O Meaalofa Paia

Saunia e Peresitene Russell M. Nelson

6 Tesema, 2020

O’u uso e ma tuafafine pele, o se afiafi matagofie lenei. Ua siitia o tatou agaga e ala i musika ma savali matagofie. Ua faaootia e Sister Craven o tatou loto i ona manatu e uiga i opo faalelagi ma palanikeke o le mafanafana. Ua faagaeetia i tatou e Elder Nielson ina ua ia toe faamatala le soifuaga o lona tama, o lona tiute faamiliteli na le maua ai le Kerisimasi mo le tolu tausaga sosoo. Ua musuia i tatou e Elder Holland a o ia aoao mai e uiga i le soifuaga o le Faaola o le lalolagi.

E mafai ona ou faaaogaina lenei avanoa e faafetai atu ai mo lo outou tali mai i la’u valaaulia talu ai nei e faalilofia ala o faasalalauga faaagafesootai i faailoaga o le loto faafetai mo le tele o o tatou faamanuiaga. E faitau miliona na tali mai. Ma ou te faafetai faapitoa ona o loo outou faaauau pea ona tatalo i aso uma i lo tatou Tama Faalelagi, e faafetai ia te Ia mo Lana taitaiga, puipuiga, musumusuga, ma le sili o mea uma, mo le meaalofa o Lona Alo Pele, o Iesu Keriso.

E aumaia e le Kerisimasi ni manatuaga matagofie. I le tausaga talu ai, sa ma maua ai ma Wendy le avanoa e faamanatu ai le vaitau ma se teineitiiti laitiiti aulelei, o Claire Crosby, o lē sa peseina se pese Kerisimasi faapelepele. Se’i ou faasoaina atu se vaega o le matou ata na pu’eina na faia mo le ta’imuaga o le “Faamalamalama le Lalolagi”.¹

E moni lava, o lena po faamanuiaina i le silia ma le lua afe tausaga talu ai, sa avea o se po na faapaiaina i le soifua mai o le Toatasi na muai faauuina e aumaia le filemu i lenei lalolagi ma ia musuia le finagalo alofa i tagata.² Na soifua mai Iesu Keriso ina ia manuia ai tagata uma, o le tuanai, taimi nei, ma le lumanai.

E tusa lava pe tatou te usuina le “Po Filemu,” ua tatou iloa lava o le soifuaga o lena Pepe o Peteleema sa le’i amataina iina, pe sa faai’uina foi i Kalevaria. I le muai olaga, sa faauuina ai Iesu e Lona Tama ia avea ma Mesia, o le Keriso, le Faaola ma le Togiola o tagata ola uma. Sa muai faauuina o Ia e togiola mo i tatou. “Na manu’a o Ia mo o a tatou solitulafono ma momomo ona o a tatou amio leaga.”³ Na afio mai o Ia ina ia faia le tino ola pea o se mea moni ma le ola e faavavau o se avanoa mo tagata uma e soifua mai.⁴

O lona uiga o i tatou uma o le a toetutu—e aofia ai i latou e pele ia te outou o ē ua maliliu i lenei tausaga faigata, ma ua soifua nei i le isi itu o le veli. O lona uiga e mafai e i tatou uma ona faaauau pea ona alualu i luma. O lona uiga e mafai ona tatou faamoemoe mo mea sili atu e oo mai.

Pe na e mafaufau ea pe aisea na filifili ai le Alii e soifua mai i le nofoaga na Ia soifua mai ai? Sa mafai lava ona Ia soifua mai i soo se nofoaga i le lalolagi. Ae sa Ia filifilia le laueleele tonu na Ia faapaiaina.

Na soifua mai Iesu i Peteleema. O lena upu i le faaEperu, bet lehem, o lona uiga “fale o le areto.” E maeu le talafeagai faapea o Ia, o le “areto o le ola,”⁵ o le a afio mai le “fale o le areto.”

O Lona soifua mai na tupu i ni tulaga maualalo faatasi ma manu. O iina sa soifua mai ai le “Tamai Mamoe a le Atua”⁶ i le vaitau o le Paseka faatasi ma manu ua saunia mo le taulaga o le Paseka. Ma i se tasi aso, o Ia o le a avea ma “tamai mamoe ua ta’ita’iina ia fasia.”⁷ O Ia o Le Tamai Mamoe ma Le Leoleo Mamoe.

I le soifua mai o Ia o lē ua ta’ua o le “leoleo mamoe lelei,”⁸ o leoleo mamoe na muamua maua le faasilasilaga o Lona soifua mai ma le paia.⁹

I le soifua mai o Ia ua ta’ua o le “fetu ao pupula,”¹⁰ na faaali mai ai se fetu fou i le lagi.¹¹

I le soifua mai o Ia o lē ua ta’ua o Ia Lava o le “malamalama o le lalolagi,”¹² na aveesea ai le pogisa i le lalolagi atoa o se faailoga o Lona soifua mai ma le paia.¹³

Na papatisoina Iesu i le vai sili ona maualalo i le lalolagi, ua fai ma faatusa i le loloto o le a Ia afio ai ina ia faaolaina i tatou, ma o le a Ia afio a’e i mea uma—ina ia toe faaolaina i tatou.¹⁴ Mai i Lana faataitaiga, na Ia aoao mai, e mafai foi e i tatou ona tula’i a’e mai le loloto o o tatou luitau faaletagata lava ia—o tatou faanoanoaga, vaivaiga, ma popolega, ina ia ausia tumutumuga o lo tatou lava gafatia mamalu ma le taunnuuga paia. O nei mea uma ua mafai ona o Lona alofa mutimutivale ma le alofa tunoa.

