Menin Letok eo Eļaptata ilo Kūrijm̧ōj

“Im ke enjeļ ro re mootļo̧k jān er n̄an lan̄, seperd ro rej kōnono n̄an doon im ba, Kiiō jen ilọk n̄an Betleem im lo men in ej waḷọk, eo Irooj ear kwaḷọk n̄an kōj.

“Im rej jarōbtok im lo Meri, im Josep, im nin̄nin̄ eo ej babu ilo menjer.”¹

Eoon kein rem̧m̧an jān jeje ko rekwojarjar ilo Kallim̧ur Ekāāl kar je jān Luk n̄an kalur kōļmenļo̧kjeņ ko ad kōn pijain iien ļotak eo ekwojarjar an Jisōs Kraist me rainin jej keememe ilo aolepen laļin.

Ilo aelōn̄ in Portugal ijo jikūm, ej juon imminene n̄an kajutak m̧akūtkūt in jān jeje ko rekwojarjar ilo aer kajutak Nativity scene eo, ej juon imminene eaorōk. Kwonaaj lo aolep nativity ko ilo aolepen Portugal en ilo jikin ko ilo jijen in Kūrijm̧ōj in—ej juon imminene me ej bar waļo̧k ilo elōn̄ m̧ōko. Kajutak Nativity scene ekkā an bōk kijejeto ko n̄an aiintok moss, hay, dōkā ko, im menin kaenōknōk ko n̄an kajutak Nativity eo.

Imminene ilo Kūrijm̧ōj in n̄an kajutak Nativity scene ekar juon m̧akūtkūt ekalimomo jen ke kōm̧ kar dik im jodikdik innem ippān ro jinōm̧ im jem̧ōm̧ im tokālik ippān ajri ro nejum. Kajutak Nativity scene ko ekar juon iaan m̧akūtkūt ko rem̧m̧an ippa ilo jijen in iiō in.

Kōm kar kōjparok juon bo̧o̧k in aolep menin kainōknōk ko reddik n̄an kajutak Nativity scene eo im men ko ipeļaakin. Ekkā, jidikin ijo jikim kar kwaļo̧ke ilo jin̄n̄ā ak pija kainōknōk. Aolep iiō, aolep Kūrijm̧ōj, jidikin men ko rekāāl kar kobaiki ļo̧k ippān men ko rej aiini ak collection. Ewōr kainōknōk ko kōn bukwōn eo, m̧ōko, rikallib ro im menin mour ko, kōto im dān ko, im menin kainōknōk ko jet ilōn̄ im laļ, wōjke ko, im meļaaj ko. Mōttan kūlaaj ko kar kōjerbali n̄an reba ko im ļōe ko. Jet iien, būriij ko rej waļo̧k. Im, aaet, ilo io̧lepen aolep kainōknōk ko raorōk, āinwōt an kōmeļeļe ilo jeje ko rekwojarjar: jet sip im “ilo āne eo ewor seperd rej pād ilo jikin wūjooj, im lale bwijin sip ko aer ilo boñ”;² koṃwin jab lōḷñọñ, im ro raar kwaļo̧k kōn ļotak eo an Rilo̧mo̧o̧r, rej bōktok “naan ko rem̧m̧an, naan in lan̄lōn̄ eļap … n̄an armej otemjeļo̧k”;³ annan̄in pijain Meri im Josep kar likūti itōrerein menjer eo.⁴ Innām ekar wōr juon iju, eo me jeje ko rekwojarjar ej ba ekar leļo̧k m̧ōņōņō eļap n̄an rimāletlet ro im kar tōl er ilo iaļ eo aer ļo̧k n̄an ippān Jisōs.⁵

Ej an aolep baam̧le ko pepe n̄an kajutak Nativity scene ko. Ilo jet iaan raan ko ak emaron̄ wiik ko, jidik kōn jidik, kar kajutaki im kar kobain aolep m̧ōttan ko ilo jikier.

Ilo aolepen jijen in, jej kautiej Nativity scene ko im keememe iien ko me kar kōmeļeļeiki bwebwenato ko ilo Matu im Luk me ekōm̧m̧an bwe kemeem in en lukkuun ļap meļeļein. Bwebwenato ko kar kwaļo̧ki kōn tōmak eo an Meri im Josep kōn iaļ eo aer me raar “wanlōn̄ļo̧k jān Galili, jikin kweilo̧k Nazeret, n̄an Judia, n̄an jikin kweilo̧k Devid, ņa etan Betleem”⁶; im kōn aer apan̄ n̄an lo juon jikin n̄an pād ijeņ.

Ak āliktata, raan in Kūrijm̧ōj ejejjet, im nin̄nin̄ Jisōs ej babu ilo menjer, im bwebwenato eo eaar oktak n̄an aorōk eo an Jisōs Kraist ilo mour ko ad im ta eo Ekar kōm̧m̧ane n̄an kōj⁷ im bwe E ej menin letok eo eļaptata iaan aolep menin letok.

Al in ej kwaļo̧k en̄jake eo an jetōb in n̄an keememej:

“O Ajri Nejin Meri Ej Onaake!

O Ajri ekwojarjar im em̧m̧an!

