Kabahin sa mga Kurtina, Pagkakontento, ug Pasko
Ni Presidente Dieter F. Uchtdorf
Ikaduhang Magtatambag sa Unang Kapangulohan
Pagkanindot, pagkamalipayong panahon sa tuig! Naghinam-hinam ko makaanhi dinhi sa unang Dominggo sa Disyembre, diin kita adunay kahigayunan nga maminaw sa nindot nga musika ug mga mensahe nga mosugod nga sa laing bulahang panahon sa Pasko. Ug usab kita naghinam-hinam nga makapaminaw sa propeta sa Dios, atong pinalanggang si Presidente Monson.
Sa kanunay ang Pasko espesyal nga panahon alang kanako. Sa dihang batan-on pa ko nagpuyo ko sa Czechoslovakia, ug gipalibutan kami sa daghan, karaan kaayong mga tradisyon sa Pasko. Bisan tuod daghang katuigan na ang milabay, mohinumdom gihapon ko niini nga may kawili ug kalumo nga naghatag kanako og lalum nga mga pagbati sa pasalamat ug kalipay.
Usa niana ka tuig, tingali kwatro anyos pa ko, anaa ko sa kwarto kon asa anaa ang among Christmas tree. Giadornohan kini og maanindot, naggilak-gilak nga mga dayan-dayan. Ang mga sanga napuno sa silver tinsel, nakapasanag sa kahayag sa mga kandila nga naggilak-gilak sa akong palibut. Sa duol may bintana nga nag-atubang sa dalan; ang mga kurtina niini naggilak-gilak sa kahayag, nagdugang og pihong misteryo ug madyik sa talan-awon.
Mao kadtong adlawa nga nakadiskobre ko og duha ka butang.
Ang una mao nga kon akong kuptan ang nagsigang kandila luyo sa kurtina, ang hayag maggilak-gilak lusot sa nipis nga panapton, mapakahimo niini nga hilabihang kanindot ug daw makalamat.
Ang ikaduha nga akong nadiskobrehan mao nga ang mga kurtina masunog. Mahimong matag-anan ninyo, nasunog sa kandila ang mga panapton ug daling mikatag, hapit makasunog sa bong-bong ug kisame sa among balay.
Misyagit ko sa kahadlok. Ang akong ginikanan nagdagan gikan sa pikas kwarto ug dali kaayong mibira sa mga panapton ug gitamak-tamakan ang kalayo, nagpugong sa posibling dako nga kadaut.
Sa dihang wala na ang kakuyaw, ang nasunog nga kurtina sa nindot na unta nga bintana nagpasad sa salog; ang walay kurtina nga daw delikado nga bintana anaa sa akong luyo, mora og nanghimaraut; ug nagbarug kong gikuyawan atubangan sa akong inahan ug amahan nga walay ekplenasyon o rason.
Nasayud ko, nga may kasiguradoan sa usa ka kwatro anyos nga batang lalaki, nga naguba nako ang Pasko!
Pasko ug Pagkahingpit
Dul-an na sa pito ka dekada sukad niadtong makalilisang nga adlaw. Ug isip resulta sa bugtong arson nga akong nahimo, nakakat-on ko og daghang importanting mga butang.
Una, ayaw gayud pagdula og kalayo—usa ka importante nga mensahe nga may literal ug simbolikanhon nga pasabut sa tanan, dili lang sa mga bata.
Ikaduha, bisan tuod hapit nasunog nako ang among apartment, wala nako gub-a ang Pasko.
Siyempre, ang sunog makahahadlok kaayo nga kasinatian. Sigurado ko ang akong inahan ug amahan nahibulong ug nagguol nga nakahimo ko og dili maayo. Apan sa katapusan, wala kini makausab sa gugma alang sa among pamilya, ni nakadaut sa katalagsaon sa panahon sa Pasko.
