N̄an eo Ewānōk, Kūrijm̧ōj ej Meļeļe in Aolep Men Renaaj Em̧m̧an

Ij kam̧m̧oolol Būreejtōn Nelson im Būreejtōnji eo Kein Kajuon kōn iien in n̄an kōnono joteen in. Baam̧le eo am ekar keememe imminene ko an Kūrijm̧ōj ilo laļ eo am make im ilo France, Germany, im Brazil. Jekdo̧o̧n ia eo jej jokwe ie, n̄an kōjwōj aolep ro jej tōmak im ļoor Jisōs Kraist, juon m̧ool aiboojoj ejjab oktak: jej m̧ōņōņō bwe E eo kar ņaetan jān jinoin, E eo kar kōtmene ium̧win bukwi iiō ko, E eo ekar Nejin Wōt Jitōnbōro an Jemān, E ekar itok—ioļap in iien, ilo jekjek ko rettā tata—E ekar itok. Im kōnke E ekar itok, bilien ro raar mour ioon laļ in renaaj bar mour im maron̄, eļan̄n̄e rej kāālet, jolōt mour indeeo, eo eļap tata iaan aolep mennin letok ko an Anij.

Ilo bwebwenato eo aiboojoj kōn ļotak eo An ilo iien Kūrijm̧ōj, elōn̄ katak ko jemaron̄ ekkatak.

En̄in ej juon katak ikōņaan kwaļo̧ke ippāmi joteen in: Kōn aolep inepata im jab jeļā kake, apan̄ ko im poktak ko me rej ļoor kōj ilo mour in, n̄an ro rōwānōk—ro rej tōmak im lōke Irooj—ilo jem̧ļo̧kin, aolep men renaaj em̧m̧an.

Ļōmņak kōn waanjon̄ak kein raiboojoj.

Juon kōrā ewānōk kar etan Elisabet im ļeo pāleen, Zakeraias, kiiō rebwijwōļā, raar būrom̧ōj bwe rejan̄in kar jeraam̧m̧an kōn ajri ro. Aaet raar tiljek im kar lōke Irooj.

Men̄e jeje ko rekwojarjar rejjab rekoote ta eo Zakeraias im Elisabet maron̄ kar en̄jake im ba n̄an doon, al ko ilo pija eo Savior of the World ej jipan̄ kōj kejekļo̧kjeņ kōn ta eo emaron̄ in kar pād ilo buruōer. Zakeraias ekar ba n̄an Elisabet: “Jejjan̄in kar kāālet n̄an an wōr nejid. Bōtaab jej lōke wōt Irooj.” Innām erro ej al: “Inaaj wujlepļo̧k n̄an Anij indeeo, bōtaab ejjab n̄an kōm̧m̧an ankilaō. … Eļan̄n̄e ejjab maron̄ in, leļo̧k n̄an E indeeo ej meļeļe in inaaj kattar im mije im lale. … Inaaj … kōtļo̧k bwe E en tōl eō ļo̧k … m̧ae awa ko aō, m̧ae raan ko aō, m̧ae iiō ko aō rej jako.”¹

Innām juon menin bwilōn̄ ekar waļok. Jeje ko rekwojarjar ej rekoote bwe ilo tampeļ eo, enjeļ Gebriel eaar waļo̧klo̧k n̄an Zakeraias. Juon enjeļ ekar ba: “Elisabet enaaj kemour nejin m̧aan n̄an kwe, im kwō naaj likūt etan Jon. … Im enaaj … bwe en kōppojak n̄an Irooj armej ro.”²

Zakeraias ekar ba, “N̄a ļōļļap, im lio pāleō lelļap.”³

Gebrial ekar uwaak, “kwaar jab tōmak naan ko aō,” “kwō naaj kejakļo̧kjeņ im jab maron̄ in kōnono, m̧ae raan eo men kein renaaj … waļo̧k.”⁴

Ļōmņak kōn en̄jake ko me renaaj kar waļo̧k n̄an Elisabet im Zakeraias. Ium̧win iiō ko raar jar bwe ren neji, ak ejjan̄in kar waļo̧k. Raar wōnm̧aanļo̧k wōt ilo kōjparok kien ko im lōke Irooj. Innām, juon enjeļ eaar waļo̧klo̧k n̄an Zakreraias, ak ālkin, ekar jab maron̄ kōnono. Emaron̄ in kar ļōmņak kōn jekjek eo an im̧aan Irooj. Ak ilo tōre eo ejejjet, nin̄nin̄ eo ekar ļotak. Zakeraias ekar bar jino kōnono. Im nin̄nin̄ eo ekar erom̧ rikanaan Jon, eo ekar kōpooj iaļ eo n̄an Rilo̧mo̧o̧r. Kōn aolep men ko jab jeļā kake im pen, n̄an wānōk, ilo jem̧ļo̧kin, aolep men renaaj em̧m̧an.

