Kūrijṃōj— iien n̄an Iakwe, Jerbal, im Jeorlok Ad Doon Bōd.
Ij iakwe ļo̧k ilo ao lale an ajri ro ketak im pojak n̄an mejatoto in Kūrijm̧ōj. Ij keememej ļo̧k ikdeleel eo ao make āinwōt juon ajri in Būraimere ekar rittoļo̧k ilo Argentina. Juon iiō, rūkaki in Būraimere am ekar kajjitōk ippem n̄an karreo kein ikkure ko am im rej mōr, kwale bōran to̧le ko nejim, im kakōm̧anm̧an nuknuk ko aer bwe kōm̧in maron̄ leļo̧k n̄an ajri ro rej pād ilo aujipitōļ ilo iien Kūrijm̧ōj.
Ilo wiik eo ke ij karreo to̧le ko nejū, jinō ekar kajjitok ippa ta eo ij kōm̧m̧ane n̄an er. Ikar kōmeļeļe ta eo rūkaki eo an Būraimere eo am ekar kajjitōk bwe kōm̧in kōm̧m̧ane, im ekar uwaak, “Kwon barāinwōt leļo̧k juon iaan kein ikkure ko am rem̧m̧an n̄an ajri raņ.”
Kōn menin ikar uwaak, “Etke inej maron̄ kōm̧m̧an men ņe?”
Innām ekar ba juon men ekar pād ippa aolepān iiō kein. Ekar ba, “Cris, em̧m̧an n̄e jej leļo̧k juon men eo eļap an em̧m̧an ippād, juon men eo epen n̄an ad leļo̧k kōnke eļap ad kaorok e, juon men eo emaron̄ juon menin leļo̧k. En̄in ej ta eo Jemedwōj Ilan̄ ekar letok n̄an kōj. Eaar jilkintok Nejin, Jisōs Kraist—ejjab jabdewōt bajjōk nejin ļaddik. Ekar jilkintok Jitōn Bōro im wānōk nejin bwe jen māron bar rool n̄an mour ippān bar juon alen.”
Iiō eo ikar leļo̧k juon iaan kein ikkure ko aō, ikar meļeļe jidik kōn menin in letok eo an Jemedwōj Ilan̄ n̄an kōj—Nejin eo Jitōn Bōro, Jisōs Kraist, eo ekar iakwe im jōb ļōmņak kōn e make kar letok mour eo An n̄an kōj.
Aolep iiō, juon iaan un ko n̄an Kūrijṃōj, jema ej kijor riit jān jeje ko rekwojarjar jān bok eo aiboojoj Luk:
“Im ilo raan ko, juon kien ej ilo̧k jān Sizar Augōstōs, bwe ren je ri lal otemjej. …
“Im er otemjej rej ilo̧k bwe ren jeje er, jabdewōt iiaer n̄an jikin kwelo̧k eo an.
“Im barāinwōt Josep ear wanlōn̄ jān Galili, jān jikin kweilo̧k Nazeret, n̄an Judia, n̄an jikin kweilo̧k an Devid, ņa etan Betleem; …
“Bwe ren je e, ippān Meri m̧okta jān airro pālele, im e bōro̧ro.
“Im, ke, rej pād ijo, e jejjet raan ko ej keotak.
“Im e ej keotak m̧aanjien, im kirboke, im kōbabu E ilo menjer; bwe ejeļo̧k jikier ilo im̧ōn euwamāejet.
“Im ilo āne eo ewor seperd rej pād ilo jikin wūjooj, im lale bwijjin sip ko aer ilo bon̄.
“Im, lo, enjel in Irooj ej jutal itureir, im wōj an Irooj ej romaak ioer: im eļap aer lōļn̄o̧n.
Im enjel ej ba n̄an er, Kom̧win jab lōļn̄o̧n: bwe, lo, ij bōkwōj n̄an kom̧ naan ko rem̧m̧an naan in lan̄lōn̄ eļap, im enaaj n̄an armej otemjeļo̧k.
“Bwe rainin e ļotak ñan kom̧ ilo jikin kweiļo̧k an Devid, Rilo̧mo̧o̧r, E Kraist Irooj.
“Im men in kakōļļe n̄an kom̧: kom̧ naaj lo nin̄nin̄ eo em̧ōj kirboke im ej babu ilo menjer.
“Im e m̧ōkaj weaaktok ippān enjeļ tok elōn̄ iaan ro ri lan̄, im rej nōbar Anij im ba,
“Aiboojoj n̄an Anij ilo uteijtata, im aenōm̧m̧an ioon laļ, ippān armej raņ E bun̄būruon kōn er.”1
Ro jeiu im jatu, elmen an itok limoid ilo ejja aneōm̧m̧an in im bun̄būruōd kōn armej?
