Jitōbōn Kūrijm̧ōj

Ro jeiū im jatū rejitōn bōro, ij kam̧m̧oolol bwe imaron̄ pād ippāmi ilo nokon in Kūrijm̧ōj in ej kōm̧m̧an aolepān laļ in. Al im naan ko raiboojoj kar un̄ūr būruōd. Raar bōktok jitbōn Kūrijm̧ōj eo em̧ool, lan̄lōn̄ eo me ej itok ilo kabun̄jar im iakwe Irooj Jisōs Kraist. Jej juon wōt bōro ilo iakwe eo im wujlepļo̧k eo ad n̄an E.

En̄jake in kabun̄jar eo ej eddōkļo̧k kajjojo iien ij riiti jeje ko rekwojarjar me rejipan̄ eō jeļā wōn kar E im wōn E. Jān aō riit im jar, iaar maron̄ jeļā bwe Jisōs ej Jeova, eo, ium̧win tōl eo an Jemedwōj Ilan̄, ekar Rikōm̧anm̧an eo an aolep men ko. Paul ekar kōmeļeļeik menin ilo wāween in:

“Anij, ke ilo elōn̄ wāween im elōn̄ katen An kōnono n̄an ro jim̧m̧ad ilo iien ko re m̧ootļo̧k kōn ro ri kanaan,

“Ilo jem̧ļo̧kōn raan kein Ear kōnono n̄an kōj kōn Nejin, eo Ear likūt E ri jolōt an men ko otemjej, im kōn Eo barāinwōt E kar kōm̧anm̧an laļ ko;

“Eo ej jatōltōl an aibojooj eo An, im āinwōt E ilo aolep wāween, im E ej dāpij men otemjej kōn An in naan e kajoor, ke em̧ōj An karreoļo̧k jero̧wiwi ko, Ear jijet i lan̄ i anmooņon̄ Anij ļapļap;

“Im āinwōt Ear jolōt juon etan em̧m̧an jān enjeļ raņ, āindein Ear utiejļo̧k jān er.

“Bwe Ear ba n̄an wōn iaan enjeļ ro ilo jabdewōt iien, Kwe nejū, rainin Iar keotak Eok? Im bar juon alen, N̄a Inaaj Jemān, im Enaaj Nejū?

“Im ke Ej bar kadeļo̧n̄ m̧aanjien ilo laļ, Ej ba, Im enjeļ raņ otemjej an Anij ren kabun̄ n̄an E.”¹

Ilo ļotak eo an Jisōs ilo Bethlehem enjeļ ro raar al im āinwōt kar kanaan kake, juon iju kāāl ekar waļo̧k n̄an kōmeram lan̄, n̄an kautiej deļo̧n̄tok eo an Nejin Anij n̄an mour in.

An aiboojoj eutiej jān eo ad, im aaet lo iien ko rej kūtibuuj ļotak eo An ilo mour in raar bōk jān kōj juon en̄jake kōn An epaake kōj. Ekar kāālet n̄an itok n̄an laļ jān tūroon eo An ilo tuanbwijmaron̄ pein Jemān n̄an bōk ioon E mour in wabanban. E ekar kōm̧m̧ane menin kōn iakwe eo n̄an aolep ļaddik im leddik nejin Jemen eo enaaj kar ļotak tok n̄an laļ in. E ekar kōm̧m̧an menin kōn iakwe n̄an kwe—im n̄an n̄a.

E emaron̄ kar ļotaktok ilo jabdewōt jekjek. Aaet Jisōs ekar ļotak ilo jekjek ko rettā ilo juon bukwōn edik. Rilale sip ro raar karuwaineneik tok E. Jejjo Em̧m̧aan Rimālōtlōt ro kar tōl kōn im̧we n̄an kabun̄jar n̄an E. Ritōl eo ilo kien ekar kakien bwe ren m̧an E. Kar aikuj in bōk E n̄an juon laļ n̄an kōjparok mour eo An. Ke juon enjeļ ekar jiron̄ ro Jinen im Jemed ilo mour in bwe E emaron̄ bar jepļaak n̄an laļ eo An, raar bōk E n̄an Nazareth. E ekar joļo̧k enan̄in 30 iiō ko ijo, ilo an rittoļo̧k im jerbal āinwōt juon rikam̧tō, m̧okta jān an jino kwaļo̧k im jerbal n̄an ro otemjej.

Kwomaron̄ in ļōm̧ņak , barāinwōt n̄a, etke emenin kar aikuj bwe Eo Nejin Anij Emake Wōt kar jilkintok ilo juon mijen rōt in. Keememej ekōjkan An kar kōmeļeļeik An ilo ettā bōk kūr eo An:

“Bwe Iar itok jān lan̄, jab bwe In kōm̧anm̧an ankil aō, a ankilaan eo ear jilkintok Eō.

