Templo, Balay ti Apo
Kinapudnona daytoy ti balay ti Apo. Kanayon a bilinen ti Apo dagiti taona nga agbangon kadagiti templo, dagiti nasantuan a pasdek a pangaramidan dagiti maikari a Santo kadagiti sagrado a seremonia ken ordinansa ti ebanghelio para kadakuada ken kadagiti natay. Sarsarungkaran ti Apo dagiti templona, ket dagitoy ti kasantuan kadagiti amin a lugar ti pagdaydayawan.
Mayakar-akar a templo ti tabernakulo a binangon ni Moises ken dagiti annak ti Israel. Inaramat dagiti Israelita bayat ti ipapanawda manipud iti Egipto.
Ti templo a binangon ni Solomon idiay Jerusalem ti kalatakan a naagapad iti Biblia (2 Cron. 2–5). Dinadael daytoy dagiti taga-Babilonia idi 600 S.C. ket binangon manen ni Zerubbabel dandani sangagasut a tawen kalpasanna (Es. 1–6). Nauram ti paset daytoy a templo idi 37 S.C., ket tinarimaan ni Herodes idi agangay. Dinadael dagiti Romano ti templo idi K.P. 70.
Iti Libro ni Mormon, nailungalong kadagiti nalinteg a pasurot ti Dios ti panagbangon ken panagdaydayawda iti templo (2Â Ne. 5:16; Mosiah 1:18; 3Â Ne. 11:1). Ti naannad a panagbangon ken panagaramat iti templo ti tanda ti pudpudno a Simbaan iti ania man a dispensasion, a pakairamanan ti naisubli a Simbaan iti aldawtayo. Ti Templo ti Kirtland ti immuna a templo a nabangon ken naidaton iti Apo iti daytoy a dispensasion. Manipud idin adun a templo ti naidaton kadagiti dagdaga iti lubong.