Ritokoj eo Em̧m̧an im Ekam̧oolol

Ej juon tōre aiboojoj an iiō! N̄e ij ron̄ kōjan̄jan̄ ko, lo tōm̧a ko, im en̄jake m̧ōļo in mejatoto, ealikkar aō kememej elōn̄ iien ko ilo aolepān mour eo aō n̄e en̄jake ko an Kūrijm̧ōj kar letok n̄an eō en̄jake ko rem̧m̧an im im̧we eō.

Āinwōt elōn̄ iaami, ij lo bwe jet iaan ememļo̧k ko rekanooj in aorōk im okmeņeņ an Kūrijm̧ōj rej itok jān tōre in ajri eo aō. Men̄e iaar rūttoļo̧k ilo jekjek ko raar nana, ro jinō im jema raar kōņaan bwe Kūrijm̧ōj en juon tōre in lan̄lōn̄ im kabwilōn̄lōn̄ n̄an ajri ro nejier. Raar joļo̧k eļap iien n̄an kōm̧m̧an bwe Kūrijm̧ōj en juon tōre eaorōk n̄an baam̧le eo am.

Kōm ajri ro kar kōm̧m̧ani menin leļo̧k ko n̄an doon. Juon iiō, ij kememej pijaik juon pija āinwōt juon menin leļo̧k an Kūrijm̧ōj n̄an sister eo aō. Eaar jab juon pija eo em̧m̧an, bōtaab eaar kōjparoke āinwōt juon men aorōk. Eļap aō iakwe menin! Bar juon iiō ļaddik, eo eaar 12 iiō rūtto ļo̧k jān n̄a, kar letok n̄an eō juon menin letok eaorōk. Eaar lo juon aļaļ ilo baak eo epaake kapijuknen eo am im eaar ļōme juon bakbōk kein ikkure jān e. Eaar ļamwaan, eaar jab kōjeij n̄an jidik, bōtaab o, iaar kaorōke bwe menin letok jab in kōnke eaar jān e!

Ejjab ke juon iaan lan̄lōn̄ ko reļļap an Kūrijm̧ōj loe laudin̄din̄ eo iturin mejān ajri ro reddik n̄e rej bōk ilo peier juon menin leļo̧k kitimi me ej n̄an er ke?

Ilo ad rūttoļo̧k, mekarta, maron̄ eo am n̄an bōk menin letok ko kōn ejja laudin̄din̄ in wōt im jouj eo em̧ool āinwōt edikļo̧k. Jet iien armej em̧ool rej tōpar ijo me rejjab maron̄ bōk juon menin letok ak, n̄an jekjek eo, em̧ool juon nōbar ilo ejjeļo̧k jook ak en̄jake ko an m̧uri. Ebōd aer ļōmņak bwe wāween eo wōt em̧m̧an n̄an ukōt bōkā eo n̄an bōk menin letok eo ej kōn bar kōro̧o̧l ļo̧k juon men ak men eo eļapļo̧k ak aorōk ļo̧k. Jet rej likjab in lo aorōk eo an juon menin letok—kalimjōk wōt jekjek eo itulikin ak aorōk eo ak kowaan tum̧wilaļ in menin letok eo āinwōt n̄an riletok eo em̧ool.

Menin ej kakememej eō kōn juon iien me eaar bōk jikin bon̄ōn eo āliktata in mour eo an Rilo̧mo̧o̧r eo. Eaar aiin tok rikaļoor ro An rejitōn bōro Ipeļaakin, kar ruje pilawe eo ippāer, im kar leļo̧k n̄an er kōmeļeļe ko raorōk āliktata. Kwoj ke kememej bwe ke kōjota eo ej wōnm̧aanļo̧k, Jisōs eaar jutak jān tebōļ eo, kar lutōk dān n̄an juon pejin, im kar jino kwaļ neen rikaļoor ro An?

Ke Eaar itok n̄an Simon Piter, rieon̄ad eo eaar jab kōņaan, ba, “Kwoj jamin kwaļ neeō.” Rilo̧mo̧o̧r eo eaar ilo mera kajim̧we e: “Eļan̄n̄e I jab kwaļe eo, ejjeļo̧k am̧ ājinkōj Ippa.”¹

Ij tōmak Piter eaar ļōmņak eaar wōr un ko an rem̧m̧an n̄an jab kōņaan menin letok in im en̄jake bwe eaar kōm̧m̧ane men eo ejim̧we. Bōtaab ilo tōre eo, eaar jab kanooj meļeļe aorōk eo ilo jetōb an ta eo Jisōs eaar leļo̧k n̄an e.

Ilo tōre in Kūrijm̧ōj jej kōnono eļap kōn leļo̧k, im jej aolep jeļā bwe “m̧ōņōņō eļapļo̧k jān bōk,”² bōtaab ij ļōmņak eļan̄n̄e jet iien jej kowaan ak em̧o̧ol jab kaorōk aorōk eo an erom juon ritokje em̧m̧an.

