E M̧ōṇōṇō ro Ri Kōllaajrak

Bar juon alen, em̧ōj an Būreejtōnji eo Kein Kajuon eo ejitōnbōro ipped kūr kōj n̄an kuktok ippān doon ilo ad jinoe keememe Kūrijm̧ōj. Ilo iminene ko ad im m̧anit ko ad oktak jān doon ilo aolep laļ ko—kabun̄jar n̄ane āinwōt juon ad Rilo̧mo̧o̧r Jisōs Kraist im keememe raan in ļotak eo An ruo epepen emootļo̧k.

Juon iaan iminene ko ilo m̧weo im̧ōn Bassett, āinļo̧k wōt ko ami rellōn̄, ej n̄an tieta kōn bwebwenato in ļotak eo. N̄an kōm, riiti bwebwenato ko ilo Aiseia, Luk, Matu, Nipai, im Mormon, kobaļo̧k ippān al in jar in Kūrijm̧ōj ko im tieta ilo amim arin Meri, Josep, im nin̄nin̄ Jisōs, ekar kōketak im kaim̧we ilo jetōb—bōtaab ejjab aolep iien.

N̄an waanjon̄ak, juon joteen raan eo m̧okta jān Kūrijm̧ōj, sip nin̄nin̄ ko reddik rekar oktak n̄an ainikien nin̄nin̄ ko rej jan̄. Aer jan̄ ekar m̧ōkaj an ajedeedļo̧k n̄an ippān rilale sip ro im enjeļ ro im em̧ool barāinwōt nin̄nin̄ eo em̧ōj kūtmi kōn nuknuk. Iiō eo tok juon, ekar ejjeļo̧k amim kurup. Ejjeļo̧k ekar kōņaan bōk eddo eo an juon sip kōn aer mijak menin, ak, sip ko rekar unin an wōr n̄iļaļļaļ ekaamijak im kōm̧m̧an joreen. Juon iiō oktak, jokoņ ko an rilale sip ro rekar erom̧ jāje ko rej ebbōl, im iiō eo tok juon ejjeļo̧k ekar kōņaan bōk jikin Rimāletlet eo ak juon enjeļ, rekar akweļap n̄an ekkōņak nuknuk in dinosaur im dolphin jān Halloween. Bōlen men eo epen meļo̧kļo̧k e ilo tieta eo amim ej tōre eo ajri eo ej kab ļōtak ekar wōtlo̧k jān menjer eo an eutiej, wōtlo̧k laļļo̧k n̄an ijo ilaļ tūrin kijeek eo, ak kar bauri jejjo wōt injej ko ilōn̄ in laļ. Ij bōk nōbar kōn aō kar likkuun jillo̧k im bauri, men̄e wōtlo̧k eo ekar barāinwōt aō bōd.

Bon̄ emmōn? Aenōm̧m̧an? Tieta ko am kōn ļotak eo em̧m̧anļo̧k n̄e jenaaj ņa etan “Kowaron̄ron̄ eo ilo Menjer eo.” Ij aikuj kile bwe ilo an epaaktok Kūrijm̧ōj, emakijkij aō ļōmņak eļan̄n̄e jej aikuj kōm̧m̧ane juon iminene in Kūrijm̧ōj me ej ilo m̧ool letok aenōm̧m̧an?

Aenōm̧m̧an—men eo em̧m̧an im eļap kōjatdikdik me kōj aolep jekōņaan, ejjab ilo iien Kūrijm̧ōj in wōt ak iien otemjej. Ilo aolepān laļ in rainin, ijoke, jej loe bwe aenōm̧m̧an ej ļapļo̧k an pen n̄an loe. Ilo aō ekkatak jān Katak im Bujen Ko ilo iiō in, kar kakeememej eō kōn juon revelesōn ej kōmeļeļeik raan kein ad:

“Im ilo raan eo … aolepān laļ enaaj limotak, im būruōn armej raņ renaaj likjab.”¹

Ilo limotak eo an laļ in raan kein, ia eo naaj loe aenōm̧m̧an in laļ in ej kōņaan?

Būreejtōn Russell M. Nelson ekar kwaļo̧k:

“Gospel eo an Jisōs Kraist ej ta eo ejejjet im ej menin aikuj ilo laļ in me eobrak kōn tarpok, jum̧ae im epoktak.