“Im men in ankilaan Jema, ear jilkintok Eō, bwe iaan ro otemjej Ear letok n̄an Eō ejjeļo̧k juon en jako, a Inaaj kajerkakpeje e ilo raan eo āliktata.

“Im men in ankilaan Eo ear jilkintok Eō, bwe er otemjej rej lo Nejin, im lōke E, ren bōk mour indeeo, im Inaaj kajerkak e ilo raan eo āliktata.”²

Jisōs ekar kwaļo̧k An iakwe im ettā. Kōjekdo̧o̧n jikin eo An ekajoor im kabwilōn̄lōn̄ ippān Jemen, Jisōs ekar kāālet rikaļoor ro An ilo laļ in jet em̧m̧aan ro rejjab oktak, ekoba rieon̄ad ro, juon ritōltōl ewwōj, im juon rizealot.

Ekar kwaļo̧k naan im iiaio ippān rilepa ro, ro rinan̄inmej, ro ejako pāleer, im ro kajejtokjān er. E ekar iakwe im bōk ijo ro ettā tata ilubwilijier, em̧ool ilo An kōjekdo̧o̧n An itok jān jikin ko ilo lan̄. E ekar jerbal n̄an er, iakwe er, im ļōn̄aj er.

Iakwe jouj eo An ekabwilōn̄lōn̄ im kabōjrak jāne ekar ļapļo̧k jekdo̧o̧n ilo jem̧lo̧k in mijen eo An ioon laļ in. E ekar jelm̧ae jum̧ae im matōrtōr ko im Ekar jeļā raar m̧ōttan mijen eo kar kūr E n̄an e im aikuj in kar bōke. Ekar n̄an en̄taan kōn jerawiwi ko im m̧ōjņo̧ ko an aolep ro rej itok n̄an mour in.

Kwoj keememej naan ko an Jekab ke ekar katakin kōn Pinmuur eo an Jisōs Kraist:

“O ewi jon̄an ekwōjarjar eo an ad Anij! Bwe E jeļā men otemjeļo̧k, im ejjeļo̧k juon men Ej jab jeļā kake e.

“Im E ej itok ilo laļ in bwe en maron̄ lo̧mo̧o̧ren aolep armej n̄e renaaj eo̧ron̄ kōn metak ko an aolep armej, aaet, metak ko an aolep mennin mour, em̧maan, kōrā, im ajri, ro rej jān nokwe eo an Adam.

“Im Eaar en̄taan kōn menin bwe jerkakpeje en maron̄ bun̄leplep ioon aolep armej, bwe aolep ren maron̄ jutak im̧aan ilo raan eo eļap raan in ekajet.”³

Nin̄nin̄ eo ilo jikin m̧ōn̄ā eo an kidu ilo Bethlehem ekar Eo Nejin Anij, kar jilkintok jān Jemān n̄an erom ad Rilo̧mo̧o̧r. E ekar Make Wōt Nejin Jemen Jitōnbōro ilo kanniōk. E ej Waanjon̄ak eo ad.

N̄an bōk jitōbōn Kūrijm̧ōj, jej aikuj kajjieon̄ n̄an iakwe āinwōt An kar iakwe. Naan ko An n̄an kwe im n̄a rej “Koṃwin yokwe doon, āinwōt Iar yokwe koṃ”⁴

Kwomaron̄ en̄jake jitōbōn Kūrijm̧ōj eo, āinwōt aō kar, ilo naan kein. Ikar en̄jake meram eo im lo̧udin̄din̄ eo me ej itok jān kareel eo an Jetōb Kwojarjar eo jabdewōt iien ij keememej im kejōkļo̧kjeņ kake ilo waanjon̄ak eo an Rilo̧mo̧o̧r eo an laļ in.

N̄an n̄a, bōlen kakeememej eo em̧m̧an tata ekar bwe Irooj ej jutak pojak n̄an jipan̄ kōj jekdo̧o̧n ta eo ej waļo̧k n̄an kōj. Āinwōt an Mormon kar katakin:

“Anij ejeļā men otemjeļo̧k, kōnke E ej jān indeeo n̄an indeeo, lo, Eaar jilkinļo̧k enjeļ ro n̄an jipan̄ ro nejin armej, n̄an kwaļo̧k ilo alikkar itok eo an Kraist; im ilo Kraist men otemjej em̧m̧an ej aikuj itok.

“Im Anij eaar barāinwōt kwaļo̧k n̄an rikanaan ro, jān lo̧n̄iin make, bwe Kraist en kar itok.

“Im lo, ekar wōr elōn̄ wāween ko im Eaar kwaļo̧k men kein n̄an ro nejin armej, ko rekar em̧m̧an; im men otemjeļo̧k ko rem̧m̧an rej itok jān Kraist; ijjeļo̧kun in armej raar wōtļo̧k im ejjeļo̧k men em̧m̧an ekar itok n̄an er.