Babu ilo menjer

Ilo raan eo kein kajuon ekwojarjar ilo Kūrijm̧ōj!

Kōjatdikdik an aolep iiō im aolep kain armej

Im Mejam̧ eaiboojoj!

O Ajri eaiboojoj eobrak laļ!

O Ajri edik ļotak ilo ettā!

Seperd ro, kar tōl jān ettoļo̧k,

Jutak nōbar ium̧win iju ko,

Im rimāletlet ro raar bukwelōlō

Im wujtake Etam̧!

O Ajri eo enjeļ ro rej al!

O Ajri edik, nin̄nin̄ Kiin̄ eo ad!

Juon bōkā n̄an kōmour aolep būrom̧ōj ko

Kōn alikkar, ilo mej ko!

O menin letok an kanniōk em̧m̧an

N̄an anjo̧ik kōj ilo Lan̄!”⁸

Rilo̧mo̧o̧r Make eaar kam̧ool kōn menin letok eo An n̄an kōj: “Men kein Iar kōnono n̄an koṃ, bwe ilo N̄a koṃwin aenōṃṃan. Ilo laḷ koṃij en̄taan, a koṃwin ṃōṇōṇō; Ña Iar bōk anjọ ioon laḷ.”⁹

“Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo.”¹⁰

Ej juon menin letok ejenoļo̧k, ej juon menin letok eo eaiboojoj.

“Jijen in Kūrijm̧ōj ej juon iien n̄an kōļmenļo̧kijeņ im kōjerbal kōjeraam̧m̧an ko im iien ko rem̧m̧an reped ipped kōn ļotak, mour, Pinmuur, im Jerkakpeje eo an ad Rilo̧mo̧o̧r, Jisōs Kraist.”¹¹

Ij ļōmņak kōn kōjeraam̧m̧an eo n̄an lo aenōm̧m̧an im kōjatdikdik em̧ool ilo en̄taan im apan̄ ko;¹² kōjeraam̧m̧an in tōl eo ekwojarjar ilo tōre in jim̧or anjo̧ im ebweer;¹³ kōjeraam̧m̧an eo eļap tokjen im kōttōpar, jeļā im tōmak bwe elōn̄ļo̧k ālkin mour in;¹⁴ kōjeraam̧m̧an kōn kam̧m̧oolol men̄e edik ad tōpar aikuj ko ad; kōjeraam̧m̧an eo n̄an aenōm̧m̧an n̄e jej ajimakeke;¹⁵ im kōjeraam̧m̧an eo n̄an maron̄ leļo̧k men̄e ejabwe ippād.

Errein jet iaan kōjeraam̧m̧an ko reļļap jej būki kōn wōt Jisōs Kraist! Aaet, kōn wōt nin̄nin̄ Jisōs ij lukkuun kōttar n̄an likūt ilo menjer ilo raan in Kūrijm̧ōj ilo Nativity scene eo am! E, eo ej ad menin letok eļap, kar letok n̄an kōj kōjeraam̧m̧an ko rem̧m̧an kōn wōt mour eo An, waanjon̄ak, katak ko im en̄taan.

Innām ij kajjitōk: Jej ke aikuj, ilo oktan, kōjerbal kōjeraam̧m̧an kein n̄an ineek eddo ko an ro jet, jipan̄ im rōjan̄ er n̄an ekkeijel ippān jetōb eo an jijen in ekwojarjar im n̄an keememej naan eo em̧m̧an kar kwaļo̧ke n̄an seperd ro ilo Kūrijm̧ōj eo jinoin?

Kraist emaron̄ ukōt Kūrijm̧ōj eo ad eļapļo̧k jān rōbin ko in jouj im iakwe im kūtmi kam̧ōņōņō ko ad kōn iakwe em̧ool, eo ej “iakwe eo erreo an Kraist [me] ej kijejeto indeeo.”¹⁶ “Men̄e en̄jake ko ad rej itok im etal, An iakwe n̄an kōj ejamin jako.”¹⁷ An iakwe ej wōnm̧aanļo̧k ilo aolepen iiō im ilo aolepen mour ko ad.

Bar mije Kraist ilo iien Kūrijm̧ōj in enaaj letok n̄an kōj eļapļo̧k jon̄an aorōkin iakwe eo An ilo mour ko ad im juon kajoor eļap n̄an iakwe im jerbal n̄an ro jet ipeļaakid.

N̄e jej kōjparok jetōbin Kūrijm̧ōj, jej kōjparok jetōbin Kraist. Jen kōm̧m̧an ilo jijen in n̄an mije wōt Jisōs Kraist, eo ej Meram in Laļ, im jen kōtļo̧k ad make meram n̄an rome jijen in n̄an kwaļo̧k ad iakwe n̄an ro jet, ad tūriam̧o, im ad jerbal in jipan̄.

Kōnke Eaar itok, ewōr tokjen ad mour. Kōnke Eaar itok, ewōr kōjatdikdik. E ej Rilo̧mo̧o̧r eo an laļ, im E ej ad menin letok eo eļap, kōn menin, ij kwaļo̧k aō kam̧ool. Ilo etan Jisōs Kraist, amen.