Ilo juon raan in Kūrijm̧ōj elōn̄ iiō remootļo̧k, juon leddik edik eaar bōk juon kein kōm̧m̧an m̧arm̧ar jān pinid ko reaiboojoj. Jemen leddik in eaar elmakot bwe leddik in en kōm̧m̧ane juon n̄an juon iaan ro nukun eo eaar itok n̄an bade eo an baam̧le.

Turin mejān leddik in eaar itok limo im eaar ilo̧k in jino kōm̧m̧ane ta eo eaar ļōmņak enaaj juon menin leļo̧k em̧m̧an. Eaar kālet armej eo eaar kōņaan kōm̧m̧ane n̄an—juon nej jinen kōrā erūtto kōn juon turin māj ejam̧ōņōņō im nana tam̧m̧ūn.

“Bōlen eļan̄n̄e ij kōm̧mane juon an pen̄kōļ,” leddik eo edik eaar ļōmņak, “enaaj kōm̧m̧an bwe en m̧ōņōņō.”

Im kōn menin eaar kanooj kālet kajjojo pinid im kōm̧m̧ane ijo em̧m̧an tata ippān n̄an kōm̧m̧ane menin leļo̧k n̄an kōrā eo nej jinen.

Ke eaar dedeļo̧k an kōm̧m̧ane, eaar jibadōkļo̧k kōrā eo nej jinen, leļo̧k n̄an e pen̄kōļ eo, im jiron̄e eaar eje im kōm̧m̧ane n̄an e.

Ruum̧ eo eaar ikōn̄ ke kōrā eo nej jinen eaar bōk pen̄kōļ eo kōn addi im jantin pein āinwōt n̄e eaar jibwe juon to in men ejjir. Eaar kalimjōk menin leļo̧k in, kabūrōrōik mejān im kōm̧akūtkūt bo̧tin, im kotlo̧k pen̄kōļ eo n̄an bar pein leddik eo edik. Innām eaar oktakļo̧k jān e ilo an jab ba juon naan im jino kōnono n̄an bar juon.

Turin mejān leddik in eaar oktak im būrōrō kōn an jook. Kōn inepata eļap, eaar diwōjļo̧k jān ruum̧ eo.

Ro jinen im jemen raar kajieon̄ kaenōm̧m̧ane. Raar kajieon̄ jipan̄ e meļeļe bwe pen̄kōļ eo eaar aiboojoj—jekdo̧o̧n lej eo an kōrā eo nej jinen. Bōtaab leddik eo edik eaar jab maron̄ jipan̄ e en̄jake jab m̧ōņōņō aolep iien eaar ļōmņak kōn menin.

N̄oul iiō kar mootļo̧k, im leddik eo edik—kiiō juon aunty make—ej kememej wōt, kōn jidik būrom̧ōj, bwe raan eo ke menin leļo̧k an ke eaar dik kar kowane.

Aolep menin letok n̄an kōj—eļaptata menin letok eo me ej itok jān bōro—ej juon iien em̧m̧an n̄an kalōk ak kōkajoorļo̧k juon korak in iakwe. N̄e jej ritokje ro rem̧m̧an im kam̧oolol, jej kōpeļļok kōjām eo n̄an kam̧wilaļ ļo̧k kadkad eo ad ippān riletok eo an menin letok eo. Bōtaab n̄e jej likjab in kam̧oolol ak em̧ool joļo̧k menin letok eo, jejjab kōmetak wōt ro me rej letok er make n̄an kōj, ak ilo jet wāween, jej kakkure kōj make barāinwōt.

Rilo̧mo̧o̧r eaar katakin bwe eļan̄n̄e jej jab “erom āinwōt oktak im erom āindwōt ajri re dik, [kom] jamin deļo̧n̄ ilo aelōn̄ in lan̄.”³

Ilo ad alooje kaitoktok limo eo im kabwilōn̄lōn̄ eo an ajri ro ilo tōre in an juon iiō, bolen jemaron̄ kakememej kōj make n̄an bar lo im bar bōk juon m̧wil eaorōk im aiboojoj an ajri ro—maron̄ eo n̄an bōk kōn m̧ool in jouj im kōn kam̧oolol.

Ejjab kailbōkbōk, Rilo̧mo̧o̧r eo ej ad waanjon̄ak eweppān ejjab wōt kōn leļo̧k ilo tenkwadik ak barāinwōt kōn bōk kōn tenkwadik. Ke Eaar pād ilo Bethany, epaake jem̧ļo̧k in ļo̧k kwaļo̧k eo An ilo mour in, juon kōrā eaar jibadōkļo̧k E kōn juon alabaster bo̧k ejeja im oil eļap wōņāān. Eaar kōtļo̧k bwe En kapit bōran kōn menin leļo̧k in eaorōk.

Jet ro raar kam̧ool menin raar illu. “Ejej tokjān an kar joļo̧k jāān,” raar ba. Oil eo eaar kanooj ļap wōņaan. Emaron̄ kar wia kake im jāān eo maron̄ kar leļo̧k n̄an rijeram̧ōl. Raar lo aorōk eo an menin letok eo in kanniōk im kanooj kar likjab eļapļo̧k kōn aorōk eo an ilo jetōb.