“Kōn menin, jān jipan̄ an enjeļ raņ, im jān naan otemjeļo̧k eaar diwōjļo̧k jān lo̧n̄iin Anij, armej raar jino kwaļo̧k tōmak ilo Kraist; im āindein jān tōmak, raar ekkejel pen ioon men otemjej em̧m̧an; im āindein eaar m̧ae itok eo an Kraist.

“Im ālikin An kar itok armej raar barāinwōt lo lo̧mo̧o̧r jān tōmak ilo Etan; im jān tōmak, rej erom m̧aan ro [im kōrā ro] nejin Anij. Im ejja lukkuun āinwōt Kraist ej mour Eaar kōnono naan kein n̄an ro jemād, im ba: Jabdewōt men kom̧ naaj kajjitōk ippān Jema ilo Eta, eo ej em̧m̧an, ilo tōmak, im lōke bwe kom̧ naaj bōk, lo, enaaj waļo̧k n̄an kom̧.”⁵

Ilo tōreen iien in, elōn̄ iaami ej jar kōn kajoorļok eo n̄an kijenmej ilo mālijjon̄ ko me rej idajon̄jon̄e kom̧ n̄an ta eo emaron̄ in āinwōt n̄an kom̧ eļap jān am̧i maron̄e. Ij kam̧ool bwe Rilo̧mo̧o̧r eo im Jemān rekar ron̄ akweļap ko ami kajjitōk kōn deeor im kōn ta eo em̧m̧an n̄an kom̧ im ro kom̧ij iakwe im jerbal n̄an er.

Uwaak ko renaaj itok āinwōt aer kar ilo̧k n̄an Rikanaan Josep Smith. Kwonaaj kile jar eo an Josep n̄an jipan̄ āinwōt eo am̧i make. Im kwonaaj en̄jake iakwe eo an Irooj n̄an Josep im n̄an kom̧ ilo uwaan eo An ekaenōm̧m̧an n̄an jar eo an Josep. Josep ekar jar:

“O Anij, kwo pād ia? Im ia eo em̧ nuknuk eo ej kalbubu jikin tilekek eo Am?

“Ewi toun naaj an Peim tōt wōt, im M̧ājam̧, aaet māj ko Mejam̧ rerreo, lo jān lan̄ ko ejjeļo̧k jem̧ļo̧kier bōd ko ņae armej ro Am̧ im ko ņae ro karejeram̧, im an ikkūr ko aer deili Lo̧jiln̄ūm̧?”⁶

Im Irooj ekar uwaak āinwōt E emaron̄ n̄an kwe im n̄an n̄a:

“Aenōm̧m̧an en n̄an am; mennin jum̧ae kein am im en̄taan kein am renaaj n̄an jidik wōt iien;

“Innām, eļan̄n̄e kwo naaj kijejetoiki em̧m̧an, Anij enaaj kotak eok ijo eutiej; kwo naaj anjo̧ ioon aolep rijum̧ae ro am.

“Ro jeram̧ rej jutak ippam̧, im renaaj nebar eok bar juon alen kōn bōro ko remāāņāņ im pā ko relem̧ōņōņō.”⁷

Ijeļā kōn n̄a make bwe kallim̧ur ko rej m̧ool im alikkar n̄an kwe, n̄an n̄a, im n̄an ro jej iakwe er. Irooj ekar en̄jake metak ko ad. E ekar kanooj kāālet kōn iakwe n̄an kōj. E ejeļā ekōjkan n̄an jipan̄ kōj en̄jake aenōm̧m̧an ilo kapan̄pan̄, jekdo̧o̧n ilo an wōnm̧aanļo̧k wōt iadjon̄jon̄. E enaaj jilkintok ro m̧ōttam̧ āinwōt enjeļ ro n̄an jutak iturum̧ “kōn bōro māņeņ im pein jemjerā.” Būruōd make renaaj oktak n̄an em̧m̧anļo̧k ilo ad kijenmej ilo idajon̄jon̄ ko ad make kōn tōmak ilo E.⁸ Im kōn oktak jab in, kōj make jenaaj erom jet ro m̧ōttan Irooj emaron̄ jilkinļo̧k āinwōt enjeļ ro n̄an ro jet.

Ainwōt An rikam̧ool, ij kam̧ool bwe nin̄nin̄ eo ekar ļotak ilo Bethlehem ej Jisōs Kraist, jitōnbōro Nejin Anij. Ij kallim̧ur bwe ilo am̧ kajjitōk ippān Jemedwōj Ilan̄ kōn tōmak ilo etan Jisōs Kraist, Jetōb eo enaaj bōktok en̄jake in aenōm̧m̧an ko n̄an kom̧ im n̄an ro kom̧ij iakwe er.

Ij kwaļo̧k aō iakwe n̄an kom̧ kōn kōjatdikik eo aō bwe en maron̄ wōr juon tōre in iien Kūrijm̧ōj elan̄lōn̄ tata—iiō in im aolep iien. Ilo āt eo ekwojarjar etan Jisōs Kraist, amen.