49. kafli

Opinberun gefin með spámanninum Joseph Smith til Sidneys Rigdon, Parleys P. Pratt og Lemans Copley í Kirtland, Ohio, í mars 1831 (History of the Church, 1:167–169). (Sumar söguskýrslur segja dagsetningu þessarar opinberunar vera í maí 1831.) Leman Copley hafði meðtekið fagnaðarerindið, en hélt enn fast við nokkrar af kenningum skekjara (Shakers eða Samfélag trúaðra á endurkomu Krists), en þeim hafði hann áður tilheyrt. Sumar trúarskoðanir skekjara voru þær, að síðari koma Krists væri þegar orðin veruleiki, og að hann hefði birst í mynd konu, Önnu Lee; að skírn í vatni væri ekki talin nauðsynleg; að neysla svínakjöts væri sérstaklega bönnuð, og margir þeirra neyttu ekki kjöts; að einlífi væri talið æðra hjónabandi. Sem formála að þessari opinberun skrifaði spámaðurinn: „Til þess að fá fullan skilning á þessu efni, spurði ég Drottin, og tók á móti því sem hér fer á eftir” (History of the Church, 1:167). Opinberunin hrakti nokkrar af meginkenningum skekjaranna. Áðurnefndir bræður fóru með eintak af opinberuninni til skekjaranna (nálægt Cleveland, Ohio) og lásu hana alla fyrir þá, en henni var hafnað.

1–7, Dagur og stund komu Krists mun haldast ókunn, þar til hann kemur; 8–14, Menn verða að iðrast, trúa á fagnaðarerindið og fylgja helgiathöfnum til að öðlast sáluhjálp; 15–16, Hjónabandið er vígt af Guði; 17–21, Neysla kjöts samþykkt; 22–28, Síon mun blómstra og Lamanítar blómgast sem rós fyrir síðari komuna.

  HLÝÐIÐ á orð mitt þjónar mínir, Sidney, Parley og Leman, því að sjá, sannlega segi ég yður, að ég gef yður fyrirmæli um að fara og prédika fyrir skekjurum fagnaðarerindi mitt, sem þér hafið meðtekið, já, eins og þér hafið meðtekið það.

  Sjá, ég segi yður, að þeir þrá að þekkja sannleikann að hluta, en ekki allan, því að þeir eru ekki einlægir gagnvart mér og verða að iðrast.

  Þess vegna sendi ég yður, þjónar mínir Sidney og Parley, til að prédika þeim fagnaðarerindið.

  Og þjónn minn Leman skal vígður til þessa verks, svo að hann geti rökrætt við þá, ekki samkvæmt því, sem hann hefur meðtekið frá þeim, heldur samkvæmt því, sem þér þjónar mínir skuluð kenna honum. Og með því að gjöra svo, mun ég blessa hann, ella mun honum ekki vel farnast.

  Svo segir Drottinn: Því að ég er Guð og hef sent minn eingetna son í heiminn til að endurleysa heiminn, og hef ákvarðað, að sá sem tekur á móti honum skuli hólpinn verða, en sá sem tekur ekki á móti honum skal fordæmdur verða—

  Og þeir hafa gjört eins og þá lysti við mannssoninn. Og hann hefur tekið vald sitt til hægri handar dýrðar sinnar, og ríkir nú á himnum, og mun sitja við völd þar til hann stígur niður til jarðar til að leggja alla óvini að fótum sér. Og sá tími er í nánd—

  Ég, Drottinn Guð, hef talað þetta. En daginn og stundina veit enginn maður, né englar himins, né heldur munu þeir vita fyrr en hann kemur.

  Þess vegna vil ég að allir menn iðrist, því að allir eru syndugir, nema þeir sem ég hef geymt mér, heilagir menn, sem þér vitið ekki um.

  Þess vegna segi ég yður, að ég hef sent yður ævarandi sáttmála minn, já, þann, sem var frá upphafi.

  10 Og það, sem ég hef heitið, hef ég uppfyllt, og þjóðir jarðar munu lúta honum, ef ekki sjálfviljugar, þá skulu þær niðurlægjast, því að það, sem nú upphefur sjálft sig, skal niðurlægt verða.

  11 Þess vegna gef ég yður þau fyrirmæli, að fara út á meðal þessa fólks og segja því, eins og postuli minn til forna, sem nefndur var Pétur:

  12 Trúið á nafn Drottins Jesú, sem var á jörðu og koma mun, upphafið og endirinn—

  13 Iðrist og látið skírast í nafni Jesú Krists til fyrirgefningar syndanna, samkvæmt hinu heilaga boðorði—

  14 Og hver sá, sem það gjörir, mun meðtaka gjöf heilags anda með handayfirlagningu öldunga kirkjunnar.

  15 Og sannlega segi ég yður enn, að hver sá, sem bannar hjónabönd, er ekki vígður af Guði, því að hjónabandið hefur Guð vígt manninum til handa.

  16 Því er það lögmálinu samkvæmt, að hann hafi eina eiginkonu, og þau tvö skulu vera eitt hold, og allt er þetta til þess að jörðin nái tilgangi sköpunar sinnar—

  17 Og svo að hún megi fyllast ákveðnum fjölda manna í samræmi við sköpun hans áður en heimurinn var skapaður.

  18 Og sá, sem bannar kjöt, að maðurinn skuli ekki neyta þess, er ekki vígður af Guði—

  19 Því að sjá, dýr merkurinnar og fuglar loftsins og það, sem af jörðu kemur, er ætlað manninum til fæðu og klæðis, svo að hann hafi gnægð.

  20 En ekki er einum manni ætlað að eiga umfram annan, þess vegna liggur heimurinn í synd.

  21 Og vei þeim manni, sem að þarflausu úthellir blóði eða sóar holdi.

  22 Og sannlega segi ég yður enn, að mannssonurinn kemur hvorki í mynd konu, né karls, sem gengur um á jörðunni.

  23 Látið þess vegna ekki blekkjast, heldur haldið staðfastir áfram og lítið fram til þess, þá er himnarnir bifast og jörðin skelfur og veltist fram og aftur líkt og drukkinn maður, og dalirnir lyftast og fjöllin hjaðna og hamrarnir verða að jafnsléttum—og allt verður þetta, þegar engillinn þeytir básúnu sína.

  24 En áður en hinn mikli dagur Drottins kemur, mun Jakob blómstra í eyðimörkinni og Lamanítarnir blómgast sem rós.

  25 Síon skal blómstra á hæðunum og fagna á fjöllunum og hún skal safnast saman á þeim stað, sem ég hef útnefnt.

  26 Sjá, ég segi yður, farið eins og ég hef boðið yður, iðrist allra synda yðar. Biðjið og yður mun gefast, knýið á og fyrir yður mun upp lokið verða.

  27 Sjá, ég mun fara fyrir yður og ég mun vera bakvörður yðar. Og ég mun verða mitt á meðal yðar og þér verðið ekki sigraðir.

  28 Sjá, ég er Jesús Kristur, og ég kem skjótt. Já, vissulega. Amen.