Kaniadto, ang mga batang German kanunay istoryahan sa usa ka tradisyon nga inigka Pasko ang buotang mga bata makadawat og gasa ug kendi, samtang kadtong nagpabadlong pagasilutan ug pagabunalan og die Rute, usa ka sanga sa birch. Sa kasagarang sumbanan, ang pagsunog sa mga kurtina sa sala mahimong pagpabadlong—ang pagka-timing sa akong nahimong sayop mahimong grabe pa. Apan wala ko bunali og die Rute. Ang akong panumduman ug sa uban pang mga Pasko sa akong kabatan-on maanindot ug bililhon. Ang pagkasayud nga ang akong pamilya nahigugma gihapon nako usa ka dakong panalangin ug talagsaong leksyon.
Maghinumdom, tingali ang akong kahadlok nga akong naguba ang Pasko naggikan sa dili hingpit nga pagsabut kon unsa gayud ang Pasko. Ug akong nabantayan nga dili lang mga kwatro anyos ang aduna niining sayop nga pagsabut.
Usahay ingon og ang atong mga paningkamot aron makasinati og hingpit nga panahon sa Pasko susama sa nagdula og Jenga—kabalo ninyo, kanang dula gamit ang gagmayng block nga huyang nga gipatong aron mahimong tore. Samtang kita maningkamot nga patas-an ang tore, mokuha ta og block sa may ubos nga bahin sa dili pa nato patungan ang ibabawng bahin sa dili lig-ong estruktura.
Kadtong gagmayng block nga hinimo sa kahoy mao ang simbolo sa mga panghitabo alang sa hingpit nga Pasko nga gusto kaayo natong maangkon. Kon maglantaw kita kon unsa gayud mahitabo ang tanan—ang hingpit nga Christmas tree, hingpit nga mga suga, hingpit nga mga gasa, ug hingpit nga mga panghitabo sa pamilya. Gani himoon nato og balik ang pipila sa nindot kaayong panghitabo sa nangaging mga Pasko, ug wala nay makapatagbaw kanato kaysa kahingpitan.
Sa dili madugay, adunay dili maayo nga mahitabo—natumba ang block nga hinimo sa kahoy, nasunog ang panapton, napaig ang turkey, sayop ang gidak-on sa sweater, nahutdan og mga bateriya ang mga dulaan, nag-away ang mga bata, mograbe ang pagpamugos—ug ang handurawan sa hingpit nga Pasko nga atong gilantaw, ang madyik nga gusto natong himoon, nahugno. Isip resulta, ang panahon sa Pasko sa kanunay puno sa kakapoy, kabalaka, kasagmuyo, ug gani usahay makapawala og kadasig.
Apan, kon ang atong kasingkasing ug hunahuna andam modawat sa diwa sa Pasko, kita makaila sa talagsaong butang nga nahitabo kanato nga modirekta sa atong atensyon sa langitnong mga butang. Kini sa kasagaran gamayng butang—kita makabasa sa kasulatan; makadungog og sagradong awit sa Pasko ug maminaw gayud sa mga pulong niini; o makasaksi og matinud-anong pagpadayag sa gugma. Sa bisan unsa nga pamaagi, ang Espiritu nagtandog sa atong kasingkasing, ug atong makita nga ang Pasko, sa tinuoray nga kahulugan, mas lig-on ug molahutay kaysa dili kaayo importanting mga butang sa kinabuhi nga atong gigamit sa pag-adorno niini.
Ang Pasko Kabahin ni Kristo
Kita makaamgo niining bililhong panghitabo sa atong gibati ug nasayran diha sa atong kasingkasing—ang Pasko kabahin gayud ni Kristo.
