John S. Tanner

Gikan sa iyang pagkabata, si Juan Sears Tanner nakakaplag sa hingpit nga kalipay sa pagkat-on.

Kana nga kahinam milungtad hangtud sa iyang edukasyon, panarbaho, ug sa iyang daghang oportunidad sa pagtudlo sa ebanghelyo: una isip misyonaryo sa Brazil South Mission ug isip usa ka bishop, presidente sa stake , high councilor, magtutudlo sa klase sa Doktrina sa Ebanghelyo, presidente sa Brazil São Paulo South Mission (nga mahuman karong ting-init), ug karon isip unang magtatambag sa kinatibuk-ang kapangulohan sa Sunday School.

“Kon ang [pagtudlo] husto ang pagkahimo, maanaa ang Espiritu Santo ug inyong bation ang kahinam sa pagkat-on; inyong bation nga anaa kamo sa sagrado nga dapit,” miingon si Presidente Tanner.

Natawo sa Siyudad sa Salt Lake, Utah, niadtong Hulyo 27, 1950, kang William Coat Tanner Jr. ug ni Athelia Sears Tanner, si Presidente Tanner nagtubo sa Habagatang Pasadena, California, USA, nga maoy ikalima sa 13 ka anak. Ang iyang mga ginikanan mihimo og mabungahong palibut sa edukasyon diha sa panimalay, lakip ang usa ka lig-on nga pundasyon diha sa ebanghelyo. “Wala koy mahinumduman nga akong nakat-unan sa simbahan nga wala nako makat-uni una sa panimalay,” siya miingon. Siya usab nakapalambo og gugma alang sa literatura nga naalimahan samtang mikuha siya og English degree sa Brigham Young University ug doctorate sa English sa University of California, Berkeley.

Samtang didto sa BYU iyang nahimamat si Susan Winder. Nagkasuod sila og maayo diin mibunga sa maanindot nga relasyon. Nagpakasal sila sa Salt Lake Temple niadtong 1974. Sila dunay lima ka anak.

Gisugdan ni Presidente Tanner ang iyang akademik nga propesyon isip assistant nga propesor sa Florida State University. Nahimo siyang sakop sa magtutudlo sa BYU niadtong 1982; sukad niadto nagtrabaho siya didto isip assistant, associate, ug hingpit nga propesor sa English, ug isip department chairman ug academic vice-president.

Ang labing importante nga bahin sa pagtudlo sa ebanghelyo, siya miingon, naggikan sa butang nga iyang nakat-unan sa sayo nga bahin sa iyang pagpanarbaho: ang pagtudlo kinahanglang dili maggikan sa usa ka dapit sa kahadlok o ambisyon apan gikan sa usa ka dapit sa gugma—gikan sa gugma nga putli, ang tiunay nga gugma ni Kristo.