Eo tok juon, ilo bwebwenato in Kūrijm̧ōj, jej lo Meri jitōnbōro, eo kar kāālete bwe en erom̧ jinen Eo Nejin Anij. Im aaet ewōr n̄ūrbōktak im jab jeļā kake ilo mour eo an. Gebriel ekar waļo̧klo̧k n̄an Meri, jiron̄ e kōn kūr eo an eutiej. Meri ekar ba, “Enaaj kōjkan men in, bwe I jab jeļā m̧aan?”⁵ Gebrial ekar kōmeļeļeiki bwe kajoor eo an Jetōb Kwojarjar enaaj itok ioom̧, im bwe kajoor An eo Eutiejtata enaaj kar kalbubuik eok, im liin enaaj kar keotak Nejin Anij, im Etan enaaj kar Jisōs.

Ļōmņak kōn ta lan̄lōn̄ im m̧ōņōņō eo liin ekar en̄jake ke kar loļo̧k jān juon enjeļ in Anij. Ewi jon̄an ettā eo ke liin ekar kōļmenļo̧kjeņ kōn an erom̧ jinen Messaia eo eto kōttare. Im aaet, kar ba n̄an Josep, menin ekar jab m̧ōkaj n̄an ņa mejļan. Josep ekar juon em̧m̧aan ejim̧we im ekar jab kōņaan bōktok kajookok ioon Meri, ak ekar jab jeļā kōn iaļ eo ejim̧we n̄an ļoore. Ilo inepata im jab jeļā eo an, juon enjeļ ekar itok n̄an e ilo juon ettōņak: “Josep, … kwōn jab mijak in bōk pāleem̧ Meri, bwe an bōro̧ro kōn Jetōb Kwojarjar. Im enaaj keotak nejin m̧aan, im kwō naaj likūt etan Jisōs: bwe E naaj lo̧mo̧o̧ren ro doon jān jero̧wiwi ko aer.”⁶

Ilo m̧ool jemaron̄ meļeļe an Meri kar inepata im jab jeļā, kejekļo̧kjeņ elmen an kōjeraam̧m̧an in ekabwilōn̄lōn̄ naaj kar waļo̧k. Josep, barāinwōt, ekar inepata im ļon̄tak. Aaet kiiō ekar alikkar bwe raar jim̧or bōk iaļ in. Ewi jon̄an an Meri kar m̧ōņōņō in jeļā bwe enjeļ eo ekar waļo̧k n̄an Josep. Ewi jon̄an an Josep kar m̧ōņōņō n̄an jeļā ke menin ekar ankilaan Anij. Kōn jab jeļā kake im pen, n̄an eo ewānōk, ilo jem̧ļo̧kin, aolep men renaaj em̧m̧an.

Ak ilo ad jeļā, ekar wōr wōt apan̄ im̧aan, enaaj aolep iien wōr. Ke ekar epaak an Meri keotak, Rirom̧ ro raar kajjitōk bwe Josep en bar jepļaakļo̧k n̄an jikin kweilo̧k Betleem. Meri im Josep kar jōk ilo er bwe renaaj kar ilo̧k ippān doonļo̧k. Jej aolep iakwe bwebwenato in Kūrijm̧ōj eaibojooj. Tōkākļo̧k ilo Betleem, ekar ejjeļo̧k ruum̧ ilo m̧ōn ruwamejet. Ta eo ekar kainepataik Josep jon̄an ne ekar en̄jake. Ekōjkan an maron̄? Etke Meri aikuj in, kar kāālet ilōn̄ in aolep kōrā ro, keotak Nejin eo Eutiejtata ilo juon jikin m̧ōn̄ā an mennin mour? Ļotak eo en kar ke ejjeļo̧k jorrāān ak kapan̄pan̄ ko n̄ane?

En kar ke lukkuun kabwilōn̄lōn̄, ak jab em̧m̧an. Ak nin̄nin̄ eo ekar ļotak; E ekar ājmour. Āinwōt an al in Kūrijm̧ōj eo em̧m̧an kwaļo̧k, “Ettoļo̧k ilo juon jikin m̧ōn̄ā an menin mour, ejjeļo̧k jikin an babu, nin̄nin̄ Irooj Jisōs ekar babu ie.”⁷

M̧okta jān an jem̧ļo̧k bon̄ōn eo, juon enjeļ eaar waļo̧kļo̧k n̄an seperd ro ilo meļaaj eo n̄an bōktok naan ko rem̧m̧an kōn lan̄lōn̄ eļap. Im enjeļ ro raar al, “Aiboojoj n̄an Anij ilo uteijtata, im aenōm̧m̧an ioon laļ, ippān armej raņ.”⁸

Im seperd ro rej etal n̄an Betleem ijo raar lo nin̄nin̄ Jisōs. Im ke rej lo Kraist nin̄nin̄ eo, Josep im Meri raar en̄jake aenōm̧m̧an im jokne ke raar jeļā jibadbad eo ilo men eo epen me ekar jepooļ er. Enjeļ ro raar kwaļo̧k kōn itok eo An im mijen eo An eutiej. Ālkin apan̄ eo im jab jeļā eo, n̄an eo ewānōk, ilo jem̧ļo̧kin, aolep men renaaj em̧m̧an.