Ang Pasko ug ang pipila sa gihandum nga mga tradisyon sa panahon nagpahinumdon kanato nga kita, sama sa kaarang Maalamong mga Tawo, magtinguha kang Kristo ug ihalad Kaniya ang labing bililhon nga mga gasa: usa ka masulub-on nga kasingkasing ug mahinulsulon nga espiritu. Kinahanglang atong ihalad Kaniya ang atong gugma. Kinahanglan nga andam kita nga modala sa Iyang ngalan ug molakaw sa dalan sa pagkadisipulo. Kinahanglang mosaad kita nga kanunay mohinumdum Kaniya, mosunod sa Iyang ehemplo, ug magbuhat og kaayohan.1
Dili kita makatanyag Kaniya sa gasa sa kahingpitan sa tanang butang tungod kay kini nga gasa dili mahimo sa atong kapasidad—sa pagkakaron. Ang Ginoo wala nagpaabut kanato nga kita makabalhin og mga bukid. Apan Siya nagsugo nga atong ihatag ang atong labing maayo nga paningkamot sa paglihok, kutob sa atong mahimo, maglakaw sa agianan nga Iyang giandam ug gitudlo.
Ug unsa ang gasa sa Manluluwas niadtong andam nga modala niining mga gasa ngadto Kaniya?
Tingali mahimong kini ang dili patas nga pagbinayloay og gasa sa kasaysayan sa tibuok kalibutan. Ang gasa sa Manluluwas makapakulbahinam.
Sugdan nato sa pagka-imortal. Tungod nabuntog sa Manluluwas ang kamatayon, ang tanang lalaki ug babaye—matarung ug dili matarung—mahangturong mabuhi.2
Dayon, pagpasaylo—bisan tuod ang atong mga sala ug kahuyang maingon nga mapula, kini mahimong puti sama sa nieve tungod Kaniya.3
Ug katapusan, ang kinabuhing dayon—ang labing mahinungdanon nga gasa sa tanan.4 Tungod sa Pag-ula ni Kristo, wala lang ta magarantiyahi og walay kinutuban nga kinabuhi, apan Siya naghalad sa posibilidad sa dili mahunahuna nga kalidad sa kinabuhi.5
Ang pipila sa Iyang balaanong gasa gireserba alang nianang mahimayaong umaabut nga adlaw nga kita mobalik sa Iyang presensya.
Apan Siya naghatag og daghang gasa ug Iyang grasya kanato matag adlaw. Siya nagsaad nga maanaa kanato kanunay, maanaa kon kita nanginahanglan og paghupay,6 sa pagpabarug kanato kon kita madagma, sa pag-agak kon gikinahanglan, sa kasubo, ug magmaya uban kanato. Matag adlaw Siya nagtanyag sa pagtabang kanato ug pag-usab sa ordinaryong kinabuhi ngadto sa talagsaong esprituhanong mga kasinatian.
Usa ka Panalangin sa Pasko
Siyempre, kita wala magkinahanglan og holiday o mga tradisyon sa Pasko sa paghinumdom ni Jesukristo, ang Manluluwas. Apan ang pagsaulog sa Pasko makatabang kanato sa paghinumdom Kaniya. Ang balaang panahon sa Pasko mahimong oportunidad sa pagpasalig og usab nga ipadayon nga magsiga ang kalayo sa Espiritu ug ang himaya sa Anak sa Dios magdilaab sa atong kasingkasing matag adlaw hangtud sa tibuok tuig.
Kini talagsaon nga panahon sa tuig. Mahimong dili kini hingpit. Apan kon ang atong kasingkasing nakapunting sa Manluluwas, kita magmaya bisan sa mga pagka dili hingpit sa panahon. Mga kaigsoonan, pinalanggang kahigalaan, unta kita kanunay mahinumdom sa pagdala og gasa ngadto Kaniya kinsa naghatag sa tanan alang kanato. Unta kita kanunay mahinumdom ug mapasalamaton nga sa pagkatawo niana nga Bata, ang tibuok kalibutan nagmaya. Ug unta ang matag panahon sa Pasko magpahinumdom kanato sa pagpataas sa atong tingog ug mopuno sa atong kasingkasing uban sa kalipay ug pasalamat nga si Kristo ang Hari moabut! Si Kristo buhi! Siya tinuod. Siya ang atong Manunubos panahon sa Pasko ug sa kanunay. Niini ako balaanong mopamatuod.
Magbilin ko kaninyo sa panalangin sa gugma ug sa akong mabinationg panghinaut alang sa makahuluganong panahon sa Pasko, sa ngalan ni Jesukristo, amen.