Ke ikar lin̄ūri kajjitōk in ilo jejo wiik ko, likūt ilo ļōmņak ke Kūrijṃōj ej iien n̄an leļo̧k, jilu m̧akūtkūt—bōlen jilu menin in leļo̧k kōj kajjojo emaron̄ leļo̧k—ekar itōk n̄an ļōmņak e aō. Kōj, aaet, jej leļo̧k menin in leļo̧k kein ilowaan iiō in, ak ilo aiboojoj eo an iien Kūrijṃōj, jej keememej menin in letok eo an Jemed kōn nejin im bōke im lale ta eo jemaron̄ ļoor ilo waanjon̄ak ko aer ilo ad kōlapļo̧k kajjojo kajoor im ikedelel n̄an leļo̧k.
1. Kūrijṃōj ej iien leļo̧k iakwe.
Jemedwōj Ilan̄ im Rilo̧mo̧o̧r eo ad, Jisōs Kraist, rej waanjon̄ak eo eļaptata kōn iakwe. Jeje ko rekwojarjar rej katakin, “Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo.”2
Rilo̧mo̧o̧r ro ad ekar katakin kōj kōn waanjon̄ak bwe jān iakwe aolep. Ekar barāinwōt katakin kōj n̄an iakwe Anij m iakwe ro jet āinwot n̄an kōj.
Elder John A. Widtsoe ekar kōmeļeļe:
“Eban lukkuun ļap ad jeļā im loe mejatoto in iakwe im meļeļe kake, ak ewōr mālijjon̄ ko n̄an ad māron̄ loi.
“Iakwe ej iien otemjej pukote m̧ool. … Riab im ko̧o̧t, ak jabdewōt bōd ilo kein erreo, ej kwaļo̧k ke ejjeļo̧k iakwe. Iakwe ejako ilo buļōn kōnono ko rej jab mool. … Kōn menin, …[leo] ej riab an iakwe, ak ej leļo̧k n̄an lio jadewōt riab ko kōn m̧ool eo, ejjab lukkuun iakwe lio.
“Kōlapļo̧k, iakwe ejjab kalel ak kōmetak ak kōjorrāān eo ej iakwe. … Nana ej ejjeļo̧k jān iakwe … āinwōt m̧ool ejjab jān jab mool.
“Iakwe ej em̧m̧an tiljek in m̧akūtkūt. Ej jipan̄ riiakwe eo an. N̄e elōn̄ aikuj, iakwe ej kōttōbrake. N̄e elōn̄ mōjņo̧, iakwe ej leļo̧k kajoor. … Iakwe eo ejjab jipan̄ ej riab ak iakwe eo eban to an pād.
“Em̧m̧an in mālijjon̄ kein, enej lapļo̧k em̧m̧an eo an. Iakwe em̧ool ej kaarmejete n̄an ro ej iakwe er. … En̄in ej mālijjon̄ eo aliktata. Kraist ekar letok e make, letok mour eo an, n̄an kōj, im n̄an kwaļo̧k m̧ool kōn iakwe eo an n̄an ro jein im jatin rej mour.”3
Jemed Ilan̄ ej karuwainene kōj, ajri ro nejin, n̄an letok im en̄taan kōn iakwe eo An. “Leļo̧k,” Kraist ekar ba, “im naaj lewōj e n̄an kom.”4 “Kom̧ ar bōk im ejej oņān, en āindein ami leļo̧k.”5
2. Kūrijṃōj ej iien jerbal in jipan̄.
Irooj im Rilo̧mo̧o̧r rekar jerbal n̄an armej, kotak ro rej būrom̧ōj, leļo̧k kōjatdikdik n̄an ro rej ebbweer, im loļo̧k ro rejābwābwe. Ekar leļo̧k loļo̧kjeņ n̄an ro ripilo, kōmour rinan̄inmej, im ro rekūrro bwe ren etetal, im kōjerkak ro remej.
Ilo iien Kūrijṃōj, ij ļōmņak kōn mijenede ro—elder, sister, mijenede ro rerūtto, im mijen būreejton ro ipeļaakin laļ in—ro, rej kam̧ool kōn Jisōs Kraist, leļo̧k iien ko aer ilo ejjeļo̧k wōņāān im jerbal n̄an aolep armej. Ij ļōmņak kōn aolep ro jeid im jatid ro rej bōk elōn̄ awa ko n̄an kōm̧m̧ani kūr ko aer ilo tōmak. Bārāinwōt ilo iien in, ij ļōmņak kōn em̧m̧aan im kōrā ro rej jerbal ilo jikin tariņae ko ad n̄an kōjparok kōj. Kom̧ em̧m̧ool kōn jerbal in jipan̄ eo ami.
