12CRAVEN-1

Debosyonal sa Pasko sa Unang Kapangulohan

Disyembre 6, 2020

 

 

Usa ka Pagputos ug Paghupay pinaagi sa usa ka Langitnong Paggakos 

Ni Sister Becky Craven 

Ikaduhang Magtatambag, Kinatibuk-ang Kapangulohan sa Young Women 

Usa sa akong paboritong mga panumduman sa Pasko nahitabo sa dihang sayis anyos pa ako. Bisperas kadto sa Pasko, ug natulog ko sa ibabaw nga bahin sa double deck nga higdaanan kauban sa akong manghod nga babaye sa among panimalay sa Berlin, sa Germany. Medyo naghinam-hinam ko nga moabot na ang kabuntagon sa Pasko—sobra ka mahinamon nga wala gayod siguro ako nakatulog og lawom, tungod kay naay higayon atol sa kagabhion nga gipukaw ko sa nagtilingtiling nga mga kampanilya. Dayon nadungog nako nga ang pultahan sa among lawak hinay-hinay nga miabli. Ug sa dihang ang kahayag sa pikas lawak miigo sa akong nawong, dali ko nga milingkod ug mitan-aw sa pultahan. Dili katuohan ang unsay akong nakita! Nagbarug sa pultahan si Santa Klaus. Wala ko magbinuang—siya kadto! Siya misulti og nagdahunog nga, “Ho, ho, ho,” ug dayon nangutana kon ganahan ba ko nga mosunod niya ngadto sa sala aron makita ang gipasiga nga Christmas tree. Nahingangha ko ug wala gayod makatingog, apan nagdali-dali ko og kanaog sa hagdanan sa akong higdaanan ug misunod niya ngadto sa atubangan nga lawak diin ang akong inahan ug magulang nga lalaki nagbarog duol sa kahoy. Apan sa akong pagtan-aw libot sa lawak, wala nako makit-i ang akong papa—ngano kaha nga wala man siya? Miingon si Mama nga gilabay niya ang basura sa gawas, apan grabe dugay kaayo siya! Hangtod karong adlawa gisayangan kaayo ko nga wala gayod siya mahatagi og higayon nga mahimamat si Santa Klaus. Nangutana si Santa kon nagbinuotan ba ko, ug malipayon kaayo ko nga mitaho nga nagbinuotan ko. Human masiguro nga nakatilaw siya sa mga biskwit ug gatas nga giandam namo alang niya, mibalik ko sa higdaanan, ug pipila ka oras human niana, mimata sa usa ka malipayon nga kabuntagon sa Pasko.

Ang lolo sa akong bana, si Heaton Lunt, adunay lahi kaayo nga kabuntagon sa Pasko isip batang lalaki nga nagpuyo sa mga kolonya sa Mexico sa ulahing bahin sa 1800. Iya kining giistorya sa iyang kasaysayan: “Ang Pasko miabot ug gibutang namo ang mga karnero sulod sa koral ilawom sa kamalig diin init-init kini, tungod kay aduna nay niyebe [snow] sa yuta. Mibangon ko og sayo gayod kaayo sa kabuntagon sa Pasko aron tan-awon kon maayo ra ba ang kahimtang sa akong mga karnero. Nakadungog ko og tingog sa karnero sa kwadra nga mora og gamay kaayo. Misulod ko ug nakita nga si Nelly adunay duha ka gagmayng nati nga karnero—kaluha. Midagan ko og balik sa balay nga paspas kaayo kutob sa akong mahimo … [ug] ako mipakpak sa akong mga kamot ug miingon sa akong mama, ‘Ako adunay pinakanindot nga Pasko kay ni bisan kinsa ninyo: Si Nelly adunay duha ka gagmayng nati nga karnero.’ Gibiyaan sa tanang bata ang ilang mga ukban ug mga butang diha ibabaw sa lamesa, ug midagan sila paingon sa kamalig aron motan-aw niadtong gagmayng nati nga mga karnero ni Nelly. Mao kadto ang labing talagsaon nga butang sukad nga among nadawat sa Pasko.”¹ Makapahingangha, sa misunod dayon nga tuig ug sa misunod pa nga mga tuig, bag-o nga mga nati nga karnero ang gipanganak sa karnero ni Heaton sa kabuntagon sa Pasko.

Sa dihang una pa nakong nadungog kini nga istorya, ang akong kasingkasing ug hunahuna nakahinumdom dayon sa lain nga Karnero nga natawo nianang labing una nga adlaw sa Pasko: si Jesukristo, ang Karnero sa Dios. Sama ni Heaton nga midagan aron tan-awon ang iyang bag-o nga mga nati nga karnero, akong gihunahuna ang mga magbalantay sa karnero nga nagdali aron motan-aw sa bag-ong natawo nga Anak sa Dios. Nakita ba ninyo sa inyong hunahuna kon unsa kaha ang ilang nasaksihan niana nga mapaubsanon ug balaang kahimtang? Akong nakita ang mahigugmaong si Jose nga nag-atiman sa iyang asawa, si Maria, samtang sila namalandong sa pagkatawo sa gisaad nga Mesiyas. Ang istorya ni Maria nga miputos sa iyang gamayng bata og mga lampin nakapatandog kaayo kanako.

