1 Ti balikas a ^anakita ni ^bIsaias, a lalaki nga anak ni Amoz, maipanggep iti Juda ken Jerusalem:

2 Ket mapasamakto kadagiti ud-udina nga aldaw, inton ti ^abantay nga ayan ti ^bbalay ti Apo ket maipasdekto iti tuktok ^cdagiti bantay, ken maitan-okto iti ngatoen dagiti turod, ket agtultultoyto a mapan ti amin a pagilian.

3 Ket adunto a tao ti mapan ken agkuna, Umaykayo, ket sumang-attayo iti bantay ti Apo, iti balay ti Dios ni Jacob; ket isuronatayonto kadagiti wagasna, ket ^amagnatayo kadagiti danana; ta aggapu ti Sion ti ^blinteg, ken ti balikas ti Apo manipud iti Jerusalem.

4 Ket isunto ti ^amangukom kadagiti pagilian, ken tubngarennanto ti adu a tao: pandayendanto nga arado dagiti espadada, ken dagiti pikada iti kumpay—saanton a makigubat ti maysa a pagilian a maibusor iti sabali, saandanton nga agsagana a makigubat iti uray kaanoman.

5 O balay ni Jacob, umaykayo ket magnatayo iti silaw ti Apo; wen, umaykayo, ta dakayo amin ket ^anaiyaw-awan, ti tunggal maysa iti dakes a dalanna.

6 Ngarud, O Apo, binaybay-am dagiti tattaom, ti balay ni Jacob, agsipud ta ^aumadudanto manipud iti daya, ket imdenganda dagiti mammadles a kas kadagiti ^bFilisteo, ket ^cpennekenda ti bagbagida kadagiti annak dagiti ganggannaet.

7 Napno met ti dagada iti pirak ken balitok, ket awan ti pannakaibus dagiti gamengda; napno met ti dagada ti kabalio, ket awan ti pannakaibus dagiti karuaheda.

8 Napno met ti dagada iti ^adidiosen; daydayawenda ti aramid dagiti imada, dayta inaramid dagiti ramayda.

9 Ket ti gagangay a tao ket saan nga ^aagtamed, ken saan nga agpakumbaba dagiti nabileg a tao, ngarud, saanmo a pakawanen.

10 O dakayo a nadangkes, sumrekkayo iti kabatuan, ket ^aaglemmengkayo iti katapukan, gapu ta saplitennakayonto ti butengyo iti Apo ken ti dayag ti kinatan-okna.

11 Ket mapasamakto a maipakumbabanton ti napangato a kita ti tao, ket maipababanto ti kinapalangguad ti tattao, ket tinto laeng Apo ti maitan-ok iti dayta nga aldaw.

12 Ta dumtengton iti mabiit ti ^aaldaw ti Apo ti Pangen kadagiti amin a pagilian, wen, iti tunggal maysa; wen, iti ^bnapalangguad ken napanakkel, ken iti tunggal maysa a natangig, ket maipababanto.

13 Wen, ket dumtengto ti aldaw ti Apo kadagiti amin a sedro ti Lebanon, ta nangato ken natangigda; ken kadagiti amin a roble ti Bashan;

14 Ken iti amin a nangato a bantay, ken iti amin a turod, ken iti amin a natangig a pagilian, ken iti tunggal tao;

15 Ken iti tunggal nangato a torre, ken iti tunggal naaladan a pader;

16 Ken iti amin a bapor iti ^abaybay, ken iti amin a bapor iti Tarsis, ken iti amin a napintas a ladawan.

17 Ken maipakumbabanton ti kinapannakkel ti tao, ken maipababanto ti kinapalangguad dagiti tattao; ket tinto laeng Apo ti maitan-okto iti ^adayta nga aldaw.

18 Ket naminpinsan a madadael dagiti didiosen.

19 Ket agkamangdanto kadagiti rukib dagiti bato, ken iti gukayab ti daga, ta saplitento ida ti butengda iti Apo ken ti dayag ti kinatan-okna, inton bumangon a mamagarigenggen iti daga.

20 Iti dayta nga aldaw ^aipuruakto ti tao dagiti didiosenna a pirak, ken dagiti didiosenna a balitok, nga inaramidna a pagdaydayawan, kadagiti marabutit ken kadagiti kurarapnit;

21 Mapanto kadagiti bakras dagiti bato, ken iti tuktok ti narusanger a bato, ta saplitento ida ti butengda iti Apo ken ti kinatan-ok ti dayagna, inton bumangon a mamagarigenggen iti daga.

22 ^aAdaywan ti tao, nga adda ti anges iti abut ti agongna; gapu ta adda kadi sungsungbatanna?