Ilo laļ eo ekāāl, inepata ko, jab jeļā, im n̄ūrbōktak ko raar bar waļo̧k n̄an ro rōwānōk. Rikanaan Samuel ekar kanaan bwe ļotak eo an Rilo̧mo̧o̧r naaj ļalem iiō ko ilo jekļaj im bwe enaaj wōr juon kakōļļe kōn aolepān bon̄on eo ilo an jab marok. Ke raan eo ekar epaaktok, eo kar jab tōmak kake ekar pād ilo karōk. “Eaar [wōr] juon raan ejenolo̧k jān ro rejjab tōmak, [ro raar kwaļo̧k bwe em̧ōj an m̧ootļo̧k iien eo,] bwe aolep ro raar tōmak [bwe Rilo̧mo̧o̧r eo enaaj itok] kar leļo̧k er n̄an mej ijello̧kun wōt kakkōļļe eo en kar jejjet kūtien.”⁹ Ro rejjab tōmak raar kajjirere kōn ritōmak ro, “ami lan̄lōn̄ im ami tōmak kōn menin raar waan.”¹⁰ Ļōmņak kōn inepata im n̄ūrbōktak an eo ewānōk. Jeje ko rekwojarjar rej ba bwe Nipai “eaar badikdik laļļo̧k ioon laļ, im kanooj kūr n̄an an Anij ilo etan armej ro an.”¹¹ Im ke Nipai ekar jar, “ainikien Irooj eaar itok n̄an e, im ba: Kwōn kotak bōram̧ im kwōn m̧ōņōņō; bwe lo, iien eo em̧oottok, im ilo bon̄ōn in kakōļļe eo naaj lewōj, im ilo raan eo ilju Ij itok ilo laļ in.”¹²

Jeje ko rekwojarjar ej kean̄, “Naan ko raar itok n̄an Nipai raar kakūrm̧ool, … bwe lo, ilo kar tulo̧kļo̧k in aļ eaar ejjeļo̧k marok. … [Im] aolep armej … raar wōtļo̧k n̄an laļ. … [Im] ālikin men kein eaar ejjeļo̧k marok ilo aolepān bon̄ōn eo, a eaar meram āinwōt n̄e eaar ilo lukwolpān raan. … Im raar jeļā bwe ekar raan eo Irooj ekar ļotak.”¹³

Kōn aolep men ko reppen im jab jeļā kaki, n̄an eo ewānōk—n̄an ro rej lōke ilo Anij—ilo jem̧ļo̧kin, men̄e ilo mour in ak n̄e jej bukwelōlō ilo Neen, aolep men renaaj em̧m̧an.¹⁴

Lōmņak kōn iien ļotak eo ekwojarjar an Rilo̧mo̧o̧r, etke Irooj ekar kōttar m̧ae bon̄ōn eo āliktata n̄an jiron̄ Nipai ke E enaaj ļotak ilju? E emaron̄ in kar jiron̄ e wiik ko ak allōn̄ m̧oktaļo̧k. Etke E ekar kōtļo̧k an Elisabet im Zakeraia lōļļap im ļeļļap bwe en ejjeļo̧k nejierro m̧okta jān an alikkar ke rikanaan Jon enaaj ļotak nejier? Im etke Meri ekar aikuj ļōmņak kōn kāālet ko im men enaaj kar kōm̧m̧ani im Josep ej kajjitōkin eddo eo an ilo bwebwento in aorōk jān aolep bwebwenato? Etke jerbal eo an juon menger im seperd ro im enjeļ ro kar jab jeļā kake m̧ae m̧akūtkūt ko rekar bōk jikier?

Ilo laļ eo m̧okta, Irooj eaar ba: Jenaaj idajon̄jon̄ er n̄an lale n̄e renaaj kōm̧m̧ane aolep men ko aer Anij ekar kean̄ er n̄an kōm̧m̧ane.”¹⁵ Im jān Jabōn Kōnnaan Ko: “Kwōn lōke Irooj kōn aolepān būruom̧, im kwōn jab atartar ioon jeļāļo̧kjeņ eo am̧. Kwōn kwaļo̧k E ilo iaļ ko am̧ otemjeļo̧k, innām Enaaj ba kajjien iaļ ko am̧.”¹⁶

Ilo iien ko ad make me jejjab jeļā kaki, ilo raan in inepata im jab jeļā ko ad, ilo apan̄ ko ad, jen tiljek. Jisōs ekar itok ilo bon̄ōn ekwojarjar. E ej Rilo̧mo̧o̧r eo an laļ, Ripepe Em̧m̧an, Kiin̄ in kiin̄ ro. E ej mour, im “kōjatdikdik ko im mijak ko an aolepān iiō ko rej kūrm̧ool ilo [E] jo̧teen in.”¹⁷ Ij kam̧ool bwe ilo ad wānōk, aolep ad dān in kōmjaaḷaḷ in būrom̧ōj ko, apan̄, im jab jeļā kake naaj ņa mejļaer im kajim̧we ilo E, Nejin Anij jitōnbōro. “Lan̄lōn̄ n̄an laļ, Irooj ej itok.”¹⁸ Ilo etan Jisōs Kraist, amen.