Bag-ohay lang gihangop namo ang pag-abot sa bag-ong apo nga babaye sa among pamilya. Usa ka adlaw nagtan-aw ko samtang ang iyang inahan miputos niya sa usa ka humok, makapawala sa katugnaw nga bakbak nga habol ug migakos kaniya. Ang pagbakbak nagpasabot nga puston og hugot. Ang pagputos og mga lampin ug mga habol gigamit na sa tibuok kasaysayan aron sa paghupay ug bisan gani sa pagpakalma sa nagperwisyo nga masuso. Samtang nagtan-aw ko sa among umagad nga babaye nga nagbakbak sa iyang bag-ong anak, nakahunahuna ko sa uban nga tingali nanginahanglan og pagputos, bisan sa virtual lang nga paagi. Ang usa ka mabination nga pulong, maminaw nga dalunggan, o masinabtonon nga kasingkasing makapahupay sa nahasol nga kalag sa lain nga tawo.

Hapit tulo ka tuig na ang milabay, ang among umagad nga lalaki nakasinati og seryoso nga medikal nga krisis. Sa pagpangita og mga tubag, miagi siya og daghan nga mga pag-eksamin ug mga paghiling nga sa katapusan nagpakita nga nagkinahanglan siya og operasyon sa kasingkasing. Samtang ang among umagad gioperahan, ang among anak nga babaye nagpadala og mensahe sa iyang mga ugangan aron makahibalo sila sa kahimtang sa ilang anak. Gikan sa layo nga dapit sa laing nasod diin sila nagserbisyo og misyon, ang iyang ugangan nga babaye mitubag niining makapahupay nga mga pulong: “Nagpadala kanimo og langitnong mga paggakos.”

Pipila lang ka gutlo human niana, usa ka nars ang miagi apan mihunong dayon. Mitan-aw siya sa napuno sa luha nga mga mata sa among anak ug nangutana kon ganahan ba siya og habol, apan mibalibad siya, miingon nga OK ra siya. Mibiya ang nars apan mibalik dayon nga nagdala og init-init nga habol. Hugot kini nga gilibot niya og putos sa among anak og miingon niya, “Gibati nako nga mora og nagkinahanglan ka og langitnong paggakos.”

Ang Karnero sa Dios, nga nailhan usab isip ang Maayong Magbalantay, nakaila sa matag usa sa Iyang panon. Sa atong mga higayon sa panginahanglan, Siya kanunay nga magpadala og kalibotanong mga anghel, sama sa manggiloloy-on nga nars ngadto sa among anak, sa pagputos ug paggakos kanato diha sa mga bukton sa Iyang gugma.² Siya mianhi sa kalibotan aron sa pagdala og kalinaw ug panagdait sa tanang katawhan.³ Siya mohupay niadto nga nagkinahanglan sa paghupay ug magbangutan uban niadto nga nagbangutan.⁴

Samtang akong gihunahuna ang daghang pamaagi nga ang Ginoo nahigugma ug nagpakabana sa matag usa kanato, gibati nako ang tinguha nga mohimo pa og dugang aron sa pagpaambit niana nga gugma ngadto sa uban. Nanghinaot usab ako nga mas mailhan pa ang langitnong mga paggakos ug mga pagputos nga akong nadawat apan hinay nga nailhan.

Sa kalibotan nga nanginahanglan kaayo og kalinaw, ang atong malumo nga mga pulong, ang atong mga buhat sa kalooy ug kamabination mahimong ang pamaagi sa pagputos sa lain nga tawo diha sa usa ka init-init, makapawala sa katugnaw nga habol. Akong nasabtan nga kon mas molihok kita sa mga pag-aghat nga moserbisyo sa uban, mas daghan nga langitnong mga habol ang ihatag sa Ginoo kanato aron ipaambit. Unsa nga mga pag-aghat ang inyong nadawat? Kinsa ang inyong nailhan nga nanginahanglan og langitnong paggakos? Ang atong personal o virtual nga paghikap makahimo sa tanan nga kalainan diha sa kinabuhi sa usa ka minahal o bisan gani sa usa ka estranghero.

Ako nag-ampo nga samtang kita magsaulog sa pagkatawo sa atong Manluluwas nga dili lamang nato mabati ang Iyang gugma, kalooy, ug kalinaw apan ato nga ipaambit kana nga mga panalangin ngadto sa uban. Samtang namalandong ko sa gasa sa Karnero sa Dios, ang bata nga giputos ug gipahigda sa pasungan, akong balikon ang mga pulong sa batang si Heaton. Siya mao “ang labing talagsaon nga butang nga among nadawat [o madawat pa] sa Pasko.”⁵

Sa ngalan ni Jesukristo, amen.