“Kajjojo ajri ro nejin Anij ejim̧we bwe en wōr aer iien em̧m̧an n̄an ron̄jake im bōk kōmour eo, ennaan in lo̧mo̧o̧r eo an Jisōs Kraist. Ejjeļo̧k bar juon ennaan eļapļo̧k an aorōk n̄an m̧ōņōņō eo ad—kiiō im n̄an indeeo. ”²

Enaan eo an Jepļaaktok eo ej enaan eo an Kūrijm̧ōj. Meram eo an iju eo me ekar tōlļo̧k rilale sip ro n̄an nin̄nin̄ eo ilo menjer ej ettōr wōt ippān jurōn meram eo me ekar jidik jidik jurōk ioon Josep—rej jim̧ōr kwaļo̧k enaan ko rem̧m̧an kōn lan̄lōn̄ eļap kōjjeļļā kōn Kraist n̄an laļ in.

Ennaan eo an Aiseia n̄an laļ in epok ej wōnm̧aanļo̧k wōt, “Bwe n̄an kōj juon ajri e ļotak, n̄an kōj juon ļaddik em̧ōj letok: im kien enaaj pād ioon aeran: im etan naaj ān̄inn̄in E, Riwōj, Ripepe Em̧m̧an, Anij Ekajoor Bōtata, Jemān Indeeo, Irooj in Aenōm̧m̧an.”³

Elder Quentin L. Cook ekar katakin, “Juon iaan taitōļ ko rem̧m̧an an Irooj im Rilo̧mo̧o̧r, Jisōs Kraist, ej ‘Irooj in Aenōm̧m̧an’ [Aiseia 9:6]. … Aelōn̄ in Anij enaj ejak im bareinwōt aenōm̧m̧an im iakwe.”⁴

Ilo ad riiti naan ko iiō in loi ilo Luk, ij kōjatdikdik kwonaaj ļōmņak kōn naan ko ke rej ba, “elōñ iaan ro ri lañ, im rej nōbar Anij,” ke rekr ba, “Aiboojoj ñan Anij ilo utiejtata, im aenōṃṃan ioon laḷ ippān armej raṇ E buñbūruon kōn er.”⁵ Em̧ōj aō kejokļo̧kijeņ kōn naan kein im ļōmņak bwe emaron̄ jim̧we n̄an ad ļōmņak kōn menin āinwōt juon kōjelļā bwe “ioon laļ ej Aenōm̧m̧an.” “Aenōm̧m̧an emōj an itok!” rekar bōlen ba ilo lan̄lōn̄. Bwe, em̧ool, ilo bon̄in eo ilo jikin eo etta, likkuun “Irooj in Aenōm̧m̧an” ekar itok n̄an laļ in.

Ilo raan eo m̧oktata in Kūrijm̧ōj kar enjeļ ro rekar kwaļo̧k aenōm̧m̧an eo me ekar itok. M̧okta jān er Jekab ekar ba, “kōm kar jeļā kōn Kraist, im eaar wōr am kōjatdikdik kōn aiboojoj eo An elōn̄ bukwi iiō ko m̧okta jān itok eo An; im ejjab kōm wōt eaar wōr am kōjatdikdik kōn aiboojoj eo An, a barāinwōt aolep rikanaan ro rekwōjarjar ro kar m̧okta jān kōm.”⁶

Bar juon alen, Aiseia ekar kanaan, kiiō kōn raan kein ad, ilo an kar je, “Re nan̄in wūlio ilo toḷ ko neen eo [ak er] ej bōktok naan eṃṃan, ej kwaḷọk aenōṃṃan, ej kōnnaantok kōn eṃṃan.”⁷

Kōn menin, wōn armej rein reaiboojoj rej kwaļo̧k aenōm̧m̧an? Rilo̧mo̧o̧r e kwaļo̧k n̄an rijilōk ro An jim̧ōr ilo Galilee im ene eo Bountiful bwe “E ṃōṇōṇō ro ri kōllaajrak, bwe naaj ṇa etaer ro nejin Anij.”⁸

Ilo kakkobaba, Kiin̄ Benjamin ekar katakin, “Im kiiō, kōnke bujen eo kom̧ ar kōm̧m̧ane naaj ān̄inn̄in kom̧ ro nejin Kraist, m̧aan ro nejin, im kōrā ro nejin; bwe lo, rainin Eaar keotak kom̧ ilo jetōb; bwe kom̧ij ba bwe būruōmi raar oktak kōn tōmak ilo Etan; kōn menin, kom̧ij ļotak ilo E im kar erom m̧aan ro im kōrā ro nejin.”⁹

