga sang kabuhi.”
“Wa’ay katapusan ang olobrahon sang Dios. Bisan kon mapatay ang isa ka gamhanan nga lider, indi gid sa bisan isa lang ka sekundo nga ang Simbahan wala sang paggiya, salamat sa mabinuotan nga Dios nga naghatag sa Iya nga ginharian sang pamaagi sa pagpadayon kag pagmantener. Parehas nga natabo na ini . . . sang una pa sa sini nga dispensasyon, ginasira sang katawhan ang lungon sing matinahuron, ginapahiran ang ila nga mga luha, kag mag-atubang sila sa palaabuton.”2
Ang Apostolic nga Interregnum
Ang panahon sa tunga sang kamatayon sang isa ka propeta kag sa pagtukod liwat sang Unang Pangulohan ginatawag nga “apostolic nga interregnum.” Sa sini nga panahon, ang Korum sang Napulog-duha, sa pagdumala sang presidente sang korum, nagakapyot sing tingob sang awtoridad sa pagtutuy sa pagdumala sang Simbahan. Gintudlo ni Presidente Joseph F. Smith nga, “Pirme may pangulo sa Simbahan, kag kon ang Pangulohan sang Simbahan makuha sang kamatayon ukon sang iban pa nga kabangdanan, ang dasun nga pangulo sang Simbahan amo ang Dose ka Apostoles, hasta matukod liwat ang isa ka pangulohan.”3
Ang nagligad nga panahon sang interregnum nagsugod sang nagtaliwan si Presidente Monson sang Enero 2, 2018, kag natapos 12 ka adlaw sa dasun sang Dominggo, Enero 14, 2018. Sadto nga aga sa Adlaw sang Inugpahuway, nagtipon ang Korum sang Napulog-duha sa ibabaw nga kwarto sang Salt Lake Temple sa pamatasan sang pagpuasa kag pagpangamuyo, sa nagadumala nga direksyon ni Presidente Russell M. Nelson, ang Senior nga Apostol kag Presidente sang Korum sang Napulog-duha.
Ang Pagtawag sang Bag-o nga Propeta
Sa sini nga sagrado kag halandumon nga miting, sa pagsunod sang kinaandan nga pagsulundan sing may unidad kag pagsugotanay, nakapungko ang mga Apostoles suno sa kadugayan sa 13 ka pulungkuan nga nahusay sa isa ka tunga-bilog kag nagtaas kamot una para magsakdag sa pagtukod sang Unang Pangulohan kag tapos para magsakdag kay Presidente Russell Marion Nelson bilang Presidente sang Simbahan ni Jesucristo sang mga Santos sa Ulihing mga Adlaw. Ini nga pagsakdag ginsundan sang paglibot sang Korum sang Napulog-duha sa isa ka bilog kag ang pagtakdong sang ila mga kamot sa ulo ni Presidente Nelson sa pag-ordinar kag pagpain sa iya, nga ang ikaduha nga pinakamadugay nga Apostol bilang taghambal.
Tapos gintawag ni Presidente Nelson ang iya nga mga manuglaygay, sanday Presidente Dallin Harris Oaks, Presidente Henry Bennion Eyring, nga si Presidente Oaks bilang Presidente sang Korum sang Napulog-duha ka mga Apostoles kag si Presidente Melvin Russell Ballard bilang Acting President sang Korum sang Napulog-duha ka mga Apostoles. Pagkatapos sang parehas nga mga boto sang pagsakdag, kada isa sa sini nga mga Kauturan ginpain ni Presidente Nelson sa ila kaugalingon nga mga palangakuan. Lubos nga sagrado ini nga eksperyensya, nga may pagduaw sang Balaan nga Espiritu. Ginahalad ko sa inyo ang akon sigurado nga panaksihon nga ang kabubut-on sang Ginuo, nga ginpangamuyuan namon sing sinsero, ginpakita sing gamhanan sa sini nga adlaw.
Sa pag-ordinar kay Presidente Nelson kag sa pagtukod liwat sang Unang Pangulohan, natapos ang apostolic nga interregnum, kag nagsugod ang bag-o nga gintukod nga Unang Pangulohan nga maggiho nga, sa katingala, wala sang bisan isa ka sekundo sang pagduhaduha sa pagdumala sa ginharian sang Ginuo sa kalibutan.
Ang Solemn nga Assembly
Kagina sang aga, naghingapos ini nga diosnon nga proseso suno sa sugo nga ara sa mga kasulatan nga ginalaragway sa Doktrina kag mga Kasugtanan: “Kay kinahanglan nga mahimo ang tanan nga mga butang sing may kahusayan, kag sa pagsulugot sang simbahan, paagi sa matinuohon nga pagpangamuyo,”4 kag “tatlo ka Nagadumala nga Mataas nga mga Pari, . . . nga ginasakdag sang pagsalig, pagtuo, kag pagpangamuyo sang simbahan, ang kaundan sang korum sang Pangulohan sang Simbahan.”5
Gineksplikar ni Elder David B. Haight ang isa sa nagligad pa nga kahitabo sang gin-entrahan naton subong nga adlaw:
“Mga saksi kita kag mga mag-entra sa isa ka labing sagrado nga kahigayunan—isa ka solemn assembly para magbuhat suno sa langitnon nga mga butang. Parehas sa dumaan nga mga panahon, madamo ang pagpuasa kag pagpangamuyo nga ginhalad sang mga Santos sa bilog nga kalibutan agud nga mabaton nila ang pagduaw sang Espiritu sang Ginuo, nga halata gid … sa sini nga kahigayunan sa sini nga aga.