Bōtaab Rilo̧mo̧o̧r eo eaar meļeļe kōkaļļe eo im iakwe eo ilo menin letok eo, im Eaar bōke ilo tenkwadik.

“Kom̧win likūt e,” Eaar ba n̄an ro me rej alin̄ūrlūr. “Etke kom̧ij an̄o̧te e? … E ar jerbal n̄an Eō jerbal em̧m̧an: ear kapit ānbwinniō m̧okta n̄an kalbwin Eō.”⁴

Ro jeiū im jatū, kain ritokje rōt kōj? Jej ke, āinwōt Rilo̧mo̧o̧r eo, kile menin letok ko āinwōt kōkaļļe ko an iakwe?

Ilo tōre in ad, Rilo̧mo̧o̧r eaar ba bwe ro me rej bōk aolep men ko kōn kam̧oolol naaj kaiboojoj e.⁵ Im tarlep in laļ in ej aer.⁶

Ij kōjatdikdik bwe Kūrijm̧ōj in im aolep raan an iiō eo jenaaj ļōmņak kōn, eļaptata, elōn̄ menin letok ko kar litok n̄an kōj jān Jemedwōj Ilan̄. Ij kōjatdikdik jenaaj bōk menin letok kein kōn bwilōn̄, kam̧oolol, im lem̧ōņōņō eo an juon ajri.

En̄jake ko aō rej erom man̄ūtn̄ūt im jouj n̄e ij ļōmņak kōn menin letok ko an Jemed ilo Lan̄ eo ej iakwe, em̧m̧an, im tenkwadik eaar litok n̄an kōj: menin letok eo pen kōmeļeļeiki an Jetōb Kwojarjar, kabwilōn̄lōn̄ eo an jeorļo̧k bōd, revelesōn an juon make im tōl, aenōm̧m̧an an Rilo̧mo̧o̧r eo, jeļā eo im kaenōm̧m̧an eo bwe mej ej anjo ioon—im elōn̄, elōn̄ ļo̧k.

Eo aorōk tata, Anij eaar letok n̄an kōj menin letok eo an Nejin Emake Wōt, eo eaar ajeļo̧k mour eo An “bwe jabdewōt eo ej tōmak ilo E en jab jako, ak en mour indeeo.”⁷

Em̧ōj ke ad bōk menin letok ko kōn kam̧oolol ettā? Ak jej ke kowani kōn utiej bōro eo ak ļōmņak eo bwe jej make? Jej ke en̄jake ke iakwe eo an Jemed kar kwaļo̧k ilo menin letok kein? Jej ke bōki ilo juon wāween eo me ej kam̧wilaļ ļo̧k kadkad ko ad ippān Riletok eo? Ak jej ke lukkuun m̧ad n̄an em̧ool kile ta eo Anij ej letok n̄an kōj kajjojo im aolep raan?

Jejeļā bwe “Anij ej yokwe eo e m̧ōņōņō in leļo̧k,”⁸ak Ej ke bar iakwe ritokje eo em̧m̧an, ekam̧oolol, im m̧ōņōņō?

Ejjab kōjeram̧m̧an juon armej eļan̄n̄e menin letok eo ej leļo̧k n̄an e im ejjab bōk menin letok eo. Armej eo ejjab lem̧ōņōņō ilo menin leļo̧k eo leļo̧k n̄an e, ak jab lem̧ōņōņō ippān rileļo̧k menin letok eo.⁹

Men̄e em̧ōj ad jeļā kōn 9 Kūrijm̧ōj ak 90, jej ajri ro wōt—jej aolep ajri ro nejin Jemedwōj Ilan̄.

Kōn menin, ewōr ippād maron̄ eo n̄an en̄jake tōre in Kūrijm̧ōj in kōn bwilōn̄ eo im kautiej eo an juon ajri. Epād ippād n̄an ba, “buruō elutōk majidjid kōn lan̄lōn̄, im inaaj m̧ōņōņō ilo aō Anij”¹⁰—Riletok eo an aolep menin letok em̧m̧an.

Ippāmi, im ippān aolep ro me rej ikirelel n̄an ļoor Kraist, ij kotak ainikiō ilo nōbar ad Anij potato kōn menin letok eo an Nejin eoarōk.

Tōre in Kūrijm̧ōj in im iien otemjeļo̧k, ij jar bwe jenaaj lo menin letok kabwilōn̄lōn̄ eo an ļotak eo an Nejin Anij kōn ļōmņak eo an juon ajri. Ij jar bwe ilo kakobaba n̄an leļo̧k menin leļo̧k ko rem̧m̧an, jenaaj kajieon̄ erom ritokje ro rem̧m̧an im kam̧oolol. Ilo ad kōm̧m̧ane āindein, jetōb eo an tōre in naaj kōļapļo̧k būruwōd im kaitokļo̧k lan̄lōn̄ eo ad eļap jān jon̄e. Ilo etan Jisōs Kraist, amen.