I le lotolotoi o le vao matūtū ma le pefua o se toafa, sa aoao atu ai e le Faaola ni lesona e na o i latou e iloaina le galala i le fia inu e mafai ona talisapaiaina atoatoa.

I le fafine i le vaieli, na aoao atu Iesu:

“A o se inu i lenei vai e toe fia inu foi:

“A o se inu i le vai ou te avatu ia te ia, e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna, e puna i luga i le ola e faavavau.”¹⁵

O lenei mau ua faamanatu mai ia te a’u se aafiaga alofa na ma maua ma Elder Mark E. Petersen.¹⁶ O le taimi lena sa avea o ia ma se sui o le Korama a Aposetolo e Toasefululua, ma a o le’i valaauina a’u i lena korama, sa ou maua ai le avanoa e faafeao ai o ia i le Nuu Paia, i le mea na faamaonia ai o lana malaga mulimuli lea i le olaga faaletino.

Sa matua tigaina lava Elder Petersen i le kanesa. I se po umi ma le tiga mo ia, sa ou taumafai i le mea sili e faamafanafana o ia. Sa ou vaaia na mafai ona ia tausami ma inu sina vaega itiiti tele lava. O le aso na sosoo ai na faatulaga ai na te tuuina atu se lauga taua tele.

Na oo mai le taeao. Ma le lototoa, na alu atu ai Elder Petersen i le matafaga i matu o le Sami o Kalilaia, lea sa faatalitali ai se faapotopotoga toatele ia te ia. Na ia filifili e aoao atu mai le Lauga a le Faaola i luga o le Mauga. Ina ua ta’ua e Elder Petersen le fuaitau, “Amuia ē fia aai ma fia inu i le amiotonu,”¹⁷ na maligi ona loimata. Na ia tuuese ana faamatalaga tusitusia, ea mai i luga, ma fesili atu, “Pe tou te iloaina moni ea pe faape’i le fia aai ma le fia inu?” Sa ou iloa na ia iloaina moni lava. Ona ia aoao atu lea, “Afai e mafai moni ona e fia ai ma fia inu i le amiotonu, ona mafai lea ona e avea atili e faapei o Keriso.” O Elder Petersen sa o se faataitaiga ola o lena mea. E le’i umi, ae ia faauu loa mai lenei olaga faaletino.¹⁸

Soo se taimi lava ou te mafaufau ai i le fia ai ma le fia inu i le amiotonu, ou te mafaufau lava i lenei Aposetolo tuuto faaaloalogia i se tasi o ana lauga mulimuli i le aoao atu o le uiga moni o le saili i le Alii o Iesu Keriso, ina ia fia ai ma fia inu i le amiotonu, ina ia avea atili e faapei o Ia.

I lenei tausaga, ua ma vave amata ai ma Sister Nelson i le galulue i a ma galuega o le Kerisimasi o le alofa mo lo ma aiga. I le amataga o Novema, na faasilasila ai e Wendy ua ma saunia mo le Kerisimasi. O la’u tali vave lava o le, “Ia, lelei! Ua mafai Nei ona ta taulai atu i le Faaola.”

I le aluga o lenei tausaga tulaga ese, ina ua toetoe o tagata uma i le lalolagi nu mafatia i aafiaga o se faama’i oti i le lalolagi atoa, e leai se isi mea sili ona taua e mafai ona tatou faia i lenei Kerisimasi nai lo le tāmau o lo tatou taulaiga i le Faaola ma i le meaalofa o le uiga moni o Lona soifuaga ia i tatou uma.

“Ua faapea lava ona alofa mai [lo tatou Tama Faalelagi alofa] … i le lalolagi, ua ia aumai lona Atalii e toatasi, ina ia le fano se tasi e faatuatua ia te ia, ae ia maua le ola e faavavau”¹⁹

Ona folafola mai lea e le Alo o le Atua ia i tatou e faapea “o tagata ola uma o e faatuatua mai ia te au, e le oti lava e oo i le faavavau.” ²⁰ E maeu nei meaalofa e lēmafaamatalaina, ma lēmafaatusalia mai le Tama ma le Alo!

Ou te faafetai i le Atua mo le meaalofa o Lona Alo Pele. Ma ou te faafetai i lo tatou Alii o Iesu Keriso mo Lana taulaga ma le misiona le maafaatusalia. I Lona muai afio mai, sa toetoe lava a afio mai faalilolilo Iesu. Ae i Lona Afio Mai Faalua, o le mamalu o le Alii “[e] faaali mai … e vaaia lava e tagata uma faatasi.”²¹ Ona Ia “pule [lea] o le Tupu o tupu ma nofotupu foi o le Alii o alii.”²²

O lenei, i le avea ai ma se auauna faatagaina a le Faaola, ou te fia talosagaina se faamanuaga i luga o outou taitoatasi, o’u uso ma tuafafine pele. Tau ina ia faamanuiaina outou ma outou aiga i le filemu, faatasi ma se gafatia faateleina e faalogo ai i le siufofoga o le Alii, ma maua faaaliga faatasi ma se gafatia faaleleia e lagona ai le tele o le alofa o lo tatou Tama ma Lona Alo mo outou, popole mo outou, ma ua sauni e taitai tagata uma o e saili atu ia i La’ua. Ou te tuufaatasi a’u upu ma upu a Moronae ma “apoapoai atu ia te outou ia outou saili lenei Iesu o le ua tusi i ai le au perofeta ma aposetolo, ina ia i ai ma tumau ia te outou e faavavau le alofa tunoa o le Atua le Tamā, ma le Alii o Iesu Keriso, ma le Agaga Paia, … ia i ai ma tumau ia te outou e faavavau.”²³ Ou te tatalo ai, i le suafa o Iesu Keriso, amene.