“Ang isa ka solemn assembly, parehas sa ginalahid sang ngalan, nagakahulugan sang sagrado, mainubuson, kag matinahuron nga kahigayunan nga sa diin magtililipon ang mga Santos suno sa direksyon sang Unang Pangulohan.”6
Mga kauturan, pwede kita magkasadya—bisan magsinggit, “Hosanna!”—nga ang baba sang Ginuo, isa ka propeta sang Dios, ara na kag nga nahamut-an ang Ginuo nga ginahikot ang Iya nga olobrahon sa diosnon nga paagi nga ginsugo Niya.
Si Presidente Russell M. Nelson
Ini nga diosnon nga ginhatag nga proseso nga bag-o lang gineksplikar nagapadulong sa isa pa ka diosnon nga gintawag nga propeta. Parehas nga si Presidente Monson amo ang isa sa pinakamaayo nga mga pumuluyo nga nagpangabuhi sa sini nga duta, amo man si Presidente Nelson. Ginhanda siya sing labi kag gintudluan sing pinasahi sang Ginuo agud magtuytuy sa aton sa sini nga tion. Kadako gid ang aton nga bugay nga may ara kita sang pinalangga nga si Presidente Russell M. Nelson bilang ang aton mapinalanggaon kag debotado nga propeta—ang ika-17 nga Presidente sang Simbahan sa sini nga ulihi nga dispensasyon.
Tuod gid nga isa ka matalingala nga tawo si Presidente Nelson. May ara ako sang pribelihio nga magserbisyo sa Korum sang Napulog-duha upod sa iya bilang akon presidente sang korum para sa sobra lang gamay sa duha ka tuig. Nakabiyahe ako upod sa iya kag natingala ako sa iya nga kapagsik kay kinahanglan nga magdali ang isa ka tawo para maglagas sa iya nga lak-ang! Sa tanan nakabisita siya sa 133 ka pungsod sa iya nga kabuhi.
Ginapauntay niya ang impluwensya niya sa tanan, hoben kag tigulang. Daw kilala niya ang tanan kag may pinasayi siya nga talento sa pagdumdum sang mga ngalan. Tanan nga nakakilala sa iya nabatyagan nga sila ang pabarito niya. Kag amo man sa kada isa sa aton—tungod sa iya sinsero nga pagpalangga kag paglabot para sa tanan.
Ang kalabanan nga pagkilala ko kay President Nelson amo sa pangsimbahan nga mga papel, pero nangin pamilyar man ako sa propesyonal nga kabuhi nga ginpangabuhi ni Presidente Nelson antes gintawag siya bilang isa ka General Authority. Madamo na sa inyo nakahibalo nga sang una si Presidente Nelson amo ang isa ka mabantog sa bilog nga kalibutan nga siruhano sang tagipusuon, kag sang temprano pa sa iya medikal nga karera, isa siya sa pinakauna nga mga tag-obra sang tagipusuon-baga nga makina. Sakop si Presidente Nelson sa pang-research nga grupo nga naghimo sang una gid nga opera sa tawo nga bukas ang tagipusuon sang 1951, paagi sa paggamit sang tagipusuon-baga nga makina. Nag-opera si Presidente Nelson sa tagipusuon ni Presidente Spencer W. Kimball antes gid nga nangin propeta si Presidente Kimball.
Interesante nga bisan natapos ang propesyonal ngamedikal nga karerasa pagpabakod kag pagpamulong sa mga tagipusuon sa pagtawag ni Presidente Nelson sa Napulog-duha sang 34 na ka tuig, ginsugdan sina ang pag-alagad bilang Apostolnga debotado sa pagkay-o sang mga tagipuson sang di-maisip nga pulo ka mga linibo sa bilog nga kalibutan, tanan sila nga ginpahalipay kag ginpaayo sang iya nga mga pulong kag mga binuhatan sang kaalam, pagserbisyo, kag pagpalangga.
Isa ka Cristohanon nga Tagipusuon
Kon hunahunaon ko ang isa ka Cristohanon nga tagipusuon sa adlaw-adlaw nga panggawi, makita ko si Presidente Nelson. Wala ko sang nakilala pa nga mas maayo nga halimbawa sa sini nga kinaiya sangsa sa iya. Katilingala gid ang mga gintudlo sa akon samatang ara ko sa posisyon nga magtan-aw sa personal sang pagpakita sang Cristohanon nga tagipusuon ni Presidente Nelson.
