Tad R. Callister

Mga dekada sa wala pa ang iyang bag-ong call isip kinatibuk-ang presidente sa Sunday School, ang Sunday School adunay mahinungdanon nga bahin sa kinabuhi ni Tad R. Callister.

Samtang si Brother Callister nagserbisyo isip presidente sa Sunday School sa ward sa Brigham Young University, iyang nakaila ang umaabut niyang asawa, si Kathryn L. Saporiti, nga iyang gipakaslan niadtong Disyembre 20, 1968, sa Los Angeles Temple.

Sila mga ginikanan sa duha ka anak nga babaye ug upat ka lalaki; sila usab dunay 24 ka apo. “Daghang maayo nga mga butang ang mahitabo kon ikaw presidente sa Sunday School,” miingon si Brother Callister.

Natawo niadtong Disyembre 17, 1945, sa Glendale, California, kang Reed Eddington ug Norinne Callister, siya mipahayag nga siya—sama ni Nephi—natawo gikan sa “matarung nga mga ginikanan.”

“Ang akong amahan maoy akong bishop sa dihang nagdako ko,” miingon si Brother Callister. “Sagad siyang magdala og gagmayng kard, ug magmemorya og mga pulong gikan sa diksyonaryo ug sa kasulatan ug ni Shakespeare.”

Sama sa iyang amahan, si Brother Callister nakaangkon og legal nga trabaho. Human makagradwar sa accounting sa Brigham Young University, mieskwela siya og abogasiya sa University of California, Los Angeles, ug naangkon ang master’s degree sa tax law sa New York University. Siya nakatrabaho isip usa ka practicing attorney sa kompaniya sa Callister & Callister.

Sa dihang gitawag siya, si Brother Callister bag-o pa lang na-release sa iyang calling sa Kapangulohan sa Seventy ug sa Ikaduhang Korum sa Seventy, diin siya miserbisyo niini sukad 2008.

Sa wala pa kana, miserbisyo siya isip presidente sa Canada Toronto East Mission, Area Seventy, regional representative, presidente sa stake, bishop, stake mission president, presidente sa elders quorum ug, sa pagkabatan-on, nagmisyon sa Eastern Atlantic States Mission.

Mikomentaryo bahin sa nagsingabut nga mga kausaban sa kurikulum alang sa Sunday School sa mga adult, miingon si Brother Callister, “Ang kurikulum, siyempre, importante kaayo, apan kini dili sama kaimportante sa pamaagi kon unsaon kini sa pagtudlo. Ang labing importante mao nga kita motudlo sama sa pamaagi sa Manluluwas, nga kita magtudlo pinaagi sa Espiritu, ug nga kita motudlo aron makakabig.”