Kwe im n̄an jej arji in bujen ro nejin Jisōs Kraist, kajjojo ej Nejin. Keememej, E ekar kwaļo̧k bwe rikōm̧m̧an aenōm̧m̧an ro rej ņae etāer ajri ro nejin Anij. Kōn menin, jej—ajri ro nejin Anij—jej aikuj rikōm̧m̧an aenōm̧m̧an. En̄in ej bujen eddo eo ad. Kwe im n̄a jej kōm̧m̧an oktak ilo laļ in epok rainin ilo ad kajjieon̄ rikōm̧m̧an aenōm̧m̧an—ilo m̧ōko m̧ōd, jikin jar ko, bukwōn ko, bar ipeļaaikn laļ in, jān ad jouj, kōm̧m̧an ko ad rem̧m̧an, naan ko ad—ilo ad ioon doon ilo mejatoto barāinwōt. Jen tiljek ilo “kwaḷọk aenōṃṃan” ilo ad kam̧ool kōn E, ilo naan im kōm̧m̧an.

Bar juon alen jān Luk jej riit:

“Im ke enjeḷ ro re mootḷọk jān er n̄an lan̄, rilale sip ro rej kōnono ñan doon im ba, “Kiiō jen ilọk n̄an Betleem im lo men in ej waḷọk, eo Irooj ear kwaḷọk n̄an kōj.

“Im rej jarōbtok im lo Meri, im Josep, im nin̄nin̄ eo ej babu ilo menjer.

“Im ke eṃōj aer loe, rej kabuñbuñḷọk naan eo ear waḷọk ñan er kōn nin̄nin̄ eo”¹⁰

Ejjeļo̧k oktak, “kiiō jen ilo̧k” im “kabuñbuñḷọk naan eo ear” enaan eo kōn aenōm̧m̧an “kōn nin̄nin̄ eo.” Ennaan eo in mijenede ro rej katakin ro jej iakwe er im ro m̧ōttad; en̄in ej enaan eo emour me service mijenede ro rej kwaļo̧k ilo aer jerbal āinwōt an nej kar Rilo̧mo̧o̧r eo kōm̧m̧ane. Ennaan eo in jej kwāļo̧k ilo ad iakwe, kwaļo̧k, im karuwaineneik ro ipeļaakid n̄an bōk kōjatdikdik im aenōm̧m̧an in loe ilo enaan eo em̧m̧an kōn Jisōs Kraist.

Kiiō bar walikļo̧k n̄an tieta eo an Bassett kōn ļōtak eo me ej kōm̧m̧an ilo pokjaļjaļ aolep Kūrijm̧ōj—etke kōm ļakkaj kōm̧m̧ane iminene in, rojan̄ ajri ro nejūmim im ajri ro jibūmim n̄an tieta n̄an kōm kōn bon̄in eo aeboojoj iaan aolep bon̄, ke enjeļ ro rekar itok kōn enaan ko rem̧m̧an kōn lan̄lōn̄ eļap?

Uwaak eo epidodo im ekam̧ōņōņō: “Im jej kōnono kōn Kraist, jej m̧ōņōņō ilo Kraist, jej kwaļo̧k kōn Kraist, jej kanaan kōn Kraist, im jej jeje ekkar n̄an kanaan ko ad, bwe ro nejid ren maron̄ jeļā n̄an ia rej maron̄ reilo̧k n̄an jeorļo̧k jero̧wiwi ko aer.”¹¹

Aaet, jej loe bwe aolepān laļ in ej ped ilo limotak im būruōn armej rej likjab. Ijo wōt ke, jekdoon māllijon̄ kein, ilo jelm̧ae jum̧ae, im ilo limotak, jen kate kōj ilo ad kōm̧m̧an aenōm̧m̧an, ilo iien in im aolep iien, ilo ad kōpooj kōj make im aolep ro ipeļaakid n̄an iien jepļaaktok eo eļap an Irooj in Aenōm̧m̧an eo, em̧ool Irooj, Rilo̧mo̧o̧r, im Ripinmuur, Jisōs Kraist. Āliji naan ko an Būreejtōn Nelon, “Kajjojo ajri ro nejin Anij ejim̧we bwe en wōr aer iien em̧m̧an n̄an ron̄jake im bōk kōmour eo, ennaan in lo̧mo̧o̧r eo an Jisōs Kraist.”

Bōlen kōj ro rikōm̧m̧an aenōm̧m̧an ilo ad kemeeme ļōtak, mour, im mijen eo an Rilo̧mo̧o̧r eo ad ilo Kūrijim̧ōj in im aolep iien ej aō jar ilo etan Jisōs Krait, amen.