Bōtaab mekarta jej jab jerbal n̄an Irooj ak ailōn̄ eo ad ilo jerbal in jipan̄ elikio, elōn̄ kain jerbal ko jemaron̄ kōm̧m̧ani im ejjeļo̧k jon̄aer. Naan im kōm̧m̧ane ko rejouj jemaron̄ joļo̧k eddodo im kam̧ōņōņō bōro ko. Jemed eo Ilan̄ ej karuwaineneik kōj n̄an leļo̧k jerbal in jipan̄. Im eļan̄n̄e jenaaj kōm̧m̧ane “Im kiin̄ eo enaaj uwaak im ba n̄an [kōj], Em̧ool Ij ba n̄an kom̧, ilo ami kōm̧anm̧an jabdewōt n̄an juon rein ro jatū ediktata, kom̧ ar kōm̧anm̧ane n̄an Eō.”6
3. Kūrijṃōj ej iien joļo̧k bōd
Joļo̧k an ro jet bōd ej boktok aenōm̧m̧an im lan̄lōn n̄an mour ko ad. Būreejtōn Heber J. Grant ekar katakin: “Ejjeļo̧k men en enaj boktok eļapļo̧k jen jetob eo an Anij … kwon jouj, lale, iakwe, en̄taan, im joļo̧k bōd. Ejjeļo̧k men en enaaj boktok lan̄lōn̄ n̄an kōj jān ad pojak im maron̄ joļo̧k bōd ko an ro riturir rej jum̧aeik kōj, im ejjeļo̧k men en emaron̄ boktok kōj n̄an etoon ijjelo̧kin eļan̄n̄e jenaaj kapen buruer im n̄an nana im karool nana kōn ļōm̧ņak ko ad n̄an ro im rej pād ipeļaakid.”7
N̄an bōk jeorļo̧k in jerawiwi ko ad, jej aikuj joļo̧k an ro jet bōd.
Joļo̧k an ro jet bōd ej kōtļo̧k bwe jen jelm̧ae ļōmņak in illu, nana, im jiāe. Im wōn iaad ekōņaan ļōmņak rōt kein ilo iien Kūrijṃōj. Joļo̧k bōd emaron̄ kōmour kinej in jetōb ko ad im boktok aenōm̧m̧an im iakwe eo im Anij wōt emaron̄e.
Jemed eo Ilan̄ ekōņaan bwe jen ukweļo̧k im joļo̧k an aolep bōd—barāinwōt kōj make. Āinwōt an Elder Jefffrey R. Holland ba: “Kōjekdo̧o̧n ewi jon̄an an rum̧wij am̧ ļōmņak, jekdo̧o̧n ewi lōn̄ in iien ko kwoj ļōmņak kwar likjab, jekdo̧o̧ņ ewi lōn̄ in bōd ko kwoj en̄jake kwar kōm̧m̧ani … , ak ettoļo̧kūm̧ in jān kapijuknen ak baam̧le eo am̧ ak Anij eo kwoj en̄jake eaar itok itak, Ij kam̧ool bwe kwojjan̄in itok itak eļapļo̧k jān iakwe eo ekwojarjar maron̄ tōpare. Ejjab pidodo n̄an kwe bwe kwon maron̄ wanlaļļo̧k jān ilaļ in meram in Pinmuur eo an Kraist ej rom̧aak.”8
Ro jeiu im jatu, ilo iien Kūrijṃōj in, jen leļo̧k menin leļo̧k ko rem̧m̧an. Jen leļo̧k ilo mōnōnō kein ikkure eo em̧m̧an tata ippād—ejjab men ko im emōj aer jorrāān. Im jen leļo̧k menin leļo̧k in iakwe, leļo̧k jerbal n̄an ro ipeļaakid, im m̧ool n̄an leļo̧k joļo̧k bōd. Bwe eļan̄n̄e jenaaj ukweļo̧k, E eo ej Rikwōjarjar Eo an Israel enaaj joļo̧k bōd ko ad Ij kam̧ool bwe E emour. E eo ej Kiin̄ ioon kiin̄ raņ, Irooj in Aenōm̧m̧an, ad Rilo̧mo̧o̧r, ad Ripinmuur, im Mottad. Ilo etan Jisōs Kraist, amen.