Sa pila lang ka simana pagkatapos sang pagtawag sa akon sa Napulog-duha sang Oktubre 2015, may ara ako sang oportunidad nga makapanilag mismo sang propesyonal nga kabuhi ni Presidente Nelson. Ginhagad ako nga magtambung sa isa ka hitabo nga sa diin gintahud siya bilang isa ka umuluna sang pag-opera sa tagipusuon. Sang nagsulod ako sa kwarto, natingala ko nga makit-an ang kadamuan sang mga propesyonal nga ara dira nga tahuron kag kilal-an ang obra nga nahimo ni Presidente Nelson sang pila ka tuig sadto bilang medikal nga doktor kag surihano.
Sang sina nga gab-i, damo ang mga propesyonal nga nagtindog kag naghambal sang ila nga respeto kag pagdayaw para sa pinasahi nga ginhatag ni Presidente Nelson sa iya medikal nga karera. Bisan halangdon ang tanan nga mga naghambal sa pageksplikar sang lain-lain nga mga katigayunan ni Presidente Nelson, natingala pa gid ko sa isa ka sugilanon nga ginsugdan ko sa isa ka lalaki nga nakapungko tupad sa akon. Indi niya ako kilala, pero nakilala niya si Presidente Nelson bilang si Dr. Nelson, ang direktor sang programa sang thoracic surgery residency sa isa ka pangmedikal nga eskwelahan sang 1955.
Estudiante ini nga lalaki ni Presidente Nelson sang una. Nagpaambit siya sang madamo nga mga dulumdumon. Ang pinakamainterestante amo ang iya nga pageksplikar sa paagi sang pagtudlo ni Presidente Nelson, nga, ginhambal niya, may ara sang daku nga kabantog. Nageksplikar siya nga madamo sang pagtudlo sa mga estudiante nga manug-operah sa tagipusuon matabo sa pang-opera nga kwarto. Didto, ang mga estudiante makatan-aw kag makahimo sang pag-opera nga ginabantayan sang ila mga maestro, bilang laboratoryo nga klase. Nagpaambit siya nga sa pila ka mga surihano ang pang-opera nga kwarto puno sang kagamo, kompetatibo, kastress, kag bisan kadalok-dalok. Gin-eksplikar ini sang lalaki bilang isa ka mabudlay nga kahimtangan, bisan ang pagpakanubo ara. Nakaresulta ini sa balatyagon sang mga estudiante nga surihanon nga ang karera nila ara sa ital-ital.
Tapos gin-eksplikar niya ang pinasahi nga kahimtangan nga makita sa pang-opera nga kwarto ni Presidente Nelson. Matahway, kalma, kag halangdon ini. Ginatahud sing labi ang mga estudiante. Pero, pagkatapos sa demonstrasyon sang pag-opera, gin-ekspektar ni Dr. Nelson ang pinakamaayo nga obra sa kada estudiante. Nag-eksplikar pa gid ini nga lalaki nga ang pinakamaayo nga mga resulta sa mga pasyente natabo sa pang-opera nga kwarto ni Dr. Nelson.
Indi ko makibot sa sini. Ini ang natalupangdan ko sa personal kag ang tuod nga nagbugay sa akon sa Korum sang Napulog-duha. Nabatyagan ko nga ako, sing paangid lang, ang isa sa iya nga mga “estudiante nga ginatudluan.”
Pinasahi ang paagi ni Presidente Nelson sa pagtudlo sa mga iban kag sa pagsaway sa positibo, matinahuron, kag makapahalipay nga paagi. Halimbawa siya sang isa ka Cristohanon nga tagipusuon kag ehemplo sa aton tanan. Halin sa iya, matun-an naton nga sa bisan ano nga mga sirkumstansya nga ara kita, pwede magsunod ang aton pangginawi kag ang aton nga mga tagipusuon sa mga prinsipio sang ebanghelyo ni Jesucristo.
May ara na kita subong sang dako nga bugay nga magsakdag sa aton nga propeta, si Presidente Russell M. Nelson. Sa bilog niya nga kabuhi, nakatuman siya sang kadamuan sang mga papel bilang estudiante, amay, maestro, bana, doktor, lider sa pristhud, lolo, kag Apostol. Gintuman niya ini nga mga papel sadto—kag nagapadayon siya sa amo sini—sing may tagipusuon sang isa ka propeta.
Mga kauturan, ang nasaksihan kag naintrahan naton sa sini nga adlaw, isa ka solemn assembly, nagapadulong sa akon nga panaksihon nga si Presidente Russell M. Nelson amo ang buhi nga baba sang Dios para sa tanan nga katawhan. Ginadugang ko man ang akon nga testimonya parte sa Dios nga Amay, kay Jesucristo, kag sa Iya nga papel bilang aton Manluluwas kag Mununubos. Sa ngalan